Kintaŋ 23
23
Balaam tiísí ntum Nyùy fo kàŋ wo mbìy
1Balaam yiì lò, e sùúy e Balak jii, «Bóm kíy cùu fen saàmbà, e fò e mò, e nèn tàʼ anàʼ vee vilum saàmbà, wùn à viyáʼ vi saàmbà, e wìy sho, e fò e mò.» 2Balak ku nèn yiì mo Balaam suuyin. Wùn wun nèn a lì nàʼ e mòʼón wùn à kiyáʼ ki, a yiì cu sho e kiy mòʼón, e kù yiì bèy, kíy woo saàmbà e dzə̀m.
3Balaam lò, e sùúy e Balak jii, «Tiím e wò ghaa cù ye tonèné, é m du, e yèn ó ji vèr Nyùy Tàr sà‑áà tárnín á? Kinyo ke wù dìnèn e mò, bo dzə̀ kíwun ke m yíi suúy e wò.» Wù suúy bey, e nèn ŋàʼáy, e kòʼ é ntoò gwan. 4Nyùy wìy fo, wùn wun tárnín. Balaam suúy shó jii, «M bòm ne kíy se cù saàmbà, e yiì cu sho sidzə̀m mo sí dzə̀kìn, e yiì e nàʼ woo lumèn wùn à e kiyáʼ ki mo kíy se cù si dzə̀kìn.»
5 Nyùy Tàr nèn yòŋ kinyo e Balaam ke wù kfə́n, e sùúy e Balak. 6Balaam kfə́n, e yèn, a Balak kù tíy e wun ghaa cù ye tonèné wùn aàtǎr saʼ veé Moavi adzə̀m. 7Balaam nèn lò, a tiisí ntum rə, a suúy jii:
«Lì Balak woo fon woó Moav mo fó Aram, e wìy sho,
wù lì fo agwan veé mbìv yee fo shùy yii tó,#23.7: agwan veé mbìv yee fo shùy yii tó: Á shu ji kirə́ʼ kin ki dzə̀ á woŋ woo Siiria, kìn Mesopotamia.
e yòŋ jii, wìyi, e shòv Jakov, e fò e mò,
ku mèŋ Isray méŋén.
8A dzə̀ m shòv wír ve Nyùy yoʼ shòv é le?
A dzə̀ m mèŋ wír ve Nyùy yoʼ mèŋ é le?
9M dzə́ e kitu ke virùmèn, yén áwune,
dzə́ aàgwan, leey áwune.
M yén wíri, aá dzə́ kév áwune áwune,
wíri, aá bár vitú vév jeéy fo vitúm vímóʼ ví.
10A dzə̀ tàŋ la màŋgòŋ woó rám Jakov?
A dzə̀ tàŋ la kintóʼ kimòʼón fo vee vikweè vee Jakov kfəə?
Màʼtì, é m kpú kpú a dzə̀ yé anjiì vinyò vee tìítiy,
e yiì, é kimaysì kém keé kitu ke nsay ki wáa dzə moo kév.»
11Balak lò, e sùúy e Balaam jii, «À yiì kee ben e mò a dzə̀ ka? Mò‑oo li wò ji à wiy, e shòv aŋgaà vém vibàn, yii bèy, la à yòʼ yiì kifá. À ló, e səə̀vì áwune sə́əvin.»
12Balaam bínér jii, «Bo dzə̀ ji lá m yòʼ sùúy kinyo, a dzə̀ ke Nyùy yòŋèn e mò a?»
Balaam tiísí ntum Nyùy ye yì meen ji baà
13Balak kfən lò, e sùúy e Balaam jii, «Wìy, é wòsò du é kirə̀ʼ kímóʼ kí fo à yíi tiím, e yen áwune ashàr, áà ku shòv vee shooy, e fò e mò.» 14Wù suúy bey, e nèn lì Balaam, e dù sho e kwaʼ woó Tsofim, e kòʼ shó e kitu ke Gwan Pisga, e bòm kíy cù saàmbà, e nèn a lì nàʼ woo lumèn e mòʼón wùn à kiyáʼ ki kimòʼón, a yiì cu sho e kiy cù e mòʼón mòʼón.
15Balaam lò, e sùúy e Balak jii, «Tiím fen e wò ghaa cù ye tonèné, é m líysín, é vèr Nyùy Tàr tárnín fésə.»
16 Nyùy Tàr nèn wìy, wùn Balaam tárnín, wù wáy kinyo kfə́ e Balaam shuù, e yòŋ sho jii, «Kfə́n, e yèn Balak, e tiìsí kinyo kìn ki shó.» 17Balaam kfə́n, e yèn a Balak kù tíy e wun ghaa cù ye tonèné wùn aàtǎr saʼ veé Moavi. Balak nèn dzə̀r ji Nyùy Tàr sà yòŋ ji ka á? 18Balaam nèn lò, a tiisí ntum rə, a suúy jii:
«Balak, ŋáʼáy, e yuùrí.
Wan Tsippor, yuúrí kinyo ke m suuy e wò ki.
19Nyùy yòʼ dzə̀ wir msòŋ, e bó a boʼtí kimboʼtì.
Wù yòʼ dzə̀ wan wìr msòŋ, e bó a kuvsín kwaʼtì rə́.
Wù‑uù yiì ne sùúy kinyo, e làa yòʼ wìy yiì a?
Wù‑uù yiì ne kàʼ kinyo, e làa yòʼ wiy yiì kíwun a?
20Leéy, e yèn, wù sùúy ne ji m səəvi.
Wù səə̀vì ne, a bó yòʼ dzə̀ m kùvsín.
21Bó wù yoʼ dìn lòn wúmóʼó e Jakov dzə̀ʼə̀m,
a bó wù yoʼ dìn ŋgeʼ símóʼ sí e Isray mvəm.
Nyùy Tàr woo Nyùy wov dzə̀ wùn áwune,
aá kù ndzə́ʼ wun ji fon wov.
22Nyùy fə̀ə́r ne áwune fó wòŋ Ejiv,
a màʼ rə́r sév e vitaáví vé nyar vi.
23Fú wóo màʼ ji á ton Jakovi yòʼ dzə̀,
kinyo kee shwéŋ ji á maʼ Isray ki yòʼ dzə̀.
Á yíi a yòŋ kùm Jakov wùn Isray jii,
Á yén á kiŋgaʼnìn ke kinyò ke Nyùy yiìn kí.
24Yén búʼú, kitúm kee Isray ki ŋáʼay moo yeè bvərə̀ʼ,
naarì vikoy moo lúm bvərə̀ʼ.
Bó yòʼ dzə̀ wù yù fóo meèmè, a bó wù koó kintàn kfə́,
e kètí, e màysì mensə́, e nò.»
25Balak lò, e sùúy e Balaam jii, «A dzə̀ bey, lá à yòʼ dzəə shòv áwune, kìn ji à wáa səə̀vì səə̀vìn.» 26Balaam bìnèr jii, «Bó m yoʼ lò sùúy e wò ji m kù kér fó yiì kinyo kidzə̀m a dzə̀ ke Nyùy yòŋèn e mò a?»
Balaam tiísí ntum Nyùy ye yì meen ji taár
27Balak nèn kfə̀n sùúy e Balaam jii, «Wìy, é m li wò, é wòsò du é kirə̀ʼ kímóʼ kí. A tàm é wúné boŋ Nyùy foo fèy, é wù yii, áà shóv áwune, e fò e mò.» 28Á bèy, Balak nèn lì Balaam, wùn wun kóʼ é ntoò Gwan Peor, e ŋkìʼnìn kirə̀ʼ ké woʼ kí. 29Á meé fó, Balaam suúy e Balak jii, «Bóm kíy se cù si saàmbà, e tàʼ anàʼ vee vilume saàmbà, wùn à viyáʼ vi saàmbà, e wìy sho.» 30Balak ku nèn yiì mo Balaam‑eè suuyin, e yiì cu aànàʼ vee saàmbà wùn à viyáʼ vee saàmbà vi, li nàʼ wùn à kiyáʼ ki, wù yiì cu e kiy wo mòʼóne.
Currently Selected:
Kintaŋ 23: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
