Kintaŋ 17
17
Mbàŋ Aaron tókír
1 Nyùy Tàr suúy e Mooser jii, 2«Súŋnín e wír veé Israyi, e sə̀ mbàŋ si fo áwune nshòv sibaà e ghvə̀m. Ku sə̀ mbàŋ e mòʼón fo kilìmbìy keé ram yee shó ki, e sàŋ yír kilìmbìyi e wun mbàŋ. 3Sáŋ a dzə̀ yír Aarone é mbàŋ ye dzəə̀n yeé ram Levi. Kitú ke ram yee shó ki kù yíi a ker mbàŋ e mòʼón ji yeé kfəə fo. 4À sə́, áà nèn wìy sho e *kibàn ké ntàsín, e neèr e mbìy ŋkùv mensàŋ fo wòsò yii tárí. 5Wìr wo m shoʼon, bo mbàŋ rə yíi tokír, é m nèn sə̀r kinyam ke wír veé Israyi nyam wò sho.» 6Mooser nèn sùŋnín e wír veé Israyi. Vilìmbìy vidzə̀m vi wìykìr e mbàŋ si, e fò shó e kitu kitu mo kfə́ə se atàr vév sí dzə̀kìn, mbàŋ nshòv sibaà e ghvə̀m, a ye Aaron dzə̀ fó. 7Mooser neèr mbàŋ sìy e Nyùy Tǎr si e *kibàn ké mensàŋ.
8Wáa dzə kibvəə́shí, Mooser dù e kibàn ké mensàŋ. Á bèy, a mbàŋ Aaron ye dzəə̀n ye rám Levi tókír ne, e fə̀tí to si, e bòŋkír, e fə̀ə́r vibuushì vé *almon, e kòóm báŋ si, a sí távkír ne. 9Mooser nèn shàʼàr mbàŋ sidzə̀m fo mbìy ŋkùv mensàŋ fèy, e dù, e yèn wír veé Isray sho. Á wáa leéy, wìr wáa lì rə́ə. 10Nyùy Tàr yòŋ e Mooser jii, «Siìr mbàŋ Aaron fo, e mbìy ŋkùv mensàŋ, aá lem fó ji kisəəm fo antavkìtu vìne. Ku lèm fo ji à fiʼ sə̀r kinyam kév ke á nyam mo shó fo á kfən lòo nyàm, é m lo, e laàr áwune.» 11Mooser ku nèn yiì réŋréŋ mo Nyùy Tàr‑iì yòŋèn ji wù yii.
12Wír veé Israyi yòŋ e Mooser jii, «Rúrú, vèr kpùkír ne. Ké ru kí, vèr sì aŋkfə. Vèr kpùkír ne wir dzə̀m. 13Wìr kóʼti e Nyùy Tǎr ghaa kibàn, wù kpù. Bo dzə̀ ji vèr yíi kpukír wír adzə̀m à?»
Currently Selected:
Kintaŋ 17: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
