Kintaŋ 18
18
Lím atàá cù, à yé wìr veé ram Levìi
1 Nyùy Tàr nèn sùúy e Aaron jii, «Vèn à wón vée, à wír vee věn kfəə Levi adzə̀me kù wíy a tur lòn woo bìʼ jay wo wù kùmèn kibàn ké Nyùy Tàr. Yii bèy, jay lóo dzə wo wù kùmèn lím atàá cù, bo kù wíy tur vèn à wón vée cáʼ lòn woo shooy. 2Ku lì afə́r vé ve dzəə̀n rám Levi, Levi woo tàr à ram yén, é vèn áwune wáa lìm, aá wáa sə vèn à wón vée e ghan se vèn taʼtìn e shùu *kibàn ké mensàŋ. 3Áwune wíy a sə wò, e kfə̀n a lìm lim seé kibàn sidzə̀m. Yii bèy, á yòʼ wíy a koʼtí e ghaa vikaŋ veé kirə̀ʼ kee jeéy kí, kìn dzə̀ é ghaa kiy cù, fo vèn áwune kpúkír. 4Vèn áwune wíy suusín, aáwune wáa yiì kév lim seé *kibàn ké ntàsín sidzə̀m, é la wìr woo və̀y yòʼ kòʼtí e věn ghaŋ ji wù yii a kifá. 5Á bèy, é vèn à wón vée wáa lìm lim yeé mbìv kibàn ké Nyùy kee jeéy, à yeé kiy cùu, é la dòʼshwíiy wom yòʼ dzəə kòʼ bìʼ wír veé Isray. 6Leéy, e yèn, m shòʼ ne afə́r vé vee kfə́ə Levi fo wír veé Israyí mvəm, e fò e vèn ji fómo. M lèm ne áwune jeéy ji aŋgàa lìm vém, ji á wáa yiì lim seé kibàn ké ntàsín. 7Yii bèy, lóo dzə lim ye dzəə̀n yé taà cù, bo kù yii vèn à wón vée yee shooy. Kinyo kee kùm kíy cù kidzə̀m, à keé bǎm ràŋ ki, bo kù yii ven. M fò ne kinyo ke atàá cù e vèn ji yén yee lim. A wìr wo sən kòʼtí e ghaa vifa vee jeéy ví, á kù yùyrí ŋgaàŋ.»
Mbìv cù ye yì du aàtàá cùu
8 Nyùy Tàr yòŋ e Aaron jii, «Ké ru kí, m fò ne wò vitaáví fó vifa ve cù vidzə̀m ve á nan ji mbìv yem yee jeéy. Kifá kidzə̀m ke wír veé Israyi cu mo shó, aá nan ji mbìv yem yee jeéy, m fò ne e vèn à wóné ji yéen yee mbìv, e fò bey ŋkuuŋkùŋ. 9Fo cu see jeéy féyì si, vifá vidzə̀m ve á yòʼ ton e və̀y ví yíi a dzə mbìv vèn à wóné. Kù yíi a dzə mbìv yen fó cù see jeéy féyì se á cu mo shó sidzə̀m, kìn dzə̀ cu vifa ve yi, kìn yé ajay, kìn dzə̀ cu njò. 10Vèn yíi a yi vifá vee shooy mo dzəə̀n vifá vee jeéy ví féyì. A dzə̀ kù yì vilum cáʼ. Vèn kú a ker vifá vìn ji vee jeéy ví.
11«À kù yíi a ker sa cu ye nanèné ye wír veé Israyi cu mo shó e dzə̀m. M fò ne e wò ŋkuuŋkùŋ vèn à wón vé vee vilume, à vee vikìyí. A dzə̀ wír e wò lav, a wù dzə̀ là *kifàn mo nsər dinè, bo dzə̀ wù yì.
12«M kfə̀n fò ne wò ŋgòn se vifa se wír veé Israyi táy a dzə̀ ve juujùŋ vi, fó e Nyùy Tàr, ŋgòn se vifa veé sum wùn à meŋgvə́r me fíy mè, à meluʼ mee koy mbìyi. 13Ŋgòn se vifa se á káv fo nsay sidzə̀m si yíi a dzə sén. A dzə̀ wír e wò lav, a wù dzə̀ là kifàn mo nsər dinè, bo dzə̀ wù yì.
14«Kifá kidzə̀m ke wír veé Israyi fó e Nyùy Tàr ji nshwì woo ŋkuuŋkùŋ#18.14: nshwì woo ŋkuuŋkùŋ: Kifá kidzə̀m ke vé‑eè shwí Nyùy Tàr shó ki kù‑uù sì kfə́ bey ŋkuuŋkùŋ, a dzə̀ á kù fò a dzə̀ áàtàá cùu cáʼ. Kí búŋ fó bèy, á kù laàr laàrìn. (Leéy 21.2). ki yíi a dzə kén.
15«Kifá kidzə̀m ke á fó e mò ji dzə̀ dzə́ə mbìyi kí yíi a dzə kén, kìn dzə̀ nyám, kìn wír. Kí nén a dzə jii, vèn wíy a tin wón wìr vee dzə́ə mbìyi, a tin sa wón nyàm ye yì kér kifàn ve dzəə̀n dzə́ə mbìyi. 16Á wíy tin, aá sì ŋwee, a káv wo á wíy a tin shoo dzə̀ *kisha ke mbàm ke fəvír kí ashekel atàn mo *shekel woo wo cù yii dzə́, a dzə̀ *gera mbaà. 17Yii bèy, a dzə̀ wan nàʼ woo dzə́ə mbìyi, kìn dzə̀ wo bvəy njiì, kìn wo bvəy loŋ, bó vèn yòʼ wíy a tin. Vee shooyi kù sì kifá ke Nyùy. À wíy waŋrí mensə́ mev é kiy cù, e tòn fóm ji cu ye və́yí bin fo fo, a kirəm kfə́ kí boŋ Nyùy Tàr. 18Jáv se nyàm sìn si wíy a dzə sén, réŋréŋ mo vèn yii kér shúu shiliv wo á nanè, kfə̀n kér kibiy ke yìy kí fó nyàm se cù.
19«Mbìv vifa ve cù ve á lem jeéy fó cù se wír veé Israyi cu mo shó sidzə̀m, m fò ne e vèn à wón vée ŋkuuŋkùŋ, vee vilum, à vee vikìyí. Sì *mensaŋ mee ŋkuuŋkùŋ me m gwàrìn vèn à wón vée, a dzə̀ ji mensaŋ me shiŋgwaŋ.»#18.19: mensaŋ me shiŋgwaŋ: Dzə̀ mensaŋ mee ŋkuuŋkùŋ réŋréŋ mo shiŋgwáŋ shi yii lem kifá, la kí yòʼ bìr.
20 Nyùy Tàr naàrì bèy, e sùúy e Aaron jii, «À yòʼ wíy a ker nsay e wír veé Israyí mvəm ji vitsə́ʼ vé, a bó à yòʼ wíy a ker kéŋ yímóʼó aáwuné mvəm. M sì kéŋ yén, a dzə vitsə́ʼ vén e wír veé Israyí mvəm.
Kéŋ wìr veé ram Levi
21«Ké wìr veé ram Levi ki dzə̀ kév jii, fo kifa kidzə̀m ke wír veé Israyi kéŋé, m fò ne kintóʼ kimòʼón fo vee ghvə̀m vi aáwune ji vév vee vitsə́ʼ. Dzə̀ vilaʼày vév vé lìm ye áwune lim e *kibàn ké ntàsín. 22Bó wír veé Israyi yòʼ wíy a shaà e ghaa kibàn ké ntàsín, fóo lì njò, e kpukír. 23Kù wíy a yiì wír veé ram Levi lim seé kibàn ké ntàsín, a tur lòn woo fó. Kù sì nsər ye yì wíy a tiy fo, mo ŋgwàʼ sén sí wíy a dzə. Áwune yòʼ wíy a ker nsay e wír veé Israyí mvəm ji vitsə́ʼ vév. 24M fò ne áwune vév vee vitsə́ʼ a dzə̀ nsùʼ wo wír veé Israyi fó e mò, a dzə̀ kintóʼ kimòʼón fo vee ghvə̀m ve áwune kéŋé. Á kinyo ke kí yiìn, é bo m yoŋ ké wìr veé ram Levi ji áwune yòʼ wíy a ker a nsay e wír veé Israyí mvəm ji vitsə́ʼ vév.»
Nsùʼ wìr veé ram Levi
25 Nyùy Tàr nèn yòŋ e Mooser jii, 26«Suúy e wír veé ram Levìi jii, ‹Vèn lóo sə nsùʼ fo wír veé Israyi, nsùʼ wo m foon e vèn ji vitsə́ʼ vén, bo vèn yíi fo sa nsùʼ e Nyùy Tàr, a wù yíi a dzə, a dzə̀ ji kintóʼ kimòʼón fo vee ghvə̀m vi. 27Vèn ku lì ji dzə̀ á nsùʼ vifa, a vèn kì bùʼ saár é riimé, kìn ji nsùʼ melùʼ, a vèn ki kòy sá tútúʼ, e fèr sho. 28Á mo vèn wíy a fo nsùʼ e Nyùy Tàr fó vifa ve wír veé Israyi fó ji wóov woo nsùʼ. Vèn wíy a fo nsùʼ won e Nyùy Tàr fó fo, e nèn a fo e Aaron ji kifá kfə́, wun moo taà cù. 29Fo mvə̀m kifa kidzə̀m ke á fó e vèn, vèn kú a tay a dzə̀ vifá ve juujùŋ vi, bó a fo e Nyùy Tàr ji nsùʼ won. Kù dzə̀ mbìv yee jeéy féyì feyì.›
30«Ku sùúy e wír veé ram Levìi jii, ‹Vèn lóo fo mbìv ye vèn tayin ji nsùʼ, bo kibér ki sì kén mo bùʼ á ven vifá e riimé, e kòy tútúʼ, e fèr meluʼ sho. 31Bo dzə̀ lèn vèn à kfə́ə yéné yì, a fə̀m dzə̀ feé, bìʼ fo dzəə̀n vilaámé vé lìm ye vèn lim e *kibàn ké ntàsín. 32Vèn yòʼ wíy a ker jay mo vèn tayin ne nsùʼ fo fo, e bó a yi. Vèn wáa yen fóo lì vifá ve wír veé Israyi foon e Nyùy ji vee jeéy ví fó tèr, fo vèn li njò, e kpùkír.› »
Currently Selected:
Kintaŋ 18: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
