Kintaŋ 16
16
Kinsə̀koy ke Kora wùn à Datan, à Abiram
1-2Kora woo wan Ishar woó kfəə Kohat, ye dzəə̀n rám Levìi nèn lò, e bà ntaŋ ji á maʼ á sáʼ Mooser. Wír veé ram Rubene‑eè tóm wun ataár, a vé‑eè dzə̀ jii, Datan wùn Abiram vee wón Eliav, à On woo wan Pelet. A wír ámóʼó kfən tàtí sa, aá dzə̀ kishóv mtàn e ghiì baà (250), a kù‑uù dzə̀ wír ve vé‑eè shoʼtin ji vilìmbìy veé Isray, a wìr dzə̀m dzə̀ kisən ke wìr. 3Áwune nèn tàr shuu, e wìy, e yèn Mooser wùn Aaron, e sùúy jii, vèn yiì ne, e tònén. Wìr dzə̀m woó Isray dzə̀ wir Nyùy, a Nyùy dzə̀ aáwuné mvəm. Yií ka, é bo vèn wáa koʼór vitú vén, a tiy mbìy, a shaà kintatì ke wìr Nyùy Tàr?
4Mooser yú kin, e gvə̀ʼtí, e tsə̀m sí e nsay, a bùnrì. 5Wù lò, e sùúy e Kora wùn à ŋgoo rə jii, «Yíi lòo dzə kijàvndzə, é Nyùy Tàr tóʼór wír wo dzəə̀n və́ə, wír wo wù lèmèn ji woo jeéy. Tóʼorì, é wù yii, é wù kóʼtí e wun ghaa kiy cù. Woo shó wo wù yíi shoʼ, dzə̀ wo wù yíi yiì, é wù kóʼtí e wun ghaŋ. 6Kora, vèn à ŋgoo yè e dzə̀m bvəə́shi, á wìy e vikáŋ vi. 7Vèn wiyì, á wày və́y shó, e neèr kiláy shó, e nèn kòʼtí sho e Nyùy Tǎr si. Wír wo Nyùy Tàr bvəə́shi, e shoʼ, bo dzə̀ woo shooy wo wù tíy jeéy ji ŋgaà lìm və. Ven veé ram Levi, kí sì é ŋàŋ.»
8Mooser kfən yòŋ e Kora jii, «Ven veé ram Levi, vèn yuúrí. 9Bó kinyo ke Nyùy woó Isray yiìn e vèn kí yoʼ ghèén ven a? Wù‑uù tày ven fo màŋgòŋ woó Isray mvəm, e lèm jeéy ji vèn wáa koʼtí e wun mentsə̀m, a yiì lim seé kibàn ké Nyùy Tàr, e kfə̀n a tiy e kintatì kí si, a sə áwune. 10Kora, kí Nyùy lì ne vèn aàfə́r vé veé ram Levi adzə̀m ji vèn kóʼtí e wun mentsə̀m? Vèn kfə́n a tàʼ lèn ji bo vèn kì dzə̀ atàá cù à? 11Bo dzə̀ ji vèn à ŋgoo yè e dzə̀m bàʼtí ne, e taàmé a dzə̀ Nyùy Tàr bey. Aaron dzə̀ kfə́ la, é bo vèn wáa ghvə̀ʼ wun?»
12Mooser nèn tùm ji á jaŋ á Datan wùn Abiram vee wón Eliav. Áwune dú, e bìnèr jii, «Vèr yòʼ wiyì. 13Dzə̀ kinyo fo tèr fo Mooser li ver fó wòŋ wo vín nàʼ wùn à vilu vi tsəətìn sho, e wìy ji wun laar é woʼ fen à? Siì lèn, wù kfə́n a tàʼ ji wun kóʼ e věr kitu, a saʼ. 14Bó wù yoʼ lò lì ver, e nə̀ə́ sho e nsay ye vín nàʼ wùn à vilu vi tsəətìn sho. Wù yoʼ lò fò ver súm sé vifa ve yi, à sé vitiír vé *vayin si ji vèr yov, a ker ji vitsə́ʼ vér. A dzə̀ la wù yòʼ kfə̀n a laàrì sí yér. Vèr yòʼ wiyì.»
15Mooser yú, a shwiíy kilòŋ é ŋàŋ, e sùúy e Nyùy Tàr jii, «Lá à yòʼ səə̀sí cu yév. M yòʼ‑oò ló a nə̀ʼsì wír fo áwune. A fə̀m dzə̀ kimbèʼbìy ké wìr, bo bó m yoʼ faàsì.» 16Mooser nèn yòŋ e Kora jii, «Vèn à ŋgoo yè e dzə̀m bvəə́shí, e wìy e Nyùy Tǎr si kibvəə́shí, é Aaron wiy sá. 17Wìr mòʼón mòʼón yíi lì kikáŋ kfə́, e way kiláy shó, e wìy sho e Nyùy Tǎr si, bo dzə̀ ji á wiy e vikáŋ vi kishóv mtàn e ghiì baà (250), é Aaron wiy sá e kfə́ kee kikáŋ ki.»
18Áwune bvəə́shí, e kù nèn lì vikáŋ vév, e wìy, e wày və́y shó, e neèr kiláy é kitu wo, e nèn kòʼtí, e tìím e shùu *kibàn ké ntàsín wùn à Mooser, à Aaron. 19A màŋgòŋ dzə̀m kì bàʼtí ne fo mo Kora kì levtin ne áwune ji á wiy, e taàmé Mooser wùn Aaron. Rán Nyùy Tàrí ku nèn fəə̀sín e màŋgòŋ dzə̀m si. 20Nyùy Tàr suúy e Mooser wùn Aaron jii, 21«Vèn fəə́ fo wír vìné mvəm, é m laar áwune kàŋ mòʼón.» 22Yii bèy, Mooser wùn Aaron gbù, e tsə̀m sí fo nsay, a toŋ jii, «Éè Nyùy, dzə̀ wò Nyùy wo wù fó kiyoy e wìr msòŋ e dzə̀m, a dzə̀ wìr mòʼón jày kinyo, à shwìíy kilòŋ e màŋgòŋ dzə̀m à?» 23Nyùy Tàr nèn sùúy jii, 24«Suúy e màŋgòŋ ji áwune lo á fo Kora wùn à Datan, à Abiram shuù se tàv.»
25Mooser nèn ŋàʼáy, e dù fo Datan wùn Abiram wùn, vilìmbìy veé Isray vi jùmrì wun fo. 26Wù kàntì màŋgòŋ jii, «Vèn kóʼtí cér fo vibáy vìn ví shuù se tàv. Lá vèn yòʼ kùm kifá kév, fóo boŋ yeé lav ghan bìʼ jay wov.» 27Á nèn kòʼtí fo Kora wùn à Datan, à Abiram shuù se tàv, a Datan wùn Abiram kì fəə̀ ne, a tiy aáwuné shuù se tàv, wùn à vikìy véví, à wóné, à wàʼbìn wov e dzə̀m. 28Mooser suúy jii, «Á lèn wo vèn yíi kiíy ji tùm á Nyùy Tàr mo ji m wáa yiì a lim rə̀n e dzə̀m, a bó yòʼ yii mo fo mǒ kitu. 29A wír vìne lòo dzə, e kpù kpú a dzə̀ yév, kìn kòóy kinyo áwune ke kí kù yii kooy wíri, bo yòʼ tùm Nyùy Tàr mo. 30Yii bèy, a Nyùy Tàr lòo dzə, e yiì ke fíy ki, nsay mvəʼ shuu, e mèy áwune wùn à kifá kév kí kidzə̀m, áwune du áàŋkfəə́ wòŋ#16.30: áàŋkfəə́ wòŋ: Wír veé Israyi kér biímé ji woŋ aŋkfəə dzə̀ á kirə́ʼ é loònsay moo bií wo wú shoon bey., bo á lèn wo vèn yíi yen ji wír vìne ŋwày á Nyùy Tàr.»
31Kù mo wù suŋnin jí sìn, a màysì, nsay yee fo áwune‑eè tíyí jàvsìn, 32e mvə̀ʼ shuu, e mèy áwune wùn à kfə́ə yéví, à wìr dzə̀m wo wù kùmèn Kora, à kifá kév kí kidzə̀m. 33Áwune nèn nə̀ə́ e sày atin wùn à vifá vév ví vidzə̀m. Nsay kfən làŋsìn fo yuv, wír vìyi ŋeémé, e lày fo màŋgòŋ woó Isray mvəm. 34Wìr dzə̀m woó Isray wo wù‑uù tíy fo nyéŋkír e tóŋe é shuù, nyéŋ bèy, suuy jii, «Nsay lo, e mèy sa ver.» 35Nyùy Tàr túm və́y, wú laàr wír vee kishóv mtàn e ghiì baà (250) ve vé‑eè wìyìn e kiláy kí, a yiì cu sho.
36 Nyùy Tàr yòŋ e Mooser jii, 37«Suúy e wan taà cù Aaron woo Eleasar ji wù fə́tí á vikáŋ fo kiber ke vinshwi vìy, e tàʼár və́y taʼarín. Vikáŋ vi sì á vifá vee jeéy ví. 38Wù li á vikáŋ ve wìr ve á kpukin bìʼ jay wov vin, e tsə̀y, é ví vemen, aá sətí á kíy cù sho. Mo á kì wìyìn shó e Nyùy Tǎr si, bo sì vifá vee jeéy ví. Á ku yiì bèy, é wáa dzə kisəəm fo wír veé Israyi.»
39Á bèy, taà cù Eleasar nèn lì vikáŋ vee kisha kee *brons ve wír ve á kì shwiiné kì wìyìn shó, á nèn tsə̀y, e sə̀tí kíy cù sho. 40Kinyo kìn ki kù‑uù wíy a kuumé wír veé Isray ji wìr wo bó yòʼ dzəə̀n taà cù yòʼ dzə̀ wù kòʼtí á ji wun yii cu kilay e Nyùy Tǎr si, a taà cù kù yii dzə́ ji rám Aaron. A wìr mùm, bo kinyo ke kí‑iì yiìn Kora wùn à ŋgoo rə kí kù‑úù yii sá wun. Á kù‑uù yiì vinyo vidzə̀m réŋréŋ mo Nyùy Tàr‑iì suuyin e Eleasar, e shaà fo Mooser.
Aaron bóyír wír veé Isray fo kifə̀ʼ
41Wáa dzə kibvəə́shí, màŋgòŋ woó Isray e dzə̀m nèn a ghvə̀ʼ Mooser wùn Aaron, a suúy jii, «Vèn yùyrí ne wír Nyùy Tàr.» 42Màŋgòŋ báʼtí, e taàmé Mooser wùn Aaron, e lòo bìnkìr, e kìʼ *kibàn ké ntàsín, e yèn, a mbàʼ súm ne, rán Nyùy Tàrí bvə́ysín. 43Mooser wùn Aaron kóʼtí é shùu kibàn ké ntàsín. 44Nyùy Tàr suúy e Mooser jii, 45«Vèn kóʼtí fo màŋgòŋ və̀n mvəm, é m laar áwune é kisəəné.» Mooser wùn Aaron gvə́ʼtí, e tsə̀m sí e nsay. 46Mooser suúy e Aaron jii, «Lì kikáŋ ké ki, e lì və́yí fó kiy cù, e wày shó, e neèr kiláy shó, e dù sho cér fo màŋgòŋ dzəə̀n, e *kfə̀mrí áwune, bìʼ fo dòʼshwiiy Nyùy Tàr koʼon ne, a kifə̀ʼ ki sì e wírí mvəm.»
47Aaron ku nèn yiì mo Mooser suuyin, e nyèŋ, e dù e màŋgòŋ mvəm. Wù wáa dù, e yèn a kifə̀ʼ ki kéʼ ne rú, a teè wíri, wù nèn wày kiláy, a kfəmrí áwune shó. 48Wù kú a tiy e wír ve tine wùn à ve á kpukiné kintìntìn, e meé mo kifə̀ʼ ki‑iì màyìn. 49A wír ve vé‑eè kpuun kpú kifə̀ʼə‑əə̀ dzə̀ kishóv ghií saàmbà aànsə̀kìi nshòv sikweè e ghvə̀m (14,700), e bóo lì ve vé‑eè kpuun bìʼ kinyo ke Kora. 50Aaron nèn kfə̀n, e yèn Mooser e shùu kibàn ké ntàsín, a kifə̀ʼ ki máy ne.
Currently Selected:
Kintaŋ 16: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
