Kèʼlo 50

1Joosev gbù e tàr wóv kitu, a toŋ, a bamrí wun. 2Wù nèn lò, e sùúy e vé shìv ve vé‑eè lim fo wune ji á wàá yóʼ á dzə́n tàr wov Isray. Á nèn yòʼ. 3Kí‑iì lì kishiíy mkweè mo nsər yee kùm dzə́n wìr ye yoʼóné taʼà. Wír veé Ejivi nèn dìy kpú rə́ kishiíy msaàmbà.

4Á dìy kpú, yí mày, Joosev nèn sùúy aàtǎr ntoʼo jii, «A vèn koŋ rú mo, vèn sùŋnín e Farao, e fò e mò. Vèn suúy e wun jii, 5‹Tàr wor‑iì lóo kpu, e yiì, m lìʼ ji m wíy dzəə̀mè wun a e wun sày ye wù‑uù naŋsin é wòŋ Kanan. Kii wun, wù ku màʼtì a, é m kóʼ, e dzəə̀mè tàr wor, e bó a kfən e bàm.› »

6Fòn nèn dù, e bìnèr ji wù kóʼ á rì, e dù, e dzəə̀mè tàr wov mo wù‑uù lìʼìn. 7Joosev nèn lò, a koʼ ji wun du, e dzəə̀mè a tàr wov. Atǎr ntoʼ adzə̀m, vibay vidzə̀m wùn aàtǎr laʼ veé Ejivi‑iì kòʼ sá e Joosev bàm, 8e lì sa wír vee wun lav adzə̀m, aàfə́r və́ wùn à kibér ke wìr kee tàr wóv lav ki. Kù‑uù jòʼsì wón ve terií wùn aànjìi, à bvə́y si, aànàʼa ve vé‑eè gòʼòn é Goshen. 9Vé kar se səŋ nyám si wùn à vé nyàm se ŋkoʼo‑oò kòʼ sá e Joosev bàm. Yì‑iì dzə̀ ŋgoo e da. 10Áwune meé é riimé yímóʼó é Atad, a dzə̀ kirə́ʼ é ghaa ndzəv yee Jordan, e nèn a dìy kpú, e rə̀sí tòŋ ntàmda. Joosev dìy kpú tàr wov fó kishiíy saàmbà. 11Wír veé Kanan ve á yii dzə́ foo yén kpú ye vé‑eè diy e riimé yeé Atad, e nèn a suúy jii, «Kin ki dzə̀ kiŋgaʼnìn ke kpu ke wír veé Ejivi diyì.» Á kifá ke kí‑iì yiìn, é bo á siíy, a yòŋ yír kirə̀ʼ keé ghaa Jordan kìn ji Abel‑Mitsrayim.#50.11: Abel‑Mitsrayim: Yír rə́ne koó fo kisuŋnìn e Lǎm Hibru moo «kpú ye wír veé Ejivi diyì.»

12Á mo wón Jakovi‑iì yiìn e dzə́n rəə́ mo wù‑uù suuyin aáwune. 13Vé‑eè bèʼèy wun, e dù sho e nsay Kanan, e dzəə̀mè e mbvə̀ʼ yeé kwaʼ woó Mak‑Pela e ghaa Mamre. Kwáʼ və̀ne dzə̀ wo Abraham‑eè yunen fo Efron woo wan Hit ji kirə́ʼ kfə́ ké kindzəə̀mèwìr. 14Joosev màysì dzəə̀mè tàr wov bey, e nèn kfə̀n é bàm é Ejiv wùn aàfə́r və́ vee vilume, à wír ve wun áwune‑eè duùn ji á dzəəme tàr woví.

Joosev rəə́r melív me afə́r və́

15Mo afə́r Joosevi yenen ji tàr wov kpù á ne, á nèn a kfə̀ynìn jii, «A Joosev sà yiì lò, a tsəmrí rə́r wùn áwune, e kfə̀n a siìr ŋkfə́tír bìʼ ajay ve vé‑eè jayin e wun, é kí sáa dzə e le á?» 16Áwune nèn tsə̀nsí ntum e Joosev jii, tàr wov‑iì lóo kpu, e lèm a ntìr kpu 17ji á suúy e wun woo Joosev ji wun yoŋ a jii, kii wun, wù ku làysìn a jay wo afə́r vəə́‑əə̀ jayin e wun. Lèn və̀n, wù ku làysìn a rì jay wov, áwune vee aŋgàa lìm Nyùy wo tàr wov‑iì ghvə́mé. Joosev yú ntum afə́r və́ rə̀n, e nèn a dìy. 18Afə́r vəə́ nèn lò wìy sa, e gbù e wun si, a suúy jii, «Ver víne, vèr sì akwàn vé.»

19Joosev suúy aáwune jii, «Lá vèn yòʼ a fàn, m dzə̀ Nyùy à? 20Vèn‑eè wày wáyín ji á yii kinyo ke bi kí e mò, yii bèy, Nyùy nèn lì, e siìr ji kinyo ke juŋ ki, e fíʼ lèm wíri aneénín atin, mo vèn yén lèn. 21Lá vèn yòʼ a fàn, m yíi a leéy fo vèn à wón véné.» Wù ku nèn a ruvtí, a suŋnín aáwune é dzəə yé a rəə̀r melív mev.

Joosev dzə́n, e kpù é Ejiv

22Joosev ku nèn a dzə e Ejiv wùn à kfə́ə tàr woví. Wù‑uù shìíy kiyá kishóv ghvə̀m e wiì (110), 23e yèn wón wón Efrayim. Makir woo wan Manasse dzəə́ wón, Joosev keérí, á kúy sá e wun kiwo. 24Joosev nèn lò, e sùúy aàfə́r vəə́ jii, «M sí méʼ mentsə̀m me kpu. Nyùy kù wíy sham ven, e fəə́r fo wòŋ fèn, e dù sho e wòŋ wo wù‑uù kàʼàn Abraham wùn à Aysi, à Jakov sho, e kfə̀n lìʼ.» 25Joosev nèn yiì, áwune vee wón Israyi lìʼ kilìʼ jii, Nyùy wíy sham áwune, e fəə́r fo Ejiv, á lóo lò, aá lì á vighvə́r və́ fó fo, a dù sho. 26Á bèy, Joosev nèn kpù, a wù dzə̀ kiyá kishóv e ghvə̀m e wiì (110). Á nèn yòʼ dzə́n rə́, e wày é ŋkùv e Ejiv foo fèy.

Currently Selected:

Kèʼlo 50: LNB

Highlight

Copy

Compare