Kèʼlo 49
49
Jakov fó ntìr kpu e wón və́ vee nshòv sibaà e ghvə̀me
1Jakov jàŋ wón və́ vee vilum, e sùúy jii, «Vèn báʼtí adzə̀m, é m suúy ven kinyo ke kí wíy koóy ven é ghan se sí wíy a wìy.
2«Ven vee wón Jakov, vèn báʼtí, e yuùrí.
Vèn yuúrí tàr won Isray.
3«Ruben, à dzə̀ wan wom mbìy,
dzəə́ yém féyì, wán wom vinsùm.
À tíy mbìy fo viwìr, tíy fo vitaaví.
4Moo ndzə́v ye yí tsə́yninè,
wò‑oò gùynìn, e kòʼ e tàr wón kikun, e bìvír,
a bó à yòʼ dzəə́ wìy a tiy mbìy.
5«Simeon wùn Levi kér liì wov e mòʼón.
Nyùy sév sí dzə̀ vifá ve rər.
6Nyaa mò, bó m yòʼ wíy way kiwó aáwuné ntaŋ.
Nyaa mò, bó m yòʼ wíy tatí ŋgoo yev menàŋ.
Vé‑eè yúyri wíri é mvə̀m dòʼshwiíy,
kotì anàʼ e mvə̀m kiŋar.
7Dòʼshwíiy wov dzə̀ e biíbí,
melív mev mè sə́n é ŋàŋ,
a lòné dzə̀ wóv.
M wíy bvəə́r áwune, aá sáŋrí e wír Jakoví mvəm.
M wíy taʼár áwune é nsay Isray.
8«Wò woo Juda, afə́r vée wíy a burí wò.
À wíy a ker aŋgaà vé vibàn a dzə̀ fó asìʼ.
Wón tàr woné wíy a fo ghvə́m e wò.
9Wan wom Juda, à dzə̀ ji bvərə̀ʼ.
À kfə̀n ne e bàm fó kwaʼ jwim,
à koò ne nyám sé, e kfə̀r.
À kfə̀n ne e bàm, e nyàʼám,
e nàsì vikoy ji á wò bvərə̀ʼ féyì.
Yeè bvərə̀ʼ, a dzə̀ yùʼtí la wún, e sə̀ʼ wò?
10Kitoómé ké vifòn ki yòʼ wíy buú fo Juda.
Kitoómé ké saʼ ki yòʼ wíy buú fo wun nsàn vibìy,
e dù, e meé e ghan se ŋgaà kitoòmé wiyì,#49.10: Kìn jii: e dù, e meé e ghan se Shilo wiyì; Kìn jii: e dù, e meé e ghan se ŋgaàŋ wo nshwìí dzəə̀n və́ wiyì.
a dzə̀ wun wo vitúm vidzə̀m vi wíy a yunín.
11Juda lo, wù tsəə̀r kimbèʼbìy kfə́ é kitiír ké *vayin,
e tsəə̀r wan kimbèʼbìy və é tam wo juŋe.
Wù su ndzə̀y sə́ e meluʼ me mè ján fo mè,
su kikúm kfə́ e meluʼ me baar mè.
12Sí rəə́ wíy a bàŋ meluʼ meluʼ,
é sóŋ rəə́ wáa fər vín vín.
13«Sebulon wíy a dzə e ghaa *rìbà ndzə̀v,
é wáa dzə kibeèy ké amàkìkoŋ.
Ŋgvən rə wíy dù, e mày e Sidon.
14«Issakar dzə̀ ji kintav ke kimbèʼbìy,
a wù néŋ e nsàn aŋkém.
15Wù‑uù yèn, a kirə́ʼ ké meèmè ki dzə̀ kijuŋ,
a nsay yee fó bóŋ é ŋàŋ,
e nèn gvə̀ʼə́r ndzə̀m rə, e lì kibeʼèy,
e fò kitú kfə́ ji kwǎn lìm woo fó.
16«Dan wíy a saʼ wír və́,
a dzə̀ rám yeé Isray yímóʼó.
17Dan wíy a dzə ji yó e dzəə,
a dzə ji búv e kiwuù ké dzəə,
búv wo wù té nsən se wuù sé nyàmŋkoʼ,
a ŋgaà koʼ gbu fo bàm.
18«Éè Nyùy Tàr, m leey a dzə̀ wò. Kù luŋèr wò wír vé.
19«Ashóŋé wíy nəə́ Gad,
é wù binkir, e jùm áwune é nsənnsən.
20«Nsay Asher wíy a fəə́r vifá ve yi ve juŋ vi.
Wù wíy a ker viyíkìr ve ví gheenen fo afone.
21«Navtali dzə̀ ji shishùy.
Wù ghán mo wù koŋè,
dzəə wón ve juŋe.
22«Joosev dzə̀ ji kitiír ke kí koomè.
Kí koom e ghaa ndzəv,
a tám sə́ sí sə́ti kirə́v ké kày.
23Vé mvə̀ne‑eè nə̀ə́ wun e dzəə ye bi,
vé‑eè tè wun, e nə̀ʼsì wun, e lèmér,
24yii bèy, kinte ki yòʼ‑oò lo wèʼ fo wun kiwo,
kóy sə́ sí‑iì gòʼ sicaʼàn.
A yiì Nyùy Jakov woo Ŋgaà Vitaàví Vidzə̀m,
wun woo Nshìy wo dzəə̀n Kilán keé Isray.
25Kù yiì Nyùy wo tàr won‑eè ghvə́mé,
wun wo wù wíy a sə wò.
Wù kù wíy a səə̀vì wò,
wun woo Nyùy woo Ŋgaà Vitaàví Vidzə̀m,
é wuú wùn à ŋweʼe wáa gbù fo yuv,
é ndzə́ví wáa koʼ fo loònsay,
é kidzəə́y kí kuʼ, ké wìr wùn à ké nyàm ki.
26Kisəəvì ké tàr won kí kùʼ,
e shaà ké agwan fo jíyí dzəə̀n ghán sidzə̀m,
e kfə̀n shaà vijuŋ veé aŋkoŋ ve á tíy fo, e wìy dù, e mày.
Kisəəvì kin ki kú a dzə e Joosev kitu,
a dzə e wun vishi ji wan ntoʼ aàfə́r vəə́ nsàn.
27«Benjamin dzə̀ ji koosàʼ wo biibí.#49.27: Nyàm ye á yoŋ e mbìv fen e Lǎm Bàràʼ dzə̀ wolf, a dzə̀ kfə́ə jwi yeé kwaʼ. Á nen yòŋ e Lǎm Nsoʼ ji koosàʼ, bìʼ fo dzəə̀n kfə́ə jwi yeé kwaʼ yìmòʼ.
Lóo dzə kijàvndzə, wù wàa kfər nyám se wù koon,
lóo dzə e ŋkuùr, wù nèn a jàv kibér.»
28Á kinyo ke Jakov‑iì suuyin é ghan se wù‑uù fó ntìr kpu e wón vəə́. A wù suuy ké wìr mo kí dzəə̀n, a wón vin adzə̀me dzə̀ rám Isray yee nshòv sibaà e ghvə̀m.
Kpú Jakov
29Jakov nèn kfə̀n a tinén kinyo aáwune, a suúy jii, «M sí lo, a jùmrì atàr vém. Vèn dzəəme mo aáwuné ghaŋ e nsay Kanan. Á ku dzəə̀mè mo a dzə̀ é mbvə̀ʼ ye yì dzəə̀n é kwaʼ wo yì‑iì dzəə̀n wó Efron woo wan wìr Hit.» 30A kwáʼ və̀ne dzə̀ é Mak‑Pela wo wù dzəə̀n é ghaa Mamre e mbìv yee fo shùy yii tó. Abraham‑eè yùn kwáʼ wùn à mbvə̀ʼ rə̀n fo Efron woo wan wìr Hit ji kirə́ʼ ké kindzəə̀mèwìr. 31Dzə̀ fó fo vé‑eè dzəə̀mèn Abraham wùn Sara woo wíiy və, e kfə̀n dzəə̀mè Aysi wun wiiy və woo Rebeka. Mò‑oò dzəə̀mè sá Lea fo. 32Á kù‑uù yùn kwáʼ woo shooy wùn à mbvə̀ʼ ye yì dzəə̀n shó fo wón Heti.
33Jakov màysì, e tìr wón və́, e nèn kòʼór wuú rə́ é kikun, e nèn shèm, á báʼtí wun.
Currently Selected:
Kèʼlo 49: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
