Kèʼlo 45

Joosev dìn kitú kfə́ aàfə́r vəə́

1Joosev yuúrí, e làa yòʼ dzə́ə yu fó kuʼtí wún e vé lìm vəə́ si. Wù kuúr wir dzə̀m e ndzə ji wun lóo dìn kitú kfə́ aàfə́r vəə́, é la wìr yòʼ a dzə a fo. 2Wù bùr tóŋ, wír veé Ejivi yú fó ndzə, sáʼka və̀n dù, e mèé e Farao ntoʼ. 3Joosev tóŋ bey, e lò, e sùúy aàfə́r vəə́ jii, «Dzə̀ mo Joosev. Tàr wòsən dzə̀ə́ sho e tin à?» Afə́r vəə́ yòʼ‑oò ló a ker kinyo kée bìnèr e wun, bìʼ fo kindzə́m kí‑iì gwàrìn áwune mo á yenen ji á sí tíy a dzə̀ e Joosev si.

4Joosev nèn sùúy aàfə́r vəə́ jii, «Kii vèn, vèn kóʼtí, e wìy fo mǒ mentsə̀m.» Áwune ku nèn kòʼtí, e wìy. Wù suúy jii, «Dzə̀ mo fə́r won Joosev wo vèn‑eè fiìnèn é Ejiv. 5Lèn və̀n, lá vèn yòʼ a yu bír. Lá vèn yòʼ a shwiíy kilòŋ fo věn vitu bìʼ fiinè ye vèn‑eè fiìnèn mo fen. Yì‑iì tsə̀nsí Nyùy mo e věn mbìy ji m fiʼ yiì, é wíri luŋ. 6Sì lèn viyá vibaà mo jìŋ koon é wòŋ. Dzəə́ bér viyá vitàn, ve bó wìr yòʼ wíy tuy kisoó e nsay, bóo fə̀m kav ke kavín kí. 7A Nyùy kù‑uù tsə̀nsí ne mo e věn mbìy ji m wiy, e yiì, é vèn boy fó jiŋ ye ghaʼán yìn, é la rám yéné yòʼ lày fo kitu ke nsay. 8Bó yòʼ‑oò lo tsə̀nsí ven mo fen. Yì‑iì tsə̀nsí Nyùy, e nèn yiì, m wáa dzə ji tàr à Farao, a dzə taàtá woo wun lav, e kfə̀n a dzə ji taà saʼ woó wòŋ Ejiv e dzə̀m.

9«Vèn kfə́n é bàm cércér, e sùúy e tàr wòsən ji mo woo wán və woo Joosev suuy a jii, Nyùy yiì ne, m wáa dzə taàtá woó wòŋ Ejiv e dzə̀m. Wù sə́y, e wìy yèn á mo. Lá wù yòʼ waà ndzə̀y. 10Wù yíi wìy, a dzə fo mǒ mentsə̀m e mbìv yeé Goshen. Wù wáa wìy a wùn à wón vəə́, à wón woné, à njiì, à nàʼ və, à kifá kidzə̀m ke wù kér ki. 11M yíi a leéy a fo wun e kirə̀ʼ fen, bìʼ fo viyá ve jiŋ vi dzəə́ bér a vitàn. Kí búŋ fó bèy, bo wùn à wír vee wun lavi yíi kpu a jíŋ, à kifá kee wun laʼ ki shó kidzə̀m.»

12Joosev kfən sùúy jii, «A dzə̀ vèn yèn lèn ji dzə̀ rú á mo Joosev wo m súŋnin e vèn, bo taaka Benjamin woo wan yè wor. 13Vèn fer e tàr wòsən vijuŋ vém ve m dzəə̀n shó e Ejiv vidzə̀m, e kfə̀n fèr kifá ke vèn yenen kí kidzə̀m. Vèn yii cércér, e dù, e lì tàr wòsən, e sə̀y shó fèn.»

14Wù suúy bey, e baàmé Benjamin. Benjamin baámé sá wun, wùn wun wáa dìy. 15Wù shàʼtì afə́r və́, e nèn a dìy aáwuné kitu, e lòo màysì, áwune súŋnín e wun.

16Sáʼka nèn dù, e mèé e Farao ntoʼ ji afə́r Joosevi waà wìy. Wùn à vé sáʼ vəə́ wáa yu vijuŋ feyì. 17Farao nèn sùúy e Joosev jii, «Yòŋ áàfə́r vée, aáwune kúr nyám si, e kfə̀n é Kanan, 18e lì tàr won wùn à kfə́ə sév sí, aá wiy, e yèn mo. M yíi fo áwune mbìv nsay ye juŋ e Ejiv, aáwune wáa yi vifá ve juŋ vi veé nsay fèn. 19Áà kfən yòŋ aáwune ji á li á viténtén ve səŋ nyám si fó Ejiv fèn, e dù, e bèʼèy wón vév wùn à vikìy véví, à tàr wov, e wìy a sho. 20Lá áwune yòʼ a ci a vifá ve á maʼtì fo. Vifá ve juŋ veé Ejiv vi yíi a dzə a vév.»

21Wón Israyi ku nèn a yiì mo fòn kì suuyin. Joosev fó áwune viténtén ve səŋ nyám se ŋkoʼ, e kfə̀n fò vifá ve yi veé kwaʼ ghan réŋréŋ mo Farao kì yòŋèn ji wù wàá yii. 22Wù jàvtì ndzə̀y sé ŋkàʼ e wìr mòʼón mòʼón, yii bèy, e fò sé Benjamin sitàn, e kfə̀n fò wun kisha ke mbàm ke fəvír kí *ashekel ghii taár. 23Wù kfən fò vifá ve á wáa dù fò e tàr wov, a ví‑iì dzə̀ jii, vifá ve tayín veé Ejiv, aá kúr e vimbèʼbìy vee vilum ví ndzə̀m e ghvə̀m, e kfə̀n fò sáŋ wùn à kibán#45.23: kibán: Leéy mbìv Ji se Naarìn sí. ke á tònèn tónen kí, à vifá ve yi veé kwaʼ ghan, aá kúr e vimbèʼbìy vee vikìy ví ndzə̀m e ghvə̀m. 24Wù màysì, e tsəə̀né afə́r və́. Á lòo dù, wù suúy aáwune ji lá áwune yòʼ a taŋnín a e dzəə.

25Áwune nèn lò fo Ejiv, e kfə̀n é wòŋ woo Kanan, e yèn tàr wov Jakov, 26e sùúy sho ji Joosev dzə̀ á sho e tin. Wù dzə̀ á taà saʼ woó Ejiv, a sáʼ wun a woŋ Ejiv e dzə̀m. Shúu má wun, wù wáa kwàʼ ji á bóʼti a wun bóʼtín. 27Á suúy vinyo vidzə̀m ve Joosev‑iì suuyin e wun, wù kfən yèn sá viténtén ve Joosev kì tsənsin ji á wiy, e lì wun sho, shilív sə́ shí luùmè. 28Isray nèn sùúy jii, «M biìmé ne lèn ji wan wom Joosev dzə̀ á sho e tin. Mo‑óò du, e yèn wun, e bóo kpu.»

Currently Selected:

Kèʼlo 45: LNB

Highlight

Copy

Compare