Kèʼlo 44

Bàr Joosev láy, á yén e Benjamin kibàm

1Áwune yíkír, e màysì, Joosev bìn, e sùúy e kitú ke vé lìm kee wun lav ki jii, «Wáy vifá ve yi vi e wír vìné vibàm mo a dzə̀ nyám sév sí bèʼèy, e siìr mbàm se wìr si e wun shùu kibàm. 2Lì sá bàr wom wo á fèrìn e kisha ke mbàm ke fəvír kí, e wày e wìr woo wánlě shùu kibàm wùn à sə́ see mbàm se wù kì wìyìn ji wun yún vifá ve yi sho si.» Wù ku nèn yiì réŋréŋ bey mo Joosev kì suuyin. 3Ndzə bvəə́shí, e jàv, á màʼtì áwune, wùn à vimbèʼbìy vév ví wáa dù. 4Áwune lò fo ŋkàlaʼ foo fèy, e ghàn shintàm, Joosev suúy e kitú ke vé lìm kee wun lav ki jii, «Jùmrì áwune cér, kooyì, à dzə̀r jii, ‹Yiì ka bo vèn lo, e siìr kinyo ke juŋ ki e ke bi kí? Vèn shòŋ bàr tàr wor wo á fèrìn e kisha ke mbàm ke fəvír kí bìʼ ka? 5Bó yòʼ dzə̀ bàr wo tàr wor yii nó fo fo, kfə̀n shwéŋ fú shó à? Vèn jày kinyo ke ghaʼán kí féyì, bóo shoŋ.› »

6Ŋgaà lìm Joosev və̀y ku nèn jùmrì áwune, e kòóy, e nèn tiìsí ntum rə̀y. 7Á bìnèr jii, «Kí ghàn é le, bo tàr wor wáa yòŋ kin kee kinyo? Bó yòʼ dzə̀ kí kòóy ji ver moo akwàn vəə́ yii kinyo kee bey. 8Leéy, e yèn mo vèr‑iì kfənen fó Kanan, e siìr mbàm se vèr‑iì yenen e věr shuù se vibàm e wò. A dzə̀ vèr yèe le, e bóo kfə̀n a shoŋ visha ve mbàm fo tàr wór lav, kìn dzə̀ ve fəvír ví, kìn ve baar ví. 9Bo dzə̀ ji a kí kòóy ji wáa dzə wír fo vèr, á kù yùyrí ŋgaàŋ, é kibér ki wáa dzə akwàn vé.»

10Wù bìnèr jii, «Bo dzə̀ réŋ mo vèn suuy bèy. Yii bèy, kù jòʼsì wír wo á yenen shó, wo wù yíi a dzə kwàn wóm, é kibér ki boy.» 11Wìr dzə̀m ku nèn gìtì, e sə̀ʼə́r kibam kfə́ é nsay, e mvə̀ʼ. 12Wù kèʼ tar fo ké woo ŋgàywìr ki, e jòʼsì e ké wo bàm kí, e nèn yèn bàr woo shooy e Benjamin woo bám yév kibàm. 13Kí yiì, wúné beémé áwune, á sàtì ndzə̀y sév. Wìr dzə̀m nèn lò, e kùr vifá e vimbèʼbìy ví ndzə̀m, a kfən sho e ŋkàlaʼ.

14Juda wùn aàfə́r vəə́ wáa kfən e Joosev lav, a wù kù dzəə́ dzə́ fo. Á gbùkìr e si wo, 15Joosev dzə́r jii, «Vèn mùm kee ben a dzə̀ ka? Bó vèn yòʼ kì ji a dzə̀ wír moo mo ben, wù kù tàʼ vinyo e fù a?»

16Juda kóʼtí, e bùʼ wó jii, «A dzə̀ vèr kfə̀n sùúy ji ka lèn e tàr wor? Kinyo ke a dzə̀ vèr kfə̀n sùúy ki bèé? A dzə̀ vèr kfə̀n tùnrí kitú kér é le? Nyùy kù yèn ne njò akwàn vé. Ver víne, aá sì ji akwǎn tàr wor, vèr à wìr wo á kì yenen bàr e wun kibàm.»

17Joosev bìnèr jii, «Àáy, yòʼ dzə̀ m mùm bey. Kù jòʼsì wír wo á yenen bàr e wun, wo wù lo, a dzə kwàn wóm. Vèn wáa kfən kén kí é bàm ji nyaáŋ, e dù yèn tàr won.»

Juda búʼ wó bìʼ Benjamin

18Juda nèn kòʼtí fo wun mentsə̀m, e sùúy jii, «Kii wò taàtá wom, ku màʼtì, é kwàn wóo súŋnín e wò kicaárín. M lón ji lá à yòʼ shwìíy a kilòŋ fo kwàn wóo. M kì ji à dzə̀ sáa moo fon kitú kfə́. 19Taàtá wom‑eè dzə̀r áàkwàn vəə́ jii, vèr sà kér kitàr, kìn fə́r woo lumèn wùmòʼ á? 20Vèr bìnèr e taàtá wor jii, vèr kér a tàr, a wù dzə̀n a ne, kfə̀n kér a fə́r woo lumèn, wo kitàr kí‑iì dzəən e wun viŋgày vé wìr, a fər və woo lumèn‑eè kpù á ne, bér wun fo wun kiyìy, a tàr wor kòŋ a wun e ŋàŋ. 21Taàtá wom nen yòŋ aàkwàn vəə́ á ji vèr du, e lì a wun, e sə̀y shó fèn, é taàtá wom yén á wun e sí rəə́. 22Vèr suúy e taàtá wom jii, a dzə̀ á la wan woo shooy yòʼ lò fo kitàr kí ghaŋ. A wù lò, bo kitàr kí kpù á ne. 23Taàtá wom nèn sùúy aàkwàn vəə́ jii, a dzə̀, a bó kinjòʼsìbàm kér kí wíy á vèr áwune, lá taàtá wom yòʼ dzəə wìy yèn á sí yér.

24«Vèr kfə́n é bàm, e dù, e yèn kwàn wó woo tàr wor, e fìʼtì jí se taàtá wòm sho sidzə̀m. 25Tàr wor ló, e kfə̀n yòŋ ji vèr kfə́n á bàm, e yùn á viyíkìr shishàr. 26Vèr bìnèr ji bó yòʼ dzə̀ vèr sə̀y á fo. A kì dzə̀ ji kinjòʼsìbàm kér kí kì du, bo vèr du, bìʼ fo a wù bùŋ, la vèr yòʼ kfə̀n dzəə yèn á sí taàtá wom. 27Kwàn wó woo tàr worí nèn sùúy e vèr ji vèr kì sáa ji wùn wiiy və woo Racel‑iì dzə̀ə́ á wón vee vilum abaà cáʼcáʼ. 28Wùmòʼ‑oò màʼtì á ne wun, a wun kì kfə́ ji nyám si‑iì kfə̀r á ne. E kèʼ fo ghan fóo fèy, bó wun yòʼ dzəə́ wìy yen a wun. 29A vèr kfə̀n màysì və̀n fo wun, e lì, kinyo ki koóy wun, bo vèr yíi yiì, é wun wo kitú ki fərin ne kpú, e dù aàŋkfəə́ wòŋ e mensíy mè si.

30-31«Lèn və̀n, a m lò, e kfə̀n é bàm là wán və̀n, bo tàr wor lo yen ji bó wàn yòʼ dzə̀, e nèn kpu, bìʼ fo dzəʼə̀m rəə́ dzə́ bèn, a yí dzə̀ wùn à yé wané kilàŋsìn. A kí kòóy bèy, bo vèr yiì ne, tàr wor kpú, e dù e sày e mensíy mè e si. 32Fó a dzə̀sì, mò‑oò lo kàʼ tàr wor, e tìír kitú kém, e sùúy jii, a m dzə̀ là fó wìy kfən e wan və̀n, bo njò kù wíy a dzə a yéem, e wìy dù, e mày. 33Lèn və̀n taàtá wòm, m yíi gòʼ fèn ji kwàn wó, e wǎn kiliŋ. Kii wò, ku màʼtì, é wù wáa kfən wùn aàfə́rí. 34A siì dzə̀ m kfə̀n é bàm fo tàr wór wùn é le, a bó wàn yòʼ dzə̀ vèr wun? M fan fóo yen kinyo ke bi ke kí yíi koóy tàr wor.»

Currently Selected:

Kèʼlo 44: LNB

Highlight

Copy

Compare