Kèʼlo 43

Afə́r Joosevi kfə́n é bàm é Ejiv wùn à Benjamin

1Mentaàshì mè kú a ghaʼtí ghaʼtín é wòŋ Kanan. 2Kfə́ə Jakovi yí vifá ve yi ve vé‑eè wìyìn shó fo Ejiv vìy ví máy, tàr wov suúy jii, «Vèn kfən dù, e yùn vifá ve yi vímóʼ ví shishàr.»

3Juda bìnèr jii, «Wìr woo shooy‑iì kàntì ver, e sùúy ji lá wun yòʼ dzəə wìy yèn á ver, a bó fər wor dzə̀ á vèr áwune. 4Aà biìmé ji fər wor du vèr áwune, vèr nèn dù, e yùn vifá vé ve yi. 5Aà tèn, la vèr yòʼ dzəə dù, bìʼ fo wù‑uù suuyin e vèr ji lá wun yòʼ dzəə wìy yèn á ver, a bó fər wor dzə̀ á vèr áwune.»

6Tàr wov Isray dzə́r jii, «Vèn‑eè suuy sho ji vèn kér fə́r wùmòʼ bìʼ ka, e bóo tinsín mo é dzəə yee ben?»

7Áwune bìnèr jii, «Wìr və̀n‑eè bònen dzə̀tí vinyo vee kùm vèr à kfə́ə yérí ji tàr wor sà dzə̀ e tin a? Vèr sà dzəə́ kér fə́r wùmòʼ á? Vèr nèn kù a bìnèr mo wù‑uù dzə́ti. A yì‑iì dzə̀ vèr kìíy fo ka kí ji wù lo, e yòŋ ji vèr wiy, e lì fə́r wor, e sə̀y shó fo?»

8Juda suúy e tàr wov Isray jii, «Wáy wán və̀n e mǒ kiwo, é vèr lo, a dù, é vèsən à wón vesəné fiʼ gòʼ atin, e làa yòʼ kpu jíŋ. 9M kàʼ, e tìír kitú kém ji m kù wíy kfən a e wun. A kinyo ki kòóy wun, à dzə̀r a dzə̀ e mò. A m dzə̀ là fóo wiy wìy, e way wun e wò kiwo, bo njò kù wíy a dzə yéem, e wìy dù, e mày. 10A là fo á ndzə̀yìn ne ndzə́yin, bo á kì dù ne lèn fo ji akàŋ abaà.»

11Tàr wov Isray yòŋ aáwune jii, «A fèn dzə̀ ji á mo kí kér fó a dzə, vèn kù tày vifá ve juŋ vímóʼ ví veé wòŋàn, e wày e věn vibàm, a səy sho ji fómo taà saʼ woo shó. Vèn ku lì mentuʼ me kilày kee *baam wùn à kee *mer ki, à virə̀ʼtìn ve vifa vi. Vèn kfən lì sa vilu, e lì báŋ se vici vee *pistacio si, à sé *almon si. 12Vèn li sá mbàm si virə́ʼ vibaà. Vèn kér fó dù, e siìr mbàm se vé‑eè siìrìn e věn shuù se vibàm ji kìn vé‑eè yiì a dzə̀ jay. 13Vèn li sá fə́r won, é vèn áwune wáa dù, e yèn wír woo shooy. 14Nyùy woo Ŋgaà Vitaàví Vidzə̀m shám mendzən men, e yiì, é wìr woo shooy siir fə́r won və̀y wùn Benjamin e bàm. A kí‑iì dzə̀ ji m wíy lày wón vém, e jòʼsì là wán, kí kù a dzə rì bèy.»

15Áwune ku nèn lì afómo, e kfə̀n lì mbàm virə́ʼ vibaà, wùn à Benjamin ŋáʼáy, e sə̀y é Ejiv, e dìn vitú vév e Joosev. 16Mo Joosev yenen wùn à Benjamin, e nèn sùúy e kitú ke vé lìm kee wun lav ki jii, «Lì wír vìne, e dù sho e mǒ laʼ, e seè nyám, e nàá, bìʼ fo m yíi yikír vèr áwune e ntìntìn shùy.» 17Ŋgaà lìm və̀y yiì mo Joosev suuyin, e lì áwune, a dù sho e wun laʼ.

18Mo vé‑eè liìn áwune, a dù sho e Joosev laʼ bèy, á wáa fàn, a sə̀mnìn jii, «Wù du e vèsən e wun laʼ bèn, a dzə̀ bìʼ mbàm se vé‑eè siìrìn e vèsə́n shuù se vibàm e ghan sé mbìy si. A wù yii bèy ji wun fiʼ gòv vèsən, e lì vèsən ji akwàn və́, e kfə̀n faàsì vimbèʼbìy vesən.» 19Á meé é shùu lav, áwune nèn mbaà ŋgaà lìm Joosev, 20a suúy sho jii, «Éè tàr wor, vèr‑iì wìy é ghan sé mbìy si ji á yún á vifá ve yi, 21-22á bèy, e lòo kfən e bàm, e mèé e kirə̀ʼ ké meèmè, e lòo mvə̀ʼ vibam vér, e yèn mbàm se wìr dzə̀m e wun shùu kibàm réŋréŋ mo sí‑iì dzəə̀n. Vèr kfə̀n ne sho lèn, bìʼ fo vèr yòʼ kiìn wír wo wù‑uù wayin. Vèr kér sa se sən sí sée kfə̀n yun vímóʼ vee vifá ve yi sho.»

23Wù bìnèr jii, «Vèn lo ji weè, lá vèn yòʼ a fàn, kinyo ke bi kí yòʼ dzə̀. A tàm bo yì‑iì wày Nyùy bùʼ və̀n e věn vibàm, wun woo Nyùy, woo wo vèn aàtàr véné. Mò‑oò lo sə̀ mbàm sén.» Wù suúy bey, e nèn fə̀ə́r Simeon, e fò aáwune.

24Ŋgaà lìm və̀y nèn lì áwune, e nə̀ə́ sho e Joosev lav, e fò mendzə́v, á sù wúu yév shó, e kfə̀n fò yí e vimbèʼbìy ví. 25Áwune nèn bàʼtí fómo wo vé‑eè yíi fo, a shìy Joosev sho mo vé‑eè yuun ji áwune yíi yikír a e wùn lav e ntìntìn shùy. 26Joosev yiì wìy e lav, á nèn wìy aàfómo ve vé‑eè kéríi, e tsə̀m ndzəə́ e wun si, e làʼ kitú e nsay. 27Wù shàʼtì áwune ji á sà dzə̀ atávkín á, e dzə̀r jii, «Tàr won dzə̀ kitávín á? Wun woo taàtá wo vèn‑eè yoŋ və̀y, wù dzə̀ə́ sho à?»

28Áwune bìnèr jii, «Kwàn wó woo tàr worí dzə̀ə́ sho, a wù dzə̀ kitávín.» Áwune nèn tsə̀m ndzəə́, e làʼ kitú fo nsay, a fo wun ghvə́m.

29Wù lòo leéy, e yèn fə́r və Benjamin woo wan yè wov, e dzə̀r jii, «Á kinjòʼsìbàm kén ke vèn‑eè yoŋ kìy à?» Wù yòŋ sho jii, «Nyùy səəvi wò wan wòm.» 30Kitú ki lùm Joosev bìʼ fə́r və, wù túmnín, a tàʼ kirə́ʼ kée toŋ sho. Wù nèn nə̀ə́ e wun mvə̀m lav, a dìy fo. 31Wù tóŋ bey, e lò sù sí rə́, e kùr tím, e fəə̀, e sùúy ji á wáy á vifá ve yi. 32Á fó vé Joosev e wun kirə̀ʼ jeéy, e fò vé afə́r və́, e nèn fò vé wìr veé Ejiv e kév kee kirə́ʼ kí, bìʼ fo dzəə̀n joonè fo wìr Ejiv wáa yikír wùn à wìr Hibru kirə́ʼ kimòʼón. 33Á dzə̀ʼə̀r afə́r Joosev, e kèʼ fo wo mbìy, e dù, e jòʼsì e wo bàm, wùn à Joosev wáa kìʼnìn. Áwune leéy, kí tárír áwune. 34Á kù‑uù jav viyíkìr, a ví tíy a dzə̀ e Joosev si. Á meé e Benjamin wùn, e wày və́, ví kúʼ, e shaà vé ámóʼó virə́ʼ vitàn. Áwune yíkír wùn à Joosev, e kfə̀n nò, wún wóví bòŋ, á wáa wàrkìr.

Currently Selected:

Kèʼlo 43: LNB

Highlight

Copy

Compare