Kèʼlo 42

Afə́r Joosevi dú é Ejiv

1Jakov nèn lò, e yù sá ji vifá ve yi vi dzə̀ á e Ejiv, e sùúy e wón vəə́ jii, «Vèn kù dzə́, leéynin leèynín, e làa yòʼ a mùm ji a sà dzə̀ á yèe le á? 2M yú ji vifá ve yi vi dzə̀ á e Ejiv. Vèn du fó, e yùn vímóʼ ví, fo vèsən kpú jíŋ.» 3Afə́r Joosev vee ghvə̀me nèn lò, a dù e Ejiv ji á yún á vifá ve yi. 4Yii bèy, la Jakov yòʼ tsə̀nsí Benjamin woo wan yìy à Joosev, bìʼ fo wù‑uù fan ji a tàm kinyo ki kòóy á wun.

5Wón Isray vìne ku nèn wìy e Ejiv e mvə̀m ŋgoo wìr ye yì‑iì wiy, e yun vifá ve yi, bìʼ fo jìŋ‑eè koon sá woŋ Kanan e dzə̀m. 6Mo Joosev‑iì dzəə̀n taà saʼ woó Ejiv, nén a fiìnè wun vifá ve yi e wír veé wòŋ foo fèyi. Afə́r vəə́ nèn wìy, e tsə̀m ndzəə́ e wun si, e làʼ kitú e nsay. 7Joosev yén afə́r və́, e kìíy, a yiì mo bó wù yòʼ waà kì bey. Wù dzə́r aáwune kitávín jii, «Vèn wìy fo feé?»

Á bìnèr jii, «Vèr wìy fo Kanan ji á yún á vifá ve yi.»

8Mo Joosev fə̀m‑eè kiiyin afə́r və́ bey, bó á yòʼ‑oò lo kìíy wun gheéy. 9Joosev kuúmé njèm se sí‑iì shí wun kùm áwune, e nèn sùúy aáwune jii, «Vèn dzə̀ vé ŋkiyi mo á wìyìn ji á shweʼ, e kiíy fo woŋ wórí njoon.»

10Á bìnèr jii, «Àáy tàr wor, akwàn vé vìne wiy a dzə̀ ji á yún á vifá ve yi. 11Vèr dzə̀ wón wìr mòʼón, vèr yòʼ dzə̀ vé ŋkiyi. Tàr wor, vèr kù dzə̀ wír suuyruú.»

12Joosev sháʼnín, e sùúy jii, «Vèn wiy ji á shwéʼ á fo woŋ wórí njoon.»

13Á suúy jii, «Àáy tàr wor, vèr dzə̀ wón wìr mòʼón e wòŋ Kanan. Vèr‑iì dzə̀ wír nshòv sibaà e ghvə̀m, fər wor wùmòʼ kpú, a kinjòʼsìbàm kér kí dzə̀ lèn wùn tàr wor.»

14Joosev suúy aáwune jii, «Kí kù dzə̀ mo m kì suuyin, vèn dzə̀ vé ŋkiyi. 15M yíi mùm ven é dzəə fen, m kan e fòn yir ji vèn yòʼ yíi lò fo fèn, a bó kinjòʼsìbàm kén kí wíy fen. 16Wìr fo vèn kér fó dù, e lì wun, e wìy sho. Wù lóo dù, é kibér ki goʼ fen e sháŋ, e dù, e meé mo á wíy keerí suuyrú won. Kí búŋ fó bèy, e fòn yir, bo vèn dzə̀ rú aŋkiy.» 17Wù nèn wày áwune é sháŋ vishiíy vitaár.

18Vishiíy ví rún ji vitaár, Joosev suúy aáwune jii, «M dzə̀ wír wo wù fan Nyùy, a kinyo ki dzə̀ shó kimòʼón ke a vèn yiì, bo á bòy ne. 19Fóo dìn ji vèn dzə̀ wír suuyruú, wìr fo vèn goʼ é sháŋ fo vèn dzəə̀n fey, é kibér ki li vifá ve yi ve vèn yunen, e dù, e fò e kfə́ə yéné ye jìŋ yúy áwune, 20é vèn nèn wìy e kinjòʼsìbàm kén kí, é m yén. Á kinyo ke kí yíi dìn ji vèn kù‑uù suuy a dzə̀ suuyrú, é la m yòʼ dzəə yùyrí ven.»

Áwune ku nèn lì bèy, 21a kfə̀ynìn áwune áwune jii, «Vèsən sí yén ŋgeʼ rə̀n bèn, bìʼ kinyo ke vèsən‑eè yiìn e fər wòsən. Vèsən‑eè lo yèn mo wù‑uù diyì, tóŋé, lón vèsən, la á yòʼ a ghay. Á kinyo ke kí yiìn, bo vèsən wáa dzə e ŋgeʼ fèn lèn.» 22Ruben suúy jii, «Bó m yòʼ‑oò lo sùúy ji lá vèn yòʼ yiì kinyo ke bi kí e wan və̀n à? Yii bèy, la vèn yòʼ yù. Lèn və̀n, vèsən sí laʼ fo wun kpu.»

23Aá kfəynìn bèy, a Joosev yú kinyo kidzə̀m ke áwune suuyì, aáwune yòʼ kì, bìʼ fo áwune kì súŋnin wùn à Joosev, a binèr wír wo sən lám. 24Joosev lò màʼtì áwune, e nèn dù, a dìy. Wù dìy bèy, e kfə̀n é bàm, e sùŋnín aáwune, e sùúy, á ghár Simeon, e kùr aáwuné si.

Afə́r Joosevi kfə́n é bàm é Kanan

25Joosev suúy ji á wáy á vifá ve yi aáwuné vibàm, e wày á mbàm se wìr mòʼón mòʼón e wun shùu kibàm, e fò áwune viyíkìr ve á wáa dù, a yi e dzəə. Á ku nèn yiì bèy. 26Afə́r Joosevi ku nèn kùr vifá ve vé‑eè yunen e vimbèʼbìy ví ndzə̀m, e nèn lò, a dù. 27Á meé fo vé‑eè yíi shiíy, wìr wùmòʼ mvə̀ʼ kibam kfə́ ji wun fəər a yí, e fo e kimbèʼbìy kí, e nèn yèn mbàm e shùu kibàm, 28e sùúy aàfə́r vəə́ jii, «Á siìr mbàm sém é bàm, síne e mǒ shùu kibàm.» Á yén bey, shilív shév shí seèm, á wáa yàʼ, a ghaynín áwune áwune jii, «Nyùy yii a dzə̀ ka kee ben e vèsən?»

29Áwune kfə́n é bàm é Kanan, e yèn tàr wov Jakov, e naàrì kinyo kidzə̀m ke kí‑iì kooyin áwune, a suúy jii, 30«Vèr‑iì dù, taà saʼ woo fó súŋnín e vèr kibiíbí, e tòy ver ji vèr wìy a ji á shwéʼ woŋ və́. 31Vèr bìnèr kér jii, ‹Vèr yòʼ dzə̀ á aŋgàa ŋkiy, vèr dzə̀ á vé suuyruú. 32Vèr dzə̀ á wón kitàr kimòʼón, a vèr‑iì dzə̀ á wír nshòv sibaà e ghvə̀m. Fər wor wùmòʼ‑oò kpù á ne, a kinjòʼsìbàm kér kí dzə̀ á e bàm é Kanan wùn tàr wor.› 33Wìr woo shooy, woo taà saʼ woo fó suúy ji dzəə̀ ye wun yíi tàr ji vèr sà dzə̀ vé suuyrú á dzə̀ á jii, wìr fo vèr lo, e gòʼ a wùn wun, é kibér ki li á vifá ve yi, a dù sho, e fo a e kfə́ə yér ye yí kpú jíŋ fo bàmé. 34Vèr li á kinjòʼsìbàm kér, e wìy sho, é wun yén. Vèr yii bèy, é wun nèn kìíy rú á ji vèr yòʼ dzə̀ aŋkiy, vèr dzə̀ rú á vé suuyruú. Wun yén bèy, é wun nèn fò á fər wor e vèr, é vèr ku nèn yiì a wìy, a yun a vifá ve yi fo fo.»

35Áwune yiì lòo bvə̀tì vibam vév, wìr dzə̀m yén mbàm sə́ e wun kibàm. Wùn à tàr wov yén bey, e nèn a fàn. 36Tàr wov Jakov suúy aáwune jii, «Vèn taʼ, e yiì, é m lay wón vém adzə̀m à? Joosev yòʼ dzə̀ə́, a Simeon dù ne. Lèn, vèn taʼ e lì Benjamin. Vinyo vìn vidzə̀m vi kù sùm a dzə̀ mo.»

37Ruben suúy e tàr wov jii, «Wáy wun e mǒ kiwo, é m yiì kfə̀n shó e bàm, e siìr e wò. A m dzə̀ làa yòʼ wìy sho, à yùyrí wón vém vee vilum vee abaà.»

38Jakov sháʼnín jii, «Bó yòʼ dzə̀ wan wom dù vèn áwune. Wàn yè wov kpù ne, a jòʼsì ne wun, wùn mòʼón. A vèn áwune lòo dù ghán yee shooy, kinyo ki koóy wun e dzəə, bo vèn yíi yiì, é mo wo kitú ki fərin ne kpú e mensíy mè si.»

Currently Selected:

Kèʼlo 42: LNB

Highlight

Copy

Compare