Fəə 40

Á tiír kibàn ké Nyùy Tàr

1 Nyùy Tàr nèn sùúy e Mooser jii, 2«Wíy lóo dzə e kishiíy ké mbìy ki fó ŋwee mbìyi#40.2: ŋwee mbìyi: Dzə̀ ŋwee woo Abiv. (Leéy: 12.2; 23.15)., à nèn nàn kibàn kém ké ntàsín, é kí tiím é yuv. 3Kí tiimè, à wày ŋkùv wo ntò se *mensàŋ si dzəə̀n shó e mvəm wó, e nèn kìŋ fó e raŋe. 4Áà nèn lì sa kidàŋ, e wày é kibàn, e tìír vifá və́ é kitu wo, e nèn wìy sa e kitiir ke làm ki, e tìír lam si shó. 5À yíi tiír *kíy cù kilay wo à fèrìn e *kisha ke mbàm ke baar kí, a dzə̀ é mbìy ŋkùv mensàŋ, e kfə̀n keèrì sa ndzə̀y sé a sətí shúu kibàn shó.

6«Ké *kiy cù woo wó cù ye tonèné, à yíi tiír e maàndzə, e ŋkìʼnìn shuù wo wú nəə e kibàn, 7e tiír màkìghìn wo á su virə́ʼ shó e nsàn kiy cù wùn à kibàn kí, e way mendzə́v shó. 8Wáyí, à nèn nàŋsín kay yeé maàndzə, e tìír, é yí kiŋ fó, e nèn kfə̀n keèrì ndzə̀y se sí sə́ti shúu kày wo wú nəə e maàndzə.

9«À maysì, à nèn lì meŋgvə́r me yoʼ, e yòʼ kibàn kém shó, e kfə̀n yòʼ vifá vidzə̀m ve ví dzəə̀n é mvəm wó, é kibàn wùn à kifá keé mvəm wó kidzə̀m ki wáa dzə jeéy ji kifá kém. 10À yíi yoʼ sa kíy cù woo wó cù ye tonèné, à vifá və́ ví vidzə̀m, é wú wáa dzə jeéy ji kifá kém ŋkuuŋkùŋ. 11Áà nèn yòʼ sá màkìghìn wo á su virə́ʼ shó, à kiyiy kfə́ kí, é wù wáa dzə jeéy ji kifá kém.

12«Á bèy, áà nèn kòʼór Aaron wùn à wón və́ vee vilume é shùu *kibàn ké ntàsín, e sù áwune e mendzə́v mè, 13e nèn màʼ ndzə̀y se á fèrìn ji see jeéy e Aaron wùn, e yòʼ wun, é wù wáa dzə jeéy ji wír wom, e fíʼ a lìm fo mò ji taà cù. 14Áà nèn kòʼór wón və́ fó mentsə̀m, e màʼ vikúm ve da ve fəvír ví aáwuné wùn, 15e yòʼ áwune mo à yoʼon tàr wov, aáwune fíʼ a lìm fo mò ji atàá cù. Mo à yíi yoʼ áwune ji atàá cù, kù dzə̀ mo rám yéví wíy a lìm ji atàá cù, e ŋgwàʼ sí ŋgwàʼ si.»

16Mooser ku nèn yiì vinyo vìn vidzə̀m, kù mo Nyùy tàr‑iì suuyin e wun. 17Kibàn ké Nyùy Tàr kí nèn tìím e yuv é kishiíy ké mbìy ki fó ŋwee mbìyi e kiya ke kí‑iì meen ji baà, e kèʼ mo vé‑eè loòn fó Ejiv#40.17: Kèʼ mo vé‑eè loòn fó Ejiv: Dzə̀ moó bǎm kiya bèy, a kfə̀n dzə̀ sá ŋwee bvə̀ʼə̀ tìítiy mo vé‑eè meen é Sinay. (Leéy: 19.1‑2).. 18Mooser‑iì tòmbìy neèr viyiy ve kibàn, e tìír vintàràŋ sho, e wàyrí mbàŋ si, e kfə̀n tìír vitóm. 19Wù nèn sàŋrì ndzə̀y é kitu ke vintàràŋ, e sàŋrì kikfə́vsì e kitu wo, kù mo Nyùy Tàr‑iì suuyin e wun.

20Wù nèn lì viwaŋ ve tiy ve vé‑eè saŋen ntò se mensàŋ sho, e wày é ŋkùv, e wàyrí vintoòr ve ŋkùv, e bóo sətí ŋkùv e nsər ye dzəə̀n ji kirə́ʼ ké kiman. 21Wù nèn lì ŋkùv mensàŋ və̀n, e dù, e tìír e kibàn, e keèrì raŋ ye yí wáa kìŋ ŋkùv mensàŋ, kù mo Nyùy Tàr‑iì suuyin e wun.

22Wù nèn lì kidàŋ, e dù sho e kibàn é mbìv yee fó mbìy ràŋ, e tìír e ghaa kirəv kee fó mbìv kùy, 23e tìír kibán ke cù sho, kí wáa tiy e Nyùy Tǎr si, kù mo Nyùy Tàr‑iì suuyin e wun.

24Wù‑uù tìír kitiir ke làm e ŋkìʼnìn kidàŋ, e ghaa kirəv ké kibàn keé mbìv yee tsə́n, 25e nèn sə̀ʼtì lam si, sí wáa ban e Nyùy Tǎr si, kù mo Nyùy Tàr‑iì suuyin e wun.

26Wù‑uù tìír kíy cù kilay wo vé‑eè fèrìn e kisha ke mbàm ke baar kí é mbìy ràŋ e mvə̀m kibàn ké ntàsín, 27e tòn kiláy ke rəʼtìn kí shó, kù mo Nyùy Tàr‑iì suuyin e wun. 28Wù nèn keèrì ndzə̀y é shùu kibàn.

29Ké kiy cù woo wó cù ye tonèné, Mooser tiír é maàndzə, e ŋkìʼnìn shuù wo wú nəə e kibàn, e nèn tòn nyám sho ji cu, e kfə̀n yiì cu ye dzəə̀n yé vifa ve yi fo, kù mo Nyùy Tàr‑iì suuyin e wun.

30Mooser‑iì tìír màkìghìn mendzə̀v me á su virə́ʼ shó e nsàn kibàn ké ntàsín wùn à kíy cùu, e nèn wày mendzə́v shó, 31me wùn à Aaron, à wón Aarone wáa sù wó wùn à wuú shó. 32Áwune‑eè lóo nəə́ e kibàn ké ntàsín, lóo koʼtí e shùu kiy cù, á sù virə́ʼ réŋréŋ mo Nyùy Tàr‑iì suuyin e Mooser ji á kú a yiì.

33Mooser kfə̀n‑eè tìír sá kay yeé maàndzə, yí kìŋ kibàn ké Nyùy Tàr wùn à kíy cùu. Wù nèn màysì, e keèrì ndzə̀y seé shùu kày wo wú nəə e maàndzə. Á mo Mooser‑iì màysìn lim yee bìʼ kibàn ké Nyùy Tàr ben.

Mbàʼŋkfəə́mé gbú é kitu ke kibàn ké Nyùy Tàr

(Kintaŋ 9.15‑23)

34Mbàʼŋkfəə́mé nèn gbù, e sə̀tí *kibàn ké ntàsín, rán Nyùy Tàrí rún é kibàn fó mvəm, 35la Mooser yòʼ dzəə yù fóo nəə́ e kibàn bìʼ mbàʼŋkfəə́mé ye yì‑iì gbuùn, à rán Nyùy Tàr ye yí‑iì runen é kibàné.

36Kí ku nèn a dzə bèy, e ghan sin se wír veé Israyi‑iì ghán e yuv. Mbàʼ‑aà yii lo fo kitu ke kibàn, bo áwune ŋáʼáy, a dù fomóʼó. 37Lóo dzə, a mbàʼ yoʼ lò, áwune kù nèn a dzə fo, a shìy kishiíy ke yì wíy lò. 38Fo ghan yév e dzə̀m, mbàʼ Nyùy Tàr‑iì lo, yì wàa dzə e kitu ke kibàn e shùy. Lóo dzə vitsə́ʼ, və́yí wàa ban e mvə̀m mbàʼ fèy, wír veé Israyi wàa yen.

Currently Selected:

Fəə 40: LNB

Highlight

Copy

Compare