Fəə 39
39
Ndzə̀y sé atàá cù
(Fəə 28.1‑14)
1Fo làv wo vé‑eè wìyìn shó və̀y, vé‑eè lì wo wù səə́ne moo yúv, à wo wù səə́ne moo yòm, à wo wù baŋ ji rèm, e fèr ndzə̀y se juujùŋ si shó ji see jeéy se dzə̀ Aaron lòo yiì lim rə́ e Nyùy kirə̀ʼ, wù wàa màʼ. A vé‑eè fèr réŋréŋ mo Nyùy Tàr‑iì suuyin e Mooser ji á wàá fer.
2Vé‑eè fèr shiŋkèéy shé kikum e ndzə̀y ye á baan e làv wo fəvír woo fèm, e tsə̀m e làv woo kisha ke mbàm ke baar kí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm. 3Vé‑eè dzə̀vtì *kisha ke mbàm ke baar kí dzə́vtin, kí vèmèn, é bo á sanri làv fo fo, wo vé‑eè tatin wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, e nèn bònen tsə̀m é ndzə̀y ye vé‑eè baan e làv wo fəvír woo fèm. 4Shiŋkèéy shé kikum shin shi‑iì kér vimbar vibaà é mbèʼ si, ve ví táti ŋkuv yee fó bàm wùn à yee fó mbìy. 5Kinsiŋ ke kí ghár shiŋkèéy shé kikum kin ki‑iì dzə̀, aá fér e víwun vee vifá ve á fèrìn kikúm shó vi, kiwó ke lìm ki wáa dzə sa kíwun, aá fér réŋréŋ mo Nyùy Tàr‑iì yòŋèn e Mooser.
6Á nèn lì *síbaŋ yee oniks e baà, e nàŋsín, e sàŋ yír sé wón Isray vee nshòv sibaà e ghvə̀m sho mo wìr fèr yii sáŋ nsáŋtí, e nèn fiì síbaŋ rəy e kisha ke mbàm ke baar kí, 7e làʼtí e vimbar veé mbèʼ se shiŋkèéy shé kikum ji ŋkùvtu wón Isray, réŋréŋ mo Nyùy Tàr‑iì suuyin e Mooser ji á ku yiì.
Kifin keé nsaŋ
(Fəə 28.15‑30)
8Á kfən fèr sa kifin keé nsaŋ, e nàŋsín, e tsə̀m e víwun vee vifá ve á kì lìmèn shiŋkèéy shé kikum shó vi. 9Vé‑eè fèr, e bvə̀nén vibar vibaà, mfìʼ se vibàr si wáa dzə réŋréŋ ntàm kiwo e mòʼón mòʼón, mbìv sidzə̀m. 10Á nèn tùúy *síbaŋ shó ŋgoo sikweè, a ŋgoo mbìy dzə̀ rubi wùn à topar, à garnet. 11Ye yì batin wáa dzə emeral wùn à safiri, à daymon, 12e ŋgoo yee taár nèn à dzə̀ jasin wùn à aget, à amatist, 13bo ye yì meen ji kweè wáa dzə beril wùn à oniks, à jespa, aá tuúy síbaŋ sin sidzə̀m, e fiì e kisha ke mbàm ke baar kí. 14Síbaŋ e dzə̀me‑eè dzə̀ nshòv sibaà e ghvə̀m, aá náŋsín, e sàŋ yír sí shó, a dzə̀ sé wón Isray ji ŋkùvtu rǎm Isray yee nshòv sibaà e ghvə̀m.
15Á nèn kfə̀n fèr shàŋ kifìn keé nsaŋ e kisha ke mbàm ke baar kí, kíwun kíwun, e tòy moo kfəə̀, 16e nèn nàŋsín vinta vibaà, e kfə̀n fèr andzə̀ŋgwáŋ abaà, kifá kidzə̀m ki wáa dzə kisha ke mbàm ke baar kí, e nèn tàŋ e kifìn keé nsaŋ kìy e kor see fó yuv. 17Vé‑eè wòvsín ashàŋ vee kisha ke mbàm ke baar kí vee abaà é shuù se andzə̀ŋgwáŋ vee abaà viy, 18e lì shuu se shàŋ, e tàŋ e vinta vee vibaà ve ví dzəə̀n é vimbar veé mbèʼ se shiŋkèéy shé kikum fó mbìy. 19Á nèn kfə̀n fèr andzə̀ŋgwáŋ ámóʼó abaà e kisha ke mbàm ke baar kí, e tsəə̀mé e kor se kifìn keé nsaŋ, a dzə̀ see fó sar, á wáa dzə e ghaa shiŋkèéy shé kikum. 20Á kfə̀n‑eè fèr sá ámóʼó vee andzə̀ŋgwáŋ abaà e kisha ke mbàm ke baar kí, e tsəə̀mé e shiŋkèéy shé kikum fó mbìv tsə̀n vimbar vee vibaà, a vé‑eè tsəə̀mé a dzə̀ é ghaa kinsəʼ e mbìv kùy kinsiŋ ke á bonen, e tsə̀m kiy ji á wáa kur shiŋkèéy shé kikum shó fo mbìy. 21Á nèn lì kfəə̀ wo wù səə́ne moo yúv, e wòvsín andzə̀ŋgwáŋ ve á dzəə̀n é kifìn keé nsaŋ wùn à ve á dzəə̀n é shiŋkèéy shé kikum. Kifin keé nsaŋ ki nèn neèm fo mbìv kùy kinsiŋ ke á bonen, e tsə̀m kiy, e làa yòʼ dzə́ə a bàyìn fo shiŋkèéy shé kikum. Vé‑eè fèr kidzə̀m réŋréŋ mo Nyùy Tàr‑iì yòŋèn e Mooser.
Ndzə̀y sé atàá cù símóʼ sí
(Fəə 28.31‑43)
22Á nèn fèr sa kikúm keé sar shiŋkèéy shé kikum, aá fér kidzə̀m e ndzə̀y ye nshòm səə́ne moo yúv. 23Vé‑eè tòʼ shúu kilòŋ fó kintìntìn, e tsə̀m, wú táv, fo wú yiì a saàsì, 24e kfə̀n fèr vitúʼtúʼ vé *grenadin e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm, e tsəə̀mé e shùu kikum fó sar. 25Á kfən fèr mbìír se ŋeerín sí e kisha ke mbàm ke baar kí kee wúntí kíwun, e tsəə̀mé sa e shùu kikum, a dzə̀ é nsàn se vituʼtúʼ fey. 26Vé‑eè tsəə́me kitúʼtúʼ, á tsəə̀mé mbìír, e yiì bèy, e kaàrí shúu kikum, e tàr, réŋréŋ mo Nyùy Tàr‑iì yòŋèn e Mooser. Kikúm kin ki‑iì dzə̀ ke taà cù‑uù yíi a màʼ, e bó a yiì lim rə́.
27Á kfən fèr vikúm ve da vi e ndzə̀y yee làv wo fəvír woo fèm ji vé Aaron wùn à vé won vəə́, 28e kfə̀n fèr tán se ndzəmén sí e ndzə̀y yee shooy, e fèr sa asə̀là ve tsəmé vee fó sar, a kù dzə̀ e ndzə̀y yee shooy. 29Á nèn fèr kikuúví e ndzə̀y yee làv wo fəvír woo fèm, e tsə̀m e làv wo wù səə́ne moo yúv, wùn à wo wù səə́ne moo yòm, à wo wù baŋ ji rèm, kù mo Nyùy Tàr‑iì suuyin e Mooser.
30Á fèr sa kicí ké tan e kisha ke mbàm ke baar kí, kíwun kíwun, e fíʼ dìn ji ŋgaà tàn dzə̀ á wír woo jeéy. Vé‑eè nàŋsín, e sàŋ shó jii, «Á shòʼ ne jeéy ji wo Nyùy Tàr.» 31Á nèn lì kfəə̀ wo nshòm səə́ne moo yúv, e sə̀ə́y kicí kiy sho e tan ye ndzəméné fó mbìy, réŋréŋ mo Nyùy Tàr‑iì suuyin e Mooser.
Kibaʼrì ke kibàn ké Nyùy ki máy
(Fəə 35.10‑19)
32Á bèy, wír veé Israyi nèn màysì lim yee bìʼ kibàn ké Nyùy Tàr e dzə̀m, aá ku yiì kifá kidzə̀m réŋréŋ mo Nyùy Tàr‑iì suuyin e Mooser. 33Á nèn lì ndzə̀y sé kibàn wùn à vifá vee fó ghaŋ vi vidzə̀m, e wìy, e yèn Mooser sho. Ví‑iì dzə̀ jii, viŋgov wùn à vintàràŋ vi, à mbàŋ si, à vitóm vi, à viyiy vi, 34à vikfə́vsì vee fó yuv ví, ve yì‑iì dzəə̀n gúrí wùn à juv nyàm ndzə̀v, à raŋe, 35ŋkùv mensàŋ wùn à vintoòr və́ ví, à nsər ŋkùv ye dzəə̀n kirə́ʼ ké kiman, 36kidàŋ wùn à vifá və́ ví vidzə̀m, à kibán ke cù ki, 37kitiir ke làm ke á fèrìn e kisha ke mbàm ke baar kí, kíwun kíwun, wùn à lam sə́ sí, à meŋgvə́r mvə mè, à vifá və́ vímóʼ ví vidzə̀m, 38*kíy cù kilay wo vé‑eè fèrìn e kisha ke mbàm ke baar kí, à meŋgvə́r me yoʼ mè, à kiláy ke rəʼtìn kí, à ndzə̀y se á sə́ti shúu kibàn ké Nyùy Tàr shó si, 39kíy cù woo kisha kee *brons wùn à kintaàr kfə́ kí, ke yì‑iì dzəə̀n sá brons, à vintoòr və́ ví, à vifá və́ vímóʼ ví vidzə̀m, à màkìghìn wo mendzə̀v me á su virə́ʼ shó wùn à kiyiy kfə́ kí, 40ndzə̀y se sí kiŋ maàndzə wùn à vitóm ve kày vi, à viyiy vév ví, à ndzə̀y se sí sə́ti shúu kày wo wú nəə e maàndzə si, aàkfə̀ə́ wùn à viŋkùm vi, à vifá vidzə̀m ve á yíi a yiì lim se kibàn ké Nyùy Tàr shó vi, 41e lì ndzə̀y se á bonen, e nàŋsín ji atàá cùu lóo yiì lim yév é kirə̀ʼ ké Nyùy, aá wáa màʼ, a sí dzə̀ jii, sé Aaron woo taà cù see jeéy, e bóo lì sé won və́ ve á yíi a lìm sa ji atàá cù.
42Wír veé Israyi kù‑uù yiì lim rə̀n e dzə̀m réŋréŋ mo Nyùy Tàr‑iì suuyin e Mooser. 43Mooser nèn wày sí e vifa vidzə̀m, e yèn ji á fèr a vidzə̀m réŋréŋ mo Nyùy Tàr‑iì suuyin. Wù nèn səə̀vì áwune.
Currently Selected:
Fəə 39: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
