Fəə 25
25
Vifá ve kibàn ké Nyùy Tàr
(Fəə 35.4‑9)
1 Nyùy Tàr suúy e Mooser jii, 2«Yòŋ, é wír veé Israyi cu mo. Ku sə̀ cúu fo wìr mòʼón mòʼón mo shilív sə́ shí bánri wun ji wù fó e mò. 3Cu rə̀ne yíi a dzə jii, kisha ke mbàm ke baar kí wùn à ke fəvír kí, à kisha kee *brons ki, 4à ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi, 5gúrí wùn à juv nyàm ndzə̀v, à vicí vé kibàʼrì vee *akaasia vi, 6meŋgvə́r me làm wùn à virə̀ʼtìn ve meŋgvə̀r ví, à vé kilay ví, 7à *síbaŋ yee oniks wùn à síbaŋ símóʼ sí se á yíi laʼtí e taà cù shiŋkèéy shé kikum#25.7: shiŋkèéy shé kikum: Dzə̀ shikumèn she taà cù wo kuʼùn‑eè maʼ vikúm, wù tàár é kitu wo, e bóo səə́y kifin keé nsaŋ sho. (Leéy: 28.6)., e kfə̀n laʼtí e wun kifìn keé nsaŋ.#25.7: kifìn keé nsaŋ: Leéy 28.4, 15‑30. 8M taʼ ji áwune baʼri kibàn kímóʼ kí kee jeéy, ke m wáa dzə sho e wír vémé mvəm.#25.8: Leéy mbìv Ji se Naarìn sí: Kibàn ké ntàsín. 9M lo, e dìn e wò e naáy naáy mo dzə̀ à bàʼrì, à vifá veé mvəm wó vi vidzə̀m.
Vifá veé mvə̀m kibàn ké Nyùy Tàr
(Fəə 37.1‑9)
10«À wíy fèr ŋkùv e kicí kee *akaasia ki, é vida vi wáa dzə ntàm se kiwo sitàn, é mbvə̀ʼ wáa dzə ntàm se kiwo sitaár, é vida ve koʼón ví wáa dzə sa ntàm se kiwo sitaár.#25.10: Ŋwàʼ woó Lǎm Hibrùu kér mfìʼ a dzə̀ kubit, a kubit e mòʼón dzə̀ ntàm se kiwo sibaà. Kóy mòʼóne nén a ker akubit akweè. 11À ferì, à lì kisha ke mbàm ke baar kí, e làʼtí e wùn wó fo ndzə wùn à fó mvəm, é kí sə́tí, e kfə̀n jùŋ shuu e kisha ke mbàm ke baar kí, e kaàrí, e tàr. 12À wíy fèr sa dzə́ŋ si sikweè e kisha ke mbàm ke baar kí, é sí wáa dzə e kiŋkar, e nèn tuúy e shwin see sikweè, é sí wáa dzə e wǔn ŋkùv sibaà sibaà. 13À wíy fèr vintoòr vibaà e kicí kee akaasia ki, e laʼtí kisha ke mbàm ke baar kí é wùn wó, é kí sə́tí, 14e nèn lì, e tsənsí e dzəŋ seé virəv vé ŋkùv vee vibaà, aá wáa toór sho. 15Vintoòr vi kù wíy gòʼ e dzəŋ sé ŋkùv, é la á yòʼ wìy shòʼ fó fo. 16M wíy fo wò viwaŋ ve tiy vibaà, aá sáŋ ne nsər se *mensàŋ sho, áà wáy é ŋkùv foo fèy.
17«Á wíy fèr nsər ŋkùv a dzə̀ e kisha ke mbàm ke baar kí, kíwun kíwun, é vida vi wáa dzə ntàm se kiwo sitàn, é mbvə̀ʼ wáa dzə ntàm se kiwo sitaár, 18e dzə̀vtì kisha ke mbàm ke baar kímóʼ kí, e fèr vifá veé yuv#25.18: vifá veé yuv: Dzə̀ kfə́ə nshìylav Nyùy yìmòʼ. Leéy mbìv Ji se Naarìn sí: Vifá veé yuv ve ví kér vav si. vímóʼ ví vibaà wùn à vav sév sí, é ví wáa tiy e kitu ke nsər ŋkùv fo mbvə̀ʼ si. 19À kù wíy fèr vifá vìn, é ví wáa dzə e kilàŋsìn wùn à nsər ŋkùv, kímóʼ kí é mbìv yìmòʼ, kímóʼ kí e yìmòʼ. 20Vifá vee vibaà vin vi wíy a kìʼnìn, a kiy nsər ŋkùv, aá nan vav sév, e sàŋrì, é sí wáa kfəvsí kirə́ʼ ké kiman kìn. 21À wíy lì viwaŋ ve tiy vee vibaà ve ntò se mensàŋ si dzəə̀n shó ve m wíy fo e wò, e way e ŋkùv, e sar kirə̀ʼ ké kiman. 22Dzə̀ é shùu ŋkùv foo fèy fo wòsò wíy a tarnín. M wíy suŋnín e wò fo kintìntìn ke vifa vee vibaà ve ví dzəə̀n é kitu ke nsər ŋkùv mensàŋ, é m nèn a fo nsər sém sidzə̀m se dzə̀ à fò e wír veé Israyi.
Kidàŋ ke kiban ke cù
(Fəə 37.10‑16)
23«À wíy fèr sa kidàŋ e kicí kee *akaasia ki, é vida vi wáa dzə ntàm se kiwo sikweè, é mbvə̀ʼ wáa dzə ntàm se kiwo sibaà, é vida ve koʼón ví wáa dzə ntàm se kiwo sitaár. 24À wíy laʼtí kisha ke mbàm ke baar kee wúntí kíwun e wùn wó, é kí sə́tí, e kfə̀n jùŋ shuu e kisha ke mbàm ke baar kí, e kaarí, e tar. 25À wíy fèr sa kikiŋ, é kí kaárí kiyiy ke kidàŋ, e tàr, é vikuʼùy ví wáa dzə mbvə̀ʼ kiwo. Áà nèn lì kisha ke mbàm ke baar kí, e bàrír sho, e kaàrí, e tàr. 26Áà kfən fèr dzə́ŋ e kweè, a kù dzə̀ e kisha ke mbàm ke baar kí, e tùúy e kor see sikweè fo shwín sí dzə̀kìn, 27aà kù tuuy a dzə̀ fó mbìv kùy, e sar kiyìy mo dzə̀ sí ghàr vintoòr ve á toor kidàŋ sho. 28À wíy fèr vintoòr e kicí kee akaasia ki, e laʼtí *kisha ke mbàm ke baar kí é wùn wó, é kí sə́tí, aá wìy a beʼ kidàŋ kìn sho. 29À wíy fèr vikáŋ wùn aàláŋé, e kfə̀n fèr ansiŋ wùn à vighín ví, a dzə̀ ve á wíy a màʼ meluʼ me cù sho, áà ku fèr vifá vìn a dzə̀ e kisha ke mbàm ke baar kí, kíwun kíwun. 30À kù wíy a lèm kibán ke cù e kidàŋ foo fèy, é kí wáa dzə e mǒ si ghán sidzə̀m.
Kitiir ke làm
(Fəə 37.17‑24)
31«À wíy fèr sa kifá ke á tiir lam si shó, aà kù fer e kisha ke mbàm ke baar kí, kee wúntí kíwun, é kiyiy wùn à wúné wáa dzə kisha ke mbàm ke baar ke dzəvtìn kí. À ferì, à nàŋsín, é vimboo wùn à vibuushì vé kifa vi wáa dzə e wùn wó e kilàŋsìn, e virə̌ʼ virə̀ʼ. 32Kitiir kìn ki wíy a ker tám ntuùfú, e taár fo mbìv yee mòʼón, e taár fo yìmòʼ yee mbìv. 33Tám e mòʼón mòʼón fo woo ntuùfuú wíy a ker vibuushì vitaár, a ví dzə̀ moo kibuushì ké *almon mo kí fəən fó kirə̀ʼ ke boón kí, e nshwìnin wàn kighìn. 34Lóo dzə kiwóŋrín kfə́, é vibuushì vé almon vi wáa dzə sho vikweè wùn à kirə́ʼ ke boón kí fó sar. 35Kirə́ʼ kidzə̀m fo tám si jàvìn fó kiwoŋrín, é kifá ke boón kin ki kú a dzə. 36Kiwóŋrín wùn à tám si, à kifá ke boón kí wíy a dzə, aá dzə́vtí a dzə̀ kisha ke mbàm ke baar kí, kee wúntí kíwun, é kitiir ke làm kìn kidzə̀m ki wáa dzə kilàŋsìn.
37«À wíy fèr lam sə́ saàmbà, e tiír sho, é sí fiʼ wìy a kàʼày mbìv yee fó mbìy. 38À kù wíy fèr sa vimfar ve á náŋsin akfə̀ə́ làm sho, a dzə̀ e kisha ke mbàm ke baar kí, kíwun kíwun, e fèr wón vikaŋ və́ réŋréŋ bey. 39À wíy lì kisha ke mbàm ke baar kí, kee wúntí kíwun akilu nshòv sikweè e mtaár,#25.39: Keé Lǎm Hibru ki dzə̀ jii, talen e mòʼón, a dzə ji akilu 34. e bóo fèr kitiir ke làm kìn sho, à vifá veé ghaŋ wo vi vidzə̀m. 40À kù wíy fèr, é kí wáa dzə réŋréŋ ji kikúv ke kíwun ke m dìnèn e wò e gwan fèn.
Currently Selected:
Fəə 25: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
