Fəə 24

Finèr mensàŋ

1 Nyùy Tàr màysì, e fò nsər sìn, e sùúy e Mooser jii, «Kóʼ é kitu ke gwan, e yèn mo. Kù yíi wìy vèn à Aaron, à Nadav, à Abihu#24.1: Nadav, Abihu: Yì‑iì dzə̀ wón Aaron. (Leéy: 6.23)., à vilìmbìy veé Isray vímóʼ ví msaàmbà. Vèn lóo meʼ fó, á tsə̀m ndzəə́, e làʼ kitú e nsay, a ghvəm mo, aá dzə̀ə́ kwaʼda. 2Kù mày wò wo à yíi koʼtí e mǒ mentsə̀m. Kibér ki yòʼ yíi meʼ mo, a bó màŋgòŋ yòʼ fə̀m yíi koʼ e gwan.»

3Mooser nèn dù, e yèn wíri, e fìʼtì jí se Nyùy Tàr sidzə̀m aáwune, e kfə̀n fìʼtì nsər se wù foon. Màŋgòŋ yú, e bìnsí jí e mòʼón jii, «Kinyo kidzə̀m ke Nyùy Tàr suuyin, vèr yíi a yiì.» 4Mooser nèn sàŋ nsər se Nyùy Tàr sidzə̀m fo nsay. Ndzə bvəə́shí, e jàv, wù bóm *kíy cù e sar gwan, e lì sə́y si nshòv sibaà e ghvə̀m mo rám seé Isray si dzəə̀n, e tùúy, sí wáa tiynín fo e kitu kitu. 5Wù nèn tùm wónlě nsùm veé Isray ámóʼó, á tàʼ nyám si, a cù Nyùy Tàr e cu ye tonèné wùn à ye á yii yii e nàʼ ji yé kikòŋnìne. 6Mooser sə́ mensə́ me nyàm sìy, e tòʼnín, e wày memoʼ mè e vighin, e lì kibér, e wàŋ é kiy cù, 7e nèn lì Ŋwàʼ Mensàŋ#24.7: Ŋwàʼ Mensàŋ: Ŋwàʼ və̀ne dzə̀ wo Mooser‑iì saŋen nsər se mensàŋ sho., e yòŋ e wíri. Áwune yú, e bìnsí jii, «Kinyo kidzə̀m ke Nyùy Tàr suuyin, vèr yíi a yiì, a yunín wun.» 8Mooser nèn lì mensə́ mèy, e wàŋrí e wírí wùn, a suúy jii, «Á mensə́ me mè fìnèrìn *mensaŋ me Nyùy Tàr gwàrìn vèn áwune, e fò ven nsər sìn sidzə̀m.»

9-10Mooser nèn lò, e kòʼ é gwan wùn à Aaron, à Nadav, à Abihu, à vilìmbìy veé Isray vee msaàmbà vìy vi. Wùn áwune yén Nyùy wo dzəə̀n woó Isray, a mfiì dzə̀ e wun sar wuù, a yì kiʼ moo *síbaŋ ye á yoŋ ji safiri, a yí səə́ne moo yúv bey. 11Mo kfə́m seé Isray si fə̀m‑eè yenen Nyùy bèy, wù yòʼ‑oò lo laàr áwune. Á kfə̀n‑eè yìnín, e nònín e wun si.

Mooser e Gwan Sinay wùn Nyùy

12 Nyùy Tàr nèn sùúy e Mooser jii, «Kóʼ é gwan fèn fo m dzəə̀n, a yuurí mo, é m lo, e fò wò viwaŋ ve tiy, a nsər sém wùn à ntir sém sí dzə̀ shó, a m sáŋ ji sí wáa tir wíri.» 13Mooser nèn ŋàʼáy wùn ŋgaà sə və Joshua, a koʼ e Nyùy gwan.#24.13: Aŋwàʼ vee fó ŋgùʼ ámóʼó kér jii: Mooser nèn ŋàʼáy wùn ŋgaà sə və Joshua, Mooser wáa koʼ e Nyùy gwan. 14Á lòo lò, e naàrì e vilìmbìy vi jii, «Vèn shiy ver fen, e meé mo vèr yíi kfən e bàm. Kí Aaron wùn Hur dzə̀ vèn áwune? A wìr sìíy, a ker kinyo, wù dù, e yèn áwune.»

15Mooser ku nèn a koʼ e Gwan Sinay fèy, a mbàʼ súm fó. 16-17Rán Nyùy Tàrí sə́y, a ban e kitu ke gwan, a wír veé Israyi yén kév rán Nyùy Tàr, a yí dzə̀ moo və́y wo wú baári e kitu ke gwan. Mbàʼ kú a sùm fó, e dù, e mèé kishiíy ntuùfú. Lòo meé e kee saàmbà ki, Nyùy Tàr súŋnín fó mvə̀m mbàʼ, e jàŋ Mooser. 18Wù nèn nə̀ə́ e mvə̀m mbàʼ, e kòʼ é kitu ke gwan. Wù‑uù dzə̀ʼə̀m fó kishiíy mkweè, e shùy wùn à vitsə́ʼ.

Currently Selected:

Fəə 24: LNB

Highlight

Copy

Compare