Fəə 26
26
Ndzə̀y sé kibàn ké Nyùy Tàr
(Fəə 36.8‑38)
1«Kee kùm kibàn kém, à kù wíy fèr vintsə̀m vé ndzə̀y e ghvə̀m, a dzə̀ ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm. À wíy tsəm nshwìnin *kifa keé yuv ke kí kér vav si shó. 2Vintsə̀m vé ndzə̀y vidzə̀m vi wíy a ker mfìʼ e mòʼón, kóy saàmbà saàmbà fo vidà, é mbvə̀ʼ wáa dzə kóy e fur. 3À wíy tsəəmé vee vitàn e kilàŋsìn, é ví fer kiŋkàŋ kimòʼón, e yiì sa e vee vitàn vi réŋréŋ bey. 4À wíy way dzə́ŋ si é shuù se ndzə̀y see fó ghaŋ, e fèr dzə́ŋ sidzə̀m e ndzə̀y se sí səə́ne moo yúv sí. À kù wíy wayrí bèy e viŋkàŋ vee vibaà, 5e wayrí dzə́ŋ sìn mtàn e shuù se ndzə̀y seé kiŋkàŋ ké mbìy ki, e wayrí sa e ke kí batin kí, kù mtàn, é dzə́ŋ si wáa kìʼnìn. 6Áà nèn nàŋsín viŋgov mtàn e *kisha ke mbàm ke baar kí, e wòvsín viŋkàŋ vé ndzə̀y vee vibaà vin sho, é ví wáa dzə kilàŋsìn, é ndzə̀y sin sidzə̀m si nèn lìm kibàn kifur.
7«À wíy fèr sa ndzə̀y símóʼ sí se sí wíy a neŋ e kitu wo, aà fer see shooy e wúy bvəyi, é sí wáa dzə vintsə̀m nshòv mòʼón e ghvə̀m. 8Ví wíy a dzə réŋréŋ vidzə̀m kóy saàmbà e kimbéʼ ki fó vidà, kóy e fur fo mbvə̀ʼ. 9À wíy tsəəmé vee vitàn kiŋkàŋ kimòʼón, e tsəəmé vee ntuùfú kiŋkàŋ kfə́ jeéy, aà kù wíy bvən kibar ke kí meen ji ntuùfú fó kintìntìn e kitu ke shùu kibàn. 10À wíy wayrí dzə́ŋ si mtàn e kiŋkàŋ ké ndzə̀y ké mbìy ki, a dzə̀ é mbìv yee mòʼón, e wayrí e kímóʼ kí sá bèy. 11Áà nèn fèr viŋgov mtàn e kisha kee *brons ki, e wòvsín dzə́ŋ si shó, e tàtí viŋkàŋ vé ndzə̀y vin ji ví lim kibàn kifur. 12Kintsə̀m ke kí sìmsìn vida ve kibàn kí wíy a səŋ fo kirəv ké bàm kí. 13Vintsə̀m ve ví sìmsìn fó virəv ve da vi wíy a səŋ fo ghaŋ si, e fíʼ sùm kibàn.
14«À wíy fèr sa vikfə́vsì vímóʼ ví vibaà ve ví wíy a sətí kibàn fó yuv, fer kímóʼ kí e gúrí, áà fer kímóʼ kí e jùv nyàm ndzə̀v.
Vintàràŋ ve kibàn ké Nyùy Tàr
15«Ké kibàn, wúntí kíwun, à kù wíy fèr vintàràŋ ve tiirín ví e kicí kee *akaasia ki. 16Kintàràŋ ki wíy a dzə kóy e baà e kimbéʼ ki fó vidà, é mbvə̀ʼ wáa dzə ntàm se kiwo sitaár. 17À wíy beéy shóy sé kintàràŋ see sibaà fo á wíy a tatí e viyìy. Á mo à wíy fèr vintàràŋ ve kibàn bey vidzə̀m. 18Fo mbìv kibàn ye yì wíy a leéy tsə́n, à wíy fèr vintàràŋ mbaà, 19e fèr viyiy mkweè e kisha ke mbàm ke fəvír kí, ve á wíy way e sar se vintàràŋ vee mbaà. Kintàràŋ ki wíy a ker viyiy vibaà mo virə́ʼ ve á beeyin ví dzəə̀n. 20Fo mbìv kibàn ye yì wíy a leéy kuy, áà fer sá vintàràŋ mbaà, 21e kfə̀n fèr viyiy vee kisha ke mbàm ke fəvír kí mkweè, é viyiy vi wáa dzə e sar kintàràŋ vibaà vibaà, vintàràŋ vidzə̀m. 22Fo kirəv ké bàm kí, é mbìv yee fo shùy yii nəə, áà fer vintàràŋ vee fó ntuùfú. 23À wíy fèr sa vintàràŋ vímóʼ ví vibaà, a dzə̀ veé buu se kibàn see fó bàm. 24Áà fer vin, é ví táʼám fó sar, e tàtí fo yuv fo kfə́v dzəə̀n. Á mo buú see sibaà see fó bàm sí wíy a dzə bèy. 25Vintàràŋ vìn vi wíy a dzə waamé, é viyiy vi wáa dzə nshòv ntuùfú e ghvə̀m, vibaà vibaà é sar kintàràŋ, aá ku fèr e kisha ke mbàm ke fəvír kí.
26«À wíy fèr sa mbàŋ se sí ghár vintàràŋ ve kibàn, aà kù wíy fèr e kicí kee akaasia ki, é sí waá dzə nshòv sitàn e ghvə̀m, sitàn fo vintàràŋ veé kirəv keé mbìv yee tsə́n, 27sitàn fo keé mbìv yee kuy, à sitàn sa fo ké bàm kí e mbìv yee fo shùy yii nəə. 28Mbàŋ ye yì tìmnìn kirə́v dzə̀ kfə́, a yì keʼ fo mbìy, e dù, e màysì fo bàm e fur. 29À kù wíy lì kisha ke mbàm ke baar kí, e laʼtí e wǔn vintàràŋ, e kfə̀n laʼtí e wǔn mbàŋ si, e sətí vidzə̀m, e fèr akfə́v ve á wíy a ghar mbàŋ si sá e kisha ke mbàm ke baar kí. 30Áà nèn tàtí kibàn réŋréŋ ji kikúv ke kíwun ke m dìnèn e wò e gwan fèn.
31«À wíy fèr raŋ e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, áà nèn kfə̀n tsə̀m nshwìnin *kifa keé yuv ke kí kér vav si#26.31: kifá keé yuv ke kí kér vav si: Leéy: 25.18. shó. 32Raŋ rə̀ne wíy a ker e vitom vímóʼ ví vikweè ve á fèrìn e kicí kee akaasia ki, e làʼtí kisha ke mbàm ke baar kí é wùn wó, é kí sə́tí. Viŋgov və́ ví kú a dzə kisha ke mbàm ke baar kí, é viyiy ve vitóm vee vikweè vi tíy sho vi wáa dzə kisha ke mbàm ke fəvír kí. 33À wíy keèrì raŋ e viŋgov foo fèy, e tiír ŋkùv mensàŋ e bàm wó, é raŋe wìy a jàvsìn kirə́ʼ ke dzəə̀n kee jeéy kí féyì fo kirə́ʼ kee jeéy kí. 34À kù wíy lì nsər ŋkùv mensàŋ, e sətí sho, e mvə̀m kirə̀ʼ kee jeéy kí féyì. 35À fəə́ raŋ, áà tiír kidàŋ e mbìv yee kùy, e tìír kitiir ke làm e mbìv yee tsə́n, é wùn à kidàŋ ki wáa kìʼnìn.
36«À wíy fèr sa ndzə̀y se á sə́tí shúu kibàn shó, aà wíy fèr a dzə̀ e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, aá kfən nàŋsín e tsə̀m. 37Áà nèn fèr vitóm ve nshìy rə̀n vitàn e kicí kee akaasia ki, e làʼtí kisha ke mbàm ke baar kí é wùn wó, é kí sə́tí, e nèn fèr viŋgov e kisha ke mbàm ke baar kí, e fèr viyiy və́ vitàn e kisha kee brons ki.
Currently Selected:
Fəə 26: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
