Fəə 23

Sáʼa wáa dzə tìítiy, a ker suuyrú

1«Lá wìr yòʼ a sàmèr kimboʼtì. Lá wìr yòʼ tòm wir liì kisaŋ, e tìím vinjen ve kisaŋ vi. 2Lá wìr yòʼ jùmrì kinyo ke kisaŋ ke màŋgòŋ yii. Wìr lóo tiím vinjen e kibàʼ ke nsaʼ, lá wù yòʼ jùmrì kinyo ke màŋgòŋ, e lò, e laàr suuyrú. 3Lá wìr yòʼ dìn sa jeéyjeéy e ŋgaà kitàn e lav nsaʼ ji bìʼ fo dzəə̀n ghéʼncey.

4«A wìr yèn nàʼ ŋgaà vibàn və, kìn dzə̀ kimbèʼbìy kfə́, a kí ghán, jáné, wù bìnèr, e kfə̀n shó, e fò e ŋgaàŋ. 5Wù yén, a kimbèʼbìy kfə́ kí gbú e vifá ví ndzə̀m, wù wàa yen fóo shaà, e làa yòʼ sə wun, e nàn.

6«Ŋgaà kitàn lóo tiy e kibàʼ ke nsaʼ, vèn wàa yen fó shwìv nsaʼ rə. 7Lá vèn yòʼ tòy wír e kinyò kisáŋ. Vèn wáa yen fó yiì, aá yúyrí wír woo là njò, a bó wù yoʼ jày kinyo. Bó m yòʼ wíy màʼtì wír wo wù yiìn kfə́ə kinyò ke bi kee bey. 8Lá wìr yòʼ sə̀ kòyàr, bìʼ fo wù yíi yiì, é wìr wo wù sí yén virə́ʼ kfə́n ji mfìr, aá shwiv nsaʼ wìr woo là jay.

9«Lá vèn yòʼ a sətí gháy kiŋgwìy. Vèn kì mo kí yii dzə́ fó a dzə kiŋgwìy, bìʼ fo vèn‑eè dzəə̀n viŋgwìy e Ejiv.

Ntò se kishiíy ké bam wùn à kiyá ke bamén kí

10«Vèn wáa lìm súmé, a kav vifá ve yi fo fo kiyá ntuùfú. 11Yii bèy, lóo dzə e kee saàmbà ki, é vèn nèn kwìír, e màʼtì là káv ji aŋgàa kitàn vee věn mvəmé wáa yikír sa fo fo, é nyám seé kwaʼ si wáa yi sa kibér. Kù dzə̀ sá mo vèn yíi a yiì e súm vitiír vé *vayin vi, à wó vici vé *oliv vi bey.

12«Vèn wáa lìm líme kishiíy ntuùfú, lóo dzə e kee saàmbà ki, vèn meèmè, é nàʼ wìr wùn à kimbèʼbìy kfə́ kí meeme, é wír və́ kibàme rəsin, é kiŋgwìy ke kí lim fo wun ki rəsin sá.

13«Vèn lem vinyo vìn vi vidzə̀m ve mo woo Nyùy Tàr suuyin e vèn. Lá wìr yòʼ a ghvəm anyùy ámóʼó. Lá á yòʼ fə̀m yù, a wìr gáʼ yír sév fo wun shuù.

Viŋkàʼ ve wiy ví vee vitaár e kiya

(Fəə 34.18‑26; Remrí 16.1‑17)

14«Lóo dzə e mvə̀m kiya, vèn wàa dù akàŋ ataár, a yiì ŋkàʼ, a ghvəm mo shó. 15Vèn wáa yiì *Ŋkǎʼ Kiban kee là Nyaà. Vèn kù yíi a yi kibán kee là nyaà kishiíy saàmbà mo mò‑oò suuyin e vèn. Vèn kú a yiì bèy, e ghan se sí dzəə̀n silemèn é ŋwee woo *Abiv, bìʼ fo dzəə̀n ŋwee woo shooy wo vèn‑eè fəən fó Ejiv. Á kuúmé sá ji lá wìr yòʼ wìy a wìy ŋkàʼ wóm e wó rəə́ kisáŋ. 16Vèn wáa yiì *Ŋkǎʼ Vifa ve Kavín ví#23.16: Ŋkǎʼ Vifa ve Kavín ví: Á yoŋ sa ŋkàʼ vən ji Ŋkàʼ woó bǎm Ŋgàm si. (Leéy: 34.22)., e ŋgòn se vifa ve vèn lìmèn e věn sum ví. Vèn wáa yiì sa *Ŋkàʼ wo dzəə̀n wó Màysì Ŋkavìn#23.16: Ŋkǎʼ Màysì Ŋkavìn: Á yàm yòŋ ŋkàʼ vən ji Ŋkǎʼ Tàv sé Ghan. (Leéy: Cù 23.39)., a kiyá ki sí mayì, a vèn máysí ne, e bàʼtí vifá ve vèn‑eè lìmèn e věn sum. 17Vilum vén adzə̀me wíy a wìy e mǒ kirə̀ʼ ké cù akàŋ ataár e kiya, a yiì ŋkàʼ bìʼ mo woo Nyùy Tàr woo Taà Ndzə.

18«Vèn lóo cù mo e nyàm, lóo fo mensə́ e mò, lá vèn yòʼ a cù e kibán ke nyaà kí. Lá vèn yòʼ lèm fóm se nyàm ye á cuùn mo shó e ghan sé ŋkàʼ, é sí meé kijàvndzə.

19«Vèn káv vifá ve mbìy vee věn nsay, vèn shàv ve juŋ vi, e wìy sho e mǒ lav, mo woo Nyùy Tàr woo Nyùy won.

«Lá wìr yòʼ nàá wan bvəy e vín kiyìyí.#23.19: Nyùy‑iì sháʼnin bèy, bìʼ fo dzəə̀n kinyo ke wír ve vé‑eè cu anyùy kisaŋe‑eè yii.

Aŋkàʼmé wùn à ntir si

20«Vèn yén ri, m yíi tum nshìylav yem, é yì wáa tsəəné ven, a kìŋsìn, e dù sho e kirə̀ʼ ke m naŋsin, e lèm e vèn. 21Vèn wáa ghvəm wun, a yunín wun. Wù súŋnin e mǒ yir ji kitú kém, a bó yòʼ dzə̀ wù làysìn jay wìr wo wù káy wun. 22Yii bèy, a vèn yiì a yunín wun rúrú, a yiì vinyo vidzə̀m ve m yíi a suúy, bo m yíi a bàn aŋgàa vibàn vén, a fùnèn áwune adzə̀m. 23Nshìylav yem yíi lì ven, e nəə́ sho e wòŋ wìr veé Amor wùn à veé Hiti, à veé Perisi, à veé Kanane, à veé Hivi, à veé Jebusi. A m yíi laàr áwune fó fo. 24Vèn wáa yen fóo wìy a ghvəm anyùy vév, a cù áwune, a jùmrì dzə́ə sév. Vèn laar mebvə̀m mev mè láarin, e bvə̀ʼtí sə́y se sí tíynin aáwuné virə̀ʼ vé cù.#23.24: Sə́y sìn si dzə̀ visəəm vé anyùy ve wír veé Kanane‑eè cu. 25Vèn kú a ghvəm a dzə̀ mo woo Nyùy Tàr woo Nyùy won, é m wìy a səə̀vì ven e viyíkìr vi, à mendzə́v mè, e kfə̀n a kìŋ sa ven fó ayàsí. 26Á yòʼ wíy taŋ wiíy, a bó kár yòʼ wíy a dzə e věn wòŋ. M wíy fo ven dzəʼə̀m ye dáa.

27«M wíy yiì, é vitúm vee fó vi kú a fàn mo, e kfə̀n tùʼùr wír vee shooy ve vèn áwune wíy a fùnèn, e nèn yiì, áàŋgaà vén vibàné binkir, a nyeŋ ven nyéŋén. 28M wíy tum vimfàŋfàʼáy#23.28: M wíy tum vimfàŋfàʼáy; Kìn jii: M wíy way kindzə́m áàŋgaà vén vibàné meliv., é ví wáa shem e věn mbìy, a jùm wír veé Hiv wùn à veé Kanane, à veé Hiti, aá wáa nyeŋkír. 29A bó m yòʼ wíy jùm áwune é bǎm kiya gheéy, fo woŋe kfə́n é kinshaàrì, é nyám se kwaʼ si wáa kùʼnìn, a ghaʼ ven. 30M kù wíy a jùm áwune fo věn mbìy ji weè weè, e meé mo vèn wíy taʼám, e yòv woŋ. 31M wíy fèr bìíy yen, e kèʼ fo Rìbà Ndzə̀v wo Baar, e dù, e meé e Rìbà Ndzə̀v woó Filistia#23.31: Rìbà Ndzə̀v woó Filistia: Dzə̀ jii: Rìbà Ndzə̀v woo Mediteranean., e kfə̀n kèʼ fo woʼ, e dù, e meé e ndzəv yee Yufret. A m wíy yiì, áàŋgàa nsayi gbu ven, é vèn jum áwune, e fə̀ə́r. 32Lá vèn yòʼ wìy gwàr *mensaŋ vèn áwune. Lá vèn yòʼ gwàr sa vèn aànyùy véví. 33Lá vèn yòʼ wìy biìmé, é wír vìne shwír wún e věn wòŋ, a dzə vèn áwune. A vèn wìy màʼtì, bo á wíy levtí ven, é vèn wáa cù anyùy vév, e jay e mò.»

Currently Selected:

Fəə 23: LNB

Highlight

Copy

Compare