Fəə 16
16
Vifá ve yi ve Nyùy‑iì foon é woʼ
1Wír veé Isray adzə̀me yiì lò, e ŋàʼáy fo Elim, a dù e woʼ yee Sin, ye yí dzəə̀n é ntìntìn Elim wùn Sinay, e mèé fo e kishiíy kee nshòv sitàn e ghvə̀m fo ŋwee wo wú‑uù meen ne ji baà,#16.1: ŋwee wo wú‑uù meen ne ji baà: Á yoŋ ŋwee və̀n e Lǎm Hibru jii, Ziv, a wú yii ghánen e kintìntìn ke ŋwee Nsoʼ woo Vishévtì (April) wùn à wó Màʼàn Sàŋ (May). kèʼ mo vé‑eè loòn fó Ejiv. 2Wíri nèn lò, a bashí Mooser wùn Aaron, 3a suúy aáwune jii, «Yì‑iì bòŋ ke Nyùy Tàr yúyrí ver é Ejiv fo vèr‑iì dzə́, yí kibán e nyàm, a bvəm yérí kúrí, e shaà ke vèn li ver, e wìy sho fèn, e màʼtì ji màŋgòŋ və̀n e dzə̀m kpú jíŋ.»
4Á bèy, Nyùy Tàr nèn sùúy e Mooser jii, «Lèn, m yíi a səʼə́r viyíkìr vén wír adzə̀m fo yuv. Wír veé Israyi kù yíi a fəə kishiíy kidzə̀m, a baʼtí ve a dzə̀ á yì é kishiíy fó. E dzəə fen, é m nèn mùm áwune, e yèn ó ji á sà yíi a jùmrì nsər sém moo ŋgáŋ á? 5Lóo dzə e kishiíy kee ntuùfú, aá báʼtí vifá ve yi, é ví wáa dzə moo veé vishiíy vímóʼ ví virə́ʼ vibaà, e nèn fèr.»
6Mooser wùn Aaron nèn sùúy e wìr dzə̀m woó Isray jii, «Yíi lòo dzə e ŋkuùr lán, é vèn nèn kìíy ji dzə̀ á Nyùy Tàr wo wù‑uù fəərin ven fó Ejiv. 7Bvəə́shi lòo dzə kijàvndzə, é vèn yén mo vikuʼùy vé Nyùy Tàr ví dzəə̀n. Nyùy Tàr yù ne ghvəʼ ye vèn ghvəʼ wun. Bó vèn yòʼ ghvəʼ a dzə̀ ver. Vèr dzə̀ kér ala?» 8Mooser wáa dzə̀sì, a suúy jii, «Nyùy Tàr yù ne mo vèn ghvəvrì wun. Wù yíi fo ven nyám e ŋkuùr, e kfə̀n fo kibán kijàvndzə, é vèn yí, é ví gháʼ. Vèn ghvəvrì a dzə̀ wun, vèn yòʼ ghvəvrì ver. Vèr yòʼ siì dzə̀ kér ji ala?»
9Mooser nèn sùúy e Aaron ji wù yoŋ á e wìr dzə̀m woó Isray ji áwune kóʼtí á fo mentsə̀m, e tìím e Nyùy Tǎr si. Wù yù á ne ghvəvrì ye áwune ghvəvrì. 10Aaron dù, e lòo suŋnín e wìr dzə̀m woó Isray bèy, á nèn bìnkìr, a leéy wóʼ, e lò yèn, a rán Nyùy Tàrí fəə́sín é mvə̀m mbàʼ. 11Nyùy Tàr suúy e Mooser jii, 12«M dzə̀ a m yú ghvəvrì ye wír veé Israyi ghvəvrì mo. Suúy aáwune jii, yíi lòo dzə e meraaràŋ, aá wáa ker a nyám yé a yi. Lóo dzə kijàvndzə, aá wáa ker a kibán mo áwune koŋè. Á bèy, aáwune nèn kìíy a ji mo woo Nyùy Tàr, dzə̀ á mo wo dzəə̀n Nyùy wov.»
13Wáa dzə e ŋkuùr, menə́n mee búmér mè nèn wìy, e gbù fo wír veé Israyi‑iì dzə́, e sə̀tí virə́ʼ. Kfə́n a dzə kijàvndzə, ŋweʼe gbù fó e dzə̀m. 14Ŋweʼe yuúmé, kifá kímóʼ kí wáa neŋ e woʼ kilàsir, a kí shwínin sèke kiban. 15Wír veé Israyi yén, e làa yòʼ kiíy, e nèn a dzə̀rnìn jii, «Kin ki dzə̀ ka?»
Mooser nèn sùúy aáwune jii, «Dzə̀ kibán ke Nyùy Tàr foon ji vèn wáa yi. 16Nyùy Tàr suuy a ji wìr dzə̀m wáa baʼtí a mo dzə̀ wù yì. Wìr kú a lì a e kighín kighin#16.16: kighín: E Lǎm Hibru, mfìʼ yee kighín rə̀n dzə̀ ji omer, a yì dzə̀ moo alita abaà bey. fo wìr mòʼón mòʼón mo wíri dzəə̀n e wun lav.»
17Wír veé Israyi ku nèn yiì bèy. Wír ámóʼó báʼtí kikuʼùn, ámóʼó báʼtí shishàr. 18Á lòo fìʼ e kighín kighin, la ké wìr wo wù kì baʼtin kikuʼùn kí yòʼ kùʼ e shaàsìn, la ké wìr wo wù kì baʼtin shishàr ki yòʼ dòrnín. Wìr‑iì báʼti mo wù baʼtin, ví kù ghèén mo a dzə̀ wír vee wun lavi yì. 19Mooser nèn sùúy aáwune jii, «Wìr wáa yen fóo màʼtì, é kímóʼ kí meé kibvəə́shí.» 20Yii bèy, la wír ámóʼó yòʼ yù Mooser, e nèn lèm kibér ji kee kibvəə́shí. Dzə́r si nèn nə̀ə́ sho, kí wáa rə̀m, Mooser wáa shwiíy kilòŋ wùn áwune. 21Á ku nèn a baʼtí vifá ve yi kijàvndzə kidzə̀m, a wìr báʼti, kù mo wíri dzəə̀n e wun lav. Shùy lumè, kibér ki nèn yaàné fo nsay.
22Lòo dzə e kishiíy kee ntuùfú, á báʼtí vifá ve yi vilíŋ vibaà, a dzə̀ ji vighín vibaà vibaà fo wìr mòʼón. Vilìmbìy vév ví nèn dù, e bì kinyo kìn e Mooser. 23Wù nèn sùúy aáwune jii, «Nyùy Tàr yoŋ a ji kibvəə́shí kí dzə̀ á kishiíy ké meèmè. Dzə̀ kishiíy ké bam ke Nyùy Tàr, a dzə̀ á kishiíy kee jeéy kí. Vèn wàá náŋsín á vifá ve yi ve vèn baʼtin lán, e tòn ve tonèn ví, e nàá ve naán ví. Vèn lóo yi, á bèr á vee kibvəə́shí.» 24Áwune ku nèn yiì mo Mooser kì suuyin, e lèm kee kibvəə́shí, kí bvəə́shi e làa yòʼ rə̀m, la dzə́r si yòʼ nə̀ə́ sho. 25Mooser suúy jii, «Vèn yí kee shoon ki lán, bìʼ fo lán dzəə̀n kishiíy ké bam ke Nyùy Tàr. Bó vèn yòʼ yíi yen kímóʼ kí, a kí gbú lán. 26Dzə̀ mo vèn kù wíy a baʼtí e vishiíy vee ntuùfú. Lóo dzə kee saàmbà, bo dzə̀ kishiíy ké bam, a bó yòʼ dzə̀ vèn yèn kímóʼ kí é kishiíy fóo fèy.»
27Wù suúy bey, wír ámóʼó ku fəə̀ é kishiíy kee saàmbà kìn ji á du, e bàʼtí. Á dù, e làa yòʼ yen, fə̀m à shishàr sho. 28Nyùy Tàr nèn sùúy e Mooser jii, «Vèn wíy ten fó a lèm nsər sém wùn à ntir sém sí, e wìy dù, e meé e le? 29Vèn wáa kuumé ji fò á mo woo Nyùy Tàr ven kishiíy ké bam. Á kinyo ke kí yiìn, é bo m wáa fo ven viyíkìr veé vishiíy vee vibaà é kishiíy kee ntuùfú. Vèn goʼ é melav e kishiíy kee saàmbà, é la wìr yòʼ fəə̀ kishwáŋ.» 30Á bèy, wíri ku nèn a meèmè e kishiíy ke dzəə̀n kee saàmbà.
31Fo ké vifa ve yi ve vé‑eè báʼti vìy, wír veé Israyi yòŋ yír ji manna#16.31: manna: E Lǎm Hibru, yír rə́ne koó fo kisuŋnìn moo kinyo kee jii, «Kin ki dzə̀ ka?». Ví‑iì fə́r moo ŋgoòy kifa ye fəvír bey, kfə̀n nyom moo kifá ke á tovin e meŋkfəŋ mè wùn à vilu vi, e bóo tòn. 32Mooser suúy jii, Nyùy Tàr yoŋ a ji á lem á kímóʼ kí é kighin, é ŋgwàʼ yen wìy sìíy, a yen e dzə̀m. Dzə̀ á kibán ke wun‑eè yiir a atàr vév shó e woʼ, e ghan se wun‑eè fəərin áwune á fo wòŋ Ejiv. 33Wù yòŋ bèy, e sùúy e Aaron jii, «Lì mbìʼí, e fìʼ kighín ké manna ki, e wày shó, e tìír e Nyùy Tǎr si, é kí wáa dzə fo, bìʼ ŋgwàʼ ye yì wíy siíy, a wìy.» 34Aaron ku nèn yiì mo Nyùy Tàr kì yòŋèn e Mooser bèy, e lì kibán kìy, e tìír e mbìy ŋkùv mensàŋ#16.34: ŋkùv mensàŋ: Leéy: 25.10‑22. ji kí wáa dzə fo kilemèn.
35Wír veé Israyi‑iì yì vifá ve yi ve á yoŋ ji manna vìy kiyá mkweè,#16.35: Leéy: Josh 5.11‑12. e dù mèé mo vé‑eè nəən fo vé‑eè dzə̀ʼə̀mèn. Vé‑eè ghàn, e dù mèé e bìíy yeé Kanan fo vé‑eè dzə̀ʼə̀mèn, aá kù yí a dzə̀ manna. 36Vighín ve vé‑eè fiʼ manna və̀n sho vi dzə̀, a dzə̀ ví nə̀ə́ e ghvə̀m e kigátí#16.36: kigátí: E Lǎm Hibru, mfìʼ yee kigátí rə̀n dzə̀ ji effa, a yì dzə̀ moo lita mbaà bey..
Currently Selected:
Fəə 16: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
