Fəə 15

Yòv Mooser wùn à wír veé Israyi

1Mooser wùn à wír veé Israyi nèn a yòv luŋ, a sùyrì Nyùy Tàr. Vé‑eè yov jii:

«M yíi a yòv luŋ, a sùyrì Nyùy Tàr, wù sò e viwìr vi.

Wù màʼ nyamŋkoʼ, à ŋgaà koʼ e rìbà ndzə̀v.

2 Nyùy Tàr dzə̀ vitaáví vém, a dzə̀ yòv wom.

Wù lò ne, e lùŋèr mo.

Dzə̀ wun Nyùy wom, a m yíi a burí wun,

Nyùy wo tàr wor ghvə́mé, a m yíi a wùʼsì wun.

3 Nyùy Tàr dzə̀ wir rə̀r, yír rəə́ dzə̀ Yahweh#15.3: Yahweh: Leéy: 3.14‑15..

4Wù màʼ *viténtén vé rər vé Farao e rìbà ndzə̀v, mànjòŋ və láy.

Rìbà Ndzə̀v wo Baar#15.4: Rìbà Ndzə̀v wo Baar: Leéy: 13.18. sə́n amfòómé Farao ntayi.

5Ndzə́ví súm áwune, á sə́y fó sar moo kilán.

6«Éè Nyùy Tàr, kóy wó yìyí kér vitaáví ve wiy ví.

Éè Nyùy Tàr, kóy wó yìyí tee vé vibàné.

7Vikùʼùy vé ve vifòn vi maʼ aŋgaà vé vibàn,

dòʼshwiiy wò kóʼó, wù tòn áwune moo jíy.

8À kì fèr yúy, ndzə́ví rún, e fùmén,

ye leŋéné tiím é kikfər,

rìbà ndzə̀v távtí fo wù shoon, e jòʼsì.

9Ŋgaà vibàn dzə̀v nsaŋ jii, ‹M yíi jùm áwune, e koo.

M yíi jàv káv wóv, e lì mbìv ye m koŋè.

M yíi shoʼ nyùy yem, e laàr áwune e kiwó kém kí.›

10À ló ké, e fèr shwér fo wò shuù, ndzə́ví súm áwune,

á sə́y é màndzə̀v moo ŋgòʼ kishà.

11«Éè Nyùy Tàr, dzə̀ la moo wò aànyùyí mvəm?

À dzə̀ ké Ŋgaà wo Ranén, a vikuʼùy vé vi dzə̀ jeéy.

A dzə̀ yiì la viŋgaʼnìn ve vinyò ve ví kér viwìr moo wò?

12Wò‑oò nàn kóy wó yìyí, nsay mèy aŋgaà vér vibàn.

13À kù wíy a dìn koŋ yé ye wiyí, a tsəəné wír ve wò‑oò tinen fo aŋgaà vév vibàné.

À kù wíy kìŋsìn áwune e vitaáví vé vi, e dù sho e wò kirə̀ʼ ké dzə ke ranén kí#15.13: e wò kirə̀ʼ ké dzə ke ranén kí: Dzə̀ woŋ Kanan..

14Vitúm vi wíy yu, a yàʼ,

tímé wíy kpu wír veé Filistia.

15Wúné wíy beemé afon veé Edom,

vilìmbìy veé Moav vi wíy a yàʼ.

Melív mè wíy seèm wír veé Kanan, aá weey.

16Kindzə́m kí wíy toʼnín áwune, aá wáa fàn, a yàʼ.

Éè Nyùy Tàr, bìʼ kóy wó vitaavií,

áwune kù wíy a sov fo moo kilán,

e meé mo wír vée wíy shaà,

wír, ve wò‑oò tinen fó vikwàn.

17Éè Nyùy Tàr, à kù wíy lì áwune,

e dù sho, e dzə̀ʼə̀r e wò gwan,

kirə́ʼ ke à naŋsin ji ké ke dzə,#15.17: kirə́ʼ ke à naŋsin ji ké ke dzə: Dzə̀ Jerusalem.

ŋgày bùnrì ye bomen wò e wó yée.

18 Nyùy Tàr kù wíy a saʼ vifon ghán sidzə̀m, e dù, e mày.»

19Vé‑eè yov bèy, bìʼ fo Nyùy Tàr‑iì yiìn, rìbà ndzə̀v sùm wír Farao. A vé‑eè nə̀ə́, Nyùy Tàr siìr ndzə́v, yí kuúy nyám se ŋkoʼ, à vé koʼo adzə̀m, e tàtí viténtén. Yii bèy, a wír veé Israyi kì tòsín kév rìbà ndzə̀v a dzə̀ é nsay ye yumér.

Yòv Miriam

20Miriam woo jemèr Aaron‑eè dzə̀ *ŋgaà ntum Nyùy. Wù nèn lò, e lì shinshùm#15.20: shinshùm: Dzə̀ shiwán shé nshùm, aá wáyrí misharìn fo ghaŋ si, e kaàrí. Á yii ghár kiwó kimòʼón səʼsì., vikìy adzə̀me lì sa sév e wun bàm, wùn áwune wáa kùm, a cèŋ. 21A Miriam tóri yòv, aáwune kooy jii:

Vèsən yov luŋ, a sùyrì Nyùy Tàr, wù sò e viwìr vi.

Wù màʼ nyam ŋkoʼ wùn à ŋgaà koʼ e rìbà ndzə̀v.

Mendzə́v me shiʼirín meé Maraa

22Mooser nèn lì wír veé Isray fo Rìbà Ndzə̀v wo Baar, a dù sho e woʼ yeé Shur. Vé‑eè ghàn vishiíy vitaár e woʼ, aá yòʼ yén mendzə́v. 23Á meé é Maraa, e làa yòʼ yu fóo no mendzə́v mee fó, bìʼ fo mè‑eè shíʼirì. Á kinyo ke kí‑iì yiìn, bo á shu yír yee fó ji Maraa#15.23: Maraa: Nsàv yìr rən dzə̀ é Lǎm Hibru ji «shíʼír.». 24Wíri nèn a bashí Mooser, a suúy jii, «Vèr yíi no ka?» 25Mooser tóŋ e Nyùy Tàr, Nyùy Tàr dìn kicí e wun, wù màʼ e ndzəv, mendzə́v mè nèn bòŋ.

Dzə̀ é kirə̀ʼ fen fo Nyùy Tàr‑iì tiirin kinyo kímóʼ kí aáwuné wùn, e fò nsər ye dzə̀ áwune wàa lèm, e taàsín áwune shó. 26Wù‑uù sùúy jii, «Dzə̀ mo Nyùy Tàr, wo wù fer ayàsí vén. A vèn yiì a yu mo, a yiì vinyo vee tìítiy, a lèm nsər sém, a yiì vinyo ve m tiirin e věn wùn vidzə̀m, bo m yòʼ yíi màʼ ŋgeʼ yàsí e věn kitu ye mò‑oò màʼàn e wír veé Ejiví kitu.»

27Áwune nèn lò fo fo, e dù e Elim, a ntòŋ sé ndzəv sí dzə̀ fó nshòv sibaà e ghvə̀m wùn à vicí vé ten ví msaàmbà. Á nèn tàm táv sí, e beè fo e ghaa ndzəv.

Currently Selected:

Fəə 15: LNB

Highlight

Copy

Compare