Fəə 17

Mendzə́v mè fəə́ fó kilan

(Kintaŋ 20.1‑13)

1Ŋgoo wìr veé Isray e dzə̀m nèn yiì lò, e ŋàʼáy fo woʼ yee Sin, a ghan, a beè e virə̌ʼ virə̀ʼ mo Nyùy Tàr‑iì yoŋè. Á dù, e beè e Refidim, la mendzə́v mè yòʼ a dzə fo me á wáa no. 2Wíri nèn a tàʼ melaà wùn à Mooser, à Aaron, a suúy jii, «Vèn fó ver mendzə́v, é vèr nó.»

Mooser dzə́r aáwune jii, «Vèn taʼ melaà vèsən ben bìʼ ka? Vèn ghíʼ Nyùy Tàr ji wù ku yiì kinyo ji ka?»

3Kilòŋ kí kú a yum wíri yúmén, á wáa bashí Mooser, a suúy jii, «Wò‑oò lì ver fó Ejiv, e wìy sho fèn ji ka? À taʼ e yiì, é vèr à wóné, à nyám sér sí kpú kilòŋ ke yumén kí a?»

4Á bèy, Mooser wáa toŋ kitávín e Nyùy Tàr, a suúy jii, «M yíi yèe le e wír vìne? Á bàʼtí ne ji á lo, e tsəmrí mo e tíyí, e yuyrí.»

5 Nyùy Tàr nèn sùúy e Mooser jii, «Lì vilìmbìy ve wìr veé Isray vímóʼ ví, é vèn áwune shaa wíri fó mbìy. Vèn áwune lóo dù, à lì mbàŋ ye wò‑oò dzə̀vìn ndzə́v yee Naay sho rə̀y. 6M yíi a tiy e wò mbìy e kilan ke kí dzəə̀n é Gwan Horev. À mee fo, à dzə̀v kilán kee shooy e mbàŋ, é mendzə́v mè fəə́ fó fo, é wíri wáa no.» Mooser dù, e yiì bèy, a vilìmbìy ve wìr veé Isray vi yéné. 7Wù nèn shù yír kirə̀ʼ kee shoon ji Massaa#17.7: Massaa: Nsàv dzə̀ é Lǎm Hibru ji «mum.», bìʼ fo wír veé Israyi‑iì mum Nyùy Tàr fó, gháy jii, «Nyùy Tàr dzə̀ vèr áwune moo ŋgáŋ á?» Wù kfən shù sa yímóʼó ji Meriba#17.7: Meriba: Nsàv dzə̀ ji «melaà.», bìʼ fo áwune‑eè taʼ melaà fo.

Wír veé Israyi só wír veé Amalek

8Wír veé Amaleki#17.8: Amalek: Dzə̀ kitúm kímóʼ kí, a kí‑iì dzə̀ é kirə̀ʼ ké woʼ kí, ghán ghanén wùn à nyám sév sí. nèn lò, e wìy e Refidim, e nə̀ə́ wír veé Isray e rə́r sí. 9Mooser nèn sùúy e Joshua jii, «Shóʼtí vilum, aá du, e fùnèn wír veé Amalek. M bvəə́shi dù, e tiím e kitu ke gwan vèr à mbàŋ rə̀n e mǒ kiwo, mbàŋ rə̀n, ye yì kér vitaáví vé Nyùy.» 10Joshua nèn dù, a fùnèn wír veé Amalek mo Mooser kì suuyin. Mooser wùn à Aaron, à Hur kóʼ kév é kitu ke gwan. 11Mooser nan kóy sə́ é yuv, sí lóo dzə e yuv, wír veé Israyi nèn a so. Wù lóo səʼə́r fo nsay, wír veé Amaleki nèn a so. 12Kóy se Mooser si yiì tàvtí, Aaron wùn Hur nèn tàʼ tíy, e neèr e wun sar, wù dzə̀ʼə̀m sho. Áwune nèn a tom kóy sə́, wír fo mbìv fen, wùmòʼ fó fèsə, sí ku nèn gòʼ e yuv, e dù, e meé mo shùy‑iì nəən. 13Bìʼ bey, Joshua nèn sə̀ʼsí wír veé Amalek e nyùy.

14 Nyùy Tàr nèn yòŋ e Mooser jii, «Sáŋ kinyo kìn ki é ŋwàʼ ji á fiʼ wìy a kuumé. A kí dzə̀ jii, m wíy laàr wír veé Amalek e dzəə ye bó wìr yòʼ dzəə́ wìy yu kikum kév é kitu ke nsay. Ku yòŋ kinyo kìn ki e Joshua kitùʼùr.» 15Mooser nèn lò, e bòm *kíy cù, e shù yír jii, «Yahweh#17.15: Yahweh: Leéy: 3.14‑15. dzə̀ cícíwàr wóm.» 16Wù wáa shù bèy, a yòŋ jii, «Vèn tóm kinyo ke Nyùy Tàr kí.»#17.16: vèn tóm kinyo ke Nyùy Tàr: Nsàv kinyò kìn yoʼ fəə̀ kiránén é Lǎm Hibru. Wù wíy a fùnèn wír veé Amalek, ŋgwàʼ yìmòʼ e yìmǒʼ bàm.

Currently Selected:

Fəə 17: LNB

Highlight

Copy

Compare