Iberiu 2

Yaubada Natuna imalatomota ada yava ivinibesoida, tauna ina livala tanuwokavatēdi

1E Natuna gagaina namliyeta anerose. Moe pasina tauna itoboineda Natunayana ina livala tanuwokavatedi, govila bei tasuláiga. 2Boi Yaubada ina livala#2:2 Yaubada ina livala: Ame Yaubada ina Katukeda boi Mosese ivini. anerose iivinidi sitalavaite Mosese yaina moe livala aba numisa. Tuwo avatauwa neta boi sikapipilave, e idi kapipilovayadi tamo tamo adi katumapu sibabanedoko. 3-4Neta amo tauyadi idi kapipilova pasina liuna sibabane, e kita bei manakaeda neta yava gagaina valena takatae? Valayana boi ida Tomoya igimitalavaite go, tauyadi sigiiminove sikamoitamoe yaida. Ago valayana ana kamoitamo Yaubada nakae italavaite kidi taiyao ame nakae: Ina nuwonúwana goi aba kinana kainaaopaidi be guinuwa toogagaidi tamo tamo siguinuwedi be nakae Baloma Kimaasabaina ina kaiguyau tamo tamo tomota iivinidi. Manakae? Neta amo valayana taakatae, bei itoboineda liuna tasiyae? Geya! Tauna tayagoi valayana moe gagaina.

5Ame moitamo. Livalayana tanuwokavāte. Poyapoya ame sinapuna vau imamaima adigedige go, manakae? Yaubada anerose itagonedi tuta amo tomota liliudi yaidi goi siilovina? Geya! 6E bogina tayagoi Gínina Kimaasabaina goi Same italavaita avatau bei iilovina. Sameyana idigo kana,

‘Yaubada e,

Tomota kaga bego manuna kunuwonúwana?

Kaga unana kumatakaavateda?

7Tuta kaakupina tauna kwaisobuye

anerose sobuyekoidi goi ikaaiyaka.

Go nava bei kukilagasi,

e taimámina be wowoina kuvini.

8Go kaga liliuna aena ogalaoina goi

kuyatoidi kuvasobusobuyedi,#1 Korinta 15:27; Epeso 1:22; Iberiu 2:8.

tauna tauyana kaga liliuna bei ikalibubudi.’

Same 8:4-6

Tutayana idigo kana, ‘Kaga liliuna kuvasobusobuyedi’, moe ana yagoina geya tayaamo kaga ikesa bego geya ivasobusobuyeta. Ego ame tuta tagite ana kaigigita bego kaga liliuna aena ogalaoina goi nava geya ivasobusobuyedita. 9E koroto tayamo tagite, Tauyana tuta kaakupina goi Yaubada ina anerose sobuyekoidi goi ikaisobuye. Moe Tauyana Yeisu. Ina kámasa ana gedageda pasina Yaubada ikilagasi taimámina be wowoina ivini, e bei Yaubada ina kanuwóiya goi kita tomota liliuda manuda ámasa ilotowo. 10Moitamo Yeisu itoboine ikámasa. Yaubadayana pasina be nakae toinina manuna kaga liliuna sikaaiyaka. Tauna itoboine ada yava ana Tokaimatana ina gedageda goi ikatubayasi bego ina nuwonúwana iguinuwe. Ina nuwonuwanayana bego kita ina bodao liliuda Yeisu ivakededa tana Yaubada ana káeyana tomoeeyalina goi tasiu. 11Yeisu itoboine ivakededa. Tauyana Tokimasaba be nakae kita kimaasabaida liliudakova unada tayamo, moe Tamada Yaubada, tuwo kita boda tayamo. Moe pasina tauna Tauyana ona geya imaemaeta ivasiyaneda 12tutayana Yaubada ilatuwoko idigo kana,

‘Yoim bei atalavaite segowo yaidi goi.

Moe nakae im totugugunayao nauyayanaidi goi

bei vesi yapali avesiye yaim.’

Same 22:22

13Aiyuwoina ina numisa senao nakae manuna idigo kana,

‘Yau bei guna numisa Tauyana yaina goi ayato.’

Aiseya 8:17

Kana,

‘Yau amegu,

gogómana taiyao boi Yaubada bogina inuumisegu

iivinigu amatakavatedi.’

Aiseya 8:18

14E tuwo kita gogomanayada liliuda ma sakavaida be ma ikaikaida, tauna Tauyana nakae sakava be ikaika ikotedi bego ina kámasa goi itoboine bei ámasa ana tolovina ina togaga itusaoli; tolovinayana moe Totagíwaya. 15Aiyuwoina ikote bego kita italigeida. Kita yawoida madabokina goi tamatoita bego ámasa ana tuta liuna tababane, e moe matoitayana boi iipakoida go, bogina italigeida. 16Bogina tayagoi Tauyana ima geya bego anerose ivaitedi, go sem ima kita Eberamo tubunao ivaiteda.#Aiseya 41:8-9. 17Moe pasina tauna itoboine Tauyana kaga liliuna goi imalatomota kita senao nakae bego ietonúwala toolagaina nuwokaapisina#Tateta 34:6. be aba numisa#1 Samwera 2:35. Yaubada ina paisewa liliudi manudi, e bei kita ina bodao ida goyo inuwolidi. 18Tauyana itoboine ivaiteda. Boi gedageda ilotowo tutayana aba vakakona ibabane. Tauna itoboine tauyadi adi kaba vakakona sibaabanedi ivaitedi.

Currently Selected:

Iberiu 2: GVS

Highlight

Copy

Compare