Iberiu 3

Yaubada ina livala tanumīse bei ina kaba waiwasi goi tasiu

(Iberiu 3:1—4:13)

Taabu ida numisa taakalāve be nakae taabu Yaubada niyana takapiipilāve

1E tauna segowo kimaasabaimi Yaubada umana be nakae yábana goi mami duduwo yau nakae, Yeisu tanuwolelēuye. Tauyana Yaubada ina vamoléyana be nakae ida Tonúwala Toolagaina takamooitamoe. 2Tauyana aba numisa ina tovayókwana yaina goi nakae Mosese aba numisa tovayokwanayana ina bodayáuwo yaidi goi.#Yoyowo 12:7. 3Tauna Yeisu tanuwolelēuye. Tauyana itoboine taimámina ibabane namliyeta baige Mosese. Moe nakae vada ana toyówana taimámina gagaina ibabane namliyeta vadayana. 4Bogina koyagoi. Vada liliudi sikaaiyaka tomota siyowóidi go, Yaubada kaga liliuna adi toyówana. 5Go Mosese tovaita aba numisa, e Yaubada ina bodayáuwo liliudi ivaitedi be kaga nava bei Yaubada iidigedi tauyana italavaitedi. 6E kina go Guyau aba numisa, tuwo Yaubada ina vada irugwausidoko geya kada kitom nakae geya, go sem Natuna nakae. Vadayana moe kita,#Roma 8:9; 1 Korinta 3:16, 6:19; 2 Korinta 6:16; Epeso 2:21-22; Nuwogau 21:3. neta moitamo ida katepatu Yaubada yaina manuna be nakae ida uyawana gagágasa ida lotuta ina katótula manudi tayoisikaavatedi.

7E Baloma Kimaasabaina idigo kana,

‘Ame neta Yaubada niyana konove,

8taabu kodaabakāsa

nakae boi nimatu tokapipilova idi tuta vakakona

yoyowo goi sikapipilova.

9-10Amoko goi tala poti guna guinuwa toogagaidi

siigitedi go, tuwo tubumiyaoyadi sikapipilavegu.

Latuwodi bego sigite bei amesayágana yaidi o geya.

Moe pasina ame tomotayadi aegamogamoguyedi,

adigo kagu,

“Tuta liliuna atedi goi siisuláiga.

E kidi guna kenao geya siyagoidita.”

11Nakae boi guna egamogamogu goi

bogina toinigu yoigu goi akatótula kagu,

“Guna kaba waiwasi#3:12 Guna Kaba Waiwasi: Ame Kenani idigedige. goi

bei geya sisiuta!”’

Same 95:7-11

12Tauna nakae Baloma Kimaasabaina ina bobwarayana, segowo, e alatuwokoimi komi nakae mami nunūwata, govila bei tomota maniyemi yaimi goi atemi madi goyo, e imi numisa goi kosou bei Yaubada maa yawoina kokalave. 13Go sem maliyalina tamo tamo goi semiyao atedi kovapatuupatūdi. Neta itoboineda kada, ‘Ame tuta’, e nakae koguuinūwe, govila bei maniyemi goyo ina pola pasina kodabakasa. 14Bogina koyagoi. Kita bogina Guyau tasiuko taeboda tayamo neta ida numisa boi mainao tagiminumisa nakae tayoisikavate ana kadókana tuta ana kaba lukavava. 15Moe nakae Same idigo kana,

‘Ame neta Yaubada niyana konove,

taabu kodaabakāsa

nakae boi nimatu tokapipilova idi tuta vakakona

yoyowo goi sikapipilova.’

Same 95:7-8

16Moitamo taabu kodaabakāsa. Avatauwa yoyowo goi boi Yaubada sinove go, sopana sikapipilave? Tubumiyao maniyedi? Geya, go sem madabokiidi Mosese boi ivakededi Itipita goi sisowóduwo.#Yoyowo 14:1-35. 17E avatauwa tala poti goi Yaubada iegamogamoguyedi? Tauyadi toogoyoidi boi yoyowo goi sikámasa ae?#Yoyowo 14:29-30; Yuda 1:5. 18Boi Yaubada ikatótula idigo kana,

‘Guna kaba waiwasi bei geya sisiuta geya.’

Same 95:11

Go moe avatauwa yaidi ikatótula? Kidi tokapipilova ae? 19Tuwo tagite bego ina kaba waiwasiyana goi geya itoboinedita sisiu unana geya sinumiseta.

Currently Selected:

Iberiu 3: GVS

Highlight

Copy

Compare