Apocalipsis 3

Je̱'e̱ ayuuk tu̶y'ajt mu̶dyiibu̶ jim Sardis yajke̱jxu̶ñ

1“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Sardis: ‘Du'un je̱'e̱ myu̶na'añ je̱'e̱ mu̶dyiibu̶ je̱'e̱ juxtujkpu̶ Dios y'espíritu mu̶dajtpu̶ñ y je̱'e̱ juxtujkpu̶ mu̶dza'a. U̶u̶ch nnejwu̶u̶ybyu̶ch ku̶xyu̶ tii miich mduumbyu̶ñ y nnejwu̶u̶ybyu̶ch ko ka'p, miich du'un mja'ayajnigápxy mja'ayajnimu̶dya'agy ko oy yajxón mduñ, du'un miich neby je̱'e̱ o'ogypyu̶ju̶ñ oy mja'ayajnigápxy mja'ayajnimu̶dya'agy ko mjuugyu̶ch. 2Ma'aywyij y yajmu̶jtu̶gu̶'u̶ je̱'e̱ mmu̶bu̶jku̶ñ mu̶dyiibu̶ xyjyakniwu̶'u̶mbu̶ñ, y nan ja'awe̱njáty je̱'e̱ nandu'un kya'atu̶gooyñu̶, u̶u̶ch, tu̶ u̶u̶ch n'ixy ko je̱'e̱ mu̶dyiibu̶ mduumbyu̶ñ ka'p je̱'e̱ jim ku̶xyu̶ ñaxy ma u̶u̶ch je̱'e̱ nDios winduuyu̶ñ. 3Ja'aymyé̱tz je̱'e̱ u̶xpu̶jku̶ñ mu̶dyiibu̶ tu̶ myajmo'oyu̶ñ; panu̶kx y jootwimbít ma je̱'e̱ Diosu̶ñ. Pu̶nu̶ ka'p ni'ixu̶'u̶ m'ity, nninú̶kxu̶py du'un neby tu'ug me̱e̱tzpu̶ju̶ñ ma naty ka'p tii mdajy mmayu̶ñ y ka'p tii mju̶jp'íxyu̶ñ. 4Peru̶ jim Sardis je̱'e̱ ja'ay we̱e̱nu̶ mu̶dyiibu̶ je̱'e̱ jyoot wyinma'añ ka'p tu̶ yajju̶bu̶ku̶u̶ygyu̶xyu̶ñ, du'un neby je̱'e̱ wyit tyukxy tu̶ ka'ayajju̶bu̶ku̶u̶ygyu̶xyu̶ñ; je̱' u̶u̶ch xymyu̶d'ídu̶p ajku̶xy mu̶u̶d je̱'e̱ wa'adzpu̶ jyoot wyinma'añ ajku̶xy, du'un neby u̶u̶ch poob wit mu̶u̶dpu̶ du'umbu̶ xymyu̶d'ijtku̶xyu̶ñ, je̱' ko paattu̶p je̱'e̱ du'un ajku̶xy. 5Pu̶njaty je̱'e̱ ju̶bu̶kpu̶ mu̶madaakku̶xpu̶ñ wa'adz jyoot wyinma'añ je̱'e̱ y'ijtku̶xnu̶ch, du'un neby poob wit mu̶u̶dpu̶ du'umbu̶ ajku̶xyu̶ñ, y ka'p u̶u̶ch je̱'e̱ xyu̶u̶ njo'tzu̶ch ajku̶xy ma je̱'e̱ jugy'ajt libroju̶ñ, nnigápxu̶byu̶ch xyu̶u̶ je̱'e̱ ajku̶xy ma u̶u̶ch je̱'e̱ nDios Teedy winduuyu̶ñ y ma je̱'e̱ y'ángelestu̶jk winduuyu̶ñ. 6¡Pu̶n tadzak mu̶u̶d, wan amdo'íty neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ!’ ”

Je̱'e̱ ayuuk tu̶y'ajt mu̶dyiibu̶ jim Filadelfia yajke̱jxu̶ñ

7“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Filadelfia: ‘Du'un je̱'e̱ myu̶na'añ je̱'e̱ mu̶dyiibu̶ wa'adzu̶ñ y tu̶y'ajt mu̶u̶du̶ñ, je̱'e̱ mu̶dyiibu̶ je̱'e̱ ane̱'e̱mbu̶ David y'awaatzk mu̶dajtpu̶ñ, je̱'e̱ mu̶dyiibu̶ ko tii yaj'awa'ach ka'p mu̶baad ni pu̶n yaj'adúky y ko tii yaj'adúky ka'p mu̶baad ni pu̶n yaj'awa'ach. 8U̶u̶ch nnejwu̶u̶ybyu̶ch ku̶xyu̶ tii miich mduumbyu̶ñ; ok'ix tu̶ u̶u̶ch je̱'e̱ tu̶gu̶u̶ydyaakt tu'ug nbu̶da'agy ma je̱'e̱ mwinduuyu̶ñ, mu̶dyiibu̶ ka'p mu̶baad ni pu̶n yaj'adúkyu̶ñ, oy je̱'e̱ mu̶k'ajt we̱e̱nu̶ mja'amu̶dáty, tu̶ u̶u̶ch miich je̱'e̱ n'ayuuk ndu̶y'ajt xyñimu̶doowu̶ y ka'p u̶u̶ch miich mu̶naa tu̶ xykyuyu'uch. 9U̶u̶ch miich je̱'e̱ Mu̶jku'u jya'ay nyajku̶'u̶du̶gu̶u̶ygyu̶xu̶py wan xywyingojxtu̶naaygyu̶xu̶ch, je̱'e̱ anu̶u̶'ajtpu̶du̶jk je̱'e̱ mu̶dyiibu̶ judío ja'ay naydyiju̶gu̶xpu̶ñ y ka'p ñi'ijaanchu̶chpyu̶, wan du'un ijxku̶x nejwu̶u̶ygyu̶xu̶ch ko miich tu̶ ndzoky tu̶ nju̶wu̶'u̶y. 10Y tu̶ u̶u̶ch miich je̱'e̱ n'ane̱'e̱mu̶ñ xykyuydyuunu̶ y mduundú̶y mu̶u̶d je̱'e̱ me̱kxtujku̶ñ mu̶u̶d u̶u̶ch kyu̶xpu̶, y paadyu̶tz nniwa'añ nyajtzo'oga'añ ko naty tu̶ myu̶baad'áty mu̶naa je̱'e̱ ja'ay xyjyoot'ijx xywyinma'añ'ijxku̶xu̶chu̶ñ je̱'e̱ ayo'on mu̶dyiibu̶ ya naaxwiiñ ku̶xyu̶ minaambu̶ñ neby je̱'e̱ ja'ay nigu̶xyu̶ yajjoot'ijx yajwinma'añ'ijxku̶xu̶chu̶ñ mu̶dyiibu̶ ya naaxwiiñ tzu̶naaygyu̶xpu̶ñ. 11Mínu̶p u̶u̶ch tzojku̶. Kweentu̶'át je̱'e̱ oybyu̶ mu̶dyiibu̶ mmu̶dajtypyu̶ñ, ka'pu̶ je̱'e̱ mmay'ajt pu̶n xypyu̶jku̶yu̶ch mu̶dyiibu̶ jiiby tzajpjooty mbade̱e̱mbyu̶ñ. 12Pu̶njaty je̱'e̱ ju̶bu̶kpu̶ mu̶madaakku̶xpu̶ñ nbu̶da'agu̶byu̶ch je̱'e̱ ane̱'e̱mbu̶ ajku̶xy ma u̶u̶ch je̱'e̱ nDios y'ityu̶ñ, du'un neby je̱'e̱ kup mu̶dyiibu̶ u̶u̶ch je̱'e̱ nDios tyu̶jk mu̶du̶naaybyu̶ñ, y nimu̶naa je̱'e̱ jiiby kya'apu̶dzu̶u̶mgu̶xu̶ch. Y jim u̶u̶ch je̱'e̱ nDios xyu̶u̶ nyujkjaayu̶ch y je̱'e̱ nDios u̶u̶ch kyajpt xu̶u̶ ma je̱' ajku̶xyu̶ñ, je̱'e̱ jembyu̶ Jerusalén kajpt mu̶dyiibu̶ jiiby tzajpjooty tzombu̶ñ ma u̶u̶ch je̱'e̱ nDiosu̶ñ; y nan jim u̶u̶ch je̱'e̱ jembyu̶ nxu̶u̶ nyujkja'awu̶ch ma je̱' ajku̶xyu̶ñ. 13¡Pu̶n tadzak mu̶u̶d, wan amdo'ity neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ!’ ”

Je̱'e̱ ayuuk tu̶y'ajt mu̶dyiibu̶ jim Laodicea yajke̱jxu̶ñ

14“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Laodicea: ‘Du'un je̱'e̱ myu̶na'añ je̱'e̱ mu̶dyiibu̶ tu̶y'ajt mu̶u̶du̶ñ, je̱'e̱ mu̶dyiibu̶ je̱'e̱ tu̶y'ajt tu̶y tu'uda'agy nidu̶y'ajt'ajtpu̶ñ ko jyaanchu̶ch ko je̱'e̱ Dios ku̶xyu̶ yajkoj mu̶dyiibu̶ jii'ajtpu̶ñ. 15U̶u̶ch nnejwu̶u̶ybyu̶ch ku̶xyu̶ tii miich mduumbyu̶ñ. Nnejwu̶u̶ybyu̶ch ko ka'p it mga'adimymyu̶bu̶jkpu̶ch, nan ka'p je̱'e̱ mmu̶bu̶jku̶ñ myu̶j myáyu̶ch. ¡Ni'igu̶ oy ko u̶xyu̶py ka'p mdimymyu̶bu̶ky o ko u̶xyu̶py je̱'e̱ mmu̶bu̶jku̶ñ myu̶j myáyu̶ch! 16Peru̶ je̱' ko we̱e̱nu̶ miich je̱'e̱ tu̶y'ajt mmu̶bu̶ky, y ka'p it mga'adimymyu̶bu̶jkypyu̶ch, nan ka'p je̱'e̱ mmu̶bu̶jku̶ñ myu̶j myáyu̶ch, paady miich nga'aku'ubú̶gu̶ch du'un neby je̱'e̱ ja'ay tii yajwimbítyu̶ñ ko naty je̱'e̱ jyoot ka'aku'ubú̶ky. 17Miich du'un miich mmu̶na'añ ko miich mgume̱e̱ñu̶ch, ko oy yajxón mdzu̶na'ay mjuugy'áty y ko ka'p tii myajmayjyáty; y ka'p mnejwu̶'u̶y ko nigoo mguyo'oy mgunaxu̶'u̶y y du'un miich neby je̱'e̱ ayoobu̶ja'ay, neby je̱'e̱ wiindzja'ay y neby ni'iwa'adz u̶xwa'adzpu̶ju̶ñ. 18Paady nwingapx nju̶jpkapxu̶'u̶y ko juy ma u̶u̶chu̶ñ je̱'e̱ wa'adz ooru̶ wan du'un jaanch mgumeeñ'ádu̶ch y juy je̱'e̱ poob wit ma u̶u̶chu̶ñ wan myajtu̶gu̶'u̶wu̶ch, y xyu'udzu̶ch xy'amé̱du̶ch ka'pu̶ du'un mdzo'oydyúnu̶ch ko du'un ni'iwa'adz u̶xwa'adz m'ity, y nan juy je̱'e̱ mdzooy wan mbu̶da'agu̶ch ma je̱'e̱ mwiinu̶ñ y m'ijxnu̶ch oy wa'adz. 19U̶u̶ch n'ojpyu̶ch y nyajkumu̶dooybyu̶ch ku̶xyu̶ pu̶n u̶u̶ch ndzojkypy nju̶wu̶u̶ybyu̶ñ. Paady windu̶na'a je̱'e̱ ayuuk tu̶y'ajt mu̶k y jootwimbít ma je̱'e̱ Diosu̶ñ. 20Okkweentu̶tuungu̶x, u̶u̶ch du'un u̶u̶ch neby u̶u̶ch je̱'e̱ tu̶jk'agu̶'u̶ du'umbu̶ nu̶wu̶'u̶y ngojxnókyu̶ñ; pu̶nu̶ jii u̶u̶ch je̱'e̱ n'ayuuk pu̶n xymyu̶doowu̶ y yaj'awa'ach je̱'e̱ tyu̶jk, tu̶gu̶'u̶wu̶bu̶ch ma je̱'e̱ tyu̶jku̶ñ y káyu̶bu̶ch uuku̶bu̶ch mu̶u̶d je̱' y je̱' mu̶u̶d u̶u̶ch. 21Pu̶njaty je̱'e̱ ju̶bu̶kpu̶ mu̶madaakku̶xpu̶ñ nmo'owu̶byu̶ch it je̱' ma kipxy y'ane̱'e̱mu̶chu̶ñ mu̶u̶d u̶u̶ch ma u̶u̶ch je̱'e̱ n'ane̱'e̱mdaaktu̶ñ, du'un neby u̶u̶ch je̱'e̱ ju̶bu̶kpu̶ u̶u̶ch tu̶ nmu̶mada'agyu̶ñ y tu̶ nnaxweechu̶ch ane̱'e̱mbu̶ mu̶u̶d u̶u̶ch je̱'e̱ nDeedy ma je̱'e̱ y'ane̱'e̱mdaaktu̶ñ. 22¡Pu̶n tadzak mu̶u̶d, wan amdo'ity neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ!’ ”

Currently Selected:

Apocalipsis 3: MIXE

Highlight

Copy

Compare