Apocalipsis 2

Je̱'e̱ ayuuk tu̶y'ajt mu̶dyiibu̶ yajke̱jx ma je̱'e̱ juxtujkpú̶kypyu̶ mu̶bu̶jkpu̶du̶jku̶ñ.

Je̱'e̱ ayuuk tu̶y'ajt mu̶dyiibu̶ jim Éfeso yajke̱jxu̶ñ

1“Nijayu̶'u̶ je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Éfeso: ‘Du'un je̱'e̱ myu̶na'añ je̱'e̱ mu̶dyiibu̶ je̱'e̱ mu̶dza'a juxtujk mu̶dajtp ma je̱'e̱ y'a'oygyu̶'u̶ju̶ñ y wyu̶dity ma je̱'e̱ juxtujkpu̶ ju̶u̶ndooybye̱jt'agujk agu̶ ooru̶bu̶ju̶ñ. 2U̶u̶ch nnejwu̶u̶ybyu̶ch ku̶xyu̶ tii miich mduumbyu̶ñ. Nnejwu̶u̶ybyu̶ch ko mu̶k mduñ mu̶u̶d u̶u̶ch kyu̶xpu̶ y mduundú̶y mu̶u̶d je̱'e̱ me̱kxtujku̶ñ, y nnejwu̶u̶ybyu̶ch ko ka'p je̱'e̱ ju̶bu̶kja'aydyu̶jk m'okmu̶me̱kxtujknu̶. Nan nnejwu̶u̶ybyu̶ch nandu'un ko je̱'e̱ ja'ay tu̶ mjoot'íxy mwinma'añ'ixy mu̶dyiibu̶ apóstolestu̶jk naydyiju̶gu̶xpu̶ñ y ka'p ñi'ijaanchu̶chpyu̶, y tu̶ myaj'anu̶u̶gudu̶dzu̶'u̶y ko ka'p jye̱'e̱ju̶ch ajku̶xy y ko anu̶u̶'ajtpu̶du̶jk je̱'e̱ ajku̶xy. 3Mduun'adu̶u̶tzp mu̶u̶d u̶u̶ch kyu̶xpu̶ mu̶u̶d je̱'e̱ me̱kxtujku̶ñ, y mu̶k je̱'e̱ tzaachpyu̶ ayo'on tu̶ m'ixy tu̶ mbaady mu̶u̶d u̶u̶ch kyu̶xpu̶ y ka'p tu̶ mmu̶dzibyii. 4Peru̶ jii tu'ug mu̶dyiibu̶ u̶u̶ch nga'a'oyjyu̶wu̶u̶by mu̶u̶d miich neby mja'ay'átyu̶ñ: ko ka'p u̶u̶ch miich xy'oktzojknu̶ neby ijty jeky'ajtyu̶ñ ko je̱'e̱ ayuuk tu̶y'ajt aga'an mmu̶bu̶jktzooñ. 5Paady ja'aymyé̱tz ko je̱'e̱ mmu̶bu̶jku̶ñ tu̶ kyu'uga'ay y jootwimbít ma je̱'e̱ Diosu̶ñ y tun du'un jadu'ook neby ijty jeky'ajty mduñu̶ñ ko je̱'e̱ ayuuk tu̶y'ajt aga'an mmu̶bu̶jktzooñ. Pu̶nu̶ ka'p du'un mduñ, nninú̶kxu̶py tzojku̶ y nbu̶jku̶yu̶py je̱'e̱ mju̶u̶ndooybye̱jt ma y'ityu̶ñ, y pu̶nu̶ mjootwimbijtpu̶tz ma je̱'e̱ Diosu̶ñ, mu̶'it je̱'e̱ mju̶u̶ndooybye̱jt ka'p nbu̶jku̶yu̶ch. 6Peru̶ je̱'e̱ miich mu̶u̶d m'oybyu̶dzu̶my ko je̱'e̱ nicolaítas ja'ay y'u̶xpu̶jku̶ñ mga'a'oy'ijxu̶ ajku̶xy, je̱'e̱ mu̶dyiibu̶ u̶u̶ch nandu'un ka'p n'oy'ixyu̶ñ. 7¡Pu̶n tadzak mu̶u̶d, wan amdo'íty neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ! Pu̶njaty je̱'e̱ ju̶bu̶kpu̶ mu̶madaakku̶xpu̶ñ nmooygyu̶xu̶byu̶ch je̱'e̱ jugy'ajt wiinu̶u̶xu̶u̶bu̶ mu̶dyiibu̶ jiiby yajpaatp ma je̱'e̱ Dios y'ityu̶ñ. Du'un neby u̶u̶ch du'umbu̶ tu̶u̶m tza'am nmooygyu̶xyu̶ñ, je̱'e̱ mu̶dyiibu̶ jim yajpaatp ma je̱'e̱ kepy mu̶dyiibu̶ jugy'ajt wiinu̶u̶xu̶u̶bu̶ ye̱jkpu̶ñ, je̱'e̱ mu̶dyiibu̶ jiiby yajpaatp ma je̱'e̱ Dios y'ityu̶ñ.’ ”

Je̱'e̱ ayuuk tu̶y'ajt mu̶dyiibu̶ jim Esmirna yajke̱jxu̶ñ

8“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Esmirna: ‘Du'un je̱'e̱ myu̶na'añ je̱'e̱ mu̶dyiibu̶ ku̶xyu̶ yajtzondaakp y je̱'e̱ mu̶dyiibu̶ ku̶xyu̶ yajku̶jxp yajmaaybyu̶ñ, je̱'e̱ mu̶dyiibu̶ o'ku̶ñ, y tu̶ jadu'ook jyuugypyú̶ky. 9U̶u̶ch nnejwu̶u̶ybyu̶ch neby miich je̱'e̱ tzaachpyu̶ ayo'on mmu̶naxy mgu'ubú̶kyu̶ñ y neby je̱'e̱ ayoyiibyu̶ m'ixy mbaadyu̶ñ, peru̶ tu̶ je̱'e̱ Dios y'oy'ajtu̶ñ xymyo'oy, du'un miich neby kumeeñjya'ayu̶ñ oy je̱'e̱ ayoyiibyu̶ du'un mja'a'íxy mja'apaady. Y nnejwu̶u̶ybyu̶ch ko je̱'e̱ ja'ay ju̶bu̶k axu̶u̶g xyñigapx xyñimu̶dyaakku̶xy, je̱'e̱ mu̶dyiibu̶ judío ja'ay naydyiju̶gu̶xpu̶ñ, peru̶ ka'p jyaanchu̶ch, je̱'e̱ mu̶jku'u je̱'e̱ mu̶u̶d y'ijtku̶xy. 10Ka'p mdzu̶gu̶'u̶y neby mjat m'ayowa'añu̶ñ, je̱'e̱ mu̶jku'u miich nije̱' xyajpujxtu̶jkka'awaangu̶xp, wan miich du'un nigu̶xyu̶ myajjoot'ijx myajwinma'añ'ijxku̶xu̶ch pu̶nu̶ jaanch je̱'e̱ tu̶y'ajt mmu̶bu̶jkku̶xy; y majk xu̶u̶ miich m'ayoogu̶xu̶ch. Tu̶y tu'uda'agy je̱'e̱ mmu̶bu̶jku̶ñ mmu̶dat, y ka'p m'u̶xtu̶gu̶'u̶wa'agy, u̶xtu̶ koonu̶ m'o'ogu̶ch, y u̶u̶ch miich je̱'e̱ jugy'ajtu̶ñ wiinu̶u̶xu̶u̶bu̶ nmo'owu̶py, du'un neby je̱'e̱ ja'ay tii yajmo'oyu̶ñ ko naty tu̶ kyanar'aty. 11¡Pu̶n tadzak mu̶u̶d, wan amdo'íty neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ! Pu̶njaty je̱'e̱ ju̶bu̶kpu̶ mu̶madaakku̶xpu̶ñ ka'p tzaachpyu̶ ayo'on je̱'e̱ ijxku̶x paatku̶xu̶ch ma je̱'e̱ mu̶me̱jtz'ookpu̶ o'ku̶ñ.’ ”

Je̱'e̱ ayuuk tu̶y'ajt mu̶dyiibu̶ jim Pérgamo yajke̱jxu̶ñ

12“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Pérgamo: ‘Du'un je̱'e̱ myu̶na'añ je̱'e̱ mu̶dyiibu̶ je̱'e̱ pujxk espaadu̶ ju̶jpxu'uñbyu̶ mu̶u̶d, je̱'e̱ mu̶dyiibu̶ me̱jtz'adu'um'eeemby ju̶jpu̶ñ. 13U̶u̶ch nnejwu̶u̶ybyu̶ch ko mdzu̶na'ay ma je̱'e̱ mu̶jku'u y'ane'emyu̶ñ. Peru̶ tu̶y tu'uda'agy miich m'ity ma u̶u̶chu̶ñ, y ka'p m'u̶xtu̶gu̶'u̶wa'agy. Ka'p miich je̱'e̱ mu̶bu̶jku̶ñ myajtu̶góyñu̶ ma u̶u̶chu̶ñ, ni je̱'e̱ mu̶'it xu̶u̶ mga'ayajtu̶gooy mu̶naa je̱'e̱ Antipas, u̶u̶ch nnidu̶y'ajt'ajtpu̶ tu'uda'agypyu̶ yaj'o'ku̶ju̶ñ ma je̱'e̱ jimbu̶ kajpt ma je̱'e̱ mu̶jku'u chu̶na'ayu̶ñ. 14Peru̶ jii nije̱' mu̶dyiibu̶ u̶u̶ch nga'a'oyjyu̶wu̶u̶by mu̶u̶d miich neby mja'ay'átyu̶ñ; ko jim je̱'e̱ ja'ay nije̱' ma miichu̶ñ, mu̶dyiibu̶ je̱'e̱ Balaam y'u̶xpu̶jku̶ñ ka'p u̶xmadzaangu̶xy, je̱'e̱ mu̶dyiibu̶ je̱'e̱ Balac ju̶jpkapxu̶u̶yu̶ñ ko je̱'e̱ Israel ja'ay yajtuundu̶gooygyu̶xu̶ch y nu̶maaygyu̶xy ko mu̶baad tzu'tzku̶xy jú̶kxku̶xy, je̱'e̱ mu̶dyiibu̶ je̱'e̱ ja'ay tzaadzéch kepychech tu̶ yajwindzu̶gu̶u̶ygyu̶xyu̶ñ y ko je̱'e̱ to'oxyu̶jk mu̶baad tu'ug tu'ug mu̶dtuundu̶gooygyu̶xy. 15Nan jim je̱'e̱ ja'ay nandu'un nije̱' ma miichu̶ñ, je̱'e̱ mu̶dyiibu̶ je̱'e̱ nicolaítas y'u̶xpu̶jku̶ñ ka'p u̶xmadzaangu̶xyu̶ñ, je̱'e̱ mu̶dyiibu̶ u̶u̶ch nga'a'oyjyu̶wu̶u̶ybyu̶ñ. 16Paady jootwimbít ma je̱'e̱ Diosu̶ñ. Pu̶nu̶ ka'p mjootwimbíty ma je̱'e̱ Diosu̶ñ, nninú̶kxu̶py tzojku̶ y tziptúnu̶bu̶ch mu̶u̶d je̱' ajku̶xy mu̶dyiibu̶ ka'p myu̶doogu̶xyu̶ñ mu̶u̶d je̱'e̱ pujxk espaadu̶ mu̶dyiibu̶ u̶u̶ch n'awakjooty pu̶dzu̶u̶mbu̶ñ. 17¡Pu̶n tadzak mu̶u̶d, wan amdo'íty neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ! Pu̶njaty je̱'e̱ ju̶bu̶kpu̶ mu̶madaakku̶xpu̶ñ je̱'e̱ maná u̶u̶ch je̱'e̱ nyajkaaygyu̶xu̶py, je̱'e̱ mu̶dyiibu̶ yu'uch ijtpu̶ñ. Y nan nmooygyu̶xu̶byu̶ch je̱'e̱ poob tzaa tu'ug nandu'un, ma je̱'e̱ jembyu̶ xu̶u̶ tu'ug yujkja'ayu̶chu̶ñ, mu̶dyiibu̶ ka'p pu̶n u̶xkapyu̶ñ, je̱' je'eyu̶ u̶xkajp pu̶n je̱'e̱ tzaa yajmooybyu̶ñ.’

Je̱'e̱ ayuuk tu̶y'ajt mu̶dyiibu̶ jim Tiatira yajke̱jxu̶ñ

18“Nijayu̶'u̶ nandu'un je̱'e̱ ángel mu̶dyiibu̶ kugapxy'ajtpu̶ñ ma je̱'e̱ mu̶bu̶jkpu̶du̶jk jim Tiatira: ‘Du'un je̱'e̱ Dios Ung myu̶na'añ, je̱'e̱ mu̶dyiibu̶ wyin du'unu̶ñ neby je̱'e̱ ju̶u̶nyé̱ngu̶ñ y je̱'e̱ mu̶dyiibu̶ tyeky du'unu̶ñ neby je̱'e̱ pujxk y'adu̶kxyu̶ñ ko yajpo'ody. 19U̶u̶ch nnejwu̶u̶ybyu̶ch ku̶xyu̶ tii miich mduumbyu̶ñ: neby je̱'e̱ mmu̶gu'ug mdzoky mju̶wu̶'u̶yu̶ñ, neby je̱'e̱ mmu̶bu̶jku̶ñ mmu̶u̶du̶chu̶ñ, neby je̱'e̱ mmu̶gu'ug mbubety mbudu̶gu̶'u̶yu̶ñ, y neby mduundú̶yu̶ñ, y nnejwu̶u̶ybyu̶ch ko ni'igyu̶ je̱'e̱ Dios jada'achám mu̶k mmu̶dúñ ni'igu̶ ka'p jeky'ajty ko aga'an mmu̶bu̶jktzooñ. 20Peru̶ jii tu'ug mu̶dyiibu̶ u̶u̶ch nga'awinju̶wu̶u̶by mu̶u̶d miich neby mja'ay'átyu̶ñ; ko je̱'e̱ to'oxyu̶jk Jezabel mgu'ubú̶ky, je̱'e̱ mu̶dyiibu̶ naydyiju̶p ko je̱'e̱ Dios y'ayuuk tyu̶y'ajt najtzkapxu̶u̶yu̶, peru̶ xywyin'u̶u̶nu̶byu̶ch je̱'e̱ nduumbu̶du̶jk du'un ajku̶xy mu̶u̶d je̱'e̱ y'u̶xpu̶jku̶ñ. Yajmu̶dtuundu̶gooygyu̶xy je̱'e̱ to'oxyu̶jk tu'ug tu'ug y yajtzu'tz yajjú̶kxku̶xy mu̶dyiibu̶ je̱'e̱ tzaadzéch kepychech tu̶ yajwindzu̶gu̶u̶ygyu̶xyu̶ñ. 21U̶u̶ch tu̶ u̶u̶ch je̱'e̱ Jezabel xu̶u̶ tiempo nja'amo'oy neby yjootwimbídu̶chu̶ñ ma je̱'e̱ Diosu̶ñ; peru̶ ka'p du'un ku'ubú̶ky, ka'p je̱'e̱ ya'aydyu̶jk mu̶dtuundu̶goyu̶u̶ najtz'ixu̶'u̶wa'añ. 22-23Paady u̶u̶ch je̱'e̱ Jezabel nyajpa'ambe̱da'añ, y nyaj'o'ktaayu̶byu̶ch je̱'e̱ jya'ay y mu̶u̶d mu̶dyiijáty ju̶bu̶k axu̶u̶k tu̶ mu̶d'adu̶u̶tzku̶xyu̶ñ pu̶nu̶ ka'p je̱'e̱ jyu̶bu̶kwinma'añ u̶xmajtzku̶xy, y mú̶ju̶ch je̱'e̱ ayo'on nyajnigue̱jxku̶xu̶ch. Y du'un je̱'e̱ mu̶bu̶jkpu̶du̶jk nigu̶xyu̶ nejwu̶u̶ydyaaygyu̶xu̶ch ko nnejwu̶u̶ydyaayu̶byu̶ch je̱'e̱ ja'ay jyoot wyinma'añ ku̶xyu̶; y miich nmooygyu̶xu̶py miich nidu'ug nidu'ug neby naty tu̶ mja'ay'ajtku̶xyu̶ñ. 24Miich ajku̶xy mu̶dyiibu̶ jim Tiatira yajpaatku̶xpu̶ñ, ka'p miich je̱'e̱ Jezabel y'u̶xpu̶jku̶ñ mbanu̶kxu̶ ajku̶xy y ni mga'anejwu̶u̶ygyu̶xyñu̶ mu̶dyiibu̶ tyijku̶xypyu̶ñ mu̶jku'u u̶xpu̶jku̶ñ, mu̶dyiibu̶ yu'uch y'ityu̶ñ y mu̶dyiibu̶ tzip winju̶wu̶u̶yu̶ñ, u̶u̶ch miich nnu̶maaygyu̶xypy ko ka'p miich je̱'e̱ wiingpu̶ u̶xpu̶jku̶ñ nyajmu̶dzibu̶u̶ygyu̶xnu̶ch. 25Yajtu'uyo'oy'adu̶u̶tzku̶x je̱'e̱ tu̶y'ajt mu̶dyiibu̶ mmu̶dajtku̶xypyu̶ñ, u̶xtu̶ koonu̶ u̶u̶ch nmínu̶ch. 26Pu̶njaty je̱'e̱ ju̶bu̶kpu̶ mu̶madaakku̶xpu̶ñ y kuydyuun'adu̶u̶tzku̶xy u̶xtu̶ mabaad y'o'kku̶xy tyu̶gooygyu̶xy du'un nébyu̶ch u̶u̶ch ndzokyu̶ñ tuungu̶xu̶chu̶ñ, nmooygyu̶xu̶byu̶ch ane̱'e̱mu̶ñ je̱' neby je̱'e̱ naax kajpt ane̱'e̱mgu̶xu̶chu̶ñ, 27-28du'un neby u̶u̶ch je̱'e̱ nDios Teedy ane̱'e̱mu̶ñ u̶u̶ch tu̶ xymyo'oyu̶ñ, y y'ane̱'e̱mgu̶xu̶py je̱'e̱ naax kajpt mu̶k mu̶u̶d je̱'e̱ mu̶kpu̶ ane̱'e̱mu̶ñ y chaachtyuungu̶xu̶py mu̶k du'un neby je̱'e̱ ja'ay naaxtu'tz apu'u ajiidzu̶'u̶yu̶ñ. Y nan nmooygyu̶xu̶byu̶ch je̱'e̱ ane̱'e̱mu̶ñ nandu'un, du'un neby je̱'e̱ mu̶dza'a jayjyuxktujku̶ñ. 29¡Pu̶n tadzak mu̶u̶d, wan amdo'ity neby je̱'e̱ Espíritu Santo je̱'e̱ mu̶bu̶jkpu̶du̶jk nu̶ma'ayu̶ñ!’ ”

Currently Selected:

Apocalipsis 2: MIXE

Highlight

Copy

Compare