Apocalipsis 21

Je̱'e̱ jembyu̶ tzajp y je̱'e̱ jembyu̶ naax

1Kujékyu̶ch je̱'e̱ jembyu̶ tzajp tu'ug y je̱'e̱ jembyu̶ naax tu'ug n'ijxy; je̱' ko tu̶ najty je̱'e̱ jayu̶jpu̶ tzajp y je̱'e̱ jayu̶jpu̶ naax kyu̶xy tyu̶goy, y nan tu̶ najty je̱'e̱ mejy nandu'un kyu̶xy tyu̶goy. 2N'ijxu̶ch je̱'e̱ wa'adzpu̶ kajpt, je̱'e̱ jembyu̶ Jerusalén ko tzajpjooty kyu̶da'agy ma je̱'e̱ Dios wyinduuyu̶ñ. Kubu̶ky ku'ixy najty neby je̱'e̱ to'oxyu̶jk tu'ug kyubu̶ky kyu'íxyu̶chu̶ñ ko pyu̶ga'añ mu̶u̶d je̱'e̱ ya'aydyu̶jk. 3Y chi u̶u̶ch je̱'e̱ ayuuk tu'ug mu̶k nmu̶dooy, chooñ jiiby tzajpjooty ma je̱'e̱ Dios y'ane̱'e̱mdaaktu̶ñ, y myu̶na'añ: “Dios jada'achám tzu̶naayñu̶py ma je̱'e̱ naaxwiiñjya'ayu̶ñ. Tzu̶na'awaamb mu̶u̶d je̱' ajku̶xy, y je̱' je̱'e̱ Dios ja'ay'adu̶u̶wu̶p ajku̶xy, y je̱'e̱ Dios ku̶'u̶m yajpadaamb mu̶u̶d je̱' ajku̶xy neby je̱'e̱ Dyios ajku̶xyu̶ñ. 4Yajtu̶gooyu̶xu̶p je̱'e̱ Dios jyootmay'adu̶u̶ ajku̶xy, du'un neby je̱'e̱ wyinnu̶u̶ du'umbu̶ pyo'ttu̶u̶tzu̶xu̶ñ ajku̶xy, ka'p y'ok'o'kku̶xnu̶ch, ka'p y'okju̶u̶y y'ok'yaaxku̶xnu̶ch, y ka'p y'oktaj y'okmaaygyu̶xnu̶ch, ni kya'a'okpu̶jk kya'a'ok'ijxu̶gu̶xnu̶ch, je̱' ko tu̶ naty je̱'e̱ ku̶xyu̶ ñajxnu̶ mu̶dyiibu̶ najty jékyu̶p ijtpu̶ñ.”

5Chi myu̶naañ je̱'e̱ mu̶dyiibu̶ najty u̶ñaaby ma je̱'e̱ mu̶j'ane̱'e̱mdaaktu̶ñ: “U̶u̶ch ku̶xyu̶ tii n'oydyuundu̶gajchpy.” Y nandu'un myu̶naañ: “Kuja'aw adayaaba ayuuk, je̱' ko tu̶y'ajt adayaaba ayuuk y paattu̶p nmu̶bu̶jku̶mu̶ch.”

6Kujeekyu̶ch xyñu̶maay: “Tu̶ ku̶xyu̶ kyojta'ay. U̶u̶ch du'un u̶u̶ch neby je̱'e̱ leetru̶ A mu̶dyiibu̶ tzondaakp ma je̱'e̱ alfabeto y neby je̱'e̱ leetru̶ Z mu̶dyiibu̶ ku̶jxnu̶byu̶ñ, je̱'e̱ mu̶dyiibu̶ ku̶xyu̶ yajtzondaakp y je̱'e̱ mu̶dyiibu̶ ku̶xyu̶ yajmaaybyu̶ñ. Pu̶n tu̶dzu̶u̶yu̶p u̶u̶ch je̱'e̱ nyajnu̶u̶'u'ugu̶py je̱'e̱ nu̶u̶ mu̶dyiibu̶ jugy'ajtu̶ñ wiinu̶u̶xu̶u̶bu̶ ye̱jkpu̶ñ, je̱'e̱ mu̶dyiibu̶ du'un neby tu'ug nu̶u̶gópt ma je̱'e̱ nu̶u̶ pyu̶dzu̶u̶mdu̶yu̶ñ, y ka'p nidu'uñdyu̶ yajmeeñdyuungu̶xu̶ch. 7Pu̶n je̱'e̱ ju̶bu̶kpu̶ mu̶madaakpu̶ñ, je̱' je̱'e̱ oy'ajtu̶ñ ku̶xyu̶ ku̶'u̶du̶gu̶u̶ydya'awu̶u̶ju̶p; y u̶u̶ch je̱'e̱ xyDyios'ádu̶p y je̱' u̶u̶ch n'ung'ádu̶py. 8Peru̶ je̱'e̱ windze'tytyu̶jk, je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶jkku̶xyu̶ñ, je̱'e̱ mu̶dyiibu̶ ka'p tii mu̶dnay'ixa'añyiiju̶ñ ajku̶xy, je̱'e̱ ja'ayyaj'o'kpu̶du̶jk ajku̶xy, je̱'e̱ mu̶dyiibu̶ je̱'e̱ ya'aydyu̶jk o je̱'e̱ to'oxyu̶jk tu'ug tu'ug mu̶dtuundu̶gooygyu̶xpu̶ñ, je̱'e̱ mu̶dyiibu̶ je̱'e̱ kuxu̶u̶'adu̶u̶ tuungu̶xpu̶ñ, je̱'e̱ mu̶dyiibu̶ je̱'e̱ tzaadzéch kepychech windzu̶gu̶u̶ygyu̶xpu̶ñ, y ku̶xyu̶ je̱'e̱ anu̶u̶'ajtpu̶du̶jk ajku̶xy, jiiby je̱'e̱ ñú̶kxku̶xu̶ch ma je̱'e̱ mu̶jju̶u̶n tyoyu̶ñ mu̶u̶d je̱'e̱ azufre, du'un je̱'e̱ ju̶u̶n neby tu'ug mejyu̶ñ wa'adz ju̶u̶n, y je̱' je̱' je̱'e̱ mu̶me̱tzkpu̶ o'ku̶ñ.”

Je̱'e̱ jembyu̶ Jerusalén

9Chi nidu'ugtu̶ myiiñ je̱'e̱ juxtujkpu̶ ángelestu̶jk je̱'e̱ mu̶dyiibu̶ je̱'e̱ juxtujkpu̶ koopu̶ najty mu̶dajtku̶xpu̶ñ ujtz mu̶u̶d je̱'e̱ juxtujkpu̶ ayo'on mu̶dyiibu̶ kugu̶xu̶u̶yñu̶byu̶ñ, y chi u̶u̶ch xyñu̶maay: “Min, cham nyajni'ixu̶'u̶wa'añ je̱'e̱ wyin'ixy, je̱'e̱ Borreegu̶'úng tyo'oxyu̶jk.” 10Y ma je̱'e̱ kuma'ayjyooty mu̶dyiibu̶ u̶u̶ch je̱'e̱ Espíritu Santo xyaj'ijxu̶ñ, chi u̶u̶ch je̱'e̱ ángel xyajnú̶kxy ma tu'ug mu̶jkóptu̶ñ y janch ku̶xp, y xyaj'ijxyu̶ch je̱'e̱ mu̶jpu̶ wa'adz kajpt Jerusalén, ko myu̶naky tzajpjooty Dios winduuy. 11Janch adu̶kxp ajajp najty je̱'e̱ mu̶j kajpt mu̶u̶d je̱'e̱ Dios y'oy'atu̶ñ; du'un najty y'adu̶kxy y'ajajy neby je̱'e̱ oybyu̶ tzaaju̶ñ, neby je̱'e̱ jaspe tzaaju̶ñ, du'un yaj'ijxnáxy neby vídrioju̶ñ. 12Ju'uwu̶dítyu̶ je̱'e̱ kajpt najty mu̶j y ku̶xp jyu'ubojtz'awu̶dítyu̶ch, y majmé̱tzk je̱'e̱ y'agu̶'u̶ najty, y majaty je̱'e̱ tu̶gu̶ydyaaktu̶ñ tu'ugjáty najty je̱'e̱ ángel jim y'adu̶naaygyu̶xy y majaty je̱'e̱ tu̶gu̶ydyaaktu̶ñ jim najty je̱'e̱ xyu̶u̶ nidu'ug nidu'ug yujkja'ayu̶ch ajku̶xy je̱'e̱ majme̱tzpú̶kypyu̶ Israel ja'ay ajku̶xy. 13Tu̶gu̶u̶g je̱'e̱ y'agu̶'u̶ najty xu̶u̶bu̶dzu̶my'eemby, tu̶gu̶u̶g ma je̱'e̱ tu̶u̶chpyoj myinu̶'u̶yu̶ñ, tu̶gu̶u̶g ma je̱'e̱ ju̶u̶nboj myinu̶'u̶yu̶ñ y tu̶gu̶u̶g xu̶u̶gu̶da'agy'eemby. 14Je̱'e̱ poch mu̶dyiibu̶ je̱'e̱ kajpt najty mu̶u̶d jyu'ubojtz'awu̶dítyu̶ch, majmé̱tzk najty tzaa je̱'e̱ mu̶u̶du̶ch ma pyojtzu̶'u̶gyu̶chu̶ñ, y jim najty je̱'e̱ Borreegu̶'úng y'apóstolestu̶jk xyu̶u̶ nidu'ugjáty nidu'ugjáty yujkja'ayu̶ch ajku̶xy ma je̱'e̱ majmé̱tzkpu̶ tzaaju̶ñ.

15Je̱'e̱ ángel mu̶dyiibu̶ u̶u̶ch najty xymyu̶dmu̶dyaakpu̶ñ jim najty ooru̶ paxy tu'ug kápyu̶ch, je̱'e̱ mu̶dyiibu̶ je̱'e̱ kajpt mu̶u̶d kipxa'añu̶ñ je̱'e̱ y'agu̶'u̶ y je̱'e̱ pyoch. 16Je̱'e̱ kajpt mu̶daaxte̱e̱k je̱'e̱ najty, tu'knáx je̱'e̱ wyiin y ñuux najty. Chi je̱'e̱ ángel kajpt kipxy mu̶u̶d je̱'e̱ y'ooru̶ paxy; je̱' najty je̱'e̱ kyipxy me̱jtz mil ja'ame̱jtzmu̶go'px kilómetros. Tu'knáx je̱'e̱ wyiin, kyu̶xp'ajtu̶ñ y ñuux. 17Chi je̱'e̱ poch kipxy: je̱' najty je̱'e̱ kyipxy tu̶gu̶'pxmu̶gooxk metro, je̱'e̱ du'umbu̶ kipxt je̱'e̱ ángel yajtuun neby je̱'e̱ naaxwiiñjya'ay kyipxtu̶ñ.

18Je̱'e̱ poch je̱'e̱ oybyu̶ jaspe tzaa najty je̱'e̱ mu̶u̶d y'oydyúñu̶ch, y je̱'e̱ kajpt agu̶ ooru̶ je̱'e̱ najty, neby je̱'e̱ ijxk wa'adzpu̶ju̶ñ. 19Je̱'e̱ tzaa ma je̱'e̱ poch pyojtzu̶'u̶gyu̶chu̶ñ xoxy je̱'e̱ najty mu̶u̶d je̱'e̱ oybyu̶ tzaa ku̶xyu̶: je̱'e̱ jayu̶jpu̶ tzaa, jaspe tzaa najty je̱'e̱ myu̶u̶d; je̱'e̱ mu̶me̱tzkpu̶ tzaa, zafiro tzaa najty je̱'e̱ myu̶u̶d; je̱'e̱ mu̶du̶gu̶u̶kpu̶ tzaa, tzaa najty je̱'e̱ myu̶u̶d; je̱'e̱ mu̶mu̶daaxkpu̶ tzaa, esmeralda tzaa najty je̱'e̱ myu̶u̶d; 20je̱'e̱ mu̶mu̶gooxkpu̶ tzaa, ónice tzaa najty je̱'e̱ myu̶u̶d; je̱'e̱ mu̶dudujkpu̶ tzaa, kornalina tzaa najty je̱'e̱ myu̶u̶d; je̱'e̱ mu̶juxtujkpu̶ tzaa, crisólito tzaa najty je̱'e̱ myu̶u̶d; je̱'e̱ mu̶duktujkpu̶ tzaa, berilo tzaa najty je̱'e̱ myu̶u̶d; je̱'e̱ mu̶daaxtujkpu̶ tzaa, topacio tzaa najty je̱'e̱ myu̶u̶d; je̱'e̱ mu̶majkpu̶ tzaa, crisopraza tzaa najty je̱'e̱ myu̶u̶d; je̱'e̱ mu̶majktu'ugpu̶ tzaa, jacinto tzaa najty je̱'e̱ myu̶u̶d; y je̱'e̱ mu̶majmé̱tzkpu̶ tzaa, amatista tzaa najty je̱'e̱ myu̶u̶d. 21Je̱'e̱ majmé̱tzkpu̶ poch agu̶'u̶ agu̶ perla najty je̱'e̱ mu̶u̶d y'oydyúñu̶ch, tu'ugjátypyu̶ y'agu̶'u̶ tu'ugjáty najty perla je̱'e̱ mu̶nu̶kxy, y je̱'e̱ mu̶jtu'u mu̶dyiibu̶ kajptkujk najxp agu̶ wa'adz ooru̶ je̱'e̱ najty, du'un neby je̱'e̱ vidrio mu̶dyiibu̶ yaj'ijxnajxpu̶ñ.

22Ka'p u̶u̶ch je̱'e̱ tzajptu̶jk jiiby ni tu'ug n'ijxy ma je̱'e̱ jemygyajptu̶ñ, je̱' ko je̱' je̱'e̱ Windzú̶n, je̱'e̱ Dios mu̶j mu̶k'ajtmu̶u̶dpu̶ chajptu̶jk'ajtypy y je̱'e̱ Borreegu̶'úng. 23Je̱'e̱ kajpt ka'p je̱'e̱ yajmayjyáty je̱'e̱ xu̶u̶, je̱'e̱ po'o mu̶dyiibu̶ kudu̶kx kujaju̶u̶wu̶bu̶ñ, je̱' ko je̱'e̱ Dios y'oy'ajt je̱'e̱ kudu̶kx kujaju̶p, y je̱'e̱ Borreegu̶'úng mu̶dyiibu̶ du'un kudu̶kxp kujajp neby lámparu̶ju̶ñ. 24Najxku̶x tu̶gu̶u̶ygyu̶xu̶p je̱'e̱ mayñaaxwiiñjya'ay, je̱'e̱ mu̶dyiibu̶ je̱'e̱ y'aanu̶mu̶ ni'idzooku̶ñ tu̶ paatku̶xy ma je̱'e̱ jemygyajpt tyu̶kxu̶ñ jyajju̶ñ, y je̱'e̱ ane̱'e̱mbu̶du̶jk mu̶dyiibu̶ ya naaxwiiñ ane̱'e̱mgu̶xpu̶ñ yajku̶'u̶du̶gu̶u̶yu̶gu̶xu̶p je̱'e̱ y'oy'ajtu̶ñ y kyu'umaay'ajtu̶ñ ajku̶xy. 25Ka'p je̱'e̱ poch agu̶'u̶ xu̶u̶m y'adúgu̶ch, y nan ka'p jim kyodzu̶'u̶wu̶ch. 26Yajku̶'u̶du̶gu̶u̶yu̶gu̶xu̶p je̱'e̱ mayñaaxwiiñjya'ay je̱'e̱ y'oy'ajtu̶ñ y kyu'umaayu̶ñ ajku̶xy; 27peru̶ nimu̶naa jiiby ni tu'ug kya'atu̶gu̶'u̶wu̶ch je̱'e̱ pokymyu̶u̶dpu̶, ni je̱'e̱ mu̶dyiibu̶ ku̶xyu̶ tuumb mu̶dyiibu̶ je̱'e̱ Dios ka'p mu̶dnay'ixa'añyii y mu̶dyiibu̶ anu̶u̶'ajtpu̶ñ. Je̱'e̱du̶'ajty jiiby tu̶gu̶u̶ygyu̶xu̶p, je̱'e̱ mu̶dyiibu̶ je̱'e̱ xyu̶u̶ jiiby kuja'ay miingu̶xpu̶ñ ma je̱'e̱ Borreegu̶'úng jyugy'ajt libroju̶ñ.

Currently Selected:

Apocalipsis 21: MIXE

Highlight

Copy

Compare