Apocalipsis 22

1Chi u̶u̶ch je̱'e̱ ángel wa'adzpu̶ mu̶jnu̶u̶ tu'ug xyaj'ijxy, je̱'e̱ nu̶u̶ mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ. Janch wa'adz neby tu'ug vidrio, y pyu̶dzu̶my ma je̱'e̱ Dios y je̱'e̱ Borreegu̶'úng y'ane̱'e̱mdaaktu̶ñ. 2Mu̶j kajptkujk najty je̱'e̱ nu̶u̶ ñaxy, y ma je̱'e̱ me̱jtz'adu'um'eembyu̶ mu̶jnu̶u̶ba'aju̶ñ jim najty je̱'e̱ kepy jugy'ajtmu̶u̶dpu̶ tyu̶na'ay, je̱'e̱ mu̶dyiibu̶ wimbo'o tu̶u̶m'ajtpu̶ñ, majkme̱tzk'ook tu'kjumu̶jtpu̶. Y je̱'e̱ kepy aay je̱' najty je̱'e̱ naaxwiiñjya'ay mu̶u̶d chookku̶xy. 3Ka'p jiiby ni tii ju̶bu̶kpu̶ axu̶u̶gpu̶ yajpaatnu̶ch. Je̱'e̱ Dios Teedy y je̱'e̱ Borreegu̶'úng y'ane̱'e̱mdaakt jiiby yajpaadu̶p ma je̱'e̱ jiipyu̶ kajptu̶ñ, y je̱'e̱ myu̶duumbu̶du̶jk windzu̶gu̶u̶y o'owu̶dajtu̶gu̶xu̶p. 4Y wiinu̶ ju̶jpu̶ je̱'e̱ Dios ijxku̶xu̶ch, y myu̶dajtu̶py je̱'e̱ xyu̶u̶ kuja'ay ajku̶xy ma je̱'e̱ wyimbok ajku̶xyu̶ñ. 5Jiiby ka'p jiiby kyodzu̶'u̶wu̶ch, y je̱'e̱ mu̶dyiibu̶ jiiby tzu̶naaygyu̶xpu̶ñ ka'p je̱'e̱ tu̶kxu̶ñ jaju̶ñ ni je̱'e̱ xu̶u̶ tyu̶kxu̶ñ jyajju̶ñ ok'yajmayjyajtku̶xnu̶ch, je̱' ko je̱'e̱ Dios je̱'e̱ Windzú̶n kudu̶kx kujaju̶gu̶xu̶p, y je̱' jiiby wiinu̶u̶xu̶u̶ ane̱'e̱mgu̶xu̶p.

Wingonu̶ñ je̱'e̱ Jesucristo myin'aa

6Mu̶'it u̶u̶ch je̱'e̱ ángel xyñu̶maay: “Adayaaba ayuuk, tu̶y'ajt adaa y paattu̶p nmu̶bu̶jku̶mu̶ch. Je̱'e̱ Windzú̶n, je̱'e̱ Dios je̱'e̱ mu̶dyiibu̶ je̱'e̱ ayuuknajtzkapxu̶u̶ybyu̶du̶jk ayuuk mooygyu̶xu̶ñ, tu̶ je̱'e̱ y'ángel kexy ko je̱'e̱ tyuumbu̶du̶jk yajni'ixu̶'u̶wu̶ch tii tzojku̶ tunaan jadaanu̶bu̶ñ.”

7“¡Miinu̶p u̶u̶ch tzojku̶! ¡Jootkujk pu̶n kweentu̶tuumb y kuydyuumb je̱'e̱ Dios y'ayuuk tyu̶y'ajt mu̶dyiibu̶ tu̶ yajnajtzkapxu̶'u̶yu̶ñ, je̱'e̱ mu̶dyiibu̶ kuja'ay miimb ma adayaaba libroju̶ñ!”

8U̶u̶ch Juan, n'ijxu̶ch ndú̶kxu̶ch y n'ijxu̶ch nmu̶doowu̶ch adayaaba mu̶dyiibu̶ u̶u̶ch tu̶ njaaywu̶'u̶myu̶ñ. Y ko u̶u̶ch najty tu̶ n'ok'ixy n'oktu̶kxy y n'ok'ixy n'okmu̶doy chi u̶u̶ch nayñajtzkojxtu̶na'awu̶u̶yu̶ ma je̱'e̱ ángel tyekymyu̶jku̶ñ, je̱'e̱ mu̶dyiibu̶ u̶u̶ch najty du'un tu̶ xyaj'íxyu̶ñ, nwindzu̶gu̶'u̶ n'o'owu̶datta'añu̶ch du'un. 9Peru̶ chi u̶u̶ch je̱'e̱ ángel xyñu̶maay: “Ka'p du'un m'adu̶u̶ch, u̶u̶ch Dios mu̶duumbu̶ u̶u̶ch nandu'un du'un neby miichu̶ñ y neby je̱'e̱ mmu̶gu'ugtu̶jk je̱'e̱ ayuuknajtzkapxu̶u̶ybyu̶du̶jk ajku̶xy, y ku̶xyu̶ mu̶dyiibu̶ adaa ayuuk kweentu̶tuungu̶xpu̶ñ y kuydyuungu̶xpu̶ñ adaa mu̶dyiibu̶ kuja'ay miimb ma adayaaba libroju̶ñ. Windzu̶gu̶'u̶ o'owu̶dát je̱'e̱ Dios.”

10Nandu'un u̶u̶ch xyñu̶maay: “Ka'p mguyu'uch je̱'e̱ Dios y'ayuuk tyu̶y'ajt mu̶dyiibu̶ tu̶ yajnajtzkapxu̶'u̶y, je̱'e̱ mu̶dyiibu̶ kuja'ay miimb ma adayaaba libroju̶ñ, je̱' ko tu̶ je̱'e̱ xu̶u̶ tiempo wyingoonu̶ mu̶naa je̱'e̱ Dios y'ayuuk kuydyuna'añ neby tu̶ myu̶na'añu̶ñ. 11Pu̶n je̱'e̱ ju̶bu̶kpu̶ tuungu̶xpu̶ñ wan je̱'e̱ ju̶bu̶kpu̶ tuun'adu̶u̶tzku̶xy, y pu̶n je̱'e̱ ju̶bu̶kpu̶ axu̶u̶gpu̶ tuungu̶xpu̶ñ wan je̱'e̱ ju̶bu̶kpu̶ axu̶u̶gpu̶ tuun'adu̶u̶tzku̶xy; peru̶ pu̶n je̱'e̱ oybyu̶ tuungu̶xpu̶ñ wan je̱'e̱ oybyu̶ tuun'adu̶u̶tzku̶xy, y je̱'e̱ ja'ay mu̶dyiibu̶ je̱'e̱ jyoot wyinma'añ oy wa'adz mu̶u̶d ma je̱'e̱ Diosu̶ñ wan je̱'e̱ jyoot wyinma'añ oy wa'adz mu̶dajtu̶y, y ka'p wyinma'añdyu̶góyu̶ch.”

12“Jaanch miinu̶p u̶u̶ch tzojku̶, y nmu̶miinu̶byu̶ch je̱'e̱ oy'ajtu̶ñ mu̶dyiibu̶ u̶u̶ch nidu'ug nidu'ug nmo'owu̶byu̶ñ, du'un neby naty tu̶ jya'ay'ajtku̶xyu̶ñ. 13U̶u̶ch du'un u̶u̶ch neby je̱'e̱ leetru̶ A mu̶dyiibu̶ tzondaakp ma je̱'e̱ alfabeto y neby je̱'e̱ leetru̶ Z mu̶dyiibu̶ ku̶jxnu̶byu̶ñ, je̱'e̱ jayu̶jpu̶ y je̱'e̱ u̶x'aambu̶, je̱'e̱ mu̶dyiibu̶ ku̶xyu̶ yajtzondaakp y je̱'e̱ mu̶dyiibu̶ ku̶xyu̶ yajku̶jxp yajmaaybyu̶ñ.”

14Jootkujk je̱' ajku̶xy, je̱'e̱ mu̶dyiibu̶ tu̶ pyokyñi'iwaatzku̶xyu̶ñ, du'un je̱' ajku̶xy neby je̱'e̱ wyit du'umbu̶ tu̶ pujku̶xy tu̶ yajwaatzku̶xyu̶ñ y neby je̱'e̱ ujtz tza'am mu̶baad jú̶kxku̶xyu̶ñ mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ, y neby mu̶baad tyu̶gu̶u̶ygyu̶xyu̶ñ ma je̱'e̱ jemygyajptu̶ñ. 15Peru̶ ka'p je̱'e̱ jiiby tyu̶gu̶u̶ygyu̶xu̶ch, tu̶be̱'py je̱'e̱ wyu̶'u̶mgu̶xu̶ch je̱'e̱ mu̶dyiibu̶ je̱'e̱ ju̶bu̶kwinma'añ mu̶dajtku̶xpu̶ñ, je̱'e̱ mu̶dyiibu̶ kuxu̶u̶'ajtku̶xpu̶ñ, je̱'e̱ mu̶dyiibu̶ je̱'e̱ ya'aydyu̶jk y to'oxyu̶jk tu'ug tu'ug mu̶dtuundu̶gooygyu̶xpu̶ñ, je̱'e̱ ja'ayyaj'o'kpu̶du̶jk ajku̶xy, je̱'e̱ mu̶dyiibu̶ je̱'e̱ tzaadzéch kepychech wiindzu̶gu̶u̶y o'owu̶dajtku̶xpu̶ñ, y ku̶xyu̶ pu̶n tii adzojkku̶xpu̶ñ y tuungu̶xpu̶ñ je̱'e̱ anu̶u̶.

16“U̶u̶ch Jesús, tu̶ u̶u̶ch je̱'e̱ n'ángel nguexy neby je̱'e̱ tu̶y'ajt ku̶xyu̶ yajnáxu̶chu̶ñ majaty je̱'e̱ mu̶bu̶jkpu̶du̶jku̶ñ. U̶u̶ch je̱'e̱ David y'u̶jx tyiktz y xy'ok'ung xy'ok'ana'k'ajtp. U̶u̶ch du'un u̶u̶ch neby je̱'e̱ mu̶j mu̶dza'a jayxu̶u̶mu̶ñ.”

17Je̱'e̱ Espíritu Santo y je̱'e̱ Borreegu̶'úng tyo'oxyu̶jk mu̶naangu̶xp: “¡Min!” Y je̱'e̱ mu̶dyiibu̶ mu̶doobu̶ñ, wan du'un nandu'un mu̶na'añ: “¡Min!” Y pu̶n je̱'e̱ jugy'ajtu̶ñ tzojkp y yajmayjyajtpu̶ñ, je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ, wan miñ, du'un neby du'umbu̶ tyu̶dzu̶'u̶yiiju̶ñ wan miñ y u'ugu̶ch je̱'e̱ nu̶u̶ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ, y ka'p nidu'uñdyu̶ yajmeeñdyúnu̶ch.

18Ku̶xyu̶ pu̶n je̱'e̱ Dios y'ayuuk tyu̶y'ajt mu̶doogu̶xpu̶ñ, je̱'e̱ mu̶dyiibu̶ tu̶ yajnajtzkapxu̶'u̶yu̶ñ, je̱'e̱ mu̶dyiibu̶ kuja'ay miimb ma adayaaba libroju̶ñ, cham u̶u̶ch nnajtzkapxu̶u̶yu̶ ajku̶xy. Pu̶nu̶ jii pu̶n jak'yajni'igyu̶ju̶'u̶y adaa ayuuk ma adayaaba libroju̶ñ, jak'yajni'igyu̶ju̶u̶ygu̶xu̶p je̱'e̱ Dios y'ayo'on, je̱'e̱ mu̶dyiibu̶ ya yajnigápxp ma adayaaba libroju̶ñ. 19Y pu̶nu̶ jii pu̶n we̱e̱nu̶ puwich adayaaba ayuuk tu̶y'ajt je̱'e̱ mu̶dyiibu̶ tu̶ yajnajtzkapxu̶'u̶yu̶ñ, je̱'e̱ mu̶dyiibu̶ kuja'ay miimb ma adayaaba libroju̶ñ, jo'tzu̶xu̶p je̱'e̱ Dios xyu̶u̶ mu̶dyiibu̶ kuja'ay miimb ma je̱'e̱ jugy'ajt libroju̶ñ y ka'p jiiby tyu̶gu̶'u̶wu̶ch ma je̱'e̱ wa'adzpu̶ jemygyajptu̶ñ, je̱'e̱ mu̶dyiibu̶ ya yajnigápxp ma adayaaba libroju̶ñ.

20Pu̶n adaa du'un nigapxpu̶ñ, du'un je̱'e̱ myu̶na'añ: “Jaanch, miinu̶p u̶u̶ch tzojku̶.”

Jaanch adaa du'un. ¡Min, Windzú̶n Jesús!

21Wan je̱'e̱ Windzú̶n Jesús oy'ajt may'ajt tuñ ma miich nigu̶xyu̶ ajku̶xyu̶ñ. Jaanch adaa du'un.

Currently Selected:

Apocalipsis 22: MIXE

Highlight

Copy

Compare