Apocalipsis 1

Je̱'e̱ mu̶dyiibu̶ je̱'e̱ Jesucristo je̱'e̱ San Juan yaj'ijxu̶ñ

1Adaa tu̶y'ajt je̱'e̱ Dios je̱'e̱ Jesucristo yaj'ijx yajnejwu̶u̶y, wan je̱'e̱ Jesucristo du'un yajmu̶doy'ádu̶ch je̱'e̱ Dios tyuumbu̶du̶jk mu̶dyiibu̶ ya naaxwiiñ tzojku̶ tunán jadánu̶bu̶ñ. Tu̶ je̱'e̱ Jesucristo Juan je̱'e̱ tu̶y'ajt du'un yajnejwu̶'u̶y ko je̱'e̱ y'ángel kejxy ma je̱'e̱ju̶ñ, 2je̱' je̱'e̱ tu̶y'ajt ku̶xyu̶ tu̶ nigapxyu̶ñ tii y'ijx myu̶doowu̶ñ, y je̱' je̱'e̱ Dios y'ayuuk nidu̶y'ajt'ajtp, je̱'e̱ mu̶dyiibu̶ je̱'e̱ Jesucristo ñi'igapxpe̱jtu̶ñ.

3Jootkujk pu̶n adaa naky kapxpu̶ñ y jootkujk pu̶n amdoo'ijtku̶xpu̶ñ adaa Dios y'ayuuk, mu̶dyiibu̶ je̱'e̱ Juan tu̶ yajmo'oyu̶ñ y pu̶n adaa kuydyuungu̶xpu̶ñ, mu̶dyiibu̶ ya kuja'ay ma adayaaba nakyu̶ñ, je̱' ko tu̶ je̱'e̱ xu̶u̶ tiempo wyingoonu̶ mu̶naa adaa du'un tyuna'añyii jyada'añyiiju̶ñ.

Juan je̱'e̱ juxtujkpú̶kypyu̶ mu̶bu̶jkpu̶du̶jk nijayu̶'u̶y

4U̶u̶ch Juan, nnijayu̶u̶byu̶ch je̱'e̱ juxtujkpú̶kypyu̶ mu̶bu̶jkpu̶du̶jk mu̶dyiibu̶ jim Asia naaxjooty yajpaatku̶xpu̶ñ. Wan je̱'e̱ Dios oy'ajt may'ajt tuñ ma miich ajku̶xyu̶ñ y xymyooygyu̶xu̶ch je̱'e̱ jootkujk'ajtu̶ñ, je̱'e̱ mu̶dyiibu̶ cham Dios'ajtpu̶ñ y je̱'e̱ mu̶dyiibu̶ jékyu̶p Dios'ajtu̶ñ y je̱'e̱ mu̶dyiibu̶ minaambu̶ñ, y je̱'e̱ juxtujkpu̶ espíritu mu̶dyiibu̶ yajpaatku̶xpu̶ñ ma je̱' y'ane̱'e̱mdaakt winduuyu̶ñ. 5Wan je̱'e̱ Jesucristo oy'ajt may'ajt nandu'un tuñ ma miich ajku̶xyu̶ñ, je̱'e̱ tu'uda'agypyu̶ nidu̶y'ajt'ajtpu̶, je̱'e̱ mu̶dyiibu̶ timyjyayu̶jp jugypyu̶jku̶ñ ko najty tu̶ y'o'ogy y je̱' ane̱'e̱mu̶ñ mu̶dajtp ma je̱'e̱ ane̱'e̱mbu̶du̶jk mu̶dyiibu̶ ya naaxwiiñ ane̱'e̱mgu̶xpu̶ñ. Cristo xychojkp xyjyu̶wu̶u̶by ajtu̶m ajku̶xy, y tu̶ je̱'e̱ nboky ngu̶dyeey xyajni'iwaatz xyajku'uwaatzu̶m ajku̶xy ko je̱'e̱ ñe'pty te̱e̱m yojky mu̶u̶d u̶u̶ch kyu̶xpu̶ ajtu̶m ajku̶xy, 6y tu̶ je̱'e̱ ane̱'e̱mu̶ñ xymyooyu̶m ajku̶xy du'un neby je̱'e̱ ane̱'e̱mbu̶ ane̱'e̱mu̶ñ yajmooygyu̶xyu̶ñ, y tu̶ je̱'e̱ tuung xymyooyu̶m ajku̶xy du'un neby je̱'e̱ teedytyu̶jk tuung yajmooygyu̶xyu̶ñ, wan je̱'e̱ Dyios y je̱'e̱ Tyeedy nmu̶duunu̶yu̶ch ajtu̶m ajku̶xy. ¡Wan je̱'e̱ kyu'umaayu̶ñ y je̱'e̱ myu̶k'ajtu̶ñ wiinu̶u̶xu̶u̶ ity! Jaanch adaa du'un.

7Ok'ijxku̶x okmu̶doogu̶x, ¡mínu̶p je̱'e̱ Cristo jokjooty!

y ku̶xyu̶ je̱'e̱ ja'ay y'ixu̶u̶ tyu̶kxu̶u̶ju̶ch,

u̶xtu̶ je̱'e̱baad mu̶dyiibu̶ tzaachtyuunu̶gu̶xu̶ñ.

Y ku̶xyu̶ je̱'e̱ naax kajpt ya naaxwiimbu̶

tyajku̶x myaaygyu̶xu̶ch y jyu̶u̶ygyu̶x yaaxku̶xu̶ch mu̶u̶d je̱' gyu̶xpu̶.

Jaanch, du'un adaa.

8“U̶u̶ch du'un u̶u̶ch neby je̱'e̱ leetru̶ A mu̶dyiibu̶ tzondaakp ma je̱'e̱ alfabeto y neby je̱'e̱ leetru̶ Z mu̶dyiibu̶ ku̶jxnu̶byu̶ñ,” [je̱'e̱ mu̶dyiibu̶ ku̶xyu̶ yajtzondaakp y je̱'e̱ mu̶dyiibu̶ ku̶xyu̶ yajku̶jxp yajmaaybyu̶ñ],#1.8 Adayaaba texto tu'ktúkypyu̶ korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy. du'un je̱'e̱ Windzú̶n myu̶na'añ, je̱'e̱ Dios mu̶jmu̶k'ajtmu̶u̶dpu̶, je̱'e̱ mu̶dyiibu̶ cham Dios'ajtpu̶ñ y je̱'e̱ mu̶dyiibu̶ jékyu̶p Dios'ajtu̶ñ y je̱'e̱ mu̶dyiibu̶ minaambu̶ñ.

Juan je̱'e̱ Cristo y'oy'ajt myu̶j'ajt ijxu̶

9U̶u̶ch Juan, miich mmu̶gu'ugtu̶jk ajku̶xy, y ko u̶u̶ch tu'ugyu̶ nyajpaady mu̶u̶d je̱'e̱ Jesús nan yajpaadu̶bu̶ch jiiby mu̶u̶d miich ajku̶xy ma je̱'e̱ Dios y'ane̱'e̱mdaaktu̶ñ du'un neby u̶u̶ch tu̶ njaty tu̶ n'ayoy mu̶u̶d miich ajku̶xy nan tu̶ je̱'e̱ mu̶k'ajt nbaattu̶m ajku̶xy neby tu̶ nmu̶madaaku̶mu̶ñ ajku̶xy. Jim u̶u̶ch najty mach n'ity ma je̱'e̱ naax mejy'agujkpu̶ mu̶dyiibu̶ xu̶u̶'ajtpu̶ñ Patmos je̱' gyu̶xpu̶ ko u̶u̶ch je̱'e̱ Dios y'ayuuk tyu̶y'ajt ngapxwa'kxu̶, y neby je̱'e̱ Jesús ni'igapxpejtyu̶ñ. 10Y chi u̶u̶ch du'un njajty, domingo xu̶u̶ najty ko u̶u̶ch je̱'e̱ Dios y'Espíritu xyajtu̶gu̶u̶y, y chi u̶u̶ch ju̶xku̶'u̶by'eemby nmu̶dooy tu'ug je̱'e̱ ayuuk janch mu̶k, du'un neby je̱'e̱ trompeta ya'axyu̶ñ, 11xyñu̶ma'ayu̶ch: [U̶u̶ch du'un u̶u̶ch neby je̱'e̱ leetru̶ A mu̶dyiibu̶ tzondaakp ma je̱'e̱ alfabeto y neby je̱'e̱ leetru̶ Z mu̶dyiibu̶ ku̶jxnu̶byu̶ñ, je̱'e̱ mu̶dyiibu̶ ku̶xyu̶ yajtzondaakp y je̱'e̱ mu̶dyiibu̶ ku̶xyu̶ yajku̶jxp yajmaaybyu̶ñ.]#1.11 Adayaaba texto tu'ktúkypyu̶ korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy. Kuja'aw ma tu'ug libro mu̶dyiibu̶ yam m'ijxypyu̶ñ, yajnigue̱jxku̶x je̱'e̱ juxtujkpú̶kypyu̶ mu̶bu̶jkpu̶du̶jk jim Asia naaxjooty: jim Éfeso, Esmirna, Pérgamo, Tiatira, Sardis, Filadelfia y Laodicea.

12Chi u̶u̶ch nwa'agwimbijty n'ixa'añu̶ch pu̶n u̶u̶ch du'un xymyu̶gapxpu̶ñ; y ko u̶u̶ch nnayjyu̶'ijxu̶ chi u̶u̶ch je̱'e̱ ju̶u̶ndooybye̱jt juxtujk n'ijxy agu̶ ooru̶. 13Y n'ijxyu̶ch ma je̱'e̱ juxtujkpu̶ ju̶u̶ndooybye̱jt'agujk tu'ug je̱'e̱ ja'ay neby oy mu̶dyiibu̶ ja'ayu̶ñ, janch yoñ je̱'e̱ wyit tekyyo'kpaad kyu̶da'agy y wyu̶u̶ñu̶ch mu̶u̶d je̱'e̱ ooru̶ wu̶u̶n kachju̶jp je̱'e̱ wyu̶u̶n jya'ady. 14Janch poob je̱'e̱ kyu'ubajk y je̱'e̱ kyu'uwaay neby je̱'e̱ poob pixyu̶ñ, o neby nieve pyoobu̶chu̶ñ, y du'un je̱'e̱ wyiin najty kyu̶xu̶'u̶gy neby je̱'e̱ ju̶u̶nyé̱ngu̶ñ. 15Du'un je̱'e̱ tyeky najty y'adu̶kxy y'ajajy neby je̱'e̱ pujxk y'adu̶kxyu̶ñ ko yajpo'ody, neby ju̶u̶njooty hoornu̶jooty pyu̶dzu̶myu̶ñ. Y janch mu̶k kyapxy du'un neby je̱'e̱ mu̶jnu̶u̶ may'it y'u̶u̶chu̶ñ. 16Y ma je̱'e̱ y'a'oygyu̶'u̶ju̶ñ mu̶dza'a najty juxtujk mu̶u̶du̶ch, y pyu̶dzu̶my pujxk espaadu̶ tu'ug ju̶jpxu'uñbyu̶ ma je̱'e̱ y'awaku̶ñ mu̶dyiibu̶ me̱jtz'adu'um'eemby ju̶jpu̶ñ. Du'un wyiin jyu̶jp najty kyu̶xu̶'u̶gy neby je̱'e̱ xu̶u̶ mu̶k y'añu̶ñ mu̶u̶d ku̶xyu̶ je̱'e̱ myu̶k myu̶jaa.

17Ko u̶u̶ch du'un n'ijxy, chi u̶u̶ch ngu̶daay y nwu̶'u̶myu̶ch neby je̱'e̱ o'ogypyu̶ ma je̱'e̱ tyekymyu̶jku̶ñ. Peru̶ je̱' u̶u̶ch je̱'e̱ y'a'oygyu̶'u̶ xyajni'ixaj, y xyñu̶maayu̶ch: “Ka'p mdzu̶gu̶'u̶y; u̶u̶ch je̱' je̱'e̱ mu̶dyiibu̶ ku̶xyu̶ yajdzondaakpu̶ñ y je̱'e̱ mu̶dyiibu̶ ku̶xyu̶ yajku̶jxp yajmaaybyu̶ñ, 18y je̱'e̱ mu̶dyiibu̶ jugy'ajtpu̶ñ. Oy u̶u̶ch nja'a'o'ky, jugy'ajtpu̶ch jada'achám wiinu̶u̶xu̶u̶. U̶u̶ch je̱'e̱ mu̶k'ajtu̶ñ nmu̶u̶d ma je̱'e̱ o'ku̶ñ y ma je̱'e̱ ayodaaktu̶ñ, du'un neby u̶u̶ch je̱'e̱ o'kpu̶ it awaatzk du'umbu̶ nmu̶u̶du̶chu̶ñ. 19Kuja'aw mu̶dyiibu̶ tu̶ m'ixyu̶ñ, je̱'e̱ mu̶dyiibu̶ jada'achám tuunu̶p jajtu̶p y je̱'e̱ mu̶dyiibu̶ jiinu̶ tunaan jadaanu̶bu̶ñ. 20Du'un je̱'e̱ yu'uchpyu̶ tu̶y'ajt wyimbu̶dzu̶my ma je̱'e̱ juxtujkpu̶ mu̶dza'a mu̶dyiibu̶ tu̶ m'ixy ma u̶u̶ch je̱'e̱ n'a'oygyu̶'u̶ju̶ñ, je̱'e̱ juxtujkpu̶ ju̶u̶ndooybye̱jt agu̶ ooru̶bu̶: y je̱'e̱ juxtujkpu̶ mu̶dza'a je̱'e̱ ángelestu̶jk je̱'e̱ ajku̶xy, je̱'e̱ mu̶dyiibu̶ kugapxy'ajtku̶xpu̶ñ ma je̱'e̱ juxtujkpú̶kypyu̶ mu̶bu̶jkpu̶du̶jk ajku̶xyu̶ñ, y je̱'e̱ juxtujkpu̶ ju̶u̶ndooybye̱jt je̱' je̱'e̱ ajku̶xy je̱'e̱ juxtujkpú̶kypyu̶ mu̶bu̶jkpu̶du̶jk ajku̶xy.

Currently Selected:

Apocalipsis 1: MIXE

Highlight

Copy

Compare