Apocalipsis 17

Je̱'e̱ tzaachpyu̶ mu̶dyiibu̶ je̱'e̱ mu̶j to'oxyu̶jk pyade̱e̱mby mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ

1Nidu'ugpu̶ je̱'e̱ juxtujkpu̶ ángelestu̶jk mu̶dyiibu̶ je̱'e̱ juxtujkpu̶ koopu̶ najty mu̶dajtku̶xpu̶ñ, xyñimiiñu̶ch y xyñu̶maayu̶ch: “Okmín, cham je̱'e̱ tzaachpyu̶ nyajni'ixu̶'u̶wa'añ mu̶dyiibu̶ je̱'e̱ mu̶j to'oxyu̶jk pyade̱e̱mby mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ, je̱'e̱ mu̶dyiibu̶ jim mejywingú̶xy u̶ñaaybyu̶ñ. 2Yu̶'u̶ naaxwiimbu̶ ane̱'e̱mbu̶du̶jk tu̶ yu̶'u̶ jiibu̶ to'oxyu̶jk mu̶dtuundu̶gooygyu̶xy, y ku̶xyu̶ je̱'e̱ naax kajpt tu̶ win'u̶u̶ngu̶xy mu̶u̶d je̱'e̱ jyu̶bu̶kwinma'añ, du'un neby je̱'e̱ to'oxyu̶jk ya'aydyu̶jktu̶jk a'uugu̶'u̶yu̶ñ ju̶gu'uwin'u̶u̶nu̶'u̶y y chi mu̶dtuundu̶góy.”

3Mu̶'it u̶u̶ch je̱'e̱ Dios y'Espíritu xyaj'ijxy, xyajnú̶kxyu̶ch je̱'e̱ ángel jim adu'ugtuum. Jim u̶u̶ch je̱'e̱ to'oxyu̶jk tu'ug n'ijxy y'u̶ña'ay tzaptz ju̶bu̶kju̶yujkkú̶xp, y ni'ija'ay ku'uja'ay najty je̱'e̱ ju̶bu̶kju̶yujk ñi'kx tu'kku̶'u̶yu̶ mu̶u̶d je̱'e̱ ayuuk mu̶dyiibu̶ je̱'e̱ Dios yajjootma'tpu̶ñ, y juxtujk najty je̱'e̱ kyu'ubajk y majk kyapt. 4Je̱'e̱ to'oxyu̶jk oy'uky y tzaptz najty wyit je̱', y xoxy najty mu̶u̶d je̱'e̱ ooru̶, mu̶u̶d je̱'e̱ oyjyatypyu̶ tzaa y mu̶u̶d je̱'e̱ perlas. Jim najty koopu̶ tu'ug ku̶'u̶gu̶'u̶yu̶ch agu̶ ooru̶ ujtz mu̶u̶d mu̶dyiibu̶ je̱'e̱ Dios kya'amu̶dnay'ixaanu̶byu̶ñ, y ju̶bu̶kpu̶ neby je̱'e̱ ya'aydyu̶jk tu'ug tu'ug mu̶dtuundu̶góyu̶ñ. 5Y wyimbokku̶xp najty je̱'e̱ leetru̶ kuja'ay mu̶u̶du̶ch mu̶dyiibu̶ ka'p yajwinju̶wu̶'u̶yu̶ñ mu̶dyiibu̶ du'un mu̶naambu̶ñ: “Je̱'e̱ mu̶j Babilonia, mu̶dyiibu̶ je̱'e̱ to'oxyu̶jk ya'aydyu̶jk mu̶dtuundu̶goyu̶u̶ nigopt'ajtpu̶ñ y ku̶xyu̶ mu̶dyiibu̶ ya naaxwiiñ ka'p yajmu̶dnay'ixa'añyiiju̶ñ.” 6Chi u̶u̶ch n'ijxy ko je̱'e̱ to'oxyu̶jk najty muuku̶bu̶ch, je̱'e̱ ne'pty najty je̱'e̱ tu̶ myu'ugyii je̱'e̱ mu̶dyiibu̶ najty tu̶ yaj'o'kku̶xyu̶ñ, je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ, y je̱'e̱ mu̶dyiibu̶ najty tu̶ ku'u'o'ogu̶u̶ygyu̶xyu̶ñ ko je̱'e̱ Jesús nidu̶y'ajt'ajtku̶xy.

Ko u̶u̶ch du'un n'ijxy, chi u̶u̶ch mu̶k nyajnú̶kxy nyajju̶wu̶u̶y. 7Mu̶'it u̶u̶ch je̱'e̱ ángel xyñu̶maay: “¿Tii ko mu̶k myajnú̶kxy myajju̶wu̶'u̶y? Cham n'awa'anaanu̶ neby je̱'e̱ yu'uchpyu̶ to'oxyu̶jk y'ayuuk y je̱'e̱ ju̶bu̶kju̶yujk y'ayuuk wyimbu̶dzu̶myu̶ñ, je̱'e̱ mu̶dyiibu̶ yaj'u̶ñaaybyu̶ñ, je̱'e̱ mu̶dyiibu̶ je̱'e̱ kyu'ubajk juxtujku̶ñ y majk kyapt. 8Je̱'e̱ ju̶bu̶kju̶yujk mu̶dyiibu̶ tu̶ m'ixyu̶ñ je̱' je̱' je̱'e̱ mu̶dyiibu̶ jékyu̶p tzu̶naayu̶ñ, peru̶ ka'p je̱'e̱ jada'achám y'ok'yajpaatnu̶, peru̶ pu̶dzú̶mu̶p je̱' ma je̱'e̱ jut ayodaakt ma naty ka'p tu'u'ook ku'udu̶góy kyu'udu̶gooyñu̶ju̶ñ. Je̱'e̱ naaxwiiñjya'ay mu̶dyiibu̶ je̱'e̱ xyu̶u̶ jiiby ka'p kyuja'ayu̶chu̶ñ ajku̶xy, maabu̶ je̱'e̱ naaxwiiñ aga'an chonda'agy, ma je̱'e̱ jugy'ajt libroju̶ñ, mu̶k je̱'e̱ yajnú̶kx yajju̶wu̶u̶ygyu̶xu̶ch ko je̱'e̱ ju̶bu̶kju̶yujk ijxku̶xu̶ch mu̶dyiibu̶ ijty jékyu̶p tzu̶naaybyu̶ñ y ka'p jada'achám y'ok'yajpaatnu̶, peru̶ mínu̶p je̱'e̱ ja'adu'ook.

9“Yaa yaj'ixa'añ pu̶n je̱'e̱ wij'ajt ke̱j'ajt mu̶dajtpu̶ñ y winju̶wu̶u̶ybyu̶ñ: Je̱'e̱ juxtujkpu̶ ku'ubajk, je̱' je̱' je̱'e̱ juxtujkpu̶ kopt ma je̱'e̱ to'oxyu̶jk y'u̶ña'ayu̶ñ, y je̱' nandu'un je̱'e̱ juxtujkpu̶ mu̶j'ane̱'e̱mbu̶. 10Peru̶ mu̶gooxk je̱'e̱ juxtujkpu̶ ane̱'e̱mbu̶ myu̶k'ajt tu̶ tyu̶gooygyu̶xy, tu'ug je̱'e̱ nime̱tzkpu̶ je'eyu̶ mu̶dyiibu̶ jakwu̶'u̶mnu̶ju̶ñ cham y'ane'emy, y je̱'e̱ ja'adu'ukpu̶ ka'p je̱'e̱ myiñyu̶. Peru̶ ko naty je̱'e̱ jak'u̶x'aambu̶ myiñ, ka'p je̱'e̱ jeky y'ane̱'e̱ma'añ. 11Je̱'e̱ ju̶bu̶kju̶yujk mu̶dyiibu̶ jékyu̶p tzu̶naayu̶ñ y ka'p jada'achám y'ok'yajpaatnu̶, je̱' je̱'e̱ mu̶duktujkpu̶ mu̶j'ane̱'e̱mbu̶. Nan je̱' je̱'e̱ nandu'un nidu'ugtu̶ je̱'e̱ mu̶juxtujkpu̶ mu̶j'ane̱'e̱mbu̶, nan jim je̱'e̱ nandu'un ñu̶kxy ma tu'ook ku'udu̶góyu̶ kyu'udu̶góyu̶chu̶ñ.

12“Je̱'e̱ majkpu̶ kapt mu̶dyiibu̶ tu̶ m'ixyu̶ñ, je̱'e̱ majkpu̶ mu̶j ane̱'e̱mbu̶ je̱'e̱ ajku̶xy, je̱'e̱ mu̶dyiibu̶ ka'p y'ane̱'e̱mdu̶gu̶u̶ygyu̶xyñu̶ju̶ñ; peru̶ pyaatku̶xu̶py je̱'e̱ ane̱'e̱mu̶ñ tu'k hooru̶ je'eyu̶ kipxy mu̶u̶d je̱'e̱ ju̶bu̶kju̶yujk ko y'ane̱'e̱mgu̶xu̶ch neby je̱'e̱ mu̶j ane̱'e̱mbu̶du̶jk ajku̶xyu̶ñ. 13Adayaaba majkpu̶ mu̶j ane̱'e̱mbu̶du̶jk ajku̶xy tu'ugyu̶ je̱' ajku̶xy y tu'ugyu̶ je̱'e̱ jyoot wyinma'añ ajku̶xy, y myooygyu̶xu̶py je̱'e̱ ju̶bu̶kju̶yujk y'ane̱'e̱mu̶ñ y myu̶k'ajtu̶ñ ajku̶xy. 14Tziptuungu̶xu̶p mu̶u̶d je̱'e̱ Borreegu̶'úng, peru̶ mu̶madaaku̶gu̶xu̶p je̱'e̱ Borreegu̶'úng mu̶u̶d je̱'e̱ mu̶dyiibu̶ je̱'e̱ Dios tu̶ win'ixyu̶ñ y tu̶ ijxtú̶yu̶ñ y tu'uda'agyu̶ñ ajku̶xy, je̱' ko je̱'e̱ Borreegu̶'úng Ane̱'e̱mb ma je̱'e̱ mu̶dyiibu̶ ane̱'e̱mbu̶ñ, y Windzú̶n ma je̱'e̱ mu̶dyiibu̶ windzu̶n'ajtpu̶ñ.”

15Du'un u̶u̶ch je̱'e̱ ángel nandu'un xyñu̶maay: “Je̱'e̱ mejy mu̶dyiibu̶ tu̶ m'ixyu̶ñ ma je̱'e̱ to'oxyu̶jk y'u̶ña'ayu̶ñ, je̱'e̱ mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ, je̱' je̱'e̱ ajku̶xy je̱'e̱ mutzk naax mutzk kajpt, je̱'e̱ ja'ay ajku̶xy, je̱'e̱ mu̶dyiibu̶ tu̶gachjyaty kápxku̶xpu̶ñ y ku̶xyu̶ je̱'e̱ naax kajpt ajku̶xy. 16Y je̱'e̱ majkpu̶ kapt mu̶dyiibu̶ tu̶ m'ixyu̶ñ ma je̱'e̱ ju̶bu̶kju̶yujku̶ñ, myu̶'ixnaaygyu̶xu̶py je̱'e̱ to'oxyu̶jk mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ, y ni'iwa'adz u̶xwa'adz u̶xmajtzku̶xu̶ch naydyu'um. Chu'tzu̶py je̱'e̱ ñi'kx chu'uch ajku̶xy y ño'kku̶xu̶py mu̶u̶d je̱'e̱ ju̶u̶n. 17Tu̶ je̱'e̱ Dios pu̶da'agy ma je̱' y'aa jyoot ajku̶xyu̶ñ ko wan tuungu̶xy neby je̱'e̱ Dios tzokyu̶ñ: y tyuungu̶xu̶py je̱'e̱ ane̱'e̱mbu̶du̶jk kipxy kapxy ko je̱'e̱ ju̶bu̶kju̶yujk y'ane̱'e̱mu̶ñ mooygyu̶xu̶ch, u̶xtu̶ koonu̶ je̱'e̱ ayuuk kuydyuungu̶xu̶ch neby je̱'e̱ Dios tu̶ myu̶na'añu̶ñ. 18Je̱'e̱ to'oxyu̶jk mu̶dyiibu̶ tu̶ m'ixyu̶ñ, je̱'e̱ mu̶jkajpt je̱', mu̶dyiibu̶ je̱'e̱ ane̱'e̱mbu̶du̶jk ya naaxwiiñ ku̶xyu̶ ane̱'e̱mdaaybyu̶ñ.”

Currently Selected:

Apocalipsis 17: MIXE

Highlight

Copy

Compare