Apocalipsis 16

Je̱'e̱ koopu̶ mu̶j ayo'on mu̶u̶dpu̶

1Chi u̶u̶ch je̱'e̱ ayuuk mu̶k nmu̶dooy, chooñ jiiby tzajpjooty ma je̱'e̱ Dios y'itu̶ñ y nu̶maaygyu̶xy najty je̱'e̱ juxtujkpu̶ ángelestu̶jk: “Nú̶kxku̶x, y yaj'yojktuutku̶x jiiby naaxwiiñ yu̶'u̶ juxtujkpu̶ koopu̶ je̱'e̱ mu̶j ayo'on mu̶dyiibu̶ je̱'e̱ Dios kye̱xe̱e̱mbyu̶ñ.”

2Chi je̱'e̱ jayu̶jpu̶ ángel ñu̶kxy, y yaj'yojktuuty je̱'e̱ kyoopu̶ jiiby naaxwiiñ; y chi je̱'e̱ ja'ay ku̶xyu̶ mu̶dyiibu̶ je̱'e̱ ju̶bu̶kju̶yujk y'ijxpe̱jt najty mu̶dajtku̶xpu̶ñ y nan mu̶dyiibu̶ je̱'e̱ ju̶bu̶kju̶yujk y'agojnáx najty windzu̶gu̶u̶ygyu̶xpu̶ñ ju̶bu̶k pu'udz ñi'ibu̶dzu̶u̶mu̶gu̶xyu̶ mu̶dyiibu̶ janch pu̶jkpu̶ñ.

3Chi je̱'e̱ mu̶me̱tzkpu̶ ángel kyoopu̶ yaj'yojktuuty mejyjyooty, y chi je̱'e̱ mejy ne'pty y'awimbijty, du'un neby je̱'e̱ o'ogyjya'ay ñe'ptyu̶ñ, y chi ku̶jx y'o'kta'ay mu̶dyiijáty najty jiiby mejyjyooty tzu̶naaygyu̶xpu̶ñ.

4Chi je̱'e̱ mu̶du̶gu̶u̶kpu̶ ángel kyoopu̶ yaj'yojktuuty majaty je̱'e̱ mu̶jnu̶u̶ y majaty je̱'e̱ nu̶u̶ pyu̶dzu̶myu̶ñ, y chi ne'pty ku̶jx y'awimbijtta'ay. 5Mu̶'it u̶u̶ch nmu̶dooy ko je̱'e̱ ángel myu̶na'añ mu̶dyiibu̶ je̱'e̱ nu̶u̶ niwindzu̶n'ajtpu̶ñ:

“Miich tu'uda'agy miich ko je̱'e̱ naaxwiiñjya'ay du'un mdu̶ydyúñ,

miich wa'adzpu̶ Dios, mu̶dyiibu̶ cham Dios'ajtpu̶ñ y mu̶dyiibu̶ jékyu̶p Dios'ajtu̶ñ,

6je̱' ko paady du'un tu̶ tyuñ tu̶ jyadyii ko je̱'e̱ naaxwiiñjya'ay ñe'pty te̱e̱mu̶ yojku̶ ajku̶xy je̱'e̱ m'ayuuknajtzkapxu̶u̶ybyu̶du̶jk,

y je̱'e̱ mu̶dyiibu̶ yajpaatku̶xpu̶ñ ma je̱'e̱ mja'ayu̶ñ,

y jada'achám tu̶ je̱'e̱ ne'pty myaj'uukku̶xy ko je̱'e̱ mejy wa'adz ne'pty tu̶ myaj'awimbíty,

¡Winmajtzu̶p najty du'un ajku̶xy!”

7Nan nmu̶doowu̶ch nandu'un ma je̱'e̱ poch ma je̱'e̱ windzu̶gu̶'u̶ñ yaj'yékyu̶ñ myu̶na'añ: “Jaanch, Windzú̶n, Dios mu̶jmu̶k'ajtmu̶u̶dpu̶, tu̶ miich je̱'e̱ naaxwiiñjya'ay mdu̶ydyúñ mu̶u̶d je̱'e̱ tu̶y'ajtu̶ñ y tu'uda'agy'ajtu̶ñ.”

8Chi je̱'e̱ mu̶mu̶daaxkpu̶ ángel kyoopu̶ yaj'yojktuuty ma je̱'e̱ xu̶u̶ju̶ñ, chi je̱'e̱ xu̶u̶ mu̶k'ajt yajmooy neby je̱'e̱ ja'ay no'ogu̶chu̶ñ mu̶u̶d je̱'e̱ ambu̶. 9Y ku̶xyu̶ je̱'e̱ ja'ay janch mu̶k xyu̶u̶no'ktaayu̶gu̶xy; peru̶ ka'p jyootwimbijtku̶xy ma je̱'e̱ Diosu̶ñ ni ka'aku'umaay ka'aja'aymye̱jtzku̶xy, ni'igyu̶ je̱'e̱ Dios ju̶bu̶k axu̶u̶g mu̶gapxtu̶gooygyu̶xy, je̱'e̱ mu̶dyiibu̶ je̱'e̱ mu̶k'ajt mu̶dajtp ma adayaaba ayo'ondu̶ñ.

10Chi je̱'e̱ mu̶mu̶gooxkpu̶ ángel kyoopu̶ yaj'yojktuuty ma je̱'e̱ ju̶bu̶kju̶yujk y'ane̱'e̱mdaaktu̶ñ, y chi kyoodzu̶ydyaay mabaad y'ane'emyu̶ñ. Du'un je̱'e̱ ja'ay tyootz janch tzu'tzku̶xy ko je̱'e̱ tzaachpyu̶ du'un ijxku̶xy paatku̶xy; 11peru̶ ni du'un je̱'e̱ ju̶bu̶kpu̶ ka'a'u̶xmajtzku̶xy mu̶dyiibu̶ najty tyuungu̶xypyu̶ñ, ni'igyu̶ je̱'e̱ tzajpjootypyu̶ Dios ju̶bu̶k axu̶u̶g mu̶gapxtu̶gooygyu̶xy ko je̱'e̱ tzaachpyu̶ najty du'un ijxku̶xy paatku̶xy y je̱'e̱ ju̶bu̶k pu'udz.

12Chi je̱'e̱ mu̶dudujkpu̶ ángel kyoopu̶ yaj'yojktuuty ma je̱'e̱ Eufrates mu̶jnu̶u̶ju̶ñ, chi je̱'e̱ mu̶jnu̶u̶ tyu̶u̶ch neby je̱'e̱ ane̱'e̱mbu̶du̶jk du'un ñajxku̶xu̶chu̶ñ, je̱'e̱ mu̶dyiibu̶ najty xu̶u̶bu̶dzu̶my'eemby tzóngu̶xpu̶ñ.

13Chi u̶u̶ch n'ijxy ma je̱'e̱ awa'an tza'añdy y'awaku̶ñ, ma je̱'e̱ ju̶bu̶kju̶yujk y'awaku̶ñ y ma je̱'e̱ y'awaku̶ñ, je̱'e̱ mu̶dyiibu̶ naydyiju̶bu̶ñ Dios y'ayuuknajtzkapxu̶u̶ybyu̶ y ka'p ñi'ijaanchu̶chpyu̶, pyu̶dzu̶my tu̶gu̶u̶g ka'a'óybyu̶ du'un neby yokychu̶ñ. 14Je̱'e̱ tu̶gu̶u̶gpu̶ ju̶bu̶k espíritu tyuungu̶xypy najty mu̶j ijxpe̱jt je̱' y'u̶xtaaygyu̶xypy y wyoomujkku̶xypy najty ku̶xyu̶ je̱'e̱ ane̱'e̱mbu̶du̶jk mu̶dyiibu̶ ya naaxwiiñ yajpaatku̶xpu̶ñ, neby je̱'e̱ Dios mu̶j mu̶k'ajtmu̶u̶dpu̶ mu̶dtziptuungu̶xu̶chu̶ñ ko naty je̱'e̱ mu̶j xu̶u̶ paady mu̶naa je̱'e̱ Dios tu̶ yajnigu'udugu̶'u̶yu̶ñ.

15“Okmu̶doogu̶x, u̶u̶ch du'un u̶u̶ch ixy ka'a'íxy tzojku̶ nmínu̶ch, neby je̱'e̱ me̱e̱tzpu̶ ixy ka'a'íxy tzojku̶ myiñu̶ñ. Jootkujk je̱'e̱ mu̶dyiibu̶ ni'ixu̶'u̶ ijtku̶xpu̶ñ y kweentu̶'ajtku̶xy je̱'e̱ wyit y ka'pu̶ ni'iwa'adz u̶xwa'adz wyu̶dijtku̶xu̶ch, y cho'oydyuungu̶xu̶ch ko naty ñi'iwa'adz y'u̶xwa'adzu̶ch ajku̶xy.”

16Chi je̱'e̱ tu̶gu̶u̶gpu̶ ju̶bu̶k espíritu ane̱'e̱mbu̶du̶jk woomujktaaygyu̶xy ma je̱'e̱ it naaxwiiñ hebreo'eemby xyu̶u̶'átyu̶ñ Armagedón.

17Chi je̱'e̱ mu̶juxtujkpu̶ ángel kyoopu̶ yaj'yojktuuty jim pojjooty, y chi jiiby tzajpjooty ma je̱'e̱ Dios chu̶naaydyaaktu̶ñ ayuuk tu'ug mu̶k yajmu̶dooy, chooñ najty ma je̱'e̱ y'ane̱'e̱mdaaktu̶ñ y myu̶na'añ najty: “¡Tu̶ je̱'e̱ du'un tyuñyii jyadyii!” 18Y chi wyu̶dzujky, yajmu̶dooy ne̱'e̱mu̶ñ, ane̱e̱ mu̶k yaaxy jyojky, y chi je̱'e̱ naaxwiimbu̶ mu̶k chu̶yuuy mu̶u̶d je̱'e̱ mu̶k temblor, neby ka'p nimu̶naa tyuñyii jyadyiiñyu̶ju̶ñ maabu̶ je̱'e̱ ja'ay ya naaxwiiñ chu̶naaydyu̶gu̶u̶y jyugy'ajtu̶gu̶u̶ygyu̶xyu̶ñ. 19Je̱'e̱ Babilonia mu̶j kajpt tu̶gu̶u̶gpú̶ky je̱'e̱ y'aja'awu̶u̶y, y ku̶xyu̶ je̱'e̱ naax kajpt y'apu'u y'ajiidzu̶u̶y, y jya'aymye̱jtzpaat je̱'e̱ Dios je̱'e̱ Babilonia mu̶j kajpt, neby du'un tzaachtyúnu̶chu̶ñ mu̶u̶d je̱'e̱ jyootma'tu̶ñ mu̶dyiibu̶ yajnigue̱jxu̶ñ, du'un neby je̱'e̱ viino du'umbu̶ yaj'uukyu̶ñ mu̶dyiibu̶ tzaachtyuumbu̶ñ. 20Ku̶xyu̶ je̱'e̱ naax mejy'agujkpu̶ y tun kopt tyu̶gooydya'ay, 21y kya'ay tu̶u̶tz tuu tzajpjooty majaty je̱'e̱ ja'ay ajku̶xyu̶ñ janch mu̶jjáty y jemchjyaty juxytyikxy kilo naxy tu'ugjátypyu̶, y chi je̱'e̱ ja'ay Dios ju̶bu̶k axu̶u̶g mu̶gapxtu̶gooygyu̶xy ko je̱'e̱ ayo'on tu̶u̶tz tuu ñajxy, je̱' ko janch mu̶k je̱'e̱ tzaachpyu̶ ijxku̶xy paatku̶xy.

Currently Selected:

Apocalipsis 16: MIXE

Highlight

Copy

Compare