Santiago 2

Yajnajtzkapxu̶'u̶y ko ka'p je̱'e̱ nmu̶gu'ug mu̶baad nbe̱jxu̶m ajku̶xy

1Miich mu̶gu'uktu̶jk ajku̶xy, je̱'e̱ mu̶dyiibu̶ je̱'e̱ nWindzú̶n Jesucristo oy'ajt mu̶k'ajt mu̶u̶dpu̶ mu̶bu̶jkku̶xpu̶ñ, ka'p je̱'e̱ ja'ay win'ixy mdzojkku̶xu̶ch, m'agu̶tzógu̶py ajku̶xy wanpú̶nu̶ch. 2-3Tzu̶k okpu̶daaku̶m m'ok'yajpaatku̶xy u̶xyu̶py miich amugu̶'u̶y, y jya'adu̶ch je̱'e̱ kumeeñjya'ay tu'ug mu̶u̶d je̱'e̱ ooru̶ ku̶'u̶jiitz mu̶u̶d je̱'e̱ oybyu̶ wit tukxy, y m'okku'ubu̶jkku̶xu̶ch oy yajxón y mnu̶maaygyu̶xu̶ch: “U̶ña'a yaa ma adaa oybyu̶ u̶ñaybye̱jtu̶ñ”, y nan mu̶'it u̶xyu̶py je̱'e̱ ayoobu̶ja'ay tu'ug jya'ady ni'idúk u̶xtuk, y mnu̶maaygyu̶xu̶ch: “Miich jiiby miich tu̶na'a wu̶'u̶mu̶'u̶ o u̶ña'a miich jiiby naaxkú̶xy.” 4Ko du'un m'adu̶u̶tzku̶xy win'ixy naty je̱'e̱ mmu̶gu'ug du'un mdzojkku̶xy, y m'u̶x'ijx mba'ijxku̶xy mu̶u̶d je̱'e̱ ju̶bu̶kjoot ju̶bu̶kwinma'añ.

5“Mu̶gu'uktu̶jk mu̶dyiibu̶ u̶u̶ch ndzojkypy nju̶wu̶u̶ybyu̶ñ, okmu̶doogu̶x adaa: Tu̶ je̱'e̱ Dios ja'ay win'ixy, je̱'e̱ mu̶dyiibu̶ ya naaxwiiñ ayoogu̶xpu̶ñ, neby je̱'e̱ Dios mu̶k mu̶bu̶jkku̶xu̶chu̶ñ, y neby paatku̶xu̶chu̶ñ je̱'e̱ Dios y'it lyugaar ma y'ane'emyu̶ñ, je̱'e̱ mu̶dyiibu̶ tu̶ awanu̶'u̶y ma je̱'e̱ mu̶dyiibu̶ tzojku̶p ju̶wu̶u̶yu̶bu̶ñ ajku̶xy. 6Peru̶ miich ajku̶xy m'u̶xtijku̶xypy je̱'e̱ ayoobu̶du̶jk. ¿Nej ka'p je̱'e̱ kumeeñjya'ay miich xy'ane̱'e̱mgu̶xp y xyajnú̶kxku̶xy pawich papo'oty ma je̱'e̱ tuungmu̶u̶dpu̶du̶jk winduuy ajku̶xyu̶ñ? 7¿Nej ka'p je̱'e̱ jye̱'e̱ju̶ch ajku̶xy je̱'e̱ mu̶dyiibu̶ je̱'e̱ Cristo ju̶bu̶k axu̶u̶g nigapxp nimu̶dyaakku̶xpu̶ñ, je̱'e̱ mu̶dyiibu̶ miich myajmu̶j'ajtku̶xypyu̶ñ?

8Oy naty du'un mduungu̶xy pu̶nu̶ mguydyuungu̶xypy jaanch je̱'e̱ jakmu̶jpu̶ ane̱'e̱mu̶ñ, du'un neby je̱'e̱ Dios ñaky myu̶na'añu̶ñ: “Mdzógu̶py mju̶wu̶'u̶wu̶py je̱'e̱ mmu̶ju̶u̶n mmu̶du̶jk, du'un neby miich ku̶'u̶m mnaychoky mnayjyu̶wu̶'u̶yiiju̶ñ.” 9Peru̶ pu̶nu̶ win'ixy je̱'e̱ ja'ay mdzojkku̶xy, mduundu̶gooygyu̶xp naty du'un y tu̶ naty mnayyajpokykya'awu̶gu̶xy ma je̱'e̱ Dios y'ane̱'e̱mu̶ñ. 10Pu̶nu̶ jii je̱'e̱ ja'ay tu'ug je̱'e̱ Dios y'ane̱'e̱mu̶ñ ku̶xyu̶ kuydyuundaayu̶, peru̶ pu̶nu̶ jii je̱'e̱ ane̱'e̱mu̶ñ tu'kpajk ka'akuydyúñ, ku̶xyu̶ naty je̱'e̱ Dios y'ane̱'e̱mu̶ñ du'un tu̶ mu̶duundu̶gooyu̶. 11Je̱'e̱ Dios mu̶dyiibu̶ du'un ku̶'u̶m mu̶naan: “Ka'p je̱'e̱ wiingpu̶ to'oxyu̶jk mmu̶dtuundu̶góyu̶ch”, nandu'un je̱'e̱ myu̶naañ: “Ka'p mja'ayyaj'o'ogu̶ch.” Y du'unu̶tz pu̶nu̶ ka'p je̱'e̱ wiingpu̶ to'oxyu̶jk pu̶n mu̶duundu̶góy, peru̶ pu̶nu̶ ja'ayyaj'o'kp tu̶ naty je̱'e̱ Dios y'ane̱'e̱mu̶ñ du'un mu̶dtuundu̶gooyu̶. 12Miich ajku̶xy oy yajxón kápxku̶x mu̶dyaakku̶x y oy yajxón ja'ay'ajtku̶x du'un neby je̱'e̱ mu̶dyiibu̶ je̱'e̱ Dios y'ane̱'e̱mu̶ñ tu̶ydyunaanu̶gu̶xpu̶ñ, je̱'e̱ ane̱'e̱mu̶ñ mu̶dyiibu̶ xyaj'awa'atzpu̶dzú̶mu̶mbu̶ñ ajku̶xy. 13Pu̶n je̱'e̱ pa'a''ayoowu̶ñ ka'p tu̶ tuungu̶xy ma je̱'e̱ myu̶gu'ugtu̶jk ajku̶xyu̶ñ, nan ka'p je̱'e̱ yajpa'a''ayoogu̶xu̶ch ko naty yajtu̶ydyuungu̶xy, peru̶ pu̶n je̱'e̱ pa'a''ayoowu̶ñ tu̶ tuungu̶xy ma je̱'e̱ myu̶gu'ugtu̶jk ajku̶xyu̶ñ, je̱' ku'umaybyu̶dzu̶u̶mgu̶xu̶p ko naty yajtu̶ydyuungu̶xy.

Je̱'e̱ mu̶bu̶jku̶ñ y ka'p jye̱'e̱ju̶ch je̱'e̱ mu̶dyiibu̶ nigoo kapxy'ajtp mu̶dya'agy'ajtpu̶ñ

14“Mu̶gu'uktu̶jk ajku̶xy, ¿ti oy'ajt du'un n'okpaattu̶mu̶p ko du'un nmu̶naanu̶mu̶ch ajku̶xy ko je̱'e̱ mu̶bu̶jku̶ñ yajmu̶dáty ma je̱'e̱ Diosu̶ñ pu̶nu̶ ka'p naty nyajni'igu̶xu̶'ku̶m ajku̶xy ma je̱'e̱ mu̶dyiibu̶ nduunu̶mbyu̶ñ ajku̶xy? ¿Nej xyajni'idzooku̶mu̶p je̱'e̱ du'umbu̶ mu̶bu̶jku̶ñ daju̶? 15Tzu̶k okpu̶daaku̶m pu̶nu̶ jii miich mmu̶gu'ug tu'ug ajku̶xy ya'aydyu̶jk o to'oxyu̶jk mu̶dyiibu̶ je̱'e̱ wit tukxy y ju̶ch kaagy yajmayjyajtpu̶ñ. 16Y m'oknu̶maaygyu̶xu̶ch miich du'un nidu'ugtu̶: “Nú̶kxku̶x agujk jootkujk; yajtu̶gu̶u̶ygyu̶x je̱'e̱ mni'ijé̱n y kaaygyu̶x uukku̶x tzu'tzku̶x jú̶kxku̶x ku̶xyu̶ tii mdimychojkku̶xypyu̶ñ,” peru̶ pu̶nu̶ ka'p mmooygyu̶xy tii yajmayjyajtku̶xypyu̶ñ, ¿ti oyjya'ay'ajtu̶ñ naty du'un mduungu̶xypy? 17Du'un jyaty mu̶u̶d je̱'e̱ mu̶bu̶jku̶ñ, je̱'e̱ agu̶ mu̶bu̶jku̶ñ, je̱' u̶u̶ch du'un ndijpy pu̶nu̶ ka'p je̱'e̱ oyjya'ay'ajtu̶ñ nyajni'igu̶xu̶'ku̶m ajku̶xy ma je̱'e̱ mu̶dyiibu̶ yajtuumbu̶ñ, ka'p je̱'e̱ du'umbu̶ mu̶bu̶jku̶ñ tyuñ.

18Wandu̶ du'un pu̶n myu̶na'anu̶ch: “Miich mu̶dajtypy miich je̱'e̱ mu̶bu̶jku̶ñ ma je̱'e̱ Diosu̶ñ, y u̶u̶ch nduumbyu̶ch je̱'e̱ oybyu̶.” Y u̶u̶ch mu̶naamb ko je̱'e̱ oyjya'ay'ajtu̶ñ jyatytyimy'óyu̶ch nduunu̶mu̶ch nandu'un je̱' ko miich mu̶dyiibu̶ je̱'e̱ oyjya'ay'ajtu̶ñ ka'p mduñu̶ñ, ka'p mu̶baad myajni'igu̶xu̶'u̶gy ko je̱'e̱ mu̶bu̶jku̶ñ mmu̶u̶du̶ch ma je̱'e̱ Diosu̶ñ. Y du'un neby u̶u̶ch je̱'e̱ mu̶bu̶jku̶ñ u̶u̶ch nmu̶u̶du̶chu̶ñ ma je̱'e̱ Diosu̶ñ oy pu̶n je̱'e̱ oyjya'ay'ajtu̶ñ du'un nejwu̶'u̶y mu̶dyiibu̶ u̶u̶ch nduumbyu̶ñ. 19Miich mmu̶bu̶jkypy ko je̱'e̱ Dios je'eyu̶ tyu'ugu̶ch, y oy du'un ko du'un mmu̶bu̶ky. Peru̶ nan myu̶bu̶jkku̶xypy je̱'e̱ ka'a'óybyu̶ Dios nandu'un y tzu̶gu̶u̶ygyu̶xp mu̶u̶d je̱'e̱ tzu̶gu̶'u̶ñ. 20Ka'p mdzuu'áty, y ku'ubú̶k ko je̱'e̱ mu̶bu̶jku̶ñ mu̶dyiibu̶ yajmu̶dajtp ma je̱'e̱ Diosu̶ñ y pu̶nu̶ ka'p ñaybyubedyii mu̶u̶d je̱'e̱ oyjya'ay'ajtu̶ñ, ka'p je̱'e̱ du'umbu̶ mu̶bu̶jku̶ñ y'óyu̶ch. 21Dios kyu'ubu̶jk je̱'e̱ Abraham neby je̱'e̱ tu'uda'agyjya'ayu̶ñ, je̱'e̱ nmu̶j'áp nmu̶jteedy ajtu̶m ajku̶xy, mu̶u̶d je̱'e̱ mu̶dyiibu̶ tyuun ko je̱'e̱ y'ung Isaac yejky neby je̱'e̱ windzu̶gu̶'u̶ñdyu̶ñ. 22Y mu̶baad m'ixy ma je̱'e̱ Abrahamu̶ñ, ko ni'igu̶xu̶'k je̱'e̱ myu̶bu̶jku̶ñ ko je̱'e̱ Dios mu̶bu̶ky mu̶u̶d je̱'e̱ mu̶dyiibu̶ tyuunu̶ñ, y mu̶u̶d je̱'e̱ mu̶dyiibu̶ tyuunu̶ñ du'un je̱'e̱ myu̶bu̶jku̶ñ du'un kya'pxy. 23Y du'un je̱'e̱ Dios ñaky du'un yajkuydyuuñ je̱'e̱ mu̶dyiibu̶ du'un mu̶naambu̶ñ: “Abraham myu̶bu̶jk je̱'e̱ Dios, y paady je̱'e̱ Dios kyu'ubu̶jku̶ neby je̱'e̱ tu'uda'agyjya'ayu̶ñ.” Y chi je̱'e̱ Abraham Dios tyiju̶ je̱'e̱ Dios myu̶gu'ug.

24Tu̶ m'ijxku̶xy mnejwu̶u̶ygyu̶xy, ko kyu'ubu̶jkypy je̱'e̱ Dios ja'ay nandu'un ko je̱'e̱ oyjya'ay'ajtu̶ñ tuungu̶xy, y ka'p myu̶'ittu̶'ajtyu̶ch ko je̱'e̱ mu̶bu̶jku̶ñ je'eyu̶ mu̶dajtku̶xy. 25Nandu'un tyuunu̶ jyajtu̶ mu̶u̶d je̱'e̱ Rahab, je̱'e̱ to'oxyu̶jk mu̶dyiibu̶ je̱'e̱ ya'aydyu̶jk najty tu'ug tu'ug mu̶dtuundu̶gooybyu̶ñ. Ku'ubu̶jku̶ je̱'e̱ Dios neby je̱'e̱ tu'uda'agyjya'ayu̶ñ ko je̱'e̱ oyjya'ay'ajtu̶ñ tuuñ; je̱' ko je̱'e̱ Israel ja'ay kexyo'oybyu̶du̶jk najty tu̶ ju̶u̶nmo'oy tu̶jkmo'oy, je̱'e̱ mu̶dyiibu̶ najty ayu'uch amechu̶ ixu̶u̶ybyu̶ tu̶ yajke̱jxku̶xyu̶ñ yajke̱e̱ktzookku̶xy y pube̱jtku̶xy nu̶u̶mooy tu'umooygyu̶xy wiing tu'u. 26Du'un neby je̱'e̱ ni'kx kopt o'ogy y'ityu̶ñ, je̱'e̱ mu̶dyiibu̶ aanu̶mu̶ ka'p okmu̶dajtnu̶ju̶ñ, nandu'un jyaty mu̶u̶d je̱'e̱ mu̶bu̶jku̶ñ ka'p je̱'e̱ tyuñ pu̶nu̶ ka'p ñaybyubedyii mu̶u̶d je̱'e̱ oyjya'ay'ajtu̶ñ.

Currently Selected:

Santiago 2: MIXE

Highlight

Copy

Compare