Hebreos 9

Je̱'e̱ Dios tyu̶jk ya naaxwiiñbyu̶, y je̱'e̱ Dios tyu̶jk jiiby tzajpjootypyu̶

1Je̱'e̱ jayu̶jpu̶ kapxytyuunu̶ñ myu̶u̶d najty ane̱'e̱mu̶ñ je̱' neby je̱'e̱ Dios yajwindzu̶gu̶'u̶wu̶chu̶ñ ma je̱'e̱ Dios tyu̶jk je̱'e̱ ya naaxwiiñbyu̶. 2Je̱'e̱ po'o'aktu̶jk du'un je̱'e̱ kyojy, ma je̱'e̱ jayu̶jpu̶ tu̶gootu̶ñ wa'adz it wa'adz tu̶goot najty je̱'e̱ xyu̶u̶'áty, y jiiby najty je̱'e̱ ju̶u̶ndu̶kxpe̱jt y'ity y je̱'e̱ meesu̶ ma je̱'e̱ tzajkaagy yujkkóñ y'ity mu̶dyiibu̶ najty tu̶ yaj'yóxy ma je̱'e̱ Diosu̶ñ. 3Ju̶xku̶'u̶by'e̱e̱mby ma je̱'e̱ mu̶me̱tzkpu̶ wit y'adu̶u̶ydyúkyu̶chu̶ñ, jiiby najty je̱'e̱ tu̶goot ja'adu'ug mu̶dyiibu̶ xu̶u̶'ajtpu̶ñ It Lugaar Amay'itpu̶. 4Jiiby najty altaar tu'ug agu̶ ooru̶ ma pyoomjojkku̶xyu̶ñ, y je̱'e̱ kaaxu̶ mu̶dyiibu̶ je̱'e̱ ooru̶ je'eyu̶ ni'igú̶xp ku'uduuy ku̶xyu̶ mu̶dajtpu̶ñ ma je̱'e̱ kapxytyuunu̶ñ y'ityu̶ñ. Ma je̱'e̱ kaaxu̶ju̶ñ jiiby najty ooru̶ tu'tz tu'ug y jiiby tu'tzjooty jiiby najty je̱'e̱ maná mu̶dyiibu̶ je̱'e̱ Dios Israel ja'ay yajkaaygyu̶xu̶ñ, y nan jiiby najty je̱'e̱ Aarón tyajt je̱'e̱ mu̶dyiibu̶ najty tu̶ wyamyu̶ñ, y je̱'e̱ tzaa ma je̱'e̱ Dios kyapxytyuunu̶ñ najty yujkja'ayu̶chu̶ñ. 5Kaaxu̶ ni'igú̶xp najty je̱'e̱ querubines ñi'igojtu'udyu̶ch ajku̶xy je̱'e̱ mu̶dyiibu̶ yajnigu̶xu̶'kku̶xpu̶ñ ko je̱'e̱ Dios y'oy'ajt najty jim yajpaady, y yajni'idu̶gooydyaaygyu̶xypy je̱'e̱ kaaxu̶ni'kx najty ajku̶xy mu̶u̶d je̱'e̱ kye̱e̱kt ajku̶xy ma je̱'e̱ poky ku̶dyeey yajwinmékxyu̶ñ. Peru̶ jada'achám ka'p jyatypyaadyii nimu̶dyaaku̶mu̶ch adayaaba ka'pxy ajku̶xy.

6Ko naty ku̶xyu̶ tu̶ okni'ixu̶u̶ydyaaygyu̶xy, chi je̱'e̱ teedy jiiby jaboom jaboom tyu̶gu̶'u̶y ma je̱'e̱ jayu̶jpu̶ tu̶goot ma je̱'e̱ po'o'aktu̶jku̶ñ ko je̱'e̱ windzu̶gu̶'u̶ñ naty ye̱gáñ. 7Peru̶ ma je̱'e̱ mu̶me̱tzkpu̶ tu̶goot je̱'e̱ mu̶dyiibu̶ xu̶u̶'ajtpu̶ñ It Lugaar Amay'itpu̶, je̱'e̱ teedy windzú̶n nigu'ubajk'ajtpu̶ jiiby je'eyu̶ tu̶gu̶u̶by, tu'u'ook je̱'e̱ tu'kjumu̶jtpu̶. Y ko tyu̶gu̶'u̶y chi je̱'e̱ ju̶yujk ne'pty jiiby yoxy; windzu̶gu̶'u̶y je̱'e̱ Dios du'un kyu̶'u̶mbóky kyu̶xpu̶ jayu̶jp y u̶x'aam mu̶u̶d je̱'e̱ ja'ay gyu̶xpu̶ pyoky kyu̶dyeey ajku̶xy, mu̶dyiibu̶ tyuungu̶xypyu̶ñ y ka'p ju̶wu̶u̶ygyu̶xy ko tyuundu̶gooygyu̶xy. 8Mu̶u̶d adayaaba je̱'e̱ Espíritu Santo xyajnejwu̶u̶yu̶m ajku̶xy ko ka'p jiiby mu̶baad pu̶n jya'ady ma je̱'e̱ It Lugaar Amay'ítpu̶ju̶ñ, je̱' ko ka'p najty je̱'e̱ y'awa'achñu̶, jiiyu̶ najty je'eyu̶ jya'tku̶xy ma je̱'e̱ jayu̶jpu̶ tu̶goot je̱'e̱ mu̶dyiibu̶ najty yajtuungu̶xypyu̶ñ. 9Ku̶xyu̶ adayaaba je̱' je̱'e̱ ja'ay du'un jada'achambaad pya'ijxku̶xypñu̶, je̱' ko je̱'e̱ yojxu̶ñ y je̱'e̱ windzu̶gu̶'u̶ñ mu̶dyiibu̶ je̱'e̱ Dios jiiby yajwindzu̶gu̶u̶ygyu̶xypyu̶ñ, ka'p je̱'e̱ ja'ay jyu̶bu̶kjoot jyu̶bu̶kwinma'añ mu̶baad yajwaatzu̶ je̱'e̱ mu̶dyiibu̶ je̱'e̱ du'umbu̶ yojxu̶ñ y windzu̶gu̶'u̶ñ ja'aye̱jkku̶xpu̶ñ. 10Je̱' najty je̱'e̱ kyuydyuungu̶xypy neby je̱'e̱ y'ane̱'e̱mu̶ñ y'ane̱'e̱mgu̶xyu̶ñ, tii kyaaygyu̶xu̶py y'uukku̶xu̶byu̶ñ y neby ñayyajpokyñi'iwaatzu̶gu̶xyu̶ñ mu̶u̶d je̱'e̱ nu̶u̶, y ka'anaag je̱'e̱ kyostumbre ajku̶xy mu̶dyiibu̶ najty pyaduungu̶xypyu̶ñ, y jibaad je̱'e̱ je'eyu̶ tyuuñ y je̱'e̱ mu̶k'ajt mu̶dajty ma je̱'e̱ Cristo najty ka'p myíñu̶ju̶ñ, y ko myiiñ chi je̱'e̱ Dios y'ane̱'e̱mu̶ñ ku̶xyu̶ yajtu̶gajtztaay.

11Peru̶ tu̶ je̱'e̱ Cristo ya naaxwiiñ y'oy, y je̱' jada'achám teedy windzú̶n nigu'ubajk'ajtp ma je̱'e̱ jak'oybyu̶ jembyu̶ ane̱'e̱mu̶ñ. Je̱'e̱ Dios tyu̶jk ma je̱'e̱ tyuñu̶ñ ma tyeedy'átyu̶ñ oy je̱'e̱ ni'igyu̶ y wa'adz ni'igyu̶, y ka'p je̱'e̱ ja'ay tu̶ kojy; je̱' u̶u̶ch du'un ndijpy ka'p ñaaxwiiñ chajptu̶jku̶ch. 12Tu̶ je̱'e̱ Cristo jiiby tyu̶gu̶'u̶y ma je̱'e̱ mu̶me̱tzkpu̶ tu̶goot je̱'e̱ mu̶dyiibu̶ xu̶u̶'ajtpu̶ñ It Lugaar Amay'itpu̶, ka'p jiiby tu̶ tyu̶gu̶'u̶y neby je̱'e̱ chiivu̶ ne'pty y waj'úng ne'pty jiiby yóxu̶chu̶ñ, je̱'e̱ kyu̶'u̶mne'pty je̱'e̱ jiiby tu̶ yoxy, y tu'u'ookpajk je̱'e̱ jiiby je'eyu̶ tu̶ tyu̶gu̶'u̶y mu̶dyiibu̶ du'un wiinu̶u̶xu̶u̶ idu̶bu̶ñ. Y ko jiiby tyu̶gu̶u̶y du'un je̱'e̱ aanu̶mu̶ ni'idzooku̶ñ wiinu̶u̶xu̶u̶bu̶ tu̶ nbaattu̶m ajku̶xy. 13Janch tu̶y'ajt ko je̱'e̱ waj ne'pty y je̱'e̱ chiivu̶ ne'pty, y je̱'e̱ waj'úng to'oxypyu̶ kuyjyaam mu̶dyiibu̶ jim pochkyu̶xp yajno'kp ma je̱'e̱ windzu̶gu̶'u̶ñ yaj'yékyu̶ñ, je̱'e̱ ne'pty mu̶dyiibu̶ je̱'e̱ ka'awa'atzpu̶ ja'ay yajni'ixu̶dujtku̶xypyu̶ñ myu̶u̶d mu̶k'ajt je̱' neby yajpokyñi'iwaatzu̶gu̶xu̶chu̶ñ y yajwaatzu̶gu̶xu̶chu̶ñ ni'igú̶xp ku'uduuy, peru̶ ka'p je̱'e̱ mu̶k'ajt mu̶u̶du̶ch neby jootjooty winma'añjyooty yajwaatzu̶gu̶xu̶chu̶ñ. 14Peru̶ pu̶nu̶ du'un, ¡ni'igyu̶ je̱'e̱ Cristo ñe'pty mu̶k'ajt mu̶u̶du̶ch! Je̱' ko nayye̱jku̶ je̱'e̱ ku̶'u̶m ma je̱'e̱ Diosu̶ñ, du'un neby je̱'e̱ windzu̶gu̶'u̶ñ óybyu̶ju̶ñ Espíritu Santo kyu̶xpu̶, je̱'e̱ mu̶dyiibu̶ wiinu̶xu̶u̶ ijtu̶u̶bu̶ñ. Y je̱'e̱ ñe'pty je̱'e̱ njoot nwinma'añ xyajwaatzu̶yu̶py ajtu̶m ajku̶xy ma je̱'e̱ ju̶bu̶kpu̶ mu̶dyiibu̶ yajtuumb mu̶dyiibu̶ ju̶bu̶ktuum yajka'abu̶ñ, neby je̱'e̱ juugypyu̶ Dios nmu̶duunu̶mu̶chu̶ñ ajku̶xy.

15Paady je̱'e̱ Jesucristo ja'ay ni'i'o'ktuuty neby je̱'e̱ Dios je̱'e̱ ja'ay du'un mu̶wingónu̶chu̶ñ, y neby je̱'e̱ ja'ay du'un tu'ugyu̶ yajpaatku̶xu̶chu̶ñ mu̶u̶d je̱'e̱ Dios mu̶u̶d je̱'e̱ jembyu̶ kapxytyuunu̶ñ mu̶dyiibu̶ je̱'e̱ Dios yajwu̶'u̶mu̶ñ, wan je̱'e̱ pyoky du'un winmekxy wyu̶'u̶mgu̶xu̶ch, je̱'e̱ mu̶dyiibu̶ tyuungu̶xu̶ñ ko je̱'e̱ jayu̶jpu̶ kapxytyuunu̶ñ najty kuydyuungu̶xyñu̶, je̱'e̱ mu̶dyiibu̶ je̱'e̱ Moisés kyujaayu̶ñ, y neby je̱'e̱ tzu̶naaydyaak wiinu̶u̶xu̶u̶bu̶ mu̶baad paatku̶xyu̶ñ je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ je̱'e̱ mu̶dyiibu̶ tu̶ yajwinwanu̶u̶yu̶gu̶xyu̶ñ. 16Ko je̱'e̱ ja'ay naky yajkojy pu̶n je̱'e̱ pyu̶da'agy yajmu̶wu̶'u̶mbyu̶ñ, jayu̶jp je̱'e̱ oy y'ok'yajnejwu̶'u̶wu̶ch pu̶nu̶ jaanch je̱'e̱ ja'ay tu̶ y'o'ogy je̱'e̱ mu̶dyiibu̶ je̱'e̱ pu̶da'agy ye̱jkpu̶ñ. 17Ka'p je̱'e̱ pu̶da'agy ñaky mu̶k'ajt mu̶u̶du̶ch pu̶nu̶ jugy'ajtnu̶ je̱'e̱ ja'ay je̱'e̱ mu̶dyiibu̶ je̱'e̱ pu̶da'agy ye̱jkpu̶ñ, mu̶'itnu̶ je̱'e̱ tyuñ u̶xtu̶ koonu̶ naty tu̶ y'o'ogy. 18Paady je̱'e̱ jayu̶jpu̶ kapxytyuunu̶ñ nandu'un kyojy ma nigapxyu̶ñ ko je̱'e̱ ju̶yujk ne'pty chúnu̶ch xyé̱kxu̶ch. 19Ñajtzkapxu̶u̶y je̱'e̱ Moisés ku̶xyu̶ je̱'e̱ Dios kyu'utujk y'ane̱'e̱mu̶ñ ma je̱'e̱ ja'ay nigu̶xyu̶ ajku̶xyu̶ñ. Mu̶'it je̱'e̱ tzaptz laanu̶ nixaju̶u̶y y tu'k'aakx hisopo kepy, chi yajxóky mu̶u̶d je̱'e̱ waj'úng ne'pty y chiivu̶ ne'pty te̱e̱mwu̶díty mu̶u̶d je̱'e̱ nu̶u̶, y chi je̱'e̱ ane̱'e̱mu̶ñ naky ne'pty ñi'ixu̶dujty y nan ne'pty ni'ixu̶dujty je̱'e̱ ja'ay nigu̶xyu̶ ajku̶xy. 20Mu̶'it nu̶maay ajku̶xy: “Adaa je̱' je̱'e̱ ne'pty mu̶dyiibu̶ je̱'e̱ kapxytyuunu̶ñ ni'igapxpe̱jtpu̶ñ, je̱'e̱ mu̶dyiibu̶ je̱'e̱ Dios tu̶ nigapxy mu̶u̶d miich ajku̶xy.” 21Ñe'pty ñi'ixu̶dujt je̱'e̱ Moisés po'o'aktu̶jk nandu'un y ku̶xyu̶ je̱'e̱ tuumbe̱jtk mu̶dyiibu̶ jiiby tuumb ko je̱'e̱ Dios jiiby windzu̶gu̶u̶y o'owu̶dajtku̶xy. 22Du'un je̱'e̱ Dios y'ane̱'e̱mu̶ñ ijty myu̶na'añ je̱'e̱ jékyu̶pu̶, ko ku̶xyu̶ ñayyajpokyñi'iwaatzu̶gu̶xu̶ch mu̶u̶d je̱'e̱ ne'pty, y ko ka'p je̱'e̱ pokywinmecxu̶ñ paatku̶xu̶ch pu̶nu̶ ka'p je̱'e̱ ne'pty chuñ xyekxy.

Je̱'e̱ Cristo wyindzu̶gu̶'u̶ñ je̱'e̱ poky yajwaatzp

23Jatytimychojku̶p najty je̱'e̱ ju̶yujk ne'pty windzu̶gu̶'u̶ñ neby je̱'e̱ tuumbe̱jtk du'un ku̶xyu̶ wya'adzu̶chu̶ñ mu̶dyiijáty ya yajpaatp ma adayaaba naaxwiiñbyu̶ tzajptu̶jk, mu̶dyiibu̶ je̱'e̱ tzajpjootypyu̶ tzajptu̶jk ka'p mu̶baaydyu̶ñ; peru̶ je̱'e̱ tzajpjootypyu̶ tzajptu̶jk jak'oybyu̶ windzu̶gu̶'u̶ñ je̱'e̱ ni'igyu̶ chojkypy ni'igu̶ ka'p je̱'e̱ mu̶dyiibu̶ ya naaxwiiñu̶ñ. 24Je̱' ko ka'p je̱'e̱ Cristo jiiby tyu̶gu̶u̶y ma je̱'e̱ tzajptu̶jk mu̶dyiibu̶ je̱'e̱ ja'ay kyojku̶xu̶ñ, je̱'e̱ mu̶dyiibu̶ je'eyu̶ ni'igojtuuttu̶ñ'ajtp je̱'e̱ jaanchpyu̶ tzajpjootypyu̶ tzajptu̶jk, jiiby tzajpjooty je̱'e̱ ku̶'u̶m tyu̶gu̶u̶y ma jada'achám yajpaadyu̶ñ Dios winduuy mu̶nukxta'agy je̱'e̱ Dios mu̶u̶d u̶u̶ch kyu̶xpu̶ ajtu̶m ajku̶xy. 25Cristo tu'ookpajk je̱'e̱ je'eyu̶ tzajpjooty tyu̶gu̶u̶y y tu'ookpajk je'eyu̶ y'o'ky y ka'p myay'ooku̶ch, ka'p dyu'unu̶ch neby je̱'e̱ teedy windzú̶n nigu'ubajk'ajtpu̶ jumu̶jt jumu̶jt tzajptu̶gooty tyu̶gu̶'u̶yu̶ñ ko je̱'e̱ no'on ju̶yujk ñe'pty windzu̶gu̶'u̶ñ ye̱jku̶ y ka'p kyu̶'u̶mne'ptyu̶ch. 26Ko u̶xyu̶py kya'a'okdu'unu̶ch, may'ook u̶xyu̶py je̱'e̱ Cristo tu̶ y'o'ogy maabu̶ je̱'e̱ naaxwiiñ chonda'agyu̶ñ. Peru̶ jada'achám ma je̱'e̱ xu̶u̶ tiempo kyu̶xaan tyu̶goyaanu̶, tu'ookpajk je̱'e̱ Cristo ya naaxwiiñ je'eyu̶ y'ooy je̱'e̱ mu̶dyiibu̶ du'un wiinu̶u̶xu̶u̶ ijtu̶wu̶bu̶ñ; ñayye̱jku̶ ku̶'u̶m neby je̱'e̱ windzu̶gu̶'u̶ñdyu̶ñ neby je̱'e̱ poky du'un yajwa'adzu̶chu̶ñ. 27Y du'un neby je̱'e̱ ja'ay nigu̶xyu̶ tu'ook y'o'kku̶xu̶chu̶ñ, y mu̶'it je̱'e̱ tu̶ydyuunu̶ñ myina'añ, 28y du'unu̶tz je̱'e̱ Cristo nandu'un tu'ookpajk tu̶ ñayyegyii neby je̱'e̱ windzu̶gu̶'u̶ñdyu̶ñ neby je̱'e̱ mayjya'ay pyoky du'un yajwaatzu̶chu̶ñ. Mu̶'it ja'adu'ook myina'añ je̱'e̱ mu̶me̱jtz'ookpu̶, peru̶ ka'p y'okmiinu̶ch pokyyajni'iwaatzpu̶, je̱' je̱'e̱ ñiminaanu̶py niwa'añ kuwa'ana'añ je̱'e̱ mu̶dyiibu̶ ju̶jp'ijxu̶bu̶ñ ajku̶xy.

Currently Selected:

Hebreos 9: MIXE

Highlight

Copy

Compare