Hebreos 10

1Je̱' ko du'un je̱'e̱ Moisés y'ane̱'e̱mu̶ñ najty nigoo je'eyu̶ neby tii y'awaxku̶'u̶yu̶ñ ma je̱'e̱ mu̶dyiibu̶ najty minaambu̶ñ, y ka'p najty je̱'e̱ jye̱'e̱ju̶ch je̱'e̱ oybyu̶. Paady je̱'e̱ Moisés y'ane̱'e̱mu̶ñ ka'p mu̶baad yajpoyñi'iwa'ach pu̶n je̱'e̱ Dios jumu̶jt jumu̶jt ja'awinguwa'agu̶u̶ygyu̶xpu̶ñ yojxtu̶gajtzku̶xnu̶bu̶ je̱'e̱ windzu̶gu̶'u̶ñ. 2Ko u̶xyu̶py je̱'e̱ Moisés y'ane̱'e̱mu̶ñ jaanch ok'yaj'awimbíty wa'adz pu̶n pokytyuungu̶xpu̶ñ, ka'p u̶xyu̶py je̱'e̱ pyoky okju̶wu̶u̶ygyu̶xnu̶, y ka'p u̶xyu̶py je̱'e̱ windzu̶gu̶'u̶ñ ok'yojxku̶xnu̶. 3Peru̶ adayaaba windzu̶gu̶'u̶ñ ka'p je̱'e̱ maa tyuunu̶xu̶ ajku̶xy, je'eyu̶ je̱'e̱ pyoky jumu̶jt jumu̶jt yajja'aymye̱jtzpaattu̶gu̶xyu̶. 4Je̱' ko ka'p je̱'e̱ waj ne'pty ni je̱'e̱ chiivu̶ ne'pty poky ku̶dyeey mu̶baad yajwa'ach.

5Paady je̱'e̱ Cristo, Dios nu̶maay ko ya naaxwiiñ myiiñ:

“Miich ka'p miich je̱'e̱ windzu̶gu̶'u̶ñ ni je̱'e̱ yojxu̶ñ mdzoky,

paady u̶u̶ch miich tu̶ xyñi'ixu̶'u̶y tu̶ xymyo'oyu̶ch je̱'e̱ nni'kx tu'ug.

6Ka'p miich je̱'e̱ windzu̶gu̶'u̶ñ ni je̱'e̱ yojxu̶ñ mgu'umáy

mu̶dyiibu̶ ja'ayyajno'kp neby je̱'e̱ pyoky kyu̶dyeey du'un ñi'iwaatzu̶gu̶xu̶chu̶ñ.

7Chi u̶u̶ch nmu̶naañ: ‘Chaa u̶u̶ch, du'un

neby jiiby kyuja'ayu̶chu̶ñ mu̶u̶d u̶u̶ch kyu̶xpu̶ ma je̱'e̱ mnakyu̶ñ,

wan u̶u̶ch je̱'e̱ mdzojku̶ñ nguydyúnu̶ch, miich Dios.’ ”

8Chi ja'adu'knáx, du'un je̱'e̱ Cristo myu̶na'añ ko je̱'e̱ Dios ka'p ku'umáy je̱'e̱ windzu̶gu̶'u̶ñ ni je̱'e̱ no'on ju̶yujk mu̶dyiibu̶ yojxku̶xypyu̶ñ, ni je̱'e̱ mu̶dyiibu̶ ño'kku̶xypyu̶ñ neby je̱'e̱ pyoky kyu̶dyeey du'un ñi'iwaatzu̶gu̶xu̶chu̶ñ, oy je̱'e̱ ane̱'e̱mu̶ñ du'un jya'a''ane'emy. 9Y chi jyakmu̶naan'adu̶'u̶ch: “Chaa u̶u̶ch nmiñ wan u̶u̶ch je̱'e̱ mdzojku̶ñ nguydyúnu̶ch.” Je̱' u̶u̶ch du'un ndijpy je̱'e̱ mu̶dyiibu̶ je̱'e̱ jeky ane̱'e̱mu̶ñ yajku'udu̶góyu̶bu̶ñ, je̱'e̱ mu̶dyiibu̶ je̱'e̱ windzu̶gu̶'u̶ñ nigapxpu̶ñ ko yajtúnu̶ch y pu̶da'agy je̱'e̱ jembyu̶ tu'ug. 10Tu̶ je̱'e̱ Dios xyajpokyñi'iwaatzu̶m ajku̶xy je̱' ko je̱'e̱ Jesucristo Dios chojku̶ñ tu̶ kuydyuunu̶ ko je̱'e̱ kyu̶'u̶mni'kx yejky tu'u'ookpajk je̱'e̱ mu̶dyiibu̶ du'un wiinu̶u̶xu̶u̶ ijtu̶wu̶bu̶ñ neby je̱'e̱ windzu̶gu̶'u̶ñdyu̶ñ.

11Ku̶xyu̶ je̱'e̱ judío teedy jaboom jaboom je̱'e̱ windzu̶gu̶'u̶ñ ye̱jkku̶xy y ni'inaxu̶ydyu̶gajtzku̶xnu̶bu̶ ja'adu'ook jaboom jaboom, je̱'e̱ mu̶dyiibu̶ naty tu̶ oktuungu̶xpu̶ju̶ñ, oy je̱'e̱ poky ku̶dyeey du'un nimu̶naaxu̶u̶ ka'ayajwa'ach je̱'e̱ mu̶dyiibu̶ du'un jya'atuungu̶xypyu̶ñ. 12Peru̶ je̱'e̱ Jesucristo tu'ookpajk o'k je̱'e̱ mu̶dyiibu̶ du'un wiinu̶u̶xu̶u̶ idu̶bu̶ñ mu̶u̶d u̶u̶ch kyu̶xpu̶ nboky ngu̶dyeey ajtu̶m ajku̶xy, y chi ñaxwech ma je̱'e̱ Dios y'a'oy'eembyu̶ñ ane̱'e̱mbu̶. 13Y jiiby cham jya'ay'éxy u̶xtu̶ koonu̶ je̱'e̱ Dios myu̶dzip myu̶madaakku̶xu̶ch, pyu̶daakku̶xu̶ch tyekypya'tku̶'u̶by, 14mu̶u̶d je̱'e̱ tu'kpajkpu̶ yojxu̶ñ mu̶dyiibu̶ je̱'e̱ Jesucristo ye̱jku̶ñ du'un je̱'e̱ ja'ay yaj'oybyu̶dzu̶u̶my yajwa'atzpu̶dzu̶u̶my wiinu̶u̶xu̶u̶, je̱'e̱ mu̶dyiibu̶ je̱'e̱ Dios jyoot wyinma'añ tu̶ yajwaatzu̶xu̶ju̶ñ ajku̶xy. 15Y je̱'e̱ Espíritu Santo ni'igapxpe̱jt ko du'un myu̶naañ:

16“Je̱'e̱ kapxytyuunu̶ñ mu̶dyiibu̶ u̶u̶ch ndúnu̶byu̶ñ mu̶u̶d je̱' ajku̶xy

ko je̱'e̱ xu̶u̶ tiempo naty du'un tu̶ y'oknaxy,

adaa je̱' du'un je̱'e̱ Windzú̶n Dios myu̶naañ:

Nbu̶da'agu̶byu̶ch je̱'e̱ n'ane̱'e̱mu̶ñ ma je̱'e̱ jyoot wyinma'añ ajku̶xyu̶ñ

y nguja'awu̶u̶ybyu̶ch ma je̱'e̱ jyoot kyu'ubajk ajku̶xyu̶ñ.

17Y ka'p u̶u̶ch je̱'e̱ ñu̶u̶ pyoky n'okja'aymye̱jtzu̶ñu̶ch ajku̶xy ni je̱'e̱ jyu̶bu̶kja'ay'ajtu̶ñ ajku̶xy.”

18Y du'unu̶tz, ko je̱'e̱ poky ku̶dyeey naty tu̶ yajwinmé̱kxnu̶, ka'p y'oktzojku̶nu̶ yaj'yé̱gu̶ch je̱'e̱ yojxu̶ñ poky kyu̶xpu̶.

Mu̶baad je̱'e̱ Dios nmu̶wingoonu̶m ajku̶xy

19Paady mu̶gu'uktu̶jk, mu̶baad agujk jootkujk ndu̶gu̶u̶yu̶m ajku̶xy ma je̱'e̱ It Lugaar Amay'ítpu̶ju̶ñ y ka'p ndzu̶gu̶u̶y nju̶wu̶u̶yu̶mu̶ch ajku̶xy, je̱' ko tu̶ je̱'e̱ Jesucristo ñe'pty temy yoky mu̶u̶d u̶u̶ch kyu̶xpu̶ ajtu̶m ajku̶xy, 20tzu̶k je̱'e̱ jembyu̶ nu̶u̶ tu'u panú̶kxu̶m ajku̶xy, je̱'e̱ nu̶u̶ tu'u mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ, je̱'e̱ mu̶dyiibu̶ je̱' yaj'awaatzu̶ñ ko je̱'e̱ wit kyu̶tzwa'kxy ma je̱'e̱ It Lugaar Amay'ítpu̶ju̶ñ, je̱' u̶u̶ch du'un ndijpy ko je̱'e̱ kyu̶'u̶mni'kx yojxy ma je̱'e̱ o'ku̶ñ ke̱e̱ku̶ñ. 21Jesús je̱' nmu̶jteedy Windzu̶n'ajtypy ajtu̶m ajku̶xy, je̱'e̱ mu̶dyiibu̶ jiiby tzajpjooty yajpaatp ma je̱'e̱ Dios tyu̶jku̶ñ. 22Paady je̱'e̱ Dios mu̶baad nmu̶wingoonu̶m ajku̶xy mu̶u̶d je̱'e̱ joot winma'añ tu̶y tu'uda'akypyu̶ y mu̶u̶d je̱'e̱ tu̶ybyu̶ jaanchpyu̶ mu̶bu̶jku̶ñ, oy wa'adz je̱'e̱ joot winma'añ natyu̶ñ, ka'p je̱'e̱ nboky ngu̶dyeey maa n'okju̶wu̶u̶yu̶nu̶ch ajku̶xy y pujy je'ech je̱'e̱ ni'kx koptu̶ñ mu̶u̶d je̱'e̱ wa'adz nu̶u̶. 23Tzu̶k tu'uda'agy ijtu̶m ma je̱'e̱ nmu̶bu̶jku̶ñ ajtu̶m ajku̶xyu̶ñ, y ka'p njootme̱tzku̶u̶yu̶mu̶ch ajku̶xy ma je̱'e̱ mu̶bu̶jku̶ñ mu̶dyiibu̶ nmu̶dajtu̶mbyu̶ñ, je̱' ko kyuydyune̱e̱mby je̱'e̱ Dios je̱'e̱ mu̶dyiibu̶ tu̶ xyajwinwaanu̶u̶yu̶mu̶ñ ajku̶xy. 24Tzu̶k u̶xtaayu̶m ajku̶xy neby amíñ u̶xyu̶py naybyube̱jtu̶mu̶chu̶ñ ajku̶xy neby ni'igyu̶ oy yajxón nnaychojk nnayjyu̶wu̶u̶yu̶mu̶chu̶ñ ajku̶xy, y nduunu̶mu̶ch je̱'e̱ oyjya'ay'ajtu̶ñ ajku̶xy. 25Ka'p nyo'oybyojtu̶m ajku̶xy ma nnayyo'oymyujku̶mu̶ñ ajku̶xy, du'un neby je̱'e̱ ja'ay nije̱' y'adu̶u̶tzku̶xyu̶ñ, tzu̶k nayjyoot'amu̶jmooyu̶mu̶ ajku̶xy amíñ u̶xyu̶py, je̱' ko wingoon'adu̶u̶tznu̶py ni'igyu̶ ma je̱'e̱ Windzú̶n Jesucristo ya naaxwiiñ myinaanu̶ju̶ñ.

26Pu̶nu̶ pokytyuun'adu̶u̶tzu̶m ajku̶xy nijoot ko je̱'e̱ tu̶y'ajt naty tu̶ y'ok'yajnejwu̶'u̶y, ka'p je̱'e̱ wiingpu̶ windzu̶gu̶'u̶ñ maaju̶ñ mu̶dyiibu̶ xyajpokyñi'iwaatzu̶mu̶bu̶ñ ajku̶xy. 27Je̱' je'eyu̶ nju̶jp'ijxu̶nu̶py ajku̶xy je̱'e̱ ju̶bu̶kpu̶ tzu̶gu̶'u̶ñ ju̶wu̶'u̶ñ je̱'e̱ Dios tyu̶ydyuunu̶ñ y je̱'e̱ ju̶u̶n mu̶dyiibu̶ ye̱n ye̱naaybyu̶ñ, je̱'e̱ mu̶dyiibu̶ yajku'udu̶góyu̶bu̶ñ je̱'e̱ Dios myu̶dziptu̶jk. 28Ko je̱'e̱ Moisés y'ane̱'e̱mu̶ñ pu̶n ka'akuydyúñ me̱tzk o tu̶gu̶u̶g je̱'e̱ nidu̶y'ajt'ajtpu̶ ñi'ixu̶'u̶bedyii ko du'un tyu̶y'ajtu̶ch, chi je̱'e̱ o'ku̶ñ yajmo'oy ka'p pa'a''ayo'on maaju̶ñ. 29¿Nej miich mmu̶naangu̶xy? ¿Nej ka'p je̱'e̱ tzaachpyu̶ da'a ni'igyu̶ mu̶j wyinmajtzu̶gu̶xy, je̱'e̱ mu̶dyiibu̶ je̱'e̱ Dios y'Ung yaj'u̶yu̶u̶ygyu̶xpu̶ñ y u̶xtiju̶ je̱'e̱ ñe'pty ajku̶xy, y je̱'e̱ mu̶dyiibu̶ je̱'e̱ Dios y'Espíritu ni'oju̶u̶ygyu̶xpu̶ñ, je̱'e̱ mu̶dyiibu̶ tzojku̶p ju̶wu̶u̶yu̶bu̶ñ ajku̶xy? Je̱'e̱ ne'pty mu̶dyiibu̶ tye̱e̱m yojku̶ñ je̱' je̱'e̱ kapxytyuunu̶ñ mu̶u̶d nidu̶y'ajt'áty y je̱' mu̶u̶d tu̶ yajpokyñi'iwaatzu̶gu̶xy. 30Nnejwu̶u̶yu̶mby ko je̱'e̱ Windzú̶n Dios du'un tu̶ myu̶na'añ: “U̶u̶ch xypyaatp nyaj'awimbídu̶chu̶ch je̱'e̱ tzaachpyu̶, u̶u̶ch nyajkumu̶doogu̶xu̶py.” Y nandu'un tu'k'ít tu̶ myu̶na'añ: “Je̱'e̱ Windzú̶n Dios je̱'e̱ jya'ay tu̶ydyúnu̶p.” 31¡Janch ju̶bu̶k axu̶u̶g ko je̱'e̱ juugypyu̶ Dios nboky xyajkumu̶doowu̶mu̶ch ajku̶xy!

32Peru̶ ja'aymye̱jtzku̶x miich je̱'e̱ tu̶u̶bu̶ xu̶u̶ tiempo ñaxy, ko je̱'e̱ tu̶y'ajt najty tu̶ mnaammu̶bu̶jkku̶xy, je̱'e̱ mu̶dyiibu̶ du'un neby je̱'e̱ ju̶u̶nu̶ñ, y mmu̶me̱kxtujkku̶xy mu̶u̶d je̱'e̱ mu̶k'ajt je̱'e̱ tzaachpyu̶ ayo'on mu̶dyiibu̶ najty mu̶j mmu̶najx mgu'ubu̶jkku̶xypyu̶ñ. 33Nije̱' miich tu̶ myajwin'oj myajju̶jp'ojku̶xy y tu̶ myajtzaachtyuungu̶xy mayjya'ayjyooty, y nije̱' je̱'e̱ tzaachpyu̶ tu̶ y'abaatnajxu̶gu̶xy mu̶u̶d je̱'e̱ mu̶dyiibu̶ du'un jajtku̶x abe̱jtku̶xu̶ñ. 34Miich mba'a''ayoogu̶x je̱'e̱ mu̶dyiibu̶ najty pujxtu̶gooty ajku̶xyu̶ñ, y u̶xtu̶ mxondaakku̶x ko myajpu̶jkku̶xy ku̶xyu̶ tijaty najty mmu̶dajtku̶xypyu̶ñ y je̱' ko mnejwu̶u̶ygyu̶xypy ko je̱'e̱ mu̶dyiibu̶ jiiby tzajpjooty mmu̶dajtku̶xypyu̶ñ, oy je̱'e̱ ni'igyu̶ y ko wiinu̶u̶xu̶u̶ y'ijtu̶y. 35Pu̶daakku̶x je̱'e̱ mmu̶bu̶jku̶ñ jim tu'ug'aa tu'ugjoot, y ko je̱'e̱ mmu̶bu̶jku̶ñ jim tu'ug'aa tu'ugjoot mbu̶daakku̶xu̶ch, mu̶'it je̱'e̱ oy'ajt mu̶j may mbaatku̶xu̶ch. 36Miich myajmayjyajtku̶xypy miich je̱'e̱ mu̶k'ajt ma je̱'e̱ tzaachpyu̶ ayo'on naty mmu̶najx mgu'ubu̶jkku̶xyu̶ñ, wan du'un nguydyuungu̶xu̶chu̶ñ neby je̱'e̱ Dios tzokyu̶ñ y mbaatku̶xu̶ch du'un mu̶dyiibu̶ je̱'e̱ Dios tu̶ awanu̶'u̶yu̶ñ. 37Du'un je̱'e̱ Dios ñaky myu̶na'añ:

“Tzojku̶, janch tzojku̶,

myina'añ je̱'e̱ mu̶dyiibu̶ tzajpjooty tzonaambu̶ñ,

y ka'p jye̱ga'añ.

38Je̱'e̱ wa'adzja'ay tzu̶na'awu̶p je̱'e̱ wiinu̶u̶xu̶u̶

mu̶u̶d je̱'e̱ mu̶bu̶jku̶ñ mu̶dyiibu̶ myu̶u̶du̶ñ;

peru̶ pu̶nu̶ u̶xtu̶gu̶'u̶wa'kp ma je̱'e̱ myu̶bu̶jku̶ñ,

ka'p u̶u̶ch du'un jootkujk nnayjyu̶wu̶'u̶wu̶u̶ju̶ch mu̶u̶d je̱'.”

39Y u̶u̶ch ka'p nje̱'e̱ju̶ch ajtu̶m ajku̶xy je̱'e̱ mu̶dyiibu̶ u̶xtu̶gu̶'u̶wa'kku̶xpu̶ñ ma je̱'e̱ myu̶bu̶jku̶ñ y ñú̶kxku̶xy je̱'e̱ y'aanu̶mu̶ ma je̱'e̱ tu̶goydyaaktu̶ñ, je̱' ajtu̶m ajku̶xy je̱'e̱ mu̶dyiibu̶ y'aanu̶mu̶ ni'idzooku̶ñ padaangu̶xpu̶ñ, je̱' ko je̱'e̱ mu̶bu̶jku̶ñ nmu̶dajtu̶m ajku̶xy ma je̱'e̱ Jesucrístoju̶ñ.

Currently Selected:

Hebreos 10: MIXE

Highlight

Copy

Compare