Hebreos 8

Jesús, je̱' je̱'e̱ wingapxpu̶ ma je̱'e̱ jembyu̶ Dios kyapxytyuunu̶ñ

1Je̱'e̱ mu̶dyiibu̶ ni'igyu̶ jakmu̶j, je̱'e̱ mu̶dyiibu̶ yam nnimu̶dyaaku̶mbyu̶ñ, je̱'e̱ je̱' ko je̱'e̱ ndeedy windzú̶n nigu'ubajk'ajtpu̶ ajtu̶m ajku̶xy jiiby tzajpjooty tu̶ ñaxwech ma je̱'e̱ Dios y'a'oy'eembyu̶ñ ane̱'e̱mbu̶, 2y tyuñ neby je̱'e̱ teedy windzú̶n nigu'ubajk'ajtpu̶ tyuñu̶ñ ma je̱'e̱ jaanchpyu̶ tzajptu̶jk je̱'e̱ mu̶dyiibu̶ je̱'e̱ Windzú̶n Dios tu̶ kojyu̶ñ y ka'p jya'ayu̶ch.

3Ku̶xyu̶ teedy windzú̶n nigu'ubajk'ajtpu̶ yajpu̶daakp je̱' neby je̱'e̱ yojxu̶ñ y windzu̶gu̶'u̶ñ mu̶baad yeky ma je̱'e̱ Diosu̶ñ, y paady jyatytyimypyaadyii ko je̱'e̱ Jesucristo yojxu̶ñ y windzu̶gu̶'u̶ñ nandu'un yé̱gu̶ch ma je̱'e̱ Diosu̶ñ. 4Y ko u̶xyu̶py ya naaxwiiñ y'ok'yajpaady, ni kya'ateedy'áty u̶xyu̶py je̱'e̱ yaa, je̱' ko jii je̱'e̱ teedy ya ajku̶xy je̱'e̱ mu̶dyiibu̶ je̱'e̱ yojxu̶ñ y windzu̶gu̶'u̶ñ ye̱jkku̶xpu̶ñ neby je̱'e̱ Moisés y'ane̱'e̱mu̶ñ y'ane'emyu̶ñ. 5Peru̶ adayaaba tzajptu̶jk ma adayaaba teedytyu̶jk tyuungu̶xyu̶ñ, ka'p je̱'e̱ du'un mu̶baady neby je̱'e̱ tzajpjootypyu̶ tzajptu̶jku̶ñ, du'un je̱'e̱ ni'ipaady neby tu'ug awaxk tzajpjooty chooñu̶ñ. Y nnejwu̶u̶yu̶mby ko ka'p je̱'e̱ naaxwiiñbyu̶ tzajptu̶jk mu̶baady je̱'e̱ tzajpjootypyu̶ tzajptu̶jk, ko je̱'e̱ Moisés je̱'e̱ tzajptu̶jk najty koja'añ, chi je̱'e̱ Dios ñu̶maayu̶: “Kweentu̶tún oy yajxón ko naty je̱'e̱ tzajptu̶jk mgojy, du'un mgoju̶ch neby jim kopku̶xp nyajni'ixu̶u̶yu̶ñ.” 6Peru̶ je̱'e̱ ndeedy windzú̶n nigu'ubajk'ajtpu̶ ajtu̶m ajku̶xy, je̱'e̱ mu̶dyiibu̶ je̱'e̱ mu̶jpu̶ tuung ni'igyu̶, je̱'e̱ teedy windzú̶n nigu'ubajk'adu̶u̶ tuung tu̶ yajmo'oyu̶ñ, je̱' je̱'e̱ Dios je̱'e̱ ja'ay yajmu̶wingoomb neby je̱'e̱ ja'ay tu'ugyu̶ yajpaatku̶xu̶chu̶ñ mu̶u̶d je̱'e̱ Dios mu̶u̶d je̱'e̱ ni'igyu̶ oybyu̶ kapxytyuunu̶ñ, y oy je̱'e̱ ni'igyu̶ je̱'e̱ mu̶dyiibu̶ je̱'e̱ Dios ja'ay tu̶ yajwinwaanu̶'u̶yu̶ñ.

7Ko u̶xyu̶py je̱'e̱ jayu̶jpu̶ kapxytyuunu̶ñ myu̶daaky neby je̱'e̱ ja'ay yaj'oybyu̶dzú̶m yajwa'atzpu̶dzú̶mu̶chu̶ñ je̱'e̱ mu̶dyiibu̶ je̱'e̱ Moisés Dios yajkapxnajxu̶ju̶ñ, ka'p u̶xyu̶py je̱'e̱ Dios mu̶me̱tzkpu̶ kapxytyuunu̶ñ tu̶ yeky. 8Peru̶ ka'p je̱'e̱ Dios je̱'e̱ ja'ay jékyu̶p ku'umaay je̱' gyu̶xpu̶ ko je̱'e̱ kapxytyuunu̶ñ ka'p oy ka'pxy kuydyuungu̶xy, y chi myu̶na'añ:

“Du'un je̱'e̱ Windzú̶n Dios myu̶na'añ: Mínu̶p je̱'e̱ xu̶u̶ tiempo

ma u̶u̶ch je̱'e̱ wiingpu̶ kapxytyuunu̶ñ nmo'owu̶chu̶ñ je̱'e̱ Israel ja'ay y Judá ja'ay ajku̶xy.

9Peru̶ ka'p je̱'e̱ kapxytyuunu̶ñ y'okdu'un'ajtnu̶ch neby u̶u̶ch jékyu̶p nduñu̶ñ mu̶u̶d je̱'e̱ myu̶j'áp myu̶jteedy ajku̶xy,

mu̶naa u̶u̶ch nbube̱jtku̶xyu̶ñ, ko u̶u̶ch nyajpu̶dzu̶u̶mgu̶xy Egipto naaxjooty.

Y je̱' ko ka'p u̶u̶ch je̱'e̱ ngapxytyuunu̶ñ xykyuydyuunu̶ ajku̶xy,

paady u̶u̶ch n'u̶x'ijxku̶xy, du'un je̱'e̱ Windzú̶n Dios myu̶na'añ.

10Je̱'e̱ kapxytyuunu̶ñ mu̶dyiibu̶ u̶u̶ch ndúnu̶byu̶ñ mu̶u̶d je̱'e̱ Israel ja'ay ajku̶xy

ko je̱'e̱ xu̶u̶ tiempo naty du'un tu̶ y'oknaxy,

adaa je̱', du'un je̱'e̱ Windzú̶n Dios myu̶na'añ:

Nbu̶da'agu̶byu̶ch je̱'e̱ n'ane̱'e̱mu̶ñ ma je̱'e̱ jyoot wyinma'añ ajku̶xyu̶ñ

y nguja'awu̶u̶ybyu̶ch ma je̱'e̱ jyoot kyu'ubajk ajku̶xyu̶ñ.

U̶u̶ch je̱'e̱ xyDyios'ádu̶p ajku̶xy

y je̱' u̶u̶ch nja'ay'ádu̶py ajku̶xy.

11Ka'p y'oktzojku̶nu̶ nu̶kxy je̱'e̱ mu̶ju̶u̶n mu̶du̶jk

y je̱'e̱ juugy mu̶gu'ug amíñ u̶xyu̶py ñayyaj'u̶xpu̶jku̶gu̶xy

neby nejwu̶u̶ygyu̶xu̶chu̶ñ pu̶n je̱' Windzu̶nu̶ñ.

Je̱' ko nigu̶xyu̶ je̱'e̱ ja'ay nejwu̶u̶ygyu̶xu̶ch pu̶n u̶u̶chu̶ñ,

pyi'kku̶ch myútzku̶ch y y'amu̶jja'aydyu̶jku̶ch.

12U̶u̶ch je̱'e̱ jyu̶bu̶kja'ay'ajtu̶ñ nwinmé̱kxu̶py ajku̶xy

y ka'p u̶u̶ch je̱'e̱ ñu̶u̶ pyoky n'okja'aymye̱jtzu̶ñu̶ch ajku̶xy.”

13Ko je̱'e̱ Dios je̱'e̱ jembyu̶ kapxytyuunu̶ñ nigapxy, paady je̱'e̱ nigapxy ko je̱'e̱ jayu̶jpu̶ tu̶ ñajxnu̶, y je̱'e̱ mu̶dyiibu̶ tu̶ ñajxnu̶ju̶ñ y ka'p y'oktuunu̶, tzojku̶ je̱'e̱ kyu'udu̶goyaanu̶.

Currently Selected:

Hebreos 8: MIXE

Highlight

Copy

Compare