Hebreos 7

Nandu'un je̱'e̱ Jesús tyeedy windzu̶n'aty neby je̱'e̱ Melquisedecu̶ñ

1Je̱'e̱ Melquisedec jim Salem mu̶j'ane̱'e̱mbu̶'ajt y tyeedy windzu̶n'ajty ma je̱'e̱ jakmu̶jpu̶ Diosu̶ñ. Ko najty je̱'e̱ Abraham wyimbity ma najty oy tu̶ chiptuñu̶ñ ma je̱'e̱ mu̶j'ane̱'e̱mbu̶du̶jk najty tu̶ mu̶mada'agyu̶ñ, chi je̱'e̱ Melquisedec choñ oy je̱'e̱ Abraham ju̶jpkubadu̶'u̶y y kunukxy. 2Mu̶'it je̱'e̱ Abraham majkpú̶ky puyejky mooy je̱'e̱ Melquisedec ku̶xyu̶ mu̶dyiibu̶ najty tu̶ ganar'aty ma najty oy tu̶ chiptuñu̶ñ. Je̱'e̱ Melquisedec xyu̶u̶ du'un je̱'e̱ wyimbu̶dzu̶my “tu'uda'agypyu̶ mu̶j'ane̱'e̱mbu̶”, y je̱' najty jim Salem mu̶j'ane̱'e̱mbu̶'ajtp je̱'e̱ mu̶dyiibu̶ wimbu̶dzu̶u̶mbu̶ñ “jootkujk'ajtu̶ñ”, nandu'un je̱'e̱ xyu̶u̶ nandu'un wyimbu̶dzu̶my “je̱'e̱ mu̶j'ane̱'e̱mbu̶ mu̶dyiibu̶ yajjootkujk'ajtpu̶ñ”. 3Ka'p yajnejwu̶'u̶y pu̶n je̱'e̱ Melquisedec jeky tyaj'ajt tyeedy'ajtu̶ñ ni kya'ayajnejwu̶'u̶y pu̶n myu̶j'áp myu̶jteedy'ajtu̶ñ, nan ka'p yajnejwu̶'u̶y ma myiindaakyu̶ñ ni ma y'o'ktaakyu̶ñ, y du'undu̶gu̶u̶by najty je̱' neby je̱'e̱ Dios Ungu̶ñ, je̱'e̱ mu̶dyiibu̶ wiinu̶u̶xu̶u̶ teedy'ajtpu̶ñ.

4Okkweentu̶tuungu̶x jada'achám ko mu̶j ku'umáy je̱'e̱ Melquisedec ijty, je̱'e̱ mu̶dyiibu̶ je̱'e̱ nmu̶j'áp nmu̶jteedy Abraham ku̶'u̶m mooyu̶ju̶ñ majkpú̶ky je̱'e̱ mu̶dyiibu̶ najty tu̶ ganar'aty ma je̱'e̱ mu̶j'ane̱'e̱mbu̶du̶jk ajku̶xy ma najty oy tu̶ chiptuñu̶ñ. 5Du'un je̱'e̱ Moisés y'ane̱'e̱mu̶ñ najty y'ane'emy, je̱'e̱ teedytyu̶jk je̱'e̱ Leví y'ok'ungtu̶jk y'ok'ana'ktu̶jk, je̱' najty je̱'e̱ ane̱'e̱mu̶ñ mu̶dajtku̶xp yaj'ye̱jkku̶xu̶ch je̱'e̱ ja'ay majkjátypyu̶ ku̶xyu̶ tijaty naty myu̶dajtku̶xypyu̶ñ; oy najty ja'a''ajuugy ja'a''amu̶gu'ug'ajtu̶gu̶xy y oy najty je̱'e̱ Abraham jya'a'ok'úng jya'a'ok'ana'k'ajtu̶gu̶xy du'un neby je̱' nandu'un ajku̶xyu̶ñ. 6Peru̶ je̱'e̱ Melquisedec oy najty je̱'e̱ Leví kya'a'ok'úng kya'a'ok'ana'k'adyii yaj'ye̱jk je̱'e̱ Abraham majkjátypyu̶ je̱'e̱ mu̶dyiibu̶ je̱'e̱ Dios najty tu̶ myo'oyiiju̶ñ je̱'e̱ mu̶dyiibu̶ najty tu̶ yajwinwanu̶'u̶yiiju̶ñ. Y du'un je̱'e̱ Melquisedec je̱'e̱ Abraham kunukxy, 7y mu̶baad yajku'ubú̶ky ko je̱'e̱ ni'igyu̶ myu̶ju̶ch je̱'e̱ mu̶dyiibu̶ kunukxpu̶ñ ni'igu̶ ka'p je̱'e̱ mu̶dyiibu̶ yajkunúkxpu̶ñ. 8Ya ma adayaaba naaxwiiñu̶ñ, je̱'e̱ mu̶dyiibu̶ je̱'e̱ ja'ay majkjátypyu̶ ya yaj'ye̱jku̶xpu̶ñ o'kku̶xp tu̶gooygyu̶xp je̱'. Peru̶ je̱'e̱ Dios ñaky je̱' je̱'e̱ ñimu̶dyaakypy je̱'e̱ Melquisedec je̱'e̱ mu̶dyiibu̶ jada'achám jugy'ajtpnu̶ju̶ñ. 9Y mu̶baad du'un yajmu̶na'añ ko je̱'e̱ teedytyu̶jk je̱'e̱ Leví y'ok'ungtu̶jk y'ok'ana'ktu̶jk ajku̶xy je̱'e̱ mu̶dyiibu̶ je̱'e̱ majkjátypyu̶ jada'achám yajmooygyu̶xpu̶ñ, du'un je̱'e̱ ni'ipaady neby je̱'e̱ Melquisedec je̱'e̱ majkjátypyu̶ nandu'un mooygyu̶xyu̶ñ ko je̱'e̱ Abraham majkjátypyu̶ mooygyu̶xy. 10Ko je̱'e̱ Melquisedec je̱'e̱ Abraham oy ju̶jpkubadu̶'u̶y, je̱'e̱ Abraham ni'igú̶xp ku'uduuy najty je̱'e̱ Leví mu̶dajtnu̶ je̱'e̱ y'ok'ungtu̶jk y'ok'ana'ktu̶jk oy najty kya'ama'axung'ajtku̶xyñu̶.

11Je̱'e̱ levitu̶ teedytyu̶jk je̱'e̱ Aarón y'ok'ungtu̶jk y'ok'ana'ktu̶jk ajku̶xy, myooygyu̶x je̱'e̱ Israel kajpt je̱'e̱ Dios y'ane̱'e̱mu̶ñ. Ko u̶xyu̶py je̱'e̱ teedytyu̶jk je̱'e̱ ja'ay tu'uda'agy tu̶ ok'yaj'awimbijtku̶xy je̱'e̱ mu̶dyiibu̶ je̱'e̱ Dios y'ane̱'e̱mu̶ñ najty paduungu̶xpu̶ñ, ka'p je̱'e̱ Dios Melquisedec u̶xyu̶py kejxy, je̱'e̱ Aarón u̶xyu̶py je̱'e̱ kyejxy. 12Je̱' ko je̱'e̱ teedy tyu̶gach nan tu̶gajtzp je̱'e̱ Dios y'ane̱'e̱mu̶ñ nandu'un. 13Y je̱'e̱ nWindzú̶n Jesucristo ajtu̶m ajku̶xy, je̱'e̱ mu̶dyiibu̶ yajnimu̶dyaakp ma je̱'e̱ Dios ñakyu̶ñ, ka'p je̱'e̱ Leví myu̶j'ap'ajt myu̶jteedy'ajt wiingpu̶ je̱'e̱ myu̶j'ap'ajt myu̶jteedy'ajt, ma je̱'e̱ teedy najty ka'p ni tu'ug pyu̶dzu̶u̶mgu̶xyñu̶ju̶ñ. 14Je̱' ko oy yajnejwu̶'u̶y ko je̱'e̱ nWindzú̶n Jesucristo ajtu̶m ajku̶xy je̱'e̱ Judá mu̶j'ap'ajty mu̶jteedy'ajty, y je̱'e̱ Moisés ka'p je̱'e̱ nej myu̶na'añ ko je̱'e̱ Judá y'ok'ung y'ok'ana'k tyeedy'ádu̶ch.

15Y adaa oy wa'adz adaa du'un ni'igyu̶ ñi'igu̶xu̶'u̶gy ko pu̶nu̶ miin je̱'e̱ jembyu̶ teedy je̱'e̱ Jesús mu̶dyiibu̶ du'un neby je̱'e̱ Melquisedecu̶ñ, 16je̱' ka'p je̱'e̱ paady tyeedy'ajty ko najty je̱'e̱ jyuugy myu̶gu'ug tu̶ tyeedy'ajtku̶xy, du'un neby je̱'e̱ ane̱'e̱mu̶ñ y'ane'emyu̶ñ ko je̱' teedy'ajtku̶xp je̱'e̱ mu̶dyiibu̶ je̱'e̱ jyuugy myu̶gu'ug naty tu̶ tyeedy'ajtku̶xyu̶ñ, je̱' teedy'ajt je̱' ko je̱'e̱ jugy'ajtu̶ñ wiinu̶u̶xu̶u̶ mu̶daty. 17Je̱' ko du'un je̱'e̱ Dios myu̶na'añ mu̶u̶d je̱' gyu̶xpu̶:

“Miich mu̶jteedy windzú̶n nigu'ubajk'ajtpu̶ wiinu̶u̶xu̶u̶,

du'un neby je̱'e̱ Melquisedec tyuuñu̶ñ.”

18Y du'unu̶tz je̱'e̱ jeky ane̱'e̱mu̶ñ kyu'udu̶gooyñu̶, je̱' ko ka'p najty mu̶k'ajt je̱'e̱ mu̶u̶du̶ch, yuu pu̶ma'ay je̱'e̱ najty. 19Je̱' ko ka'p je̱'e̱ Moisés y'ane̱'e̱mu̶ñ myu̶daaky neby je̱'e̱ ja'ay yaj'oybyu̶dzú̶m yajwa'adzpu̶dzú̶mu̶chu̶ñ, paady je̱'e̱ jembyu̶ ane̱'e̱mu̶ñ myiiñ je̱'e̱ mu̶dyiibu̶ ni'igyu̶ oyu̶ñ mu̶dyiibu̶ nju̶jp'ijxu̶mbyu̶ñ ajku̶xy, je̱'e̱ mu̶dyiibu̶ je̱'e̱ Dios xyajmu̶wingoonu̶mbu̶ñ ajku̶xy.

20Dios ñi'igapxpe̱jt je̱'e̱ y'ayuuk ku̶'u̶m ko je̱'e̱ Jesucristo tyeedy'ádu̶ch wiinu̶u̶xu̶u̶. Je̱'e̱ wiingpu̶ teedytyu̶jk du'uñyu̶ je̱'e̱ yajtuungmooygyu̶xy y ka'p je̱'e̱ Dios y'ayuuk ñi'igapxpe̱jtu̶ ajku̶xy. 21Peru̶ ko je̱'e̱ Windzú̶n Jesucristo tyu̶gu̶u̶y teedy'ajtpu̶ ñi'igapxpe̱jt je̱'e̱ Dios y'ayuuk ku̶'u̶m ko tyeedy'ádu̶ch, je̱' ko du'un jiiby yajnimu̶dya'agy ma je̱'e̱ Dios ñakyu̶ñ:

“Tu̶ je̱'e̱ Windzú̶n Dios y'ayuuk ku̶'u̶m ni'igapxpéty

y ka'p nimu̶naa y'u̶xtu̶gu̶'u̶wa'agu̶ch neby tu̶ myu̶na'añu̶ñ:

‘Miich mu̶jteedy windzú̶n nigu'ubajk'ajtpu̶ wiinu̶u̶xu̶u̶.’ ”

22Y du'unu̶tz je̱'e̱ Dios y'ayuuk ku̶'u̶m ni'igapxpejty, ko je̱'e̱ kapxytyuunu̶ñ ni'igyu̶ y'óyu̶ch je̱'e̱ mu̶dyiibu̶ je̱'e̱ Jesús tu̶ yekyu̶ñ, ni'igu̶ ka'p je̱'e̱ jékyu̶ñbyu̶ kapxytyuunu̶ñ. 23Janch nimay je̱'e̱ wiingpu̶ teedytyu̶jk najty ajku̶xy, naag naag najty y'o'ogyu̶ñ wiingpu̶ je̱'e̱ teedy'adu̶u̶ najty ju̶jptu̶gu̶yu̶u̶by. 24Je̱' ko ka'p je̱'e̱ Jesús nimu̶naaxu̶u̶ y'o'ogy, wiinu̶u̶xu̶u̶ je̱'e̱ jyuugy'áty, ka'p je̱'e̱ tyuung teedy'adu̶u̶ ni pu̶n jyu̶jptu̶gu̶yu̶u̶yu̶xu̶. 25Paady je̱'e̱ ja'ay mu̶baad yajpokyñi'iwa'ach wiinu̶u̶xu̶u̶ je̱'e̱ mu̶dyiibu̶ je̱'e̱ Dios ku'ubu̶jkku̶xpu̶ñ mu̶u̶d je̱' gyu̶xpu̶, je̱' ko wiinu̶u̶xu̶u̶ je̱'e̱ jyugy'ajtu̶y, neby je̱'e̱ Dios mu̶baad mu̶nukxtaaktu̶yu̶ñ mu̶u̶d je̱'e̱ ja'ay gyu̶xpu̶ ajku̶xy.

26Y du'unu̶tz, je̱'e̱ Jesús je̱' je̱'e̱ teedy windzú̶n nigu'ubajk'ajtpu̶, je̱'e̱ mu̶dyiibu̶ ijty nyajmayjyajtu̶mbyu̶ñ ajku̶xy. Je̱' je̱'e̱ wa'adzja'ay, je̱'e̱ mu̶dyiibu̶ je̱'e̱ ju̶bu̶kpu̶ ni je̱'e̱ poky ka'p mu̶u̶du̶chu̶ñ, ka'p tu'ugyu̶ y'ity mu̶u̶d je̱'e̱ pokyjya'aydyu̶jk ajku̶xy, ni'igyu̶ je̱'e̱ tzajpjooty myu̶ju̶ch kyú̶xpu̶ch ka'p du'un ni pú̶nu̶ñu̶ba. 27Jesús ka'p je̱'e̱ dyu'unu̶ch neby je̱'e̱ wiingpu̶ teedy windzú̶n nigu'ubajk'ajtpu̶ ajku̶xyu̶ñ, je̱'e̱ mu̶dyiibu̶ je̱'e̱ no'on ju̶yujk yaj'o'kku̶xpu̶ñ y yojxku̶xy jaboom jaboom neby je̱'e̱ windzu̶gu̶'u̶ñdyu̶ñ, jaywiin mu̶u̶d je̱'e̱ kyu̶'u̶mbóky kyu̶'u̶mgu̶dyeey gyu̶xpu̶ ajku̶xy y u̶x'aam mu̶u̶d je̱'e̱ ja'ay gyu̶xpu̶ pyoky kyu̶dyeey ajku̶xy. Peru̶ je̱'e̱ Jesús tu'u'ookpajku̶ je̱'e̱ windzu̶gu̶'u̶ñ je'eyu̶ yejky je̱'e̱ mu̶dyiibu̶ wiinu̶u̶xu̶u̶ ijtu̶wu̶bu̶ñ, ko ku̶'u̶m ñayye̱jku̶ ma je̱'e̱ o'ku̶ñ. 28Je̱'e̱ Moisés y'ane̱'e̱mu̶ñ yajteedywyindzú̶n nigu'ubajk'ajtypy je̱'e̱ ja'ay mu̶dyiibu̶ pokymyu̶u̶d ku̶dyeeymyu̶u̶du̶ñ. Peru̶ je̱'e̱ ayuuk je̱'e̱ mu̶dyiibu̶ je̱'e̱ Dios ku̶'u̶m ñi'igapxpe̱jtu̶ñ, je̱'e̱ mu̶dyiibu̶ u̶x'aam'ajtu̶ñ jaywiin je̱'e̱ Moisés y'ane̱'e̱mu̶ñu̶ba, je̱'e̱ y'Ung Jesucristo je̱'e̱ ku̶'u̶m yajteedywyindzú̶n nigu'ubajk'ajtypy, je̱'e̱ mu̶dyiibu̶ wiinu̶u̶xu̶u̶ wa'adz y jaybyoky mu̶u̶d ijtpu̶ñ.

Currently Selected:

Hebreos 7: MIXE

Highlight

Copy

Compare