Hebreos 6

1Tzu̶k je̱'e̱ ayuuk tu̶y'ajt yajtu'uyo'oy'adu̶u̶tzu̶m ajku̶xy u̶xtu̶ koonu̶ je̱'e̱ tzipjatypyu̶ ayuuk tu̶y'ajt nwinju̶wu̶u̶yu̶mu̶ch ajku̶xy. Tzu̶k je̱'e̱ Cristo y'u̶xpu̶jku̶ñ u̶xmajtzu̶nu̶ je̱'e̱ mu̶dyiibu̶ jayu̶jp ndimy'u̶xpu̶jktzónu̶mu̶ñ ajku̶xy ko aga'an nmu̶bu̶jku̶m ajku̶xy. Ka'p ja'anaam ja'atzojk n'agapxu̶y'o'ku̶m neby njootwimbijtu̶mu̶ñ ajku̶xy ma je̱'e̱ Diosu̶ñ y neby je̱'e̱ ju̶bu̶kpu̶ n'u̶xmajtzu̶mu̶ñ ajku̶xy, je̱'e̱ mu̶dyiibu̶ yajka'ab ma je̱'e̱ o'ku̶ñ, o neby je̱'e̱ Dios aga'an nmu̶bu̶jku̶mu̶ñ ajku̶xy, 2je̱'e̱ u̶xpu̶jku̶ñ ma je̱'e̱ nu̶u̶be̱jtu̶ñ, neby je̱'e̱ mu̶bu̶jkpu̶du̶jk yajku̶'u̶ni'ixajyu̶ñ, neby je̱'e̱ o'ogyjya'ay jyuugypyu̶jkku̶xyu̶ñ y je̱'e̱ Dios tyu̶ydyuunu̶ñ wiinu̶u̶xu̶u̶bu̶. 3Je̱' nduunu̶mu̶py ajku̶xy pu̶nu̶ Dios naty du'un tzojkp.

4Je̱'e̱ mu̶dyiibu̶ je̱'e̱ tu̶y'ajt tu'ook paatku̶xu̶ñ je̱'e̱ mu̶dyiibu̶ du'un neby je̱'e̱ ju̶u̶nu̶ñ, y kyu'ubu̶jkku̶x xi'ig xon je̱'e̱ mu̶dyiibu̶ je̱'e̱ Dios ñi'iyejkypyu̶ñ, y adu̶gu̶u̶y joottu̶gu̶u̶yu̶gu̶x je̱'e̱ Espíritu Santo, 5y kyu'ubu̶jkku̶x xi'ig xon je̱'e̱ oybyu̶ Dios y'ayuuk tyu̶y'ajt y je̱'e̱ mu̶k'ajt ma je̱'e̱ jugy'ajtu̶ñ myiñ kyu̶da'agyu̶ñ, 6y pu̶nu̶ winma'añdyu̶gooby ja'adu'ook u̶xmádzu̶ch je̱'e̱ Dios y'ayuuk tyu̶y'ajt, ka'p je̱'e̱ mu̶baad n'okyajjootwimbijtu̶nu̶ ajku̶xy ma je̱'e̱ Diosu̶ñ, yajcruutzpe̱jtku̶xypy naty je̱'e̱ Dios y'Ung du'un ja'adu'ook ajku̶xy y u̶xtaaygyu̶xy neby je̱'e̱ ja'ay je̱'e̱ Dios y'Ung du'un yajnixiik yajniyaaxku̶xu̶chu̶ñ. 7Du'un je̱' ajku̶xy neby je̱'e̱ naax nu̶u̶ uuktu̶'u̶chu̶ñ ko tyu'uy: pu̶nu̶ oyu̶u̶by je̱'e̱ pu̶da'aky ma naty tu̶ ñiip tu̶ tyuungu̶xyu̶ñ, pyaatku̶xypy je̱'e̱ Dios kyunukxu̶ñ. 8Peru̶ pu̶nu̶ agu̶ epty y pu̶nu̶ agu̶ ju̶bu̶k'ujtz jim pu̶du̶'kp ma je̱'e̱ naaxu̶ñ, ka'p je̱'e̱ du'umbu̶ naax y'óyu̶ch; tzaachtyunu̶u̶wu̶p Dios je̱', y u̶x'aam yajno'ogu̶ch.

Je̱' tu'uda'agy xyaj'ijtu̶mb ajku̶xy je̱'e̱ mu̶dyiibu̶ nja'ay'e̱jxu̶mybyu̶ñ ajku̶xy

9Peru̶ oy du'un nja'amu̶dkápx nja'amu̶dmu̶dyaakku̶xy, miich mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ, nnejwu̶u̶ygyu̶xypyu̶ch oy yajxón ko miich myajpaatku̶xy ma je̱'e̱ Dios ñu̶u̶ tyu'uju̶ñ, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 10Je̱' ko tu'uda'agy je̱'e̱ Dios jya'ay'áty, y ka'p ja'aydyu̶góyu̶ch je̱'e̱ mu̶dyiibu̶ miich tu̶ mduungu̶xyu̶ñ mu̶u̶d je̱' gyu̶xpu̶ y ko tu̶ myajni'igu̶xu̶'kku̶xy ko je̱'e̱ mu̶gu'uktu̶jk mdzojkku̶xy mju̶wu̶u̶ygyu̶xy je̱'e̱ mu̶dyiibu̶ je̱'e̱ ayuuk tu̶y'ajt mu̶bu̶jkku̶xpu̶ñ ko tu̶ mbube̱jtku̶xy, y du'un neby chambaad mduun'adu̶u̶tzku̶xyu̶ñ. 11Peru̶ ndzojkku̶xypyu̶ch ko miich nidu'ug nidu'ug mnixondaak'adu̶u̶tzku̶xu̶ch je̱'e̱ oyjya'ay'ajtu̶ñ u̶xtu̶ mabaad m'o'kku̶xy mdu̶gooygyu̶xyu̶ñ, wan ku̶xyu̶ mbaadku̶xu̶ch je̱'e̱ mu̶dyiibu̶ mja'ay'e̱jxku̶xypyu̶ñ. 12Ka'p u̶u̶ch ndzojkku̶xy mnuuxu̶u̶ygyu̶xu̶ch, je̱' u̶u̶ch dzojkku̶xypy mba'ijxku̶xu̶ch je̱'e̱ ijxpe̱jt ma je̱'e̱ mu̶dyiibu̶ je̱'e̱ ayuuk tu̶y'ajt mu̶bu̶jkku̶xu̶ñ y mye̱kxtujkku̶xy y paatku̶xnu̶ jiiby jada'achám je̱'e̱ mu̶dyiibu̶ je̱'e̱ Dios yajwinwaanu̶u̶yu̶gu̶xu̶ñ.

13Ko je̱'e̱ Dios je̱'e̱ Abraham y'ayuuk yajwinwaanu̶u̶y, ku̶'u̶m je̱'e̱ Dios y'ayuuk ni'igapxpejty myu̶naañ, je̱' ko ka'p najty jakmu̶jpu̶ jii jadu'ug neby je̱'e̱yu̶ñ pu̶n je̱'e̱ y'ayuuk ni'igapxpé̱ttu̶bu̶ñ, 14y myu̶naañ: “Jaanch, u̶u̶ch miich mu̶j may ngunúkxu̶py y nyajmayu̶'u̶wu̶byu̶ch je̱'e̱ m'ok'ung m'ok'ana'k.” 15Abraham ja'ay'e̱jx je̱' mu̶u̶d je̱'e̱ me̱kxtujku̶ñ, y pyaat je̱'e̱ mu̶dyiibu̶ je̱'e̱ Dios najty tu̶ yajwinwaanu̶'u̶yiiju̶ñ. 16Ko je̱'e̱ ja'ay y'ayuuk ni'igapxpe̱jtku̶xy jim je̱'e̱ ni'igapxpe̱jtku̶xy ma je̱'e̱ mu̶dyiibu̶ ni'igyu̶ mu̶ju̶ñ ni'igu̶ ka'p je̱' ajku̶xyñu̶ba; y ko tii awaanu̶u̶ygyu̶xy mu̶u̶d je̱'e̱ y'ayuuk mu̶dyiibu̶ naty tu̶ ni'igapxpe̱jtku̶xy, ñi'igu̶ kuydyuungu̶xu̶py je̱' y ka'p mu̶baad y'u̶xtu̶gu̶'u̶wa'kku̶xnu̶. 17Dios yajni'igu̶xu̶'k je̱'e̱ oy wa'adz ma je̱'e̱ ja'ayu̶ñ je̱'e̱ mu̶dyiibu̶ je̱'e̱ y'ayuuk najty tu̶ yajwinwaanu̶u̶ygyu̶xyu̶ñ, ko kyuydyuneembyu̶ch je̱'e̱ mu̶dyiibu̶ najty tu̶ yajwinwaanu̶u̶gyu̶xyu̶ñ y ka'p yajtu̶gatza'añ. Paady je̱'e̱ y'ayuuk awaanu̶u̶y mu̶u̶d je̱'e̱ y'ayuuk mu̶dyiibu̶ ñi'igapxpe̱jtu̶ñ. 18Adayaaba me̱tzkpu̶ ayuuk mu̶dyiibu̶ je̱'e̱ Dios ñi'igapxpe̱jtu̶ñ ka'p je̱'e̱ mu̶baad yajtu̶gách y nan ka'p mu̶baad y'anu̶u̶'áty, y paady mu̶j xypyudaj xypyumayu̶u̶yu̶m ajku̶xy u̶u̶ch je̱'e̱ mu̶dyiibu̶ n'u̶xtaayu̶mbyu̶ñ ajku̶xy je̱'e̱ Dios pyube̱jtu̶ñ, y nan je̱'e̱ mu̶dyiibu̶ je̱'e̱ nmu̶bu̶jku̶ñ jim tu̶ nbu̶daaku̶mu̶ñ ajku̶xy ma je̱'e̱ mu̶dyiibu̶ nju̶jp'ijxu̶mbyu̶ñ ajku̶xy xymyo'owaanu̶m je̱'e̱ Dios ajku̶xy. 19Adayaaba ju̶jp'ijxu̶ñ adaa je̱'e̱ n'aanu̶mu̶ jootkujk xyaj'ijtú̶yu̶py ajtu̶m ajku̶xy ko je̱'e̱ jugy'ajtu̶ñ pada'añ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ, du'un neby je̱'e̱ pujxk'ajo'kt mu̶dyiibu̶ je̱'e̱ barco mejyjyooty tu'um'ít won'ijtpu̶ñ ka'pu̶ yo'oymyín yo'oyxyú̶bu̶ch. Adayaaba ju̶jp'ijxu̶ñ adaa jiiby xyajtu̶gu̶u̶yu̶mu̶p ajku̶xy ma je̱'e̱ wit kyu̶tzwa'kxyu̶ñ ma je̱'e̱ tzajpjootypyu̶ tzajptu̶jku̶ñ, 20ma je̱'e̱ Jesús tyu̶gu̶u̶yu̶ñ neby je̱'e̱ nu̶u̶ tu'u yaj'awa'adzu̶chu̶ñ je̱'e̱ mu̶dyiibu̶ jiiby xyajtu̶gu̶u̶yu̶mu̶bu̶ñ ajku̶xy ma je̱'e̱ Dios y'it lyugaaru̶ñ, y du'un du'un wiinu̶u̶xu̶u̶ tu̶ wyu̶'u̶my teedy windzú̶n nigu'ubajk'ajtpu̶, du'un neby je̱'e̱ Melquisedec tyuuñu̶ñ.

Currently Selected:

Hebreos 6: MIXE

Highlight

Copy

Compare