Hebreos 5

1Ku̶xyu̶ mu̶jteedy windzú̶n nigu'ubajk'ajtpu̶ yajwin'ijxku̶xp je̱' ma je̱'e̱ ya'aydyu̶jktu̶jku̶ñ, yajpu̶da'agy neby wyingápxu̶chu̶ñ ma je̱'e̱ Diosu̶ñ y neby je̱'e̱ yojxu̶ñ y je̱'e̱ windzu̶gu̶'u̶ñ yé̱gu̶chu̶ñ mu̶u̶d je̱'e̱ ja'ay gyu̶xpu̶ pyoky kyu̶dyeey ajku̶xy. 2Y je̱' ko nan pokyjya'ay je̱'e̱ teedy windzú̶n nigu'ubajk'ajtpu̶ nandu'un ajku̶xy, paady je̱'e̱ mu̶baad pa'a''ayoogu̶xy je̱'e̱ mu̶dyiibu̶ ka'p tii nejwu̶u̶ygyu̶xyu̶ñ y mu̶dyiibu̶ tu̶goydyuum yajpaatku̶xpu̶ñ; 3y ko nandu'un ku̶'u̶m pyokyjya'ayu̶ch ajku̶xy, paady je̱'e̱ windzu̶gu̶'u̶ñ wan ye̱jkku̶xy mu̶u̶d je̱'e̱ pyoky kyu̶xpu̶ ajku̶xy y mu̶u̶d je̱'e̱ ja'ay jye̱'e̱ nandu'un ajku̶xy. 4Ka'p mu̶baad pu̶n ku̶'u̶m mu̶jteedy windzú̶n nigu'ubajk'ajtpu̶ ñaybyu̶da'agyii, Dios je̱' je̱'e̱ mu̶dyiibu̶ win'ijxu̶bu̶ñ y pyu̶da'agyii, du'un neby je̱'e̱ Aarón wyin'ijxu̶ju̶ñ. 5Nandu'un jyajty mu̶u̶d je̱'e̱ Cristo, ka'p je̱'e̱ ku̶'u̶m mu̶jteedy windzú̶n nigu'ubajk'ajtpu̶ ñaybyu̶daaku̶, Dios je̱'e̱ pu̶daaku̶, je̱' ko je̱'e̱ Dios du'un mu̶naan:

“U̶u̶ch miich n'ung'ajtypy;

u̶u̶ch miich je̱'e̱ jugy'ajtu̶ñ jada'achám tu̶ nmo'oy.”

6Y nandu'un je̱'e̱ Dios jiiby wiingtuum myu̶naañ ma je̱'e̱ ñakyu̶ñ:

“Miich mu̶jteedy windzú̶n nigu'ubajk'ádu̶p wiinu̶u̶xu̶u̶,

du'un neby je̱'e̱ Melquisedec tyuuñu̶ñ.”

7Mu̶naabu̶ je̱'e̱ Cristo ya naaxwiiñ chu̶naayu̶ñ, myu̶bu̶jktzoow je̱'e̱ Dios mu̶k y jyu̶u̶y yaaxy mu̶kta'agy y mu̶nukxtaaky je̱'e̱ Dios ko wan ñiwa'anu̶u̶ju̶ch ma je̱'e̱ o'ku̶ñ ke̱e̱ku̶ñ; y je̱' ko myu̶mu̶dooby kyapxymyu̶dooby najty je̱'e̱ Dios, mu̶doowu̶xu̶ je̱' y'ayuuk. 8Y du'unu̶tz je̱'e̱ Cristo, oy najty je̱'e̱ Dios jya'a'Ung'adyii, jyajt y'abu̶jk neby je̱'e̱ Dios kapxymyu̶dówu̶chu̶ñ ko je̱'e̱ tzaachpyu̶ mu̶najxy ku'ubu̶jky; 9y du'un je̱'e̱ Dios y'oy'ajtu̶ñ yajka'pxu̶ mu̶u̶d je̱'e̱ tzaachpyu̶ mu̶dyiibu̶ myu̶najx kyu'ubu̶jku̶ñ y myu̶madaaku̶ñ, mu̶'it du'un paaty neby je̱'e̱ aanu̶mu̶ ni'idzooku̶ñ wiinu̶u̶xu̶u̶bu̶ niwindzu̶n'ádu̶chu̶ñ mo'owu̶ch ku̶xyu̶ pu̶n u̶u̶mu̶doow kapxymyu̶doowu̶bu̶ñ, 10y Dios je̱'e̱ Cristo mu̶jteedy windzú̶n nigu'ubajk'ajtpu̶ pu̶daaku̶ du'un neby je̱'e̱ Melquisedec tyuuñu̶ñ.

Je̱'e̱ ayo'on ko je̱'e̱ mu̶bu̶jku̶ñ n'u̶xmajtzu̶mu̶ch

11May u̶u̶ch je̱'e̱ ayuuk nmu̶dajtku̶xy nyajmu̶dmu̶dya'agaangu̶xy adaa, peru̶ janchtzip n'awaanu̶ch ajku̶xy, je̱' ko ka'p miich tii mdzojkwinju̶wu̶u̶ygyu̶xy. 12Tu̶ jye̱jknu̶ ma je̱'e̱ ayuuk tu̶y'ajt mmu̶bu̶jkku̶xyu̶ñ, myaj'u̶xpu̶jkypy u̶xyu̶py miich je̱'e̱ ayuuk tu̶y'ajt ajku̶xyu̶ñ, peru̶ ka'p miich je̱'e̱ myaj'u̶xpu̶jkku̶xy, ni'igyu̶ miich ja'adu'ook mdzojkku̶xy ko je̱'e̱ Dios je̱'e̱ ka'pu̶ y'ayuuk tyu̶y'ajt chípu̶ch ja'adu'ook m'u̶xpu̶jkku̶xu̶ch. Du'un miich tu̶ mwimbijtku̶xy ma je̱'e̱ mmu̶bu̶jku̶ñ ajku̶xyu̶ñ neby ka'pu̶ mmu̶k mmu̶jaaju̶ñ ajku̶xy neby je̱'e̱ pi'k'ana'ktu̶jku̶ñ ajku̶xy, ma jya'apadyii neby je̱'e̱ tu̶'u̶tzpu̶ ju̶ch kaagy mgaaygyu̶xu̶chu̶ñ, je̱'e̱ leeche miich m'uukku̶xypyñu̶. 13Y je̱'e̱ mu̶dyiibu̶ je̱'e̱ myu̶bu̶jku̶ñ ka'p myu̶j myayu̶u̶ygyu̶xyu̶ñ, du'un je̱'e̱ ajku̶xy neby je̱'e̱ ma'axungtu̶jk mu̶dyiibu̶ tzi'tzku̶xnu̶ju̶ñ, ka'p jajtku̶xy neby je̱'e̱ tu'uda'agypyu̶ tu̶y'ajt winju̶wu̶u̶ygyu̶xu̶chu̶ñ.#5.13 Ka'p jajtku̶xy neby je̱'e̱ tu'uda'agypyu̶ tu̶y'ajt winju̶wu̶u̶ygyu̶xu̶chu̶ñ: nije̱' wiingpu̶ jaaybyu̶du̶jk myu̶naangu̶xy: ka'p je̱'e̱ tu'uda'agypyu̶ u̶xpu̶jku̶ñ winju̶wu̶u̶ygyu̶xy. 14Je̱'e̱ tzipjatypyu̶ tu̶y'ajt je̱' je̱'e̱ winju̶wu̶u̶ygyu̶xp, je̱'e̱ mu̶dyiibu̶ myu̶bu̶jku̶ñ mu̶j may mu̶dajtku̶xpu̶ñ, du'un neby je̱'e̱ mu̶dyiibu̶ y'aa tyu̶u̶tz jim ajku̶xyu̶ñ je̱'e̱ tu̶'u̶tzpu̶ ju̶ch kaagy je̱'e̱ kyaaygyu̶xypy, je̱' ko jyajtku̶xypy je̱' neby winju̶wu̶u̶ygyu̶xu̶chu̶ñ je̱'e̱ mu̶dyiibu̶ oy, y je̱'e̱ mu̶dyiibu̶ ka'a'óyu̶ñ.

Currently Selected:

Hebreos 5: MIXE

Highlight

Copy

Compare