Hebreos 4

1Paady pu̶nu̶ nmu̶dajtu̶myñu̶ je̱'e̱ Dios y'ayuuk neby tu̶ xyajwinwaanu̶u̶yu̶mu̶ñ ajku̶xy ko ndu̶gu̶u̶yu̶mu̶ch ajku̶xy ma je̱'e̱ pyokxtaaktu̶ñ, tzu̶k je̱'e̱ ndzu̶naay njugy'ajtu̶ñ kweentu̶'ajtu̶m ajku̶xy, ix ko nu̶kxy miich nidu'ugtu̶ mwu̶'u̶mgu̶xy; mka'atu̶gu̶u̶ygyu̶xu̶ch jiiby. 2Je̱' ko tu̶ je̱'e̱ ayuuk tu̶y'ajt u̶u̶ch nandu'un nmu̶doowu̶m ajku̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, du'un neby je̱' jékyu̶p mu̶doogu̶xyu̶ñ. Peru̶ ka'p tii oy'ajtu̶ñ paatku̶xy oy ja'amu̶doogu̶xy, je̱' ko ka'p mu̶bu̶jkku̶xy. 3Peru̶ u̶u̶ch ajtu̶m ajku̶xy mu̶dyiibu̶ tu̶ nmu̶bu̶jku̶mu̶ñ ajku̶xy, tu̶gu̶u̶yu̶mu̶p ajku̶xy ma je̱'e̱ pokxtaaktu̶ñ je̱'e̱ mu̶dyiibu̶ je̱'e̱ Dios tu̶ nigapxyu̶ñ:

“Paady u̶u̶ch je̱'e̱ n'ayuuk ni'igapxpejty nmu̶jootma'tku̶xyu̶ch,

y nnu̶maaygyu̶xyu̶ch ko ka'p tyu̶gu̶u̶ygyu̶xu̶ch ma je̱'e̱ it lugaar ma u̶u̶ch je̱'e̱ nbokxtaaktu̶ñ.”

Peru̶ je̱'e̱ Dios tu̶ najty je̱'e̱ jékyu̶p niwinmayu̶'u̶y y yajmáy je̱'e̱ tyuung ma je̱'e̱ naaxwiimbu̶ najty ka'p yajkojyñu̶ju̶ñ, 4ma je̱'e̱ Dios ñakyu̶ñ jiiby mu̶maty nigapxy je̱'e̱ mu̶juxtujkxu̶u̶bu̶:

“Chi je̱'e̱ Dios pyokxy ko je̱'e̱ tyuung ku̶xyu̶ yajmaay je̱'e̱ mu̶juxtujkxu̶u̶bu̶.”

5Y du'un jiiby jadu'ook myu̶na'añ ma je̱'e̱ Dios ñakyu̶ñ:

“Ka'p je̱'e̱ jiiby tyu̶gu̶u̶ygyu̶xu̶ch ma u̶u̶ch je̱'e̱ nbokxtaaktu̶ñ.”

6Jii je̱'e̱ lugaarnu̶ tyu̶gu̶u̶ygyu̶xu̶ch pu̶n jaktu̶gu̶'u̶waamb ma je̱'e̱ pokxtaaktu̶ñ. Je̱' ko kya'akapxymyu̶doogu̶xy paady je̱'e̱ ka'p tyu̶gu̶u̶ygyu̶xy je̱'e̱ mu̶dyiibu̶ je̱'e̱ ayuuk tu̶y'ajt jayu̶jp ja'amu̶doogu̶xu̶ñ, je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 7Paady je̱'e̱ Dios je̱'e̱ xu̶u̶ tiempo jadu'ook tu̶ ja'anigápxnu̶ba, je̱'e̱ jembyu̶ “jada'achám”, y tyuun je̱' mu̶u̶d je̱'e̱ David, myu̶naañ je̱'e̱ David kujeky ma je̱'e̱ Dios ñakyu̶ñ:

“Pu̶nu̶ mmu̶doogu̶xypy miich jada'achám neby je̱'e̱ Dios myu̶na'añu̶ñ,

ka'p je̱'e̱ mjoot mwinma'añ myajjuungu̶xy.”

8Ko u̶xyu̶py je̱'e̱ Josué je̱'e̱ Israel ja'ay pokxu̶ñ ka'p ku̶mooygyu̶xy, ka'p u̶xyu̶py je̱'e̱ Dios wiingpu̶ xu̶u̶ tzuu tu̶ nigapxy ko je̱'e̱ pokxtaakt yajpaadu̶ch. 9Paady jakwu̶'u̶mnu̶ je̱'e̱ kunukxy pokxtaakt ja'adu'ug ma je̱'e̱ Dios jya'ay tyu̶gu̶u̶ygyu̶xu̶chu̶ñ. 10Je̱' ko je̱'e̱ mu̶dyiibu̶ jiiby tu̶gu̶u̶by ma je̱'e̱ Dios pyokxtaaktu̶ñ, pókxnu̶py naty je̱' mu̶u̶d je̱'e̱ tyuung mu̶dyiibu̶ naty tu̶ tuñu̶ñ, du'un neby je̱'e̱ Dios pyokxyu̶ñ ko je̱'e̱ tyuung ku̶xyu̶ yajmaay. 11Paady mu̶baad nnay'amu̶jaduunu̶mu̶ neby mu̶baad ndu̶gu̶u̶yu̶mu̶ñ ajku̶xy ma je̱'e̱ pokxtaaktu̶ñ, ka'pu̶ pu̶n pa'íxu̶ch neby je̱'e̱ ja'ay y'adu̶u̶tzku̶xyu̶ñ je̱'e̱ mu̶dyiibu̶ je̱'e̱ Dios ka'p mu̶bu̶jkku̶xyu̶ñ.

12Je̱' ko wiinu̶u̶xu̶u̶ je̱'e̱ Dios y'ayuuk y'ity, y mu̶k'ajt mu̶u̶d. Ñi'igu̶ yajtu̶gu̶u̶ydyaaby je̱'e̱ ni'kx, je̱'e̱ joot aanu̶mu̶ y joot winma'añ, ni'igu̶ ka'p je̱'e̱ espaadu̶ mu̶dyiibu̶ me̱jtz'adu'um'eemby ja'aju̶jpu̶ñ y ja'aju̶jpxu'uñdyu̶ñ, u̶xtu̶ je̱'e̱baad ñejwu̶ydyaaby nebyjyaty je̱'e̱ ja'ay amechu̶ tyajy myayu̶ñ. Y ñejwu̶ydyaaby nebyjyaty je̱'e̱ ja'ay joot winma'añ mu̶datyu̶ñ y tijaty y'adzojkku̶xypyu̶ñ. 13Ka'p jii ni tii mu̶dyiibu̶ je̱'e̱ Dios tu̶ yajkojyu̶ñ nu̶kxy ñayyu'uchii o kya'ani'igu̶xu̶'u̶gu̶ch ma je̱'e̱ju̶ñ; ku̶xyu̶ wa'adzu̶ je̱'e̱ ñi'igu̶xu̶'u̶gu̶ch neby je̱'e̱ joot winma'añ nmu̶dajtu̶mu̶ñ ajku̶xy ma je̱'e̱ Diosu̶ñ, je̱'e̱ mu̶dyiibu̶ nyajku̶'u̶du̶gu̶u̶yu̶mu̶byu̶ñ ku̶xu̶ tijaty naty tu̶ nduunu̶mu̶ñ ajku̶xy.

Jesús je̱' mu̶jteedy windzú̶n nigu'ubajk'ajtp

14Jesús, je̱'e̱ Dios y'Ung, je̱' nmu̶jteedy windzú̶n nigu'ubajk'ajtypy ajtu̶m ajku̶xy, je̱'e̱ mu̶dyiibu̶ jiiby tzajpjooty wingapxpu̶ tu̶ tyu̶gu̶'u̶yu̶ñ mu̶u̶d u̶u̶ch kyu̶xpu̶ ajtu̶m ajku̶xy. Paady je̱'e̱ nmu̶bu̶jku̶ñ mu̶baad tu̶y tu'uda'agy nmu̶dajtu̶m ajku̶xy y ka'p n'u̶xtu̶gu̶'u̶wa'ku̶mu̶ch ajku̶xy. 15Xypya'a''ayoowu̶mu̶p je̱'e̱ nmu̶jteedy windzú̶n nigu'ubajk'ajtpu̶ ajtu̶m ajku̶xy, je̱' ko ñejwu̶u̶by je̱' neby ya naaxwiiñ ndzu̶naayu̶mu̶ñ ajku̶xy, je̱' ko tu̶ je̱'e̱ nandu'un jya'ayajwin'u̶u̶ñ mu̶u̶d je̱'e̱ ju̶bu̶kwinma'añ, peru̶ ka'p nimu̶naa pyokytyuuñ. 16Tzu̶k je̱'e̱ nDios y'ane̱'e̱mdaakt mu̶wingoonu̶ ajtu̶m ajku̶xy, cham nmu̶yaax n'o'owu̶dajtu̶m ajku̶xy, je̱'e̱ Dios mu̶dyiibu̶ tzojkp ju̶wu̶u̶ybyu̶ñ, wan je̱' xypya'a''ayoowu̶mu̶ch y xypyube̱jtu̶mu̶ch ajku̶xy may'ajtu̶ñ gyu̶xpu̶ mu̶naa naty nyajmayjyajtu̶mu̶ñ ajku̶xy.

Currently Selected:

Hebreos 4: MIXE

Highlight

Copy

Compare