Hebreos 3

Jesús jakni'igyu̶ je̱'e̱ myu̶ju̶ch ni'igu̶ ka'p je̱'e̱ Moisés

1“Mu̶gu'uktu̶jk, miich je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ, je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xy ko jya'ay'adaanu̶gu̶xy, ja'aymye̱jtzku̶x je̱'e̱ Cristo Jesús oy yajxón, je̱'e̱ Dios y'apóstol y teedy windzú̶n nigu'ubajk'ajtpu̶ je̱'e̱ mu̶dyiibu̶ nmu̶bu̶jku̶mbyu̶ñ ajku̶xy. 2Tu'uda'agy je̱'e̱ Jesús tu̶ jya'ay'áty Dios winduuy, je̱'e̱ Dios mu̶dyiibu̶ adaa tuung yajni'ipu̶jku̶ju̶ñ, du'un neby je̱'e̱ Moisés tu'uda'agy jya'ay'ajty ma je̱'e̱ tyuung ma je̱'e̱ Dios tyu̶jk nigu̶xyu̶ ajku̶xyu̶ñ. 3Peru̶ mu̶j je̱'e̱ Jesús mu̶baad ni'igyu̶ windzu̶gu̶'u̶y y'ity, ni'igu̶ ka'p je̱'e̱ Moisés, du'un neby je̱'e̱ mu̶dyiibu̶ tu'ug tu̶jkkojp ni'igyu̶ mu̶j windzu̶gu̶'u̶y y'ity ni'igu̶ ka'p je̱'e̱ tu̶jk. 4Ku̶xyu̶ je̱'e̱ ju̶u̶n tu̶jk je̱'e̱ ja'ay je̱'e̱ tu̶ kojku̶xy, peru̶ Dios je̱' je̱'e̱ mu̶dyiibu̶ ku̶xyu̶ tu̶ yajkojy je̱'e̱ mu̶dyiibu̶ jii'ajtpu̶ñ. 5Y du'unu̶tz je̱'e̱ Moisés tu'uda'agy je̱'e̱ jya'ay'ajty ma je̱'e̱ Dios tyu̶jk nigu̶xyu̶ ajku̶xyu̶ñ, neby je̱'e̱ Dios mu̶duumbu̶ju̶ñ, y du'un neby tyuuñu̶ñ je̱' je̱'e̱ tu̶y'ajt ye̱jk tii je̱'e̱ Dios najty u̶x'aam tyune̱e̱mbyu̶ñ. 6Peru̶ je̱'e̱ Cristo, je̱'e̱ Dios y'Ung, tu'uda'agy je̱'e̱ y'ane'emy ma u̶u̶ch nigu̶xyu̶ ajtu̶m ajku̶xy, je̱'e̱ mu̶dyiibu̶ du'un neby je̱'e̱ Dios tyu̶jku̶ñ ma u̶u̶ch ajtu̶m ajku̶xyu̶ñ, pu̶nu̶ nju̶jp'ijxu̶mby tu'ug'aa tu'ugjoot y xi'ig xon je̱'e̱ mu̶dyiibu̶ nbadaanu̶mbyu̶ñ ajku̶xy.

Dios jya'ay pyokxu̶ñ ajku̶xy

7Paady je̱'e̱ Espíritu Santo du'un myu̶na'añ ma je̱'e̱ Dios ñakyu̶ñ:

“Pu̶nu̶ mmu̶doogu̶xypy miich jada'achám neby je̱'e̱ Dios myu̶na'añu̶ñ,

8ka'p je̱'e̱ mjoot mwinma'añ myajjuungu̶xy neby je̱'e̱ ja'ay jyoot wyinma'añ jékyu̶p yajjuungu̶xyu̶ñ

y nibu̶du̶'kku̶xy je̱'e̱ Dios, y joot'ijx winma'añ'ijxku̶xy jim adu'ugtuum.

9Jim u̶u̶ch je̱'e̱ mmu̶j'áp mmu̶jteedy miich xyjyoot'ijx xywyinma'añ'ijxku̶xy,

oy najty tu̶ ja'a'ijxku̶xy ndúñu̶ch je̱'e̱ mu̶jwinma'añ mayñax juxytyikxy jumu̶jt.

10Paady u̶u̶ch je̱'e̱ nmu̶jootma'tku̶xy, y nmu̶naañu̶ch:

‘Ijtku̶x joottu̶góy winma'añdyu̶góy,

y ka'p u̶u̶ch miich je̱'e̱ nnu̶u̶ ndu'u xymyu̶dowaanu̶ ajku̶xy.’

11Paady u̶u̶ch je̱'e̱ n'ayuuk ni'igapxpejty nmu̶jootma'tku̶xyu̶ch,

y nnu̶maaygyu̶xyu̶ch ko ka'p tyu̶gu̶u̶ygyu̶xu̶ch ma u̶u̶ch je̱'e̱ nbokxtaaktu̶ñ.”

12“Mu̶gu'uktu̶jk, naygyweentu̶'ajtu̶gu̶x nidu'ug nidu'ug ko ka'p je̱'e̱ ju̶bu̶kjoot ju̶bu̶kwinma'añ ni tu'ug mmu̶dajtku̶xy, je̱'e̱ mu̶dyiibu̶ je̱'e̱ juugypyu̶ Dios y'ayuuk xyaj'u̶xmajtzku̶xu̶bu̶ñ ko naty mga'amu̶bu̶jkku̶xy. 13Ni'igyu̶ amíñ u̶xyu̶py nayjyootmu̶kmooyu̶gu̶x jaboom jaboom mabaad mdzu̶naay mjugy'ajtku̶xy, mabaad je̱'e̱ “ada'achámbu̶” jyékyu̶ñ je̱'e̱ mu̶dyiibu̶ je̱'e̱ Dios ñaky du'un tyijpyu̶ñ. Ka'pu̶ je̱'e̱ pokytyunu̶u̶ miich ni tu'ug xywyin'u̶u̶ngu̶xu̶ch y wyimbijtku̶xu̶ch je̱'e̱ mjoot mwinma'añ juuñ. 14Pu̶nu̶ nmu̶bu̶jku̶mby je̱'e̱ Cristo y'ayuuk tyu̶y'ajt u̶xtu̶ mabaad n'oku̶m ndu̶gooyu̶m ajku̶xy y pu̶nu̶ ka'p n'u̶xtu̶gu̶'u̶'wa'ku̶m ajku̶xy du'un neby nmu̶bu̶jktzoonu̶mu̶ñ ajku̶xy. Mu̶'it jiiby nyajpaatu̶mu̶ch ajku̶xy ma je̱'e̱ Cristo yajpaadyu̶ñ.

15Paady je̱'e̱ Dios ñaky du'un myu̶na'añ:

“Pu̶nu̶ mmu̶dooygyu̶xypy miich jada'achám neby je̱'e̱ Dios myu̶na'añu̶ñ:

ka'p je̱'e̱ mjoot mwinma'añ myajjuungu̶xy

neby je̱'e̱ ja'ay jyoot wyinma'añ jékyu̶p yajjuungu̶xyu̶ñ

y ka'p je̱'e̱ Dios ku'ubu̶jkku̶xy.”

16¿Y pu̶n je̱'e̱ Dios ka'p ku'ubu̶jkku̶xy oy je̱'e̱ y'ayuuk najty tu̶ ja'amu̶doowu̶ ajku̶xy? Je̱' nigu̶xyu̶ ajku̶xy je̱'e̱ mu̶dyiibu̶ je̱'e̱ Moisés najty jim Egipto naaxjooty tu̶ yajpu̶dzú̶myu̶ñ. 17¿Y pu̶n je̱'e̱ Dios myu̶jootma't juxytyikxy jumu̶jt? Je̱' ajku̶xy je̱'e̱ mu̶dyiibu̶ pokytyuungu̶x, je̱'e̱ mu̶dyiibu̶ jim adu'ugtuum o'kku̶xu̶ñ. 18¿Y pu̶n je̱'e̱ Dios y'ayuuk mu̶u̶d ni'igapxpejty ko jiiby ka'p tyu̶gu̶u̶ygyu̶xu̶ch ma je̱'e̱ pyokxtaaktu̶ñ? Je̱' ajku̶xy je̱'e̱ mu̶dyiibu̶ ka'p kyapxymyu̶doogu̶xyu̶ñ. 19Y nnejwu̶u̶yu̶mby ajku̶xy ko ka'p tyu̶gu̶u̶ygyu̶xy ma je̱'e̱ pokxtaaktu̶ñ, je̱' ko je̱'e̱ Dios y'ayuuk ka'p mu̶bu̶jku̶ ajku̶xy.

Currently Selected:

Hebreos 3: MIXE

Highlight

Copy

Compare