Hebreos 2

Ka'p je̱'e̱ aanu̶mu̶ ni'idzooku̶ñ mu̶baad nnajtz'ixu̶u̶yu̶m ajku̶xy

1Paady je̱'e̱ ayuuk tu̶y'ajt mu̶baad oy yajxón nyajkoptu̶gu̶u̶yu̶m ajku̶xy je̱'e̱ mu̶dyiibu̶ tu̶ nmu̶doowu̶mu̶ñ ajku̶xy, ka'pu̶ je̱'e̱ tu̶y'ajt nyajtu̶gooyu̶mu̶ch ajku̶xy je̱'e̱ mu̶dyiibu̶ du'un neby je̱'e̱ nu̶u̶ tu'uju̶ñ. 2Je̱'e̱ ane̱'e̱mu̶ñ je̱'e̱ mu̶dyiibu̶ je̱'e̱ Dios y'ángelestu̶jk jékyu̶p yaj'ye̱jku̶ñ, mu̶k najty ane̱'e̱mu̶ñ je̱'e̱ mu̶u̶du̶ch, y je̱'e̱ ja'ay mu̶dyiibu̶ pokytyuungu̶xu̶ñ y ka'animu̶doogu̶xy je̱'e̱ ane̱'e̱mu̶ñ, yajtzaachtyuungu̶x je̱' neby najty wyinmajtzu̶gu̶xyu̶ñ. 3¿Neby'eemby da'a n'okni'idzooku̶mu̶ch ajku̶xy pu̶nu̶ nnajtz'ixu̶u̶yu̶mby je̱'e̱ mu̶jpu̶ aanu̶mu̶ ni'idzooku̶ñ? Je̱'e̱ Windzú̶n Jesucristo je̱'e̱ jayu̶jp ku̶'u̶m kapxwa'kx y jak'u̶x'aam ni'igapxpe̱jtku̶xy ma u̶u̶ch ajtu̶m ajku̶xyu̶ñ je̱'e̱ mu̶dyiibu̶ mu̶doogu̶xu̶ñ neby je̱'e̱ Jesús aanu̶mu̶ ni'idzooku̶ñ kapxwa'kxyu̶ñ. 4Nan tu̶ je̱'e̱ Dios yajni'igu̶xu̶'u̶gy ko du'un jyaanchu̶ch neby je̱'e̱ Jesús myu̶na'añu̶ñ, mu̶u̶d je̱'e̱ ijxpe̱jt y mu̶jwinma'añ may. Y tu̶ je̱'e̱ mu̶k'ajt mayñax xymyooyu̶m ajku̶xy mu̶u̶d je̱'e̱ y'Espíritu Santo, du'un neby tu̶ xyajmu̶dzojku̶mu̶ñ ajku̶xy.

Jesucristo du'un najty je̱' neby je̱'e̱ myu̶gu'ugtu̶jku̶ñ

5Dios ka'p je̱'e̱ ángelestu̶jk ane̱'e̱mu̶ñ mooy ko je̱'e̱ naaxwiiñ ane̱'e̱mu̶ch je̱'e̱ mu̶dyiibu̶ miimb ku̶daakpu̶ñ je̱'e̱ mu̶dyiibu̶ yam nnigápxu̶mbyu̶ñ ajku̶xyu̶ñ. 6Ni'igyu̶ jiiby du'un tu'k'ít yajnimu̶dya'agy ma je̱'e̱ Dios ñakyu̶ñ:

“¿Timbyu̶n je̱'e̱ ja'ay ko mja'aymyéch?

¿Timbyu̶n je̱'e̱ naaxwiiñjya'ay ko mjootmay'áty?

7Ja'awe̱e̱n je̱'e̱ mu̶k'ajt ka'amu̶baady mu̶u̶d je̱'e̱ mu̶k'ajt je̱'e̱

mu̶dyiibu̶ je̱'e̱ ángelestu̶jk mmooyu̶ñ,

peru̶ tu̶ je̱'e̱ oy'ajt y je̱'e̱ ku'umaayu̶ñ mmo'oy.

8Ku̶xyu̶ je̱'e̱ ane̱'e̱mu̶ñ myajku̶'u̶du̶gu̶u̶ydyaay,

du'un neby du'umbu̶ ku̶xyu̶ tyekypya'tku̶'u̶by mbu̶daaktaayu̶ju̶ñ.”

Y du'unu̶tz ko je̱'e̱ ane̱'e̱mu̶ñ ku̶xyu̶ yajku̶'u̶du̶gu̶u̶ydyaay, ka'p je̱'e̱ Dios ni tu'ug yajwu̶'u̶my nu̶kxy je̱'e̱ ane̱'e̱mu̶ñ jim ka'apaady ma je̱'e̱ju̶ñ. Peru̶ ka'anu̶ n'ijxu̶mnu̶ ajku̶xy ko ku̶xyu̶ ane̱'e̱mda'ay. 9Peru̶ n'ijxu̶mby je̱'e̱ Jesús je̱'e̱ mu̶dyiibu̶ je̱'e̱ Dios je̱'e̱ mu̶k'ajt ja'awe̱e̱n ka'ayajmu̶baattu̶ju̶ñ mu̶u̶d je̱'e̱ ángelestu̶jk myu̶k'ajt ajku̶xy. Dios ko xychojk xyjyu̶wu̶u̶yu̶m ajku̶xy je̱' je̱'e̱ Jesús nidujk ko nigu̶xyu̶ xykyu'u'o'ogu̶u̶yu̶mu̶ch ajku̶xy, y paady je̱'e̱ oy'ajt y ku'umaayu̶ñ jada'achám mu̶dajtnu̶, je̱' gyu̶xpu̶ ko je̱'e̱ tzaachpyu̶ o'ku̶ñ ijxy paaty.

10Ku̶xyu̶ tijaty ya yajpaatp Dios kyu̶xpu̶ je̱'e̱ jyii'áty, y ko je̱'e̱ Dios mu̶k'ajt mu̶u̶du̶ch, y chojkypy ko je̱'e̱ y'ung y'ana'k tu̶gu̶u̶ydyaakt nigu̶xyu̶ paatku̶xu̶ch ma je̱'e̱ y'oy'ajttaaktu̶ñ. Paady je̱'e̱ Dios je̱'e̱ Jesucristo y'oy'ajtu̶ñ yajka'pxu̶ mu̶u̶d je̱'e̱ tzaachpyu̶ mu̶dyiibu̶ myu̶najx kyu'ubu̶jku̶ñ, je̱' ñiwaambu̶ yajtzookpu̶ ajku̶xy. 11U̶u̶ch ajtu̶m ajku̶xy je̱'e̱ mu̶dyiibu̶ je̱'e̱ Jesús tu̶ xyajpokyñi'iwaatzu̶mu̶ñ ajku̶xy, je̱' jada'achám nDeedy'ajtu̶nu̶py ajku̶xy je̱'e̱ Jesús tyeedy je̱'e̱ mu̶dyiibu̶ yajpokyñi'iwaatzpu̶ñ. Paady je̱'e̱ ka'p xymyu̶dzo'oydyuunu̶m ajku̶xy ko du'un xyñu̶maayu̶m ajku̶xy mu̶gu'uktu̶jk, 12ko du'un myu̶naañ ma je̱'e̱ Dios ñakyu̶ñ:

“Miich Dios nnigapx nnimu̶dya'agu̶byu̶ch,

miich je̱'e̱ m'ayuuk ma u̶u̶ch je̱'e̱ nmu̶gu'ugtu̶jku̶ñ,

y nwin'u̶w nwinya'axu̶py mayjya'ayjyooty.”

13Nandu'un je̱'e̱ Dios ñaky myu̶na'añ:

“Nmu̶jpu̶da'agu̶byu̶ch je̱'e̱ Dios.”

Y nandu'un jadu'ook myu̶naanu̶ba:

“Cha u̶u̶ch mu̶u̶d je̱'e̱ ung ana'k

je̱'e̱ mu̶dyiibu̶ u̶u̶ch je̱'e̱ Dios tu̶ xymyo'oyu̶ñ.”

14Du'un neby je̱'e̱ ung ana'k tu'kke̱'e̱xkpu̶ tyu'kjoot tyu'kne'py'ajtku̶xy, nandu'un je̱'e̱ Jesús jyoot ñe'pty mu̶dajty neby je̱'e̱ naaxwiiñjya'ayu̶ñ, du'un je̱'e̱ o'ku̶ñ mu̶madaaky je̱'e̱ mu̶dyiibu̶ je̱'e̱ mu̶k'ajt najty ja'amu̶dajtp neby yaj'o'ogu̶chu̶ñ ko je̱'e̱ o'ku̶ñ mu̶najxy ku'ubu̶jky, je̱' u̶u̶ch du'un ndijpy je̱'e̱ mu̶jku'u je̱'e̱ mu̶dyiibu̶ je̱'e̱ o'ku̶ñ niwindzu̶n'ajtpu̶ñ. 15Du'un je̱'e̱ tu̶ yaj'awa'atzpu̶dzú̶my ku̶xyu̶ je̱'e̱ mu̶dyiibu̶ je̱'e̱ o'ku̶ñ du'un mu̶dajtu̶gu̶xpu̶ñ neby je̱'e̱ ni'idoogypyu̶ju̶ñ, tzu̶gu̶u̶ygyu̶xy je̱'e̱ o'ku̶ñ du'uñdyu̶ chu̶naay jyugy'ajtku̶xyu̶ñ. 16Tu̶y'ajt ka'p je̱'e̱ Jesús ángelestu̶jk ya naaxwiiñ nimiiñ neby pubé̱du̶chu̶ñ, je̱' je̱'e̱ ya naaxwiiñ ñimiin je̱'e̱ Abraham y'ok'ungtu̶jk y'ok'ana'ktu̶jk. 17Paady je̱'e̱ du'un nandu'un jya'ay'ajty neby u̶u̶ch ajtu̶m ajku̶xyu̶ñ je̱'e̱ jyuugytyu̶jk myu̶gu'ugtu̶jk, neby du'un Dios winduuy yajpaadu̶chu̶ñ je̱'e̱ teedy windzú̶n nigu'ubajk'ajtpu̶ mu̶u̶d je̱'e̱ tu'uda'agy'ajtu̶ñ y pa'a''ayo'ajtu̶ñ, y neby je̱'e̱ naaxwiiñjya'ay pyoky kyu̶dyeey winmé̱kxu̶chu̶ñ mu̶u̶d je̱'e̱ kyu̶'u̶m o'ku̶ñ. 18Y je̱' ko je̱'e̱ Jesucristo je̱'e̱ tzaachpyu̶ ku̶'u̶m mu̶najx ku'ubu̶jk y yajjoot'ijxy yajwinma'añ'ijxy, paady jada'achám mu̶baad pubety pudu̶gu̶'u̶y pu̶njaty je̱'e̱ tzaachpyu̶ nandu'un mu̶najxp ku'ubu̶jkpu̶ñ y yajjoot'ijxp yajwinma'añ'ijxpu̶ñ.

Currently Selected:

Hebreos 2: MIXE

Highlight

Copy

Compare