Hebreos 1

Dios Y'ung kyu̶xpu̶ je̱'e̱ tu̶ xymyu̶gápxu̶m ajku̶xy

1Dios xymyu̶gapxu̶ je̱'e̱ nmu̶j'áp nmu̶jteedy jékyu̶p ajtu̶m ajku̶xy may'ook y mayñax mu̶u̶d je̱' y'ayuuknajtzkapxu̶u̶ybyu̶du̶jk ajku̶xy, yajnajxku̶xy je̱'e̱ ayuuk. 2Jada'achám, ma je̱'e̱ xu̶u̶ tiempo wyingoonu̶ ma je̱'e̱ naaxwiiñ kyu̶xaan tyu̶goyaanu̶ju̶ñ, tu̶ je̱'e̱ Dios xymyu̶gápxu̶m ajku̶xy mu̶u̶d je̱'e̱ y'Ung, y mu̶u̶d je̱' gyu̶xpu̶ je̱'e̱ naaxwiiñ yajkojy y ku̶xyu̶ tijaty ya yajpaatp y je̱' ku̶xyu̶ tijaty yajmu̶wu̶'u̶mdaay. 3Je̱' je̱'e̱ Dios y'oy'ajtu̶ñ, je̱'e̱ mu̶dyiibu̶ adu̶kxp ajajpu̶ñ, je̱'e̱ mu̶dyiibu̶ du'un ku̶xu̶'kp neby je̱'e̱ Dios kyu̶xu̶'u̶gyu̶ñ, y je̱'e̱ mu̶dyiibu̶ ku̶xyu̶ tii wijtz'ijttaaybyu̶ñ mu̶u̶d je̱'e̱ y'ayuuk mu̶k'ajtmu̶u̶dpu̶. Ko je̱'e̱ nboky ngu̶dyeey tu̶ xyajni'iwaatzu̶m ajku̶xy, chi jiiby tzajpjooty ñaxwech ma je̱'e̱ Dios y'a'oy'eembyu̶ñ ane̱'e̱mbu̶.

Je̱'e̱ Dios y'Ung jakmu̶j je̱'e̱ ni'igyu̶ ni'igu̶ ka'p je̱'e̱ ángelestu̶jk ajku̶xy

4Y je̱'e̱ Dios y'Ung jakmu̶j je̱'e̱ ni'igyu̶ ni'igu̶ ka'p je̱'e̱ ángelestu̶jk ajku̶xy, je̱' ko tu̶ je̱'e̱ Dios ane̱'e̱mu̶ñ ku'umáybyu̶ ku̶xyu̶ yajmu̶wu̶'u̶mda'ayii ni'igu̶ ka'p je̱'e̱ ángelestu̶jk ajku̶xy.

5Je̱' ko ka'p je̱'e̱ Dios ángel du'un ni tu'ug nimu̶naa nu̶maay:

“U̶u̶ch miich n'Ung'ajtypy,

u̶u̶ch miich je̱'e̱ jugy'ajtu̶ñ jada'achám tu̶ nmo'oy.”

Nan ka'p je̱'e̱ ángel du'un ni tu'ug nu̶maay:

“U̶u̶ch miich xytyeedy'ádu̶py

y u̶u̶ch miich n'ung'ádu̶py.”

6Peru̶ wiingtuumb du'un jiiby myu̶na'añ ko je̱'e̱ Dios kyob'Ung ya naaxwiiñ kejxy:

“Ko je̱'e̱ Dios y'ángelestu̶jk nigu̶xyu̶ wyindzu̶gu̶'u̶ y'o'owu̶dattu̶u̶wu̶ch.”

7Dios du'un je̱'e̱ y'ángelestu̶jk nimu̶dya'agy myu̶na'añ:

“Ko je̱'e̱ y'ángelestu̶jk dyu'unu̶ch neby je̱'e̱ poju̶ñ,

y je̱'e̱ tyuumbu̶du̶jk neby je̱'e̱ ju̶u̶nyé̱ngu̶ñ.”

8Peru̶ je̱'e̱ Dios du'un je̱'e̱ U'ung nimu̶dya'agy:

“Je̱'e̱ m'ane̱'e̱mu̶ñ, miich Dios, wiinu̶u̶xu̶u̶ je̱'e̱ y'ijtu̶y,

y je̱'e̱ tu̶y tu'uda'agypyu̶ ane̱'e̱mu̶ñ je̱'.

9Tu̶ miich je̱'e̱ oybyu̶ mdzoky y tu̶ m'u̶xtijy je̱'e̱ ju̶bu̶kpu̶,

paady je̱'e̱ Dios tu̶ xywyin'ixy, miich je̱'e̱ mDios,

y paady je̱'e̱ jootkujk'ajtu̶ñ ni'igyu̶ tu̶ xymyo'oy,

ni'igu̶ ka'p je̱'e̱ mmu̶'ane̱'e̱mbu̶du̶jk ajku̶xy.”

10Nandu'un je̱'e̱ Dios myu̶na'añ:

“Miich, Windzú̶n Dios, miich je̱'e̱ naaxwiimbu̶ jékyu̶p myajkoj,

y miich je̱'e̱ tzajp ku̶'u̶m myajkoj.

11Kú̶xu̶p tu̶góyu̶p je̱'e̱ tzajp y je̱'e̱ naaxwímbu̶ ku̶xyu̶,

peru̶ miich wiinu̶u̶xu̶u̶ miich m'ijttú̶y.

Du'un je̱'e̱ kyú̶xu̶ch tyu̶góyu̶ch neby je̱'e̱ wit tukxy tyukyu̶ñ.

12¡M'ane̱'e̱gu̶py je̱' neby je̱'e̱ wit tukxy yaj'ane'egyu̶ñ,

myajtu̶gátzu̶py je̱' neby je̱'e̱ ja'ay ñaygyubu̶gyiiju̶ñ yajtu̶gách je̱'e̱ wyit!

Peru̶ miich je̱' miich je'emy;

ka'p miich je̱'e̱ mjugy'ajtu̶ñ kyú̶xu̶ch tyu̶góyu̶ch.”

13Dios ka'p je̱'e̱ ángel du'un ni tu'ug nimu̶naa nu̶maay:

“U̶ña'a yaa a'oy'eemby ma u̶u̶ch je̱'e̱ nnamu̶jku̶ñ,

u̶xtu̶ koonu̶ u̶u̶ch naty je̱'e̱ mmu̶dzip tu̶ nmu̶madaakta'ay,

tu̶ nbu̶da'agyu̶ch mdekypya'tku̶'u̶py.”

14Je̱' ko nigu̶xyu̶ je̱'e̱ ángelestu̶jk du'un je̱'e̱ ajku̶xy neby je̱'e̱ poju̶ñ, ka'p kyu̶xu̶'kku̶xy, mu̶dyiibu̶ mu̶duungu̶xy je̱'e̱ Dios, kye̱jxu̶gu̶xyu̶ neby je̱'e̱ ja'ay pube̱jtku̶xu̶chu̶ñ je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ padaangu̶xpu̶ñ.

Currently Selected:

Hebreos 1: MIXE

Highlight

Copy

Compare