Hebreos 12

Tzu̶k je̱'e̱ nwiin njoot jim pu̶daaku̶m ajku̶xy ma je̱'e̱ Jesúsu̶ñ

1Je̱' ko janch may je̱'e̱ tu̶y'ajt nmu̶dajtu̶m ajku̶xy ma je̱'e̱ ja'ay mu̶dyiibu̶ je̱'e̱ Dios mu̶bu̶jkku̶xu̶ñ, je̱'e̱ mu̶dyiibu̶ je̱'e̱ myu̶bu̶jku̶ñ yajni'igu̶xu̶'kku̶xu̶ñ, paady mu̶baad nnajtz'ixu̶u̶yu̶nu̶ ku̶xyu̶ je̱'e̱ mu̶dyiibu̶ xy'agugu̶u̶yu̶mbu̶ñ ajku̶xy y je̱'e̱ poky mu̶dyiibu̶ xyajwinma'añdyu̶gooyu̶mbu̶ñ ajku̶xy, y tzu̶k je̱'e̱ tu̶y'ajt yajtu'uyo'oy'adu̶u̶tzu̶m ajku̶xy mu̶u̶d je̱'e̱ mu̶k'ajt, je̱'e̱ mu̶dyiibu̶ tu̶ nyajtzondaaku̶mu̶ñ ajku̶xy. 2Tzu̶k je̱'e̱ nwiin njoot jim pu̶daaku̶m ajku̶xy ma je̱'e̱ Jesúsu̶ñ, je̱' je̱'e̱ nmu̶bu̶jku̶ñ xymyooby ajtu̶m ajku̶xy y jak'yajka'pxy neby ni'igyu̶ oy yajxón nmu̶bu̶jku̶mu̶chu̶ñ ajku̶xy. Je̱'e̱ Jesús jim cruutzkú̶xp ayoow, ka'p je̱'e̱ tzo'oydyu'un o'ku̶ñ kweentu̶tuuñ, je̱' ko ñejwu̶u̶by najty ko jayu̶jp y'ok'ayówu̶ch, mu̶'it je̱'e̱ jootkujk'ajtu̶ñ y xondaaku̶ñ paadu̶ch, y chi ñaxwech ma je̱'e̱ Dios y'a'oy'eembyu̶ñ ane̱'e̱mbu̶.

3Paady ja'aymye̱jtzku̶x je̱'e̱ Jesús y'ijxpe̱jt, neby je̱'e̱ pokyjya'aydyu̶jk chaachtyuunu̶gu̶xy y kya'a'ixaanu̶gu̶xy. Paady ka'p mmu̶dzijpu̶gu̶xyu̶ ni mga'a'u̶xtu̶gu̶'u̶wa'kku̶xu̶ch. 4Miich ajku̶xy ka'anu̶ miich je̱'e̱ o'ku̶ñ mmu̶najx mgu'ubu̶jkku̶xyñu̶ neby je̱'e̱ Cristo mu̶najxy ku'ubu̶jkyu̶ñ poky kyu̶xpu̶, 5y tu̶ miich je̱'e̱ mja'aydyu̶gooygyu̶xnu̶ neby je̱'e̱ Dios xywyingapx xyjyu̶jpkapxu̶u̶ygyu̶xyu̶ñ neby je̱'e̱ kyu̶'u̶m'úngu̶ñ. Du'un myu̶na'añ ma je̱'e̱ Dios ñakyu̶ñ:

“Ung, ka'p mjootma'ady

ko je̱'e̱ Windzú̶n Dios xy'u̶u̶wijy xykyapxwijy

cham xyajkumu̶dóy, y ka'p mjootme̱tzku̶'u̶y ko xy'ojy.

6Je̱' ko je̱' je̱'e̱ Windzú̶n Dios y'u̶u̶wijpy kyapxwijpy mu̶dyiibu̶ chojkypyu̶ñ,

y je̱' yajkumu̶dooby mu̶dyiibu̶ kyu'ubu̶jkypy neby ungu̶ñ.”

7Me̱kxtujkku̶x ma je̱'e̱ Dios xyajkumu̶doogu̶xyu̶ñ, y du'un je̱'e̱ Dios xymyu̶dajtku̶xu̶ch neby ung ana'ku̶ñ. ¿Nej jii ung da'a nije̱' mu̶dyiibu̶ je̱'e̱ tyeedy ka'p yajkumu̶doyii? 8Pu̶nu̶ ka'p je̱'e̱ Dios miich xyajkumu̶doogu̶xy, du'un neby je̱'e̱ y'ung y'ana'k ku̶xyu̶ yajkumu̶dóyu̶ñ, ka'p naty je̱'e̱ jaanch xy'ung'ajtku̶xy, wiing ung miich naty ajku̶xy. 9Chi ja'adu'knáx, ko najty yajpi'k'ana'k'áty, xyajkumu̶doob najty je̱'e̱ ndeedy ajtu̶m ajku̶xy ya naaxwiiñ, y nwindzu̶gu̶u̶by najty ajtu̶m ajku̶xy oy xyjya'ayajkumu̶doowu̶m ajku̶xy. ¿Ti mdijy da'a ko ni'igyu̶ nga'a'okkapxymyu̶doowu̶mu̶ch ajku̶xy je̱'e̱ nDios Teedy tzajpjootypyu̶ ajtu̶m ajku̶xy, neby je̱'e̱ jugy'ajtu̶ñ wiinu̶u̶xu̶u̶bu̶ nbaattu̶mu̶chu̶ñ ajku̶xy? 10Xyajkumu̶doob najty je̱'e̱ ndeedy ajtu̶m ajku̶xy ya naaxwiiñ ma ya tzojku̶ yajjugy'átyu̶ñ, du'un neby najty je̱' ku'umaaygyu̶xyu̶ñ; peru̶ je̱'e̱ Dios xyajkumu̶doowu̶mb ajku̶xy mu̶u̶d je̱'e̱ jaanchpyu̶ n'oy'ajtu̶ñ gyu̶xpu̶ ajtu̶m ajku̶xy, neby du'un wa'adz nyajpaatu̶mu̶chu̶ñ ajku̶xy neby je̱'e̱ju̶ñ ka'p je̱'e̱ poky maa. 11Jaanch tu̶y'ajt, ni pu̶n je̱'e̱ tzaachpyu̶ ka'a'oyjyu̶wu̶'u̶y ko yaj'íxy yajpaady, yajtzu̶chu̶u̶by je̱'. Peru̶ pu̶n jajtp neby je̱'e̱ tzaachpyu̶ mu̶mada'agu̶chu̶ñ, je̱'e̱ mu̶dyiibu̶ myu̶najxypy kyu'ubu̶jkypyu̶ñ, chi je̱'e̱ jootkujkpu̶ jugy'ajtu̶ñ paadu̶ch ka'p je̱'e̱ tzip ma'ad maa y je̱'e̱ tu̶y tu'uda'agypyu̶ jugy'ajtu̶ñ.

Je̱'e̱ ayo'on ko je̱'e̱ Dios kyapxy n'u̶xtiju̶mu̶ch ajku̶xy

12Y du'unu̶tz, jootmu̶kpu̶jkku̶x ma je̱'e̱ mmu̶bu̶jku̶ñ, du'un neby du'umbu̶ tu̶ myajmu̶kpu̶jkku̶xy je̱'e̱ mgu̶'u̶ mu̶dyiibu̶ tu̶ y'anukxu̶u̶ygyu̶xnu̶ju̶ñ y je̱'e̱ mgox mu̶dyiibu̶ myu̶k myu̶jaa ka'abu̶ñ, 13y u̶xtaaygyu̶x je̱'e̱ tu̶ybyu̶ nu̶u̶ tu'u, wan xypya'ijxku̶xu̶ch je̱'e̱ mu̶dyiibu̶ myu̶bu̶jku̶ñ we̱e̱nu̶ ajku̶xyu̶ñ, ka'pu̶ tyu'udu̶gooygyu̶xu̶ch y du'un ni'igyu̶ jyootmu̶kpu̶jkku̶xu̶ch. Wan je̱'e̱ teky cho'ogu̶ch mu̶dyiibu̶ du'un neby ma'adpu̶ju̶ñ y ka'pu̶ wyítnu̶ch.

14Jatytimy chu̶naaygyu̶x oy yajxón nigu̶xyu̶ ka'p je̱'e̱ tzip ma'ad maa y tzu̶naaygyu̶x mu̶u̶d je̱'e̱ wa'atzpu̶ tzu̶naayu̶ñ. Pu̶nu̶ ka'p je̱'e̱ wa'atzpu̶ tzu̶naayu̶ñ myajkoptu̶gu̶u̶ygyu̶xy, ni pu̶n je̱'e̱ Windzú̶n Dios ka'a'íxu̶ch. 15Jatytimy yajkoptu̶gu̶u̶ygyu̶x ka'pu̶ ni pu̶n tyu̶goy'ajtku̶xu̶ch je̱'e̱ Dios myay'ajtu̶ñ ka'pu̶ je̱'e̱ jyoot wyinma'añ ni pu̶n ta'am mu̶dádu̶ch, y yajwinma'añdyu̶gooygyu̶xu̶ch je̱'e̱ myu̶gu'ugtu̶jk, du'un neby je̱'e̱ ujtz ta'ambu̶ mu̶dyiibu̶ pa'amduumbu̶ñ y yajpa'amdu̶gu̶'u̶y je̱'e̱ ja'ay. 16Ni tu'ug miich je̱'e̱ wiingpu̶ to'oxyu̶jktu̶jk ka'p mu̶baad mu̶dtuundu̶gooygyu̶xy ni mga'a'u̶xtijku̶xu̶ch je̱'e̱ mu̶dyiibu̶ je̱'e̱ Dios tu̶ xymyooygyu̶xyu̶ñ; du'un je̱'e̱ Esaú y'adu̶u̶ch ko yajwingubu̶jky mu̶u̶d tu'ktéxy ju̶kxy, je̱'e̱ mu̶dyiibu̶ je̱'e̱ tyeedy najty ku̶xyu̶ mo'owaanu̶bu̶ñ ko kyob'úngu̶ch. 17Y miich mnejwu̶u̶ygyu̶xypy ko je̱'e̱ Esaú tyeedy je̱'e̱ kunukxu̶ñ ja'ayujkwaanu̶ñu̶, ka'p je̱'e̱ tyeedy y'okmooyu̶nu̶, y oy mu̶k jyaaju̶u̶y jyaayaaxy, tu̶ najty du'un jyaty y ka'p mu̶baad tii oktuunu̶.

18Miich ka'anu̶ miich je̱'e̱ Dios y'oy'ajtu̶ñ mmu̶wingoonu̶ ajku̶xy, ka'anu̶ miich je̱'e̱ m'ijxku̶xy mbaatku̶xy je̱'e̱ mu̶dyiibu̶ yaj'ijxp yajni'idoombu̶ñ neby je̱'e̱ Israel ja'ay ijxku̶xy ni'idoongu̶xy ma je̱'e̱ Sinaí koptu̶ñ, ma je̱'e̱ ju̶u̶n najty jyanchtoyu̶ñ, ma najty jyanch'agoodzu̶'u̶yu̶ñ y ma najty jyanchpojyu̶ñ, 19ni mga'amu̶doogu̶xy ko je̱'e̱ trompeta yaaxy ni je̱'e̱ Dios kyapxy mga'amu̶doogu̶xy. Y pu̶n je̱'e̱ Dios kyapxy mu̶doogu̶xu̶ch y'amdoogu̶x je̱'e̱ may'ajt ma je̱'e̱ Moisesu̶ñ ko ka'p y'okmu̶gapx'adu̶u̶tzu̶gu̶xnu̶ch je̱' ko najty jyanchtzu̶gu̶u̶ygyu̶xy. 20Je̱' ko je̱'e̱ ane̱'e̱mu̶ñ najty ka'p myu̶madaaknu̶ju̶ch, je̱'e̱ mu̶dyiibu̶ ñigapxypyu̶ñ: “Pu̶n je̱'e̱ tyeky jim pu̶daakp ma je̱'e̱ koptu̶ñ, tzaagu'uga'ach je̱'e̱ y'oyyaj'o'knu̶ch o kepyjyu̶jpxu'uñ mu̶u̶d, oy naty jya'aju̶yujk jya'a'animaalu̶ch. 21Oy chu̶gu̶u̶yñu̶ je̱'e̱ najty mu̶dyiibu̶ najty yaj'ijxpu̶ñ, u̶xtu̶ je̱'e̱ Moisés paad du'un ku̶'u̶m mu̶naan: “Janch tzu̶yuuby u̶u̶ch yam mu̶u̶d je̱'e̱ tzu̶gu̶'u̶ñ.”

22Miich, ni'igyu̶ miich je̱'e̱ Sión kopt tu̶ mmu̶wingoongu̶xy, y je̱'e̱ juugypyu̶ Dios kyajpt, je̱'e̱ tzajpjootypyu̶ Jerusalén, y maa je̱'e̱ ángelestu̶jk ka'anaag mil amugu̶'u̶ yajpaatku̶xyu̶ñ windzu̶gu̶'u̶ o'owu̶dattaangu̶xy je̱'e̱ Dios. 23Nan tu̶ mmu̶wingoongu̶xy ma je̱'e̱ jayu̶jpu̶ Dios y'Ung y'ana'k ñayñi'imugu̶u̶yu̶gu̶xyu̶ñ, je̱'e̱ mu̶dyiibu̶ je̱'e̱ Dios mu̶bu̶jkku̶xu̶ñ, y je̱'e̱ mu̶dyiibu̶ xyu̶u̶ jiiby tzajpjooty kuja'ayu̶ñ ajku̶xy. Tu̶ je̱'e̱ Dios mmu̶wingoongu̶xy, mu̶dyiibu̶ ku̶xyu̶ nijueez'ajtpu̶ñ, nan tu̶ miich je̱'e̱ oyjya'aydyu̶jk y'aanu̶mu̶ mmu̶wingoongu̶xy je̱'e̱ mu̶dyiibu̶ je̱'e̱ Dios tu'uda'agy tu̶ yaj'awimbítyu̶ñ. 24Tu̶ mmu̶wingoongu̶xy je̱'e̱ Jesús, je̱'e̱ mu̶dyiibu̶ je̱'e̱ jembyu̶ kapxytyuunu̶ñ tu̶ tuñu̶ñ, y je̱'e̱ ñe'pty mu̶dyiibu̶ tu̶ xyajpokyñi'iwaatzu̶mu̶ñ ajku̶xy ko teemy yojky mu̶u̶d u̶u̶ch kyu̶xpu̶ nboky ajtu̶m ajku̶xy, oy je̱'e̱ ni'igyu̶ ni'igu̶ ka'p je̱'e̱ Abel ñe'pty, je̱'e̱ mu̶dyiibu̶ je̱'e̱ o'ku̶ñ yaj'awimbijtpu̶ñ.

25Paady naygyweentu̶'ajtu̶gu̶x miich ka'p je̱'e̱ Dios m'u̶xtijku̶xy, je̱'e̱ mu̶dyiibu̶ xymyu̶gápxu̶mbu̶ñ ajku̶xy. Je̱' ko je̱'e̱ mu̶dyiibu̶ je̱'e̱ Dios u̶xtijku̶xu̶ñ ko je̱'e̱ Dios ya naaxwiiñ jya'amu̶gápxu̶gu̶xy, ka'p je̱'e̱ ñi'idzookku̶xy, yajkumu̶doowu̶gu̶x je̱'. Y ma je̱' kya'a'okni'idzookku̶xpu̶, y paady u̶u̶ch ni'igyu̶ anaxy njajtu̶mu̶ch ajku̶xy pu̶nu̶ ngapxykyu'udé̱nu̶mby je̱'e̱ Dios mu̶dyiibu̶ jiiby tzajpjooty xyjya'amu̶gápxu̶mbu̶ñ ajku̶xy. 26Ma je̱'e̱ jeky tiempo, ko je̱'e̱ Dios kyapxy tzu̶yuuy je̱'e̱ naax, peru̶ jada'achám du'un je̱'e̱ Dios myu̶na'añ: “Nyajtzu̶yuye̱e̱mbyu̶ch je̱'e̱ naax ja'adu'ook nan ka'p ñaaxtu̶'ajtyu̶ch, nandu'un je̱'e̱ tzajp.” 27Ko du'un myu̶na'añ: “Chi du'un ja'adu'ook” yajwinju̶wu̶'u̶y ko ku̶xyu̶ yajku'udu̶goya'añ mu̶dyiibu̶ je̱'e̱ Dios tu̶ yajkojyu̶ñ, je̱'e̱ mu̶dyiibu̶ yu'kxpu̶ñ, wan je̱'e̱ ijtu̶wu̶p je̱'e̱ mu̶dyiibu̶ ka'p yu'kxyu̶ñ. 28Je̱'e̱ ane̱'e̱mu̶ñ mu̶dyiibu̶ je̱'e̱ Dios xymyooyu̶mu̶ñ ajku̶xy, ka'p je̱'e̱ nimu̶naa kyu̶xy tyu̶goy. Paady je̱'e̱ Dioskujuuyu̶p mu̶baad nye̱jku̶m ajku̶xy ma je̱'e̱ Diosu̶ñ mu̶u̶d adaa gyu̶xpu̶, y tzu̶k je̱'e̱ Dios windzu̶gu̶u̶y o'owu̶dajtu̶m ajku̶xy tu'ug'aa tu'ugjoot y mu̶u̶d je̱'e̱ windzu̶gu̶u̶yu̶ñ mu̶dyiibu̶ kyu'umaaybyu̶ñ. 29Je̱' ko du'un je̱'e̱ nDios ajtu̶m ajku̶xy neby je̱'e̱ ju̶u̶n mu̶dyiibu̶ ku̶xyu̶ yajwindu̶gooybyu̶ñ.

Currently Selected:

Hebreos 12: MIXE

Highlight

Copy

Compare