Hebreos 13

Neby je̱'e̱ Dios mu̶baad nyajku'umaayu̶mu̶ñ ajku̶xy

1Ka'p mja'aydyu̶gooygyu̶xy ko mnaychojk mnayjyu̶wu̶u̶yu̶gu̶xu̶ch amíñ u̶xyu̶py neby tu'kmu̶gu'ugpu̶ju̶ñ. 2Ka'p je̱'e̱ oy'ja'ay'ajtu̶ñ mja'aydyu̶gooygyu̶xy mu̶u̶d je̱'e̱ mu̶dyiibu̶ mju̶u̶njooty mdu̶gooty ja'ttaakku̶xpu̶ñ, du'un je̱'e̱ ja'ay ángelestu̶jk nije̱' yajja'ttaakku̶xy, ni ka'anejwu̶u̶ygyu̶xy pu̶nu̶ ángelestu̶jk najty je̱'e̱ ajku̶xy.

3Pube̱jtku̶x je̱'e̱ mu̶dyiibu̶ tzumy'u̶ñaaygyu̶xpu̶ñ, du'un neby miich du'umbu̶ nu̶wu̶'u̶y kipxy mdzumy'u̶ñaaygyu̶xyu̶ñ mu̶u̶d je̱' ajku̶xy. Pube̱jtku̶x je̱'e̱ mu̶dyiibu̶ je̱'e̱ tzaachpyu̶ ayo'on tu̶ mu̶najx tu̶ ku'ubu̶jkku̶xyu̶ñ, je̱' ko ka'p jékyu̶ch mjajtku̶xu̶ch miich du'un nandu'un ajku̶xy.

4Wan je̱'e̱ ja'ay ku̶xyu̶ windzu̶gu̶u̶y yajmu̶j'ajtku̶xy je̱'e̱ pu̶jku̶ñ y wan oy yajxón naymyu̶dtzu̶naayu̶gu̶xy mu̶u̶d je̱'e̱ wa'adz'ajtu̶ñ ya'aydyu̶jku̶ch tyo'oxyu̶jku̶ch, je̱' ko tyu̶ydyúnu̶py je̱'e̱ Dios mu̶dyiibu̶ du'uñyu̶ naymyu̶dtzu̶naayu̶gu̶xpu̶ñ ma ka'anu̶ pyu̶jkku̶xyu̶ñ y je̱'e̱ mu̶dyiibu̶ je̱'e̱ to'oxyu̶jk tu'ug tu'ug mu̶dtuundu̶gooygyu̶xpu̶ñ.

5Ka'p je̱'e̱ meeñ m'adzojkku̶xy; mu̶jootkujk'ajtku̶x mu̶dyiibu̶ mmu̶dajtku̶xypyu̶ñ, je̱' ko du'un je̱'e̱ Dios tu̶ myu̶na'añ: “Nimu̶naaxu̶u̶ u̶u̶ch miich nga'a'u̶xmádzu̶ch, nga'a'u̶x'íxu̶ch.” 6Y du'unu̶tz mu̶baad du'un jootkujk nmu̶naanu̶nu̶ ajku̶xy:

“Je̱'e̱ Windzú̶n Dios je̱' u̶u̶ch xypyube̱jtp, ka'p u̶u̶ch ndzu̶gu̶'u̶wu̶ch

neby u̶u̶ch je̱'e̱ ja'ay xyjya'atuna'añu̶ñ.”

7Ja'aymye̱jtzku̶x pu̶njaty tu̶ xyñigu'ubajk'ajtku̶xyu̶ñ y pu̶njaty je̱'e̱ Dios y'ayuuk tyu̶y'ajt tu̶ xyajmu̶dmu̶dyaakku̶xyu̶ñ; oktaj okmaaygyu̶x neby je̱'e̱ jyugy'ajtu̶ñ tu̶ kyugu̶x kyumayu̶u̶ygyu̶xyu̶ñ, y pa'ijxku̶x je̱'e̱ y'ijxpe̱jt neby je̱'e̱ mu̶bu̶jku̶ñ najty mu̶dajtku̶xyu̶ñ.

8Je̱'e̱ Jesucristo je̱' je'emy ijtu̶u̶b jékyu̶p, chambaad y wiinu̶u̶xu̶u̶. 9Ka'p miich myajwin'u̶u̶ngu̶xy mu̶u̶d je̱'e̱ tu̶gachpyu̶ y ka'a'oymyu̶bu̶jknu̶ba u̶xpu̶jku̶ñ. Ni'igu̶ oy ko je̱'e̱ njoot nwinma'añ mu̶k'ajt jim paattu̶m ma je̱'e̱ Dios y'oy'ajtu̶ñ ni'igu̶ ka'p ko je̱'e̱ ku'utujku̶ñ nbanú̶kxu̶mu̶ch mu̶dyiibu̶ je̱'e̱ ju̶kxy pu̶ky nigapxpu̶ñ ko ka'p ndzu'tz njú̶kxu̶mu̶ch. Je̱'e̱ du'umbu̶ ku'utujku̶ñ ni tii oy'ajt je̱'e̱ ka'ayékyñu̶ ma je̱'e̱ mu̶dyiibu̶ je̱'e̱ du'umbu̶ ku'utujku̶ñ ja'apaduungu̶xpu̶ñ.

10U̶u̶ch oy je̱'e̱ nwindzu̶gu̶'u̶ñ ni'igyu̶ ajtu̶m ajku̶xy mu̶dyiibu̶ je̱'e̱ Cristo jim cruutzkú̶xp tyuunu̶ñ mu̶u̶d u̶u̶ch kyu̶xpu̶ ajtu̶m ajku̶xy, ni'igu̶ ka'p je̱'e̱ teedy wyindzu̶gu̶'u̶ñ ajku̶xy, mu̶dyiibu̶ ye̱jkku̶x ma je̱'e̱ jékyu̶p po'o'aktu̶jku̶ñ. 11Je̱'e̱ teedy windzú̶n nigu'ubajk'ajtpu̶ yojxku̶xypy najty je̱'e̱ ju̶yujk ne'pty ma je̱'e̱ Amay'ítpu̶ju̶ñ, neby tu'ug yojxu̶ñ mu̶dyiibu̶ yajpokyñi'iwaatzpu̶ñ, peru̶ je̱'e̱ ju̶yujk o'ogy ñi'kx kajptpa'a najty je̱'e̱ no'kku̶xy. 12Y nan kajptpa'a je̱'e̱ Jesús o'ku̶ñ nandu'un mu̶najxy ku'ubu̶jky, neby je̱'e̱ kajpt yajpokyñi'iwa'adzu̶chu̶ñ mu̶u̶d je̱'e̱ kyu̶'u̶mne'pty. 13Tzu̶k je̱'e̱ Jesús panú̶kxu̶m ajku̶xy y tzu̶k je̱'e̱ jeky ane̱'e̱mu̶ñ u̶xmajtzu̶m ajku̶xy mu̶dyiibu̶ ijty jékyu̶p yajpaduumbu̶ñ, y tzu̶k je̱'e̱ ka'anaymyu̶j'íx ka'anaymyu̶jpu̶da'agu̶u̶ mu̶najx ku'ubu̶jku̶m ajku̶xy, du'un neby je̱'e̱ Jesús mu̶najxy ku'ubu̶jkyu̶ñ. 14Ya naaxwiiñ ka'p je̱'e̱ ndzu̶naaydyaakt yaaju̶ch ajtu̶m ajku̶xy je̱'e̱ mu̶dyiibu̶ wiinu̶u̶xu̶u̶ ijtu̶u̶bu̶ñ, je̱' nju̶jp'ijxypy ajtu̶m ajku̶xy je̱'e̱ tzu̶naaydyaakt mu̶dyiibu̶ miimb ku̶daakpu̶ñ. 15Paady tzu̶k je̱'e̱ Dios ku'umaay ja'aymye̱jtzu̶m ajku̶xy jaboom jaboom mu̶u̶d je̱'e̱ Jesucristo kyu̶xpu̶. Je̱'e̱ du'umbu̶ ku'umaay ja'aymye̱jtzu̶ñ, du'un je̱' neby je̱'e̱ windzu̶gu̶'u̶ñ nyojxu̶mu̶ñ ajku̶xy. ¡Tzú̶gu̶tz ku'umaay ja'aymye̱jtzu̶m ajku̶xy mu̶u̶d je̱'e̱ nwiin n'awak ajtu̶m ajku̶xy! 16Ka'p mja'aydyu̶gooygyu̶xu̶ch mduungu̶xu̶ch je̱'e̱ oyjya'ay'ajtu̶ñ y myajwa'kku̶xu̶ch tijaty mmu̶dajtku̶xypyu̶ñ ma je̱'e̱ mu̶dyiibu̶ ka'p tii mu̶dajtku̶xyu̶ñ; je̱' ko du'un adaa du'umbu̶ neby je̱'e̱ windzu̶gu̶'u̶ñ mu̶dyiibu̶ je̱'e̱ Dios kyu'umaaybyu̶ñ.

17Kapxymyu̶doogu̶x je̱'e̱ mu̶dyiibu̶ xyñigu'ubajk'ajtku̶xpu̶ñ y yajmu̶gápx yaj'ane̱'e̱mgu̶x nebyjyaty xyñu̶maaygyu̶xyu̶ñ, je̱' ko je̱' xykyweentu̶'ajtku̶xp ka'pu̶ mjoottu̶gooy mwinma'añdyu̶gooygyu̶xu̶ch, y ñejwu̶u̶ygyu̶xypy ko je̱'e̱ kyweentu̶ ku̶'u̶ye̱jkku̶xu̶ch ma je̱'e̱ Diosu̶ñ neby tu̶ xykyweentu̶'ajtku̶xyu̶ñ. Jatytimytyuunu̶ je̱'e̱ tyuung oy yajxón ajku̶xy y ka'p jyu̶bu̶k y'axu̶u̶gu̶ch, y pu̶nu̶ ka'p je̱'e̱ tyuung oy yajxón nduunu̶ ajku̶xy ni miich je̱'e̱ jootkujk'ajtu̶ñ du'un mga'amu̶dajtku̶xu̶ch.

18Mu̶bu̶jktzoogu̶x je̱'e̱ Dios mu̶u̶d u̶u̶ch kyu̶xpu̶ ajku̶xy, u̶u̶ch nnejwu̶u̶ygyu̶xypyu̶ch tu̶y tu'uda'agy ko u̶u̶ch je̱'e̱ njoot nwinma'añ tyu'uda'agyu̶ch ajku̶xy, jatytimy ñay'amu̶jaduunu̶bu̶ch ajku̶xy nduungu̶xyu̶ch ku̶xyu̶ oy yajxón. 19Nyujkwe̱e̱mbyu̶ch may'ajt ma miich ajku̶xyu̶ñ ko mmu̶bu̶jktzoogu̶xu̶ch je̱'e̱ Dios mu̶u̶d u̶u̶ch kyu̶xpu̶ wan je̱'e̱ Dios yajmu̶baad'ádu̶ch nnú̶kxu̶chu̶ch tzojku̶ ma miich ajku̶xyu̶ñ.

Kunukxu̶ñ y yajpókxu̶ñ mu̶dyiibu̶ ku̶jxp maayñu̶byu̶ñ

20Wan je̱'e̱ Dios mu̶dyiibu̶ je̱'e̱ jotkujk'ajtu̶ñ ye̱jkpu̶ñ, je̱'e̱ mu̶dyiibu̶ je̱'e̱ Windzú̶n Jesús yajjuugypyu̶jku̶ñ ko najty tu̶ y'o'ogy, je̱'e̱ mu̶dyiibu̶ je̱'e̱ mu̶bu̶jkpu̶du̶jk kweentu̶'ajtpu̶ñ du'un neby je̱'e̱ maj borreegu̶ kweentu̶'ajtpu̶ju̶ñ, je̱'e̱ mu̶dyiibu̶ mu̶u̶d je̱'e̱ ñe'pty mu̶dyiibu̶ te̱e̱m yojk kyapxytyuunu̶ñ wiinu̶u̶xu̶u̶bu̶ ni'igapxpe̱jtu̶ñ. 21Wan oy wa'adz xyaj'awimbijtku̶xy y oyjya'ay ma ku̶xyu̶ tii mdimytyuungu̶xypyu̶ñ, wan je̱'e̱ chojku̶ñ du'un mguydyuunu̶ch ajku̶xy, y wan tuñ ma u̶u̶ch ajtu̶m ajku̶xyu̶ñ neby je̱' tzokyu̶ñ mu̶u̶d je̱'e̱ Jesucristo kyu̶xpu̶. ¡Wan je̱'e̱ Cristo ku'umaay wiinu̶u̶xu̶u̶ ity! Jaanch adaa du'un.

22“Mu̶gu'uktu̶jk, cham nmu̶nukxtaakku̶xy ku'ubu̶jkku̶x mu̶u̶d me̱kxtujku̶ñ adaa we̱e̱nu̶ba kapxwiju̶ñ ayuuk mu̶dyiibu̶ tu̶ nyajnijayu̶u̶ygyu̶xyu̶ñ. 23Nejwu̶u̶ygyu̶x miich ko tu̶ je̱'e̱ nmu̶gu'ug Timoteo pyujxtu̶jkpu̶dzu̶u̶mnu̶; pu̶nu̶ miimb naty ya tzojku̶, nmu̶dnú̶kxu̶byu̶ch ma miich ajku̶xyu̶ñ ko naty nu̶kxy ngu'ijxku̶xy.

24Yajpókxku̶x ku̶xyu̶ mu̶dyiibu̶ xyñigu'ubajk'ajtku̶xpu̶ñ y ku̶xyu̶ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ. Cham je̱'e̱ yajpókxu̶ñ xyajnigue̱jxku̶xy je̱'e̱ mu̶dyiibu̶ Italia tzóngu̶xpu̶ñ.

25Wan je̱'e̱ Dios oy'ajt may'ajt tuñ ma miich nigu̶xyu̶ ajku̶xyu̶ñ.

Currently Selected:

Hebreos 13: MIXE

Highlight

Copy

Compare