Hebreos 11

Je̱'e̱ mu̶bu̶jku̶ñ

1Nmu̶dajtu̶mu̶ch je̱'e̱ mu̶bu̶jku̶ñ, je̱' je̱' ko je̱'e̱ tu̶y'ajt nmu̶dajtu̶mu̶ch ko nbadaanu̶m je̱'e̱ mu̶dyiibu̶ nju̶jp'ijxu̶mbyu̶ñ, y nmu̶naanu̶mu̶ch tu'ug'aa tu'ugjoot ko nbadaanu̶m je̱'e̱ mu̶dyiibu̶ ka'p nidu'uñdyu̶ n'ijxu̶mnu̶ju̶ñ. 2Je̱'e̱ nmu̶j'áp nmu̶jteedy ajtu̶m ajku̶xy ku'umaayu̶gu̶x je̱'e̱ Dios, je̱' ko je̱'e̱ mu̶bu̶jku̶ñ mu̶dajtku̶xy.

3Ko je̱'e̱ Dios nmu̶bu̶jku̶m ajku̶xy, paady nnejwu̶u̶yu̶m ajku̶xy ko je̱'e̱ naaxwiimbu̶ ku̶xyu̶ yajkojy y'ayuukku̶xp, y du'unu̶tz je̱'e̱ mu̶dyiibu̶ cham yaj'ijxpu̶ñ, je̱' je̱' je̱'e̱ mu̶dyiibu̶ ijty ka'p yaj'íxyu̶ñ.

4Ko je̱'e̱ Abel Dios mu̶bu̶jky paady je̱'e̱ windzu̶gu̶'u̶ñ yejky ma je̱'e̱ Diosu̶ñ, je̱'e̱ jak'oybyu̶ ni'igu̶ ka'p je̱'e̱ Caín jye̱'e̱ju̶ñu̶ba, y paady je̱'e̱ Dios kyu'ubu̶jku̶ neby je̱'e̱ wa'adzja'ayu̶ñ y kyu'ubu̶jkku̶xu̶ je̱'e̱ yojxu̶ñ. Y du'unu̶tz oy je̱'e̱ Abel tu̶ jya'a'o'knu̶ xyajmu̶dmu̶dyaaku̶mnu̶ neby je̱'e̱ mu̶bu̶jku̶ñ mu̶dajtyu̶ñ.

5Ko je̱'e̱ Enoc Dios mu̶bu̶jky paady je̱'e̱ Dios juugy tzajpjooty yajnú̶kxu̶ ka'pu̶ y'o'ogu̶ch, y ka'p okpaatku̶xnu̶ je̱' ko je̱'e̱ Dios najty tu̶ yajnu̶kxyii. Y du'un je̱'e̱ Dios ñaky myu̶na'añ ma najty ka'p yajnu̶kxyiiñu̶ju̶ñ, ko tu̶ najty je̱'e̱ Enoc Dios kyu'umayii. 6Janch tzip xykyu'umaayu̶mu̶ch je̱'e̱ Dios pu̶nu̶ ka'p je̱'e̱ mu̶bu̶jku̶ñ naty nmu̶dajtu̶m, je̱' ko pu̶n je̱'e̱ Dios mu̶wingonaambu̶ñ ñi'igu̶ mu̶bu̶gu̶py je̱' ko je̱'e̱ Dios jyiiju̶ch y ko je̱'e̱ Dios oybyu̶ mo'owa'añ pu̶n mu̶bu̶jku̶bu̶ñ.

7Ko je̱'e̱ Noé Dios mu̶bu̶jky paady je̱'e̱ Dios kapxymyu̶dooy ko ñu̶maayu̶ ko je̱'e̱ mu̶jnu̶u̶góm najty myina'añ je̱'e̱ mu̶dyiibu̶ najty ka'p yaj'íxyñu̶ y yaj'oyu̶u̶y je̱'e̱ barcu̶ ma je̱' y je̱'e̱ y'ung y'ana'k ñu̶u̶gomdzookku̶xu̶chu̶ñ. Y mu̶u̶d je̱'e̱ mu̶bu̶jku̶ñ mu̶dyiibu̶ najty myu̶u̶d je̱' je̱'e̱ naaxwiiñjya'ay mu̶u̶d yajpokykya'ay mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ y paaty je̱'e̱ nidzooku̶ñ mu̶dyiibu̶ yajpaatp ko je̱'e̱ Dios y'ayuuk yajmu̶bú̶ky.

8Ko je̱'e̱ Abraham Dios mu̶bu̶jky paady je̱'e̱ Dios wyin'ijxu̶ y kapxymyu̶dooy, chi choñ ñu̶kxy ma je̱'e̱ it lugaar mu̶dyiibu̶ je̱'e̱ Dios najty mo'owaanu̶bu̶ñ ko je̱'e̱'ádu̶ch. Y chi choñ ma je̱' ñaax kyajptu̶ñ ni ka'anejwu̶'u̶y ma najty du'un ñu̶kxyu̶ñ, 9mu̶u̶d je̱'e̱ mu̶bu̶jku̶ñ mu̶dyiibu̶ najty myu̶u̶du̶ñ, tzu̶naaydyaakpu̶jk jim neby jaybyokxyu̶ñ ma je̱'e̱ naax mu̶dyiibu̶ je̱'e̱ Dios najty tu̶ yajwinwaanu̶'u̶yiiju̶ñ. Po'o'aktu̶jk jim yajtzu̶na'awu̶u̶y, nan po'o'aktu̶jk je̱'e̱ Isaac y Jacob jim yajtzu̶na'awu̶u̶ygyu̶x ma je̱'e̱ Dios naax najty nandu'un tu̶ yajwinwanu̶u̶yu̶gu̶xy. 10Je̱' ko jyu̶jp'ijxypy je̱'e̱ Abraham kajpt najty je̱'e̱ mu̶dyiibu̶ ta'tzpú̶ky kojyu̶ñ, je̱'e̱ tzajpjootypyu̶ kajpt mu̶dyiibu̶ je̱'e̱ Dios ñiwindzu̶n'ajtypyu̶ñ y kyoju̶ñ.

11Nan ko je̱'e̱ Sara Dios nandu'un mu̶bu̶jky, oy najty mu̶baad kya'a'ungpaady, peru̶ pyaat je̱'e̱ mu̶k'ajt neby mu̶baad y'ungpaadyu̶ñ, je̱' ko mu̶bu̶jky ko je̱'e̱ Dios kuydyúnu̶ch neby najty tu̶ yajwinwaanu̶'u̶yiiju̶ñ. 12Y du'unu̶tz je̱'e̱ Abraham oy najty je̱'e̱ xyu̶u̶ tiempo tu̶ jya'awingoonu̶ mu̶naa y'o'ogaanu̶ju̶ñ, peru̶ pyaat je̱'e̱ y'ung y'ana'k y y'ok'ung y'ok'ana'k janchmay du'un neby maymyu̶dza'a y neby pu'u mejypya'aju̶ñ, ka'p ñimu̶cho'on.

13Ku̶xyu̶ adayaaba ja'ay mu̶dyiibu̶ yam yajnimu̶dyaakpu̶ñ o'ktaaygyu̶x je̱', y ka'p ku̶xyu̶ paattaaygyu̶xy mu̶dyiibu̶ je̱'e̱ Dios najty tu̶ yajwinwanu̶u̶yu̶gu̶xyu̶ñ. Peru̶ je̱' ko myu̶dajtku̶xypy najty je̱'e̱ mu̶bu̶jku̶ñ ñejwu̶u̶ygyu̶x ko je̱'e̱ Dios najty jiinu̶ myo'owaanu̶gu̶xy, y jootkujk najty ajku̶xy myu̶naangu̶xy ku̶'u̶m ko ya jyaybyokxy'ajtku̶xy ma adayaaba naaxwiiñ najty tzojku̶ ñajxku̶xyu̶ñ. 14Y pu̶n du'un mu̶naangu̶xpu̶ñ ko ya tzojku̶ jaybyokxy'ajtpu̶ ñáxku̶xy ma adayaaba naaxwiiñu̶ñ, oy wa'adz du'un yajwinju̶wu̶'u̶y wyu̶dijtku̶xyñu̶ u̶xtaaygyu̶xy je̱'e̱ tzu̶naaydyaakt. 15Ko u̶xyu̶py je̱'e̱ ñaax kyajpt okja'aymye̱jtzku̶xy ma najty tu̶ chóngu̶xyu̶ñ, wimbijt u̶xyu̶py ja'adu'ook ajku̶xy; 16peru̶ je̱' ajku̶xy jak'oybyu̶ kajpt najty je̱'e̱ chojkku̶xypy, je̱'e̱ tzajpjootypyu̶ kajpt. Paady je̱'e̱ Dios ka'p cho'oydyúñ ko ñaydyijyii, Dios ma je̱' ajku̶xyu̶ñ, je̱' ko ni'ixu̶'u̶ je̱'e̱ kyajpt jiiby tu'ug tzajpjooty mu̶dajtu̶yu̶ ajku̶xy.

17Ko je̱'e̱ Abraham Dios mu̶bu̶jky paady je̱'e̱ Dios wyinma'añ'ijxu̶, chi je̱'e̱ y'ung Isaac nixaju̶u̶y ko yoxa'añ neby je̱'e̱ windzu̶gu̶'u̶ñdyu̶ñ. Tu'ug'aa tu'ugjoot najty du'un myu̶na'añ ko je̱'e̱ tu'kpajkpu̶ y'ung yoxa'añ, oy najty je̱'e̱ jya'aje̱'e̱ju̶ch je̱'e̱ mu̶dyiibu̶ je̱'e̱ Dios najty tu̶ y'ok'yajwinwanu̶u̶yu̶bu̶ju̶ñ: 18“Isaac kyu̶xpu̶ miich je̱'e̱ m'ok'ung m'ok'ana'k may mbaadu̶ch.” 19Je̱'e̱ Abraham ñejwu̶u̶by najty je̱' ko je̱'e̱ Dios mu̶k'ajt mu̶u̶du̶ch neby je̱'e̱ o'ogyjya'aydyu̶jk yajjuugypyú̶ku̶chu̶ñ. Y chi je̱'e̱ Abraham Dios ñu̶maayu̶ñu̶ba ko je̱'e̱ y'ung Isaac ka'ani'iyaj'o'ogu̶ch, y du'un du'un paady neby je̱'e̱ Abraham y'ung ja'adu'ook jyuugypyu̶jkyu̶ñ ma najty tu̶ y'o'ogyu̶ñ.

20Ko je̱'e̱ Isaac Dios mu̶bu̶jky paady je̱'e̱ Jacob y je̱'e̱ Esaú kunukxu̶ñ yajwinwaanu̶u̶y, mo'owa'añ ma je̱'e̱ xu̶u̶ tiempo myiñ kyu̶da'agyu̶ñ.

21Ko je̱'e̱ Jacob Dios mu̶bu̶jky paady ko najty y'o'ogaanu̶, chi je̱'e̱ José y'ung y'ana'k kunukxu̶ñ nidu'ug nidu'ug yajwinwanu̶u̶yu̶, chi je̱'e̱ Dios o'owu̶dajty cham je̱'e̱ tyajt ñayyajkudijyii.

22Ko je̱'e̱ José Dios mu̶bu̶jky paady ko najty y'o'ogaanu̶, chi myu̶naañ ko je̱'e̱ Israel ja'ay kujeky pyu̶dzu̶u̶mgu̶xu̶ch Egipto naaxjooty, y yejky je̱'e̱ ane̱'e̱mu̶ñ ko je̱'e̱ wyaay pyajk jim Egipto naaxjooty yajpu̶dzu̶u̶mu̶xu̶ch.

23Ko je̱'e̱ Moisés tyaj tyeedy Dios mu̶bu̶jkku̶xy paady ko je̱'e̱ Moisés mya'axung'ajty, chi je̱'e̱ tyaj tyeedy tu̶gu̶u̶g po'o yu'uch yaj'ijtu̶; je̱' ko oy mu̶k ijxku̶xy y ka'p je̱'e̱ mu̶j'ane̱'e̱mbu̶ y'ane̱'e̱mu̶ñ tzu̶gu̶u̶ygyu̶xy ko je̱'e̱ ma'axungtu̶jk ya'ay'ana'kpu̶ najty ku̶xyu̶ yaj'o'kta'awa'añ.

24Ko je̱'e̱ Moisés Dios mu̶bu̶jky paady ko oy myu̶j'ana'kju̶u̶yñu̶, ka'p ñaydyujku̶ ko je̱'e̱ mu̶j'ane̱'e̱mbu̶ tyo'oxy'úng y'ung'adu̶u̶ju̶ch. 25Naydyujku̶ ko je̱'e̱ tzaachpyu̶ mu̶nax ku'ubú̶ku̶ch kipxy mu̶u̶d je̱'e̱ Dios jya'ay, ni'igu̶ ka'p ko ya naaxwiiñ tzojku̶ xyonda'agu̶ch, ma je̱'e̱ xondaaku̶ñ tzojku̶ kyu̶xy tyu̶goyu̶ñ. 26Ni'igu̶ oy ni'igyu̶ tijy ko je̱'e̱ tzaachpyu̶ mu̶nax ku'ubú̶ku̶ch Cristo kyu̶xpu̶ je̱'e̱ Dios wyin'ixypyu̶, ni'igu̶ ka'p ko je̱'e̱ wit meeñ mu̶dádu̶ch mu̶dyiibu̶ jim Egipto yajpaatpu̶ñ; je̱' ko jyu̶jp'ijxypy najty je̱'e̱ oy'ajtu̶ñ, je̱'e̱ mu̶dyiibu̶ je̱'e̱ Dios najty mo'owaanu̶bu̶ñ.

27Ko je̱'e̱ Moisés Dios mu̶bu̶jky paady jim Egipto naaxjooty choñ, y ka'p je̱'e̱ mu̶j'ane̱'e̱mbu̶ tzu̶gu̶u̶y ko najty jyootma'ady. Ka'p tzu̶gu̶u̶ychooy ko jim chona'añ, du'un najty ñayjyu̶wu̶'u̶yii neby je̱'e̱ Dios du'umbu̶ ixyu̶ñ je̱'e̱ Dios ka'pu̶ yaj'íxy. 28Ko je̱'e̱ Moisés Dios mu̶bu̶jky paady je̱'e̱ Pascua xu̶u̶ tuuñ y yejky je̱'e̱ ane̱'e̱mu̶ñ ko je̱'e̱ tu̶jk'agu̶'u̶ wan tu'ug tu'ug yajne'ptyu̶u̶ygyu̶xy, ka'pu̶ je̱'e̱ ángel ja'ayyaj'o'kpu̶ je̱'e̱ Israel ja'ay kyob'ung ni tu'ug yaj'o'ku̶yu̶ch.

29Ko je̱'e̱ Israel ja'ay Dios mu̶bu̶jkku̶xy paady je̱'e̱ Tzaptz Mejy yajnajxku̶xy, du'un neby tu̶'u̶tznaaxtuumbu̶ nu̶wu̶'u̶y ñajxku̶xyu̶ñ; y ko je̱'e̱ egipto ja'ay du'un nandu'un jya'a''adu̶'u̶dzaangu̶xpu̶, chi ku̶jx ñu̶u̶'o'ktaaygyu̶xy.

30Ko je̱'e̱ Israel ja'ay Dios mu̶bu̶jkku̶xy paady je̱'e̱ poch jyijty mu̶dyiibu̶ je̱'e̱ Jericó kajpt najty mu̶u̶d jyu'ubojtz'awu̶dítyu̶chu̶ñ, ko juxtujk'ook ju'uyo'oywyu̶dijtku̶xy. 31Ko je̱'e̱ Rahab Dios mu̶bu̶jky, je̱'e̱ to'oxyu̶jk mu̶dyiibu̶ je̱'e̱ ya'aydyu̶jk najty tu'ug tu'ug mu̶dtuundu̶gooybyu̶ñ, paady je̱'e̱ ka'p kipxy y'o'ky mu̶u̶d je̱'e̱ mu̶dyiibu̶ Dios najty ka'p kapxymyu̶doogu̶xyu̶ñ, je̱' ko je̱'e̱ Israel ja'ay najty tu̶ yajja'tta'agy, je̱'e̱ mu̶dyiibu̶ najty ayu'uch amechu̶ ixu̶u̶ybyu̶ tu̶ yajke̱jxku̶xyu̶ñ.

32¿Ti u̶u̶ch njaknimu̶dyaak'adu̶'u̶dzu̶py? Ka'p je̱'e̱ tiempo myu̶baad'ádu̶ch nnimu̶dya'agu̶chu̶ch je̱'e̱ Gedeón, je̱'e̱ Barac, je̱'e̱ Sansón, je̱'e̱ Jefté, je̱'e̱ David, je̱'e̱ Samuel y je̱'e̱ Dios y'ayuuknajtzkapxu̶u̶ybyu̶du̶jk. 33Ko je̱'e̱ Dios mu̶bu̶jkku̶xy paady je̱'e̱ myu̶dzip ka'anaag kajpt mu̶madaakku̶xy, y'ane̱'e̱mgu̶x je̱'e̱ naax kajpt oy yajxón neby tyu̶y'ajtu̶chu̶ñ, pyaatku̶x je̱'e̱ pube̱jtu̶ñ je̱'e̱ mu̶dyiibu̶ je̱'e̱ Dios najty tu̶ yajwinwaanu̶u̶yu̶gu̶xyu̶ñ, y'amo'kxku̶x je̱'e̱ león ka'pu̶ nej tyuunu̶gu̶xu̶ch, 34yajpi'tzku̶x je̱'e̱ mu̶jju̶u̶n hoornu̶jooty, ni'idzookku̶x ko najty yaj'o'ogaanu̶gu̶xy puxy mu̶u̶d je̱'e̱ espaadu̶, pyaatku̶x je̱'e̱ myu̶k myu̶jaa je̱'e̱ mu̶dyiibu̶ najty yuu pu̶ma'ayu̶ñ ajku̶xy y pyaatku̶x je̱'e̱ mu̶k'ajt ma najty chiptuungu̶xyu̶ñ, y mu̶madaakku̶xy je̱'e̱ myu̶dziptu̶jk. 35Jim najty to'oxyu̶jktu̶jk nije̱' mu̶dyiibu̶ jyuugy myu̶gu'ug ja'adu'ook juugypyu̶jkku̶xu̶ñ.

Nije̱' je̱'e̱ tzaach o'ku̶ñ paatku̶xy ijxku̶xy, ka'p ku'ubu̶jkku̶xy yajnajtzmadzu̶u̶ygyu̶xu̶ch je̱' ko je̱'e̱ myu̶bu̶jku̶ñ najty ka'anajtz'ixu̶'u̶waangu̶xy, je̱' najty je̱'e̱ jyu̶jp'ijxku̶xypy jyuugypyu̶jktu̶gatzaangu̶xy neby je̱'e̱ jak'oybyu̶ jugy'ajtu̶ñ mu̶baad paatku̶xyu̶ñ. 36Nije̱' ñixiik yajxiiku̶gu̶xy y wyojp kya'tzu̶gu̶xy, y yajtzuumgu̶xy yajkuwu̶u̶ngu̶xy cadeenu̶ mu̶u̶d. 37Y nije̱' yajtzaagu'uga'tzku̶xy, nije̱' yaj'aju̶u̶du̶u̶ygyu̶xy kupt, nije̱' jyoot'ijx wyinma'añ'ijxu̶gu̶xy, nije̱' puxy y'o'kku̶xy mu̶u̶d espaadu̶; wyu̶dijtku̶xy najty wimbe̱t ku'umu̶nák y yajtuungu̶xy je̱'e̱ borreegu̶ ak y chiivu̶ ak; du'un je̱'e̱ ayowu̶u̶ mu̶najx ku'ubu̶jkku̶xy, jootmáy mu̶u̶d y yajtzaachtyuungu̶xy. 38Adayaaba ja'ay ajku̶xy ka'p najty je̱'e̱ pyaattu̶gu̶xy chu̶naaygyu̶xu̶ch ya naaxwiiñ, wu̶dijtku̶x wimbe̱t ku'umu̶nák adu'ugtuum, y tunjooty koptjooty, tzaa aangjooty y naax'akpa't.

39Peru̶ ka'p ni tu'ug ni tii paatku̶xy mu̶dyiibu̶ je̱'e̱ Dios najty tu̶ jya'ayajwinwanu̶u̶yu̶gu̶xyu̶ñ, oy jya'aku'umaybyu̶dzu̶u̶mgu̶xy ma je̱'e̱ Diosu̶ñ neby je̱'e̱ mu̶bu̶jku̶ñ najty mu̶dajtku̶xyu̶ñ. 40Je̱' ko je̱'e̱ Dios oybyu̶ najty u̶u̶ch ni'igyu̶ xyajmu̶dzojku̶m ajku̶xy, paady je̱'e̱ kya'atzojk mooyu̶ ajku̶xy je̱'e̱ mu̶dyiibu̶ yajwinwaanu̶u̶yu̶gu̶xu̶ñ, wan du'un y'oybyu̶dzu̶u̶m wya'atzpu̶dzu̶u̶mgu̶xu̶ch niguipxy mu̶u̶d u̶u̶ch ajtu̶m ajku̶xy.

Currently Selected:

Hebreos 11: MIXE

Highlight

Copy

Compare