Gálatas 5

Tzu̶k mu̶ktu̶naayu̶m ajku̶xy ma tu̶ n'awa'adzpu̶dzu̶u̶mu̶mu̶ñ ajku̶xy

1Tu̶ je̱'e̱ Cristo xyaj'awa'adzpu̶dzu̶u̶mu̶m ajku̶xy ma je̱'e̱ Moisés y'ane̱'e̱mu̶ñ ijty xy'ane̱'e̱mu̶mu̶ñ ajku̶xy, neby mu̶baad n'awa'adzpu̶dzu̶u̶mu̶nu̶ ajtu̶m ajku̶xy. Paady mu̶ktu̶naaygyu̶x miich ma tu̶ m'awa'adzpu̶dzu̶u̶mgu̶xyu̶ñ y ka'p ja'adu'ook mwimbijtku̶xy xy'ane̱'e̱mgu̶xu̶ch je̱'e̱ Moisés y'ane̱'e̱mu̶ñ, du'un neby je̱'e̱ tuumbu̶ ni'idoogypyu̶ ane'emy y'ityu̶ñ.

2Ok'amdo'ijtku̶ch ajku̶xy. U̶u̶ch Pablo, nnu̶maaygyu̶xypy miich pu̶nu̶ myajkoptu̶gu̶u̶ygyu̶xypy je̱'e̱ tu̶y'ajtu̶'u̶yiibyu̶, je̱'e̱ Cristo naty du'un mga'amu̶j'ijx mga'amu̶jpu̶daakku̶xypy. 3Cham nnu̶maaydyu̶gajtzku̶xy ja'adu'ook wan pu̶nja'ayu̶ch pu̶n yajtu̶y'ajtu̶u̶ybyu̶ñ, mu̶dzibu̶'u̶ je̱'e̱ ku̶xyu̶ kuydyuunda'awu̶ch neby je̱'e̱ Moisés y'ane̱'e̱mu̶ñ y'ane'emyu̶ñ. 4Miich ajku̶xy, je̱'e̱ mu̶dyiibu̶ mu̶naangu̶xpu̶ñ ko mbokyñi'iwa'adzaangu̶xy je̱' ko je̱'e̱ Moisés y'ane̱'e̱mu̶ñ mguydyuunu̶ ajku̶xy, tu̶ je̱'e̱ Cristo y'ayuuk tyu̶y'ajt du'un mnajtz'ixu̶u̶yu̶ ajku̶xy y tu̶ m'u̶xmajtzku̶xy je̱'e̱ Dios y'oy'ajt myay'ajtu̶ñ. 5Peru̶ u̶u̶ch ajtu̶m ajku̶xy nju̶jp'ijxu̶mby nbokyñi'iwaatzu̶mu̶ch ajku̶xy, ko je̱'e̱ Dios y'Espíritu xypyube̱jt xypyudu̶gu̶u̶yu̶mu̶ch ajku̶xy y ko je̱'e̱ Cristo nmu̶bu̶jku̶mu̶ch ajku̶xy. 6Pu̶nu̶ tu'ugyu̶ nyajpaatu̶m ajku̶xy mu̶u̶d je̱'e̱ Cristo Jesús, ka'p je̱'e̱ maa y'oktzobaadnu̶ pu̶nu̶ tu̶y'ajtu̶'u̶y o pu̶nu̶ ka'p ndu̶y'ajtu̶'u̶yu̶ch ajtu̶m ajku̶xy. Je̱'e̱ mu̶dyiiju̶tz tu̶y tzobaatpu̶ñ je̱' je̱' ko je̱'e̱ Jesucristo nmu̶bu̶jku̶mu̶ch ajku̶xy, y ko nmu̶bu̶jku̶mu̶ch je̱' xyajtzu̶naay xyajjugy'ajtu̶mu̶p ajku̶xy nnaychojk nnayjyu̶wu̶u̶yu̶mu̶ch ajku̶xy.

7Miich ajku̶xy oy yajxón najty je̱'e̱ ayuuk tu̶y'ajt myajtu'uyo'oygyu̶xy. ¿Pu̶n tu̶ xywyin'u̶u̶ngu̶xy ko je̱'e̱ tu̶y'ajt ka'p mguydyuungu̶xu̶ch? 8Ka'p je̱'e̱ Diósu̶ch je̱'e̱ mu̶dyiibu̶ tu̶ xywyin'ijxku̶xyu̶ñ. 9Du'un je̱'e̱ ja'ay myu̶na'añ: “Ko je̱'e̱ levaduru̶ we̱e̱nu̶ yajpu̶da'agy ma je̱'e̱ hariina ju̶chu̶ñ, yajxuundaaby yajtu̶gu̶u̶ydyaaby je̱'e̱ ju̶ch ku̶xyu̶.” Du'un neby je̱'e̱ tu'ugpu̶ ja'ay je̱'e̱ myu̶gu'ug ku̶xyu̶ yajwinma'añdyu̶gooydya'ayu̶ñ. 10Y u̶u̶ch nju̶jp'ijxypyu̶ch ma je̱'e̱ Windzú̶n Jesucristo ko ja'adu'ook mwimbijtku̶xu̶ch ma je̱'e̱ mu̶dyiibu̶ jayu̶jp tu̶ nyaj'u̶xpu̶jkku̶xyu̶ñ y ko ka'p adaa wiing mwinju̶wu̶u̶ygyu̶xu̶ch; peru̶ chaachtyúnu̶py je̱'e̱ Dios je̱'e̱ ja'ay je̱'e̱ mu̶dyiibu̶ miich xyajwinma'añdyu̶gooygyu̶xpu̶ñ, oy u̶xyu̶py jya'adimypyu̶n'ajtpu̶.

11Ko u̶u̶ch miich mu̶gu'uktu̶jk, je̱'e̱ mu̶bu̶jkpu̶du̶jk u̶xyu̶py nyajmu̶guwaanu̶u̶ygyu̶xy ko ñaydyu̶y'ajtu̶u̶yu̶gu̶xu̶ch, ka'p u̶u̶ch u̶xyu̶py je̱'e̱ judío ja'ay xy'u̶xwu̶dijt xypyawu̶dijtku̶xy, je̱' paady u̶u̶ch je̱'e̱ xy'u̶xwu̶dijt xypyawu̶dijtku̶xy ko u̶u̶ch je̱'e̱ ayuuk tu̶y'ajt ngapxwa'kxy ko je̱'e̱ Cristo cruutzkú̶xp xykyu'u'o'ogu̶u̶y ajtu̶m ajku̶xy y je̱'e̱ju̶tz je̱'e̱ du'un chaachpyu̶daakku̶xypy. 12Peru̶ je̱'e̱ ja'ay mu̶dyiibu̶ miich xyajwinma'añdyu̶gooygyu̶xpu̶ñ, ¡naxy it y'óyu̶ch ko ku̶'u̶m ñaychujku̶gu̶xu̶ch amaaydyuuby y wan xy'u̶xmajtzku̶xnu̶ch!

13Miich mu̶gu'uktu̶jk, Dios miich tu̶ xywyin'ijxku̶xy neby mu̶baad m'awa'adzpu̶dzu̶u̶mgu̶xy ma je̱'e̱ Moisés y'ane̱'e̱mu̶ñ, ka'pu̶ je̱'e̱ xy'ok'ane̱'e̱mgu̶xnu̶ch. Peru̶ ka'p je̱'e̱ Dios paady tu̶ xyaj'awa'adzpu̶dzu̶u̶mgu̶xy wan oy nejpy mja'ay'ajtku̶xu̶ch mduungu̶xu̶ch je̱'e̱ ju̶bu̶kpu̶ axu̶u̶gpu̶. Paady je̱'e̱ xyaj'awa'adzpu̶dzu̶u̶mgu̶xy wan amíñ u̶xyu̶py mnaychogu̶u̶ mnayjyu̶wu̶'u̶wu̶u̶ju̶ch y mnaybyube̱t mnaybyudu̶gu̶'u̶wu̶u̶ju̶ch ajku̶xy. 14Ko adayaaba tu'ugpu̶ Dios y'ane̱'e̱mu̶ñ nguydyuunu̶mu̶ch ajku̶xy, ku̶xyu̶ naty je̱'e̱ Dios y'ane̱'e̱mu̶ñ du'un nguydyuundaayu̶ ajtu̶m ajku̶xy, je̱'e̱ mu̶dyiibu̶ du'un mu̶naambu̶ñ: “Tzok ju̶wu̶'u̶ je̱'e̱ mmu̶gu'ugtu̶jk du'un neby miich ku̶'u̶m mnaychogyii mnayjyu̶wu̶'u̶yiiju̶ñ.” 15Naygyweentu̶'ajtu̶gu̶x, pu̶nu̶ mnaymyu̶dzibu̶u̶yu̶gu̶xp y pu̶nu̶ mnaygyojx mnaychíku̶gu̶xp amíñ u̶xyu̶py, mnayyajku'udu̶gooyu̶gu̶xu̶p agu̶ miich ajku̶xy.

Je̱'e̱ naaxwiiñjya'ay adzojku̶ñ y je̱'e̱ jugy'ajtu̶ñ je̱'e̱ mu̶dyiibu̶ je̱'e̱ Espíritu yejkypyu̶ñ

16Paady du'un nnu̶maaygyu̶xy: Tzu̶naaygyu̶x jugy'ajtku̶x du'un neby je̱'e̱ Espíritu tzokyu̶ñ mdzu̶naaygyu̶x mjugy'ajtku̶xu̶chu̶ñ, y ka'p mguydyuungu̶xy je̱'e̱ mgu̶'u̶mni'kx jyu̶bu̶k'adzojku̶ñ ajku̶xy. 17Je̱' ko je̱'e̱ ju̶bu̶k'adzojku̶ñ ka'p je̱'e̱ Espíritu mu̶dnay'ixa'añyii, y je̱'e̱ Espíritu ka'p je̱'e̱ ju̶bu̶k'adzojku̶ñ mu̶dnay'ixa'añyii. Je̱'e̱ ju̶bu̶k'adzojku̶ñ y je̱'e̱ Espíritu ka'p je̱'e̱ amíñ u̶xu̶py ñay'ixaanu̶gu̶xy, y paady miich je̱'e̱ oybyu̶ ka'p mu̶baad mduungu̶xy je̱'e̱ mu̶dyiibu̶ naty mja'atzojkku̶xypyu̶ñ mdunaangu̶xy, je̱' ko je̱'e̱ ju̶bu̶k'adzojku̶ñ xy'adujkku̶xp mduungu̶xu̶ch je̱'e̱ oybyu̶. 18Peru̶ pu̶nu̶ je̱'e̱ Espíritu miich xyñu̶u̶mooby xytyu'umooygyu̶xp, ka'p je̱'e̱ Moisés y'ane̱'e̱mu̶ñ mu̶baad xy'ane̱'e̱mgu̶xnu̶.

19Ni'igu̶xu̶'kku̶xp je̱' je̱'e̱ mu̶dyiibu̶ je̱'e̱ ju̶bu̶k'adzojku̶ñ tuungu̶xpu̶ñ: myu̶dtuundu̶gooygyu̶xypy je̱'e̱ to'oxyu̶jk tu'ug tu'ug,#5.19 Nije̱' jaaybyu̶du̶jk myu̶naangu̶xy: ja'ayyaj'o'kp je̱'e̱ ajku̶xy. tyuungu̶xypy je̱'e̱ ju̶bu̶kpu̶ axu̶u̶gpu̶ y ku̶xyu̶ adzojku̶ñ, 20wyindzu̶gu̶u̶ygyu̶xypy je̱'e̱ tzaadzéch kepychech, kuxu̶u̶'ajtp kudzuu'ajtp ajku̶xy, ka'p je̱'e̱ myu̶gu'ug ixaangu̶xy, myu̶dzip'ajtku̶xypy je̱'e̱ myu̶gu'ug y ka'p tii yajmu̶'oy'ijxku̶xy. Janch ja'ani'ijootma'tku̶xp, yajnaymyu̶dzibu̶u̶yu̶gu̶xy je̱'e̱ ja'ay, yaj'abu̶kyu̶u̶ygyu̶xy je̱'e̱ ja'ay y abu̶ky je̱'e̱ jya'ay pu̶daakku̶xy je̱'e̱ mu̶dyiibu̶ jya'ay'ajtku̶xypyu̶ñ. 21Ka'p je̱'e̱ myu̶gu'ug tii yajmu̶'oy'ijxku̶xy, #5.21 Nije̱' wiingpu̶ versión myu̶na'añ: y myu̶dtuundu̶gooygyu̶xypy je̱'e̱ to'oxyu̶jk ma ka'anu̶ pyu̶jkku̶xyñu̶ju̶ñ. uukku̶xp jú̶kxku̶xp je̱', janch kax ajku̶xy y ku̶xyu̶ tii tuungu̶xy ijxku̶xy du'undu̶gu̶u̶by neby adaaju̶ñ. Cham miich adaa nyajja'aymye̱jtzku̶xy neby jékyu̶p nnu̶maaygyu̶xyu̶ñ, ko je̱'e̱ ja'ay je̱'e̱ mu̶dyiibu̶ du'un adzu̶u̶tzku̶xp ja'ay'ajtku̶xpu̶ñ ka'p je̱'e̱ jiiby jya'tku̶xu̶ch ma je̱'e̱ Dios y'ane'emyu̶ñ.

22Peru̶ je̱'e̱ Espíritu je̱' je̱'e̱ yejkypy je̱'e̱ tzojk'ajtu̶ñ, jootkujk'ajtu̶ñ, oy'ajtu̶ñ, me̱kxtujku̶ñ, amu̶gu'ug'ajtu̶ñ, oyjya'ay'ajtu̶ñ, tu'uda'agjya'ay'ajtu̶ñ, 23yuung'ajt naaxypy'ajtu̶ñ y n'ane̱'e̱mu̶mu̶ch je̱'e̱ nni'kx ngopt ajtu̶m ajku̶xy ku̶'u̶m oydyuum. Ka'p je̱'e̱ ane̱'e̱mu̶ñ jii ni tu'ug mu̶dyiibu̶ adayaaba oybyu̶ du'un ka'a'oy'íxu̶bu̶ñ. 24Peru̶ je̱'e̱ mu̶dyiibu̶ yajpaatku̶xpu̶ñ ma je̱'e̱ Jesucrístoju̶ñ tu̶ je̱'e̱ pokytyuñiibu̶ u̶xmajtzku̶xnu̶ je̱'e̱ mu̶dyiibu̶ tu̶ mu̶miingu̶xyu̶ñ ko tu̶ mya'axung'ajtku̶xy, du'un neby du'umbu̶ tu̶ yajcruutzpe̱jtku̶xyu̶ñ kipxy mu̶u̶d je̱'e̱ ñi'kx kyopt jyu̶bu̶k'adzojku̶ñ ajku̶xy. 25Pu̶nu̶ tzu̶naay jugy'ajtu̶nu̶py jada'achám ajku̶xy mu̶u̶d je̱'e̱ Espíritu myu̶k'ajty, wan je̱'e̱ Espíritu nandu'un xyñu̶u̶mooy xytyu'umooyu̶m ajku̶xy ma je̱'e̱ óybyu̶ju̶ñ.

26Ka'p mu̶j ku̶xp nayjyu̶wu̶u̶yu̶mu̶ch ajku̶xy, nan ka'p je̱'e̱ ja'ay nayyajmu̶dzibu̶u̶yu̶mu̶ch ajku̶xy y nan ka'p ku̶xyu̶ tii nga'ayajmu̶'oy'ijxu̶mu̶ch ajku̶xy.

Currently Selected:

Gálatas 5: MIXE

Highlight

Copy

Compare