Gálatas 6

Naybyube̱jtu̶gu̶x amíñ u̶xyu̶py

1“Mu̶gu'uktu̶jk pu̶nu̶ jii pu̶n m'ijxku̶xy tu̶ tyuundu̶góy#6.1 Pu̶nu̶ jii pu̶n m'ijxku̶xy tyuundu̶góy: nije̱' wiingpu̶ jaaybyu̶du̶jk myu̶naangu̶xy: pu̶nu̶ jii pu̶n myajmu̶badu̶u̶ygyu̶xy. tu̶ myu̶mada'agyii je̱'e̱ poky, miich ajku̶xy je̱'e̱ mu̶dyiibu̶ je̱'e̱ ju̶bu̶kpu̶ mu̶madaakku̶xpu̶ñ mu̶u̶d je̱'e̱ Dios myu̶k'ajtu̶ñ, miich je̱'e̱ mu̶baad mbube̱jtku̶xy mwingapx mju̶jpkapxu̶u̶ygyu̶xu̶ch ko wan ja'adu'ook wimbijttu̶gách ma je̱'e̱ Dios ñu̶u̶ tyu'uju̶ñ. Peru̶ xi'ig xon du'un mduungu̶xu̶ch y mu̶k nidu'ug nidu'ug mnaygyweentu̶'ajtu̶gu̶xu̶ch, ka'pu̶ du'un nandu'un mduundu̶gooygyu̶xu̶ch. 2Naybyube̱jtu̶gu̶x amíñ u̶xyu̶py ko je̱'e̱ ayo'on jotmay naty m'ijxku̶xy mbaatku̶xy y ko du'un mduungu̶xu̶ch je̱'e̱ Cristo naty y'ane̱'e̱mu̶ñ du'un mguydyuunu̶py ajku̶xy.

3Pu̶nu̶ jii pu̶n mu̶j ku̶xp ñayjyu̶wu̶'u̶yii ko ku̶xyu̶ tii jaty, ka'p je̱'e̱ tii jaty nigoo je̱'e̱ du'un myu̶na'añ, ku̶'u̶m je̱'e̱ du'un ñaywyin'u̶u̶ñyii. 4Nidu'ug nidu'ug ku̶'u̶m mnayjyu̶wu̶'u̶wu̶u̶ju̶ch ajku̶xy ko jaanch oy mdzu̶naay mjugy'ajtku̶xy, y pu̶nu̶ jaanch oy mdzu̶naay mjugy'ajtku̶xy, mu̶'it ku̶'u̶m jootkujk mnayjyu̶wu̶u̶yu̶gu̶xu̶ch y ka'p ko oy pu̶n mnayyajmu̶baattu̶gu̶xu̶ch. 5Ku̶jx je̱' je̱'e̱ n'ayo'on njootmáy nmu̶najx ngu'ubu̶jku̶mu̶ch ajku̶xy.

6Pu̶n je̱'e̱ ayuuk tu̶y'ajt yajni'ixu̶u̶yu̶bu̶ñ, pyubé̱du̶py je̱'e̱ wyindzú̶n mu̶u̶d ku̶xyu̶ tii, je̱'e̱ mu̶dyiibu̶ naty tu̶ yajni'ixu̶'u̶yiiju̶ñ.

7Ka'p miich ku̶'u̶m mnaywin'u̶nnu̶gu̶xyu̶: ka'p je̱'e̱ Dios mu̶baad ni pu̶n nixi'igy yajxi'igy. Pu̶nu̶ ju̶bu̶k tu̶ mja'ay'ajtku̶xy nan ju̶bu̶k mjajtku̶xu̶ch, du'un neby pu̶n tii ni'iby, nan je̱' je̱'e̱ yajpu̶du̶'kypy je̱'e̱ mu̶dyiibu̶ naty tu̶ ni'ibyu̶ñ. 8Pu̶n du'un kuydyuumb neby je̱'e̱ ñi'kx kyopt je̱'e̱ ju̶bu̶k'adzojku̶ñ naty yujk'waanu̶xu̶ju̶ñ, je̱'e̱ o'ku̶ñ tu̶gooyu̶ñ je̱'e̱ pyaadu̶py, je̱' ko naty je̱'e̱ ñi'kx kyopt je̱'e̱ ju̶bu̶k'adzojku̶ñ tu̶ kuydyuunu̶, je̱'e̱ mu̶dyiibu̶ naty tu̶ yujkwaanu̶xu̶ju̶ñ. Pu̶n du'un kuydyuumb neby je̱'e̱ Espíritu naty yujkwaanu̶xu̶ju̶ñ, je̱'e̱ jugy'ajtu̶ñ wiinu̶u̶xu̶u̶bu̶ je̱'e̱ pyaadu̶py, je̱' ko naty je̱'e̱ Espíritu tu̶ kuydyuunu̶, je̱'e̱ mu̶dyiibu̶ naty tu̶ yujkwaanu̶xu̶ju̶ñ. 9Y du'unu̶tz tzu̶k je̱'e̱ oybyu̶ tuunu̶m ajku̶xy y ka'p nmu̶dzijpu̶mu̶ch ajku̶xy; pu̶nu̶ ka'p nmu̶jootme̱tzku̶u̶yu̶m ajku̶xy, mu̶'it je̱'e̱ oy'ajt nbaattu̶mu̶ch ajku̶xy ko naty je̱'e̱ xu̶u̶ tiempo myu̶baad'ajtnu̶. 10Paady tzu̶k je̱'e̱ ja'ay nigu̶xyu̶ pube̱jtu̶m ajku̶xy mu̶naa naty oy tii nmu̶dajtu̶mu̶ñ ajku̶xy, y je̱' ni'igyu̶ nbube̱jtu̶mu̶py ajku̶xy je̱'e̱ mu̶gu'uktu̶jk je̱'e̱ mu̶dyiibu̶ je̱'e̱ Jesucristo mu̶bu̶jkku̶xpu̶ñ.

Pablo myu̶gu'ug mu̶dya'agy jak'yajni'ipú̶ky, y yajpókxu̶ñ jak'yajniguéxy

11¡Ok'ijxku̶x miich janch mu̶jjáty adaa leetru̶ je̱'e̱ mu̶dyiibu̶ jada'achám nyajnijayu̶u̶ygyu̶xypyu̶ñ mu̶u̶d u̶u̶ch je̱'e̱ ngu̶'u̶mgu̶'u̶! 12Je̱'e̱ ja'ay ajku̶xy je̱'e̱ mu̶dyiibu̶ miich xyajmu̶guwaanu̶u̶ygyu̶xpu̶ñ ko mnaydyu̶y'ajtu̶u̶yu̶gu̶xu̶ch, paady je̱'e̱ du'un y'adu̶u̶tzku̶xy neby y'oybyu̶dzu̶maangu̶xy ma je̱'e̱ ja'ay ajku̶xyu̶ñ y ka'p je̱' gyu̶xpu̶ yaj'u̶xwu̶dijt yajpawu̶dijtku̶xu̶ch ko je̱'e̱ Cristo cruutzkú̶xp kyu'u'o'ogu̶u̶yu̶ ajku̶xy. 13Peru̶ ni je̱'e̱ mu̶dyiibu̶ ja'anaydyu̶y'ajtu̶u̶yu̶gu̶xpu̶ñ je̱'e̱ du'un ku̶xyu̶ ka'akuydyuundaaygyu̶xy neby je̱'e̱ Moisés y'ane̱'e̱mu̶ñ myu̶na'añu̶ñ. Y miich je̱'e̱ je'eyu̶ xyajnaydyu̶y'ajtu̶'u̶waanu̶p ajku̶xy, neby du'un ñaygyu'umayaanu̶gu̶xyu̶ñ ko tu̶ xyajmu̶guwanu̶u̶ygyu̶xy ko je̱'e̱ ijxpe̱jt mbu̶daakku̶xu̶ch ma je̱'e̱ mni'kx mgopt ajku̶xyu̶ñ. 14Peru̶ mu̶u̶d u̶u̶ch, u̶u̶ch ka'p u̶u̶ch tii nayyajku'umayii, je̱' u̶u̶ch je'eyu̶ nayyajku'umaayu̶p ko u̶u̶ch cruutzkú̶xp xykyu'u'o'ogu̶u̶y je̱'e̱ nWindzú̶n Jesucristo ajtu̶m. Mu̶u̶d je̱' gyu̶xpu̶ ko u̶u̶ch je̱'e̱ Cristo cruutzkú̶xp xykyu'u'o'ogu̶u̶y,#6.14 Mu̶u̶d je̱' gyu̶xpu̶ ko u̶u̶ch je̱'e̱ Cristo cruutzkú̶xp xykyu'u'o'ogu̶u̶y: nije̱' wiingpu̶ jaaybyu̶du̶jk myu̶na'añ: mu̶u̶d je̱' gyu̶xpu̶. tu̶ je̱'e̱ naaxwiiñ winma'añ y'o'knu̶ mu̶u̶d u̶u̶ch y u̶u̶ch tu̶ u̶u̶ch n'o'knu̶ mu̶u̶d je̱'e̱ naaxwiiñ winma'añ. 15Ka'p je̱'e̱ chobaady pu̶nu̶ tu̶y'ajtu̶'u̶y o pu̶nu̶ ka'p ndu̶y'ajtu̶'u̶yu̶ch ajtu̶m ajku̶xy; je̱'e̱ mu̶dyiibu̶ tzobaatpu̶ñ je̱' je̱' ko je̱'e̱ Dios je̱'e̱ njoot nwinma'añ tu̶ xyajwinje̱e̱mu̶ ajtu̶m ajku̶xy ko je̱'e̱ Jesucristo tu̶ nmu̶bu̶jku̶m ajku̶xy. 16Wan je̱'e̱ jootkujk'ajtu̶ñ y je̱'e̱ pa'a''ayoowu̶ñ nigu̶xyu̶ paatku̶xy, je̱'e̱ mu̶dyiibu̶ du'un tzu̶naay jugy'ajtku̶xpu̶ñ du'un neby je̱'e̱ tu̶y'ajt y'ane'emyu̶ñ, y nigu̶xyu̶ je̱'e̱ jaanchpyu̶ Dios jya'ay ajku̶xy.

17Jada'achám y jakjiinu̶ ka'p u̶u̶ch ndzoky ko u̶u̶ch pu̶n xymyu̶'amayu̶'u̶wu̶ch, je̱' ko tay u̶u̶ch je̱'e̱ nni'kx ngopt tu'kku̶'u̶yu̶ y je̱' du'un yajni'igu̶xu̶'kp ko u̶u̶ch je̱'e̱ Jesús ngu'u'ayowu̶'u̶y y ko u̶u̶ch xytyuumbu̶'áty.

18“Mu̶gu'uktu̶jk ajku̶xy, wan je̱'e̱ nWindzú̶n Jesucristo ajtu̶m ajku̶xy oy'ajt may'ajt tuñ ma miich nigu̶xyu̶ ajku̶xyu̶ñ. Jaanch adaa du'un.

Currently Selected:

Gálatas 6: MIXE

Highlight

Copy

Compare