Gálatas 4

1Adaa u̶u̶ch du'un ndijpy: Ko je̱'e̱ ungteedy tu'ug y'o'ogy, pu̶nu̶ mutzknu̶ naty je̱'e̱ y'ung je̱'e̱ mu̶dyiibu̶ je̱'e̱ pu̶da'agy mu̶wu̶'u̶mbu̶ñ, ma je̱'e̱ pi'k'ana'k kya'ayeegyñu̶ju̶ñ du'undu̶gu̶u̶by je̱' neby je̱'e̱ tuumbu̶ ni'idoogypyu̶ju̶ñ, oy u̶xyu̶py najty je̱'e̱ tyeedy pyu̶da'agy ku̶xyu̶ ja'aniwindzu̶n'ajttaayu̶byu̶. 2Jii je̱'e̱ ja'ay nije̱' mu̶dyiibu̶ je̱'e̱ pi'k'ana'k kweentu̶'ajtpu̶ñ y kweentu̶'ajtu̶ ku̶xyu̶ tii, u̶xtu̶ koonu̶ je̱'e̱ tiempo paady ma je̱'e̱ tyeedy pyu̶da'agy kyu̶'u̶du̶gu̶u̶yu̶xu̶ch. 3Nandu'un jyaty mu̶u̶d u̶u̶ch ajtu̶m ajku̶xy: ko najty du'un n'ijtu̶m ajku̶xy neby je̱'e̱ pi'k'ana'ktu̶jku̶ñ, je̱'e̱ ane̱'e̱mu̶ñ najty xy'ane̱'e̱mb ajtu̶m ajku̶xy je̱'e̱ mu̶dyiibu̶ adayaaba naaxwiiñ ane̱'e̱mbu̶ñ. 4Ko je̱'e̱ tiempo oy myu̶baad'áty, mu̶'it je̱'e̱ Dios y'Ung kejxy, je̱'e̱ mu̶dyiibu̶ ma'axung'ajt ma tu'ug to'oxyu̶jku̶ñ, y nan kyuydyuun je̱'e̱ Moisés y'ane̱'e̱mu̶ñ nandu'un, 5neby mu̶baad xyaj'awa'adzpu̶dzu̶u̶mu̶mu̶ñ ajku̶xy je̱'e̱ mu̶dyiibu̶ je̱'e̱ Moisés y'ane̱'e̱mu̶ñ najty xy'ane̱'e̱mu̶mbu̶ñ ajku̶xy, neby je̱'e̱ Dios mu̶baad xykyu'ubu̶jku̶mu̶ñ ajku̶xy neby je̱'e̱ y'ungu̶ñ. 6Y neby xyajnejwu̶u̶yu̶mu̶chu̶ñ ajku̶xy ko je̱'e̱ Dios xy'ung'ajtu̶nu̶ ajku̶xy, Dios je̱'e̱ y'ung y'Espíritu tu̶ xyajnigue̱jxu̶m ajku̶xy neby mu̶baad xy'adu̶gu̶u̶y xyjyoottu̶gu̶u̶yu̶mu̶ñ ajku̶xy; y je̱'e̱ Espíritu je̱'e̱ Dios du'un nu̶maaby: “¡Dios Teedy!” 7Y du'unu̶tz, ka'p miich m'okdu'un'ajtnu̶ neby je̱'e̱ tuumbu̶ ni'idoogypyu̶ju̶ñ, je̱'e̱ mu̶dyiibu̶ ane'emy ijtu̶u̶bu̶ñ, je̱'e̱ Dios miich xy'ung'ajtnu̶py, y je̱' ko je̱' xy'ung'ajtnu̶py, je̱'e̱ Dios du'un tzojkp ko nandu'un mbaadu̶ch je̱'e̱ mu̶dyiibu̶ xymyo'owaambu̶ñ.#4.7 Nije̱' wiingpu̶ versión myu̶na'añ: ko je̱'e̱ Cristo mmu̶bú̶gu̶ch.

Pablo je̱'e̱ mu̶bu̶jkpu̶du̶jk nidajy nimay

8Jékyu̶p, ko najty je̱'e̱ Dios y'ayuuk tyu̶y'ajt miich ka'p mnejwu̶u̶ygyu̶xyñu̶, du'un miich najty ajku̶xy neby je̱'e̱ tuumbu̶ ni'idoogypyu̶ju̶ñ, mmu̶duungu̶xy je̱'e̱ mu̶dyiibu̶ ka'p jaanch diósu̶ch. 9Peru̶ jada'achám ko je̱'e̱ Dios y'ayuuk tyu̶y'ajt mnejwu̶u̶ygyu̶xnu̶, o n'okni'igu̶ mu̶na'añu̶ch ko je̱'e̱ Dios miich xyñejwu̶u̶ygyu̶xnu̶ ko je̱'e̱ y'ayuuk tyu̶y'ajt mnejwu̶u̶yu̶ñu̶ ajku̶xy, ¿ti ko ja'adu'ook mwimbijtku̶xnu̶ba xy'ane̱'e̱mgu̶xnu̶ba je̱'e̱ ane̱'e̱mu̶ñ ka'pu̶ mu̶k'ajt mu̶u̶du̶ch, y xy'ane̱'e̱mgu̶xu̶ch du'un neby je̱'e̱ tuumbu̶ ni'idoogypyu̶ju̶ñ? 10Miich ajku̶xy mxu̶duungu̶xypy je̱'e̱ xu̶u̶ je̱'e̱ po'o nije̱', y je̱'e̱ xu̶u̶ jumu̶jt. 11¡Taj maabyu̶ch du'un neby u̶u̶ch je̱'e̱ nduung nigoo tu̶ y'ayoy ma miich ajku̶xyu̶ñ ko je̱'e̱ Dios y'ayuuk tyu̶y'ajt tu̶ nyaj'u̶xpu̶jkku̶xy!

12“Mu̶gu'uktu̶jk, cham nmu̶nukxtaakku̶xy yajtu'ugyu̶ju̶u̶ygyu̶x je̱'e̱ mjoot mwinma'añ mu̶u̶d u̶u̶ch, du'un neby u̶u̶ch je̱'e̱ njoot nwinma'añ tu̶ nyajtu'ugyu̶ju̶'u̶y mu̶u̶d miich ajku̶xy ko u̶u̶ch je̱'e̱ judío ja'ay kyostumbre tu̶ n'u̶xmajtzu̶ñu̶. Miich ajku̶xy, ka'p u̶u̶ch miich nimu̶naa tu̶ xymyu̶dzip'ajtku̶xy. 13Je̱' ko tu̶ du'un mnejwu̶u̶ygyu̶xy, ko je̱'e̱ ayuuk tu̶y'ajt jayu̶jp nyajwingapxu̶u̶ygyu̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, nni'iwu̶'u̶mu̶u̶yu̶ch jim ma miich ajku̶xyu̶ñ je̱' ko u̶u̶ch najty nbu̶gyii. 14Y mu̶k miich n'adzijp n'abe̱jtku̶xy pa'am gyu̶xpu̶, ka'p u̶u̶ch miich xyú̶kku̶xy xypye̱jxku̶xy y ka'p u̶u̶ch miich xymyu̶dzijpku̶xy oy u̶u̶ch najty nja'apu̶gyii, ni'igyu̶ u̶u̶ch miich du'un xykyu'ubu̶jky ajku̶xy neby je̱'e̱ Dios y'ángelu̶ñ, ¡neby je̱'e̱ Jesucristo du'un ku̶'u̶m mgu'ubu̶jkku̶xypyu̶ñ! 15¿Neby tu̶ mjajtku̶xy ko cham xi'ig xon mga'a'okyajpaatku̶xnu̶ neby ijty jeky'ajty myajpaatku̶xyu̶ñ? U̶u̶ch nmu̶u̶du̶ch je̱'e̱ tu̶y'ajt ma miich ajku̶xyu̶ñ ko mu̶j u̶u̶ch miich xypyubejty xypyudu̶gu̶u̶y ajku̶xy, u̶xtu̶ mja'ayajpu̶dzu̶maangu̶x je̱'e̱ mgu̶'u̶mwiin xymyo'owaangu̶xyu̶ch najty. 16Y jada'achám, ¿nej mu̶dzip u̶u̶ch da'a tu̶ nwimbijtnu̶ ma miich ajku̶xyu̶ñ ko je̱'e̱ tu̶y'ajt tu̶ nyajnu̶maaygyu̶xy?

17Je̱'e̱ ja'ay ajku̶xy miich je̱'e̱ xyjyanchku'ix xyjyanchmu̶gapxaangu̶xp, peru̶ ka'p je̱'e̱ jyoot wyinma'añ tyu'uda'agyu̶ch ajku̶xy. Je̱' je̱'e̱ du'un y'u̶xtaaygyu̶xypy neby u̶u̶ch miich xypyuyo'oydyuutku̶xu̶chu̶ñ, neby miich je̱'e̱ mu̶baad mbuyo'oyu̶u̶ygyu̶xyu̶ñ. 18Ja'a'oy je̱'e̱ du'un ko je̱'e̱ wiingpu̶ ja'ay ngu'ijx nmu̶gápxu̶mu̶ch, peru̶ mu̶u̶d je̱'e̱ joot winma'añ tu'uda'agypyu̶, y ngu'ijx nmu̶gápxu̶mu̶ch oy mu̶naa y ka'p myu̶'ittu̶'ajtyu̶ch ko u̶u̶ch ya nyajpaady ma miich ajku̶xyu̶ñ. 19“Mu̶gu'uktu̶jk, du'un miich nju̶wu̶u̶ygyu̶xy neby je̱'e̱ ku̶'u̶m'úngu̶ñ, nju̶wu̶u̶ybyu̶ch je̱'e̱ tzaachpyu̶ ja'adu'ook mu̶u̶d miich kyu̶xpu̶ ajku̶xy, du'un neby je̱'e̱ ungtaj tzaachpyu̶ paady ko naty y'ungpada'añ, y nju̶wu̶u̶ydyu̶wu̶byu̶ch je̱'e̱ taachpyu̶ u̶xtu̶ koonu̶ naty je̱'e̱ Cristo myu̶k'ajt miich xy'adu̶gu̶u̶y xyjyoottu̶gu̶u̶ygyu̶xy. 20Du'un u̶u̶ch it jim n'oknay'ijxpadu̶u̶ju̶ch cham cham ma miich ajku̶xyu̶ñ neby mu̶baad wiing'eemby nmu̶dkapx nmu̶dmu̶dyaakku̶xyu̶ñ, ka'p u̶u̶ch n'oknejwu̶u̶yñu̶ tii u̶u̶ch ndúnu̶byu̶ñ mu̶u̶d miich kyu̶xpu̶ ajku̶xy.

Je̱'e̱ Agar y je̱'e̱ Sara ijxpe̱jt

21U̶u̶ch oknu̶maaygyu̶xk, miich mu̶dyiibu̶ je̱'e̱ Moisés y'ane̱'e̱mu̶ñ kuydyunaangu̶xpu̶ñ: ¿nej ka'p miich mmu̶doogu̶xyñu̶ neby je̱'e̱ du'umbu̶ Moisés y'ane̱'e̱mu̶ñ myu̶na'añu̶ñ? 22Pues du'un je̱'e̱ myu̶na'añ ko je̱'e̱ Abraham y'ung najty me̱tzk; tu'ug je̱'e̱ pyo'oduumbu̶ najty mu̶d'ung'aty, je̱'e̱ mu̶dyiibu̶ najty ni'idoogy myu̶dajtypyu̶ñ y tu'ug je̱'e̱ kyu̶'u̶mdo'oxyu̶jk najty mu̶d'ung'aty, je̱'e̱ ka'pu̶ najty ñi'idoogyu̶ch. 23Je̱'e̱ ni'idoogypyu̶ to'oxyu̶jk y'ung du'un je̱'e̱ mya'axung'ajty neby oy mu̶dyiibu̶ ma'axúng mya'axung'átyu̶ñ. Peru̶ je̱'e̱ kyu̶'u̶mdo'oxyu̶jk y'ung, je̱'e̱ ka'pu̶ ñi'idoogyu̶ch, ma'axung'ajt je̱' neby je̱'e̱ Dios y'ayuuk du'un kuydyúnu̶chu̶ñ neby je̱'e̱ Abraham najty tu̶ yajwinwaanu̶'u̶yu̶ñ. 24Adaa mu̶j adaa u̶xpu̶jku̶ñ du'un nigapxy; je̱'e̱ me̱tzkpu̶ to'oxyu̶jk me̱jtzpú̶ky je̱'e̱ kapxytyuunu̶ñ du'un kudu̶naaygyu̶xy je̱'e̱ mu̶dyiibu̶ je̱'e̱ Dios tyuunu̶ñ: mu̶du'kpú̶ky je̱'e̱ mu̶dyiibu̶ je̱'e̱ Dios je̱'e̱ Moisés ane̱'e̱mu̶ñ myooy jim Sinaí koptku̶xp, y je̱' je̱'e̱ Agar du'un kyudu̶naaby; pu̶n adayaaba kapxytyuunu̶ñ kuydyuungu̶xpu̶ñ, ane'emy je̱'e̱ Moisés y'ane̱'e̱mu̶ñ yaj'ijtu̶u̶gu̶xu̶ch, du'un neby je̱'e̱ tuumbu̶ ni'idoogypyu̶ ane'emy y'ityu̶ñ. 25Je̱'e̱ Agar, je̱' je̱'e̱ kyudu̶naaby je̱'e̱ Moisés y'ane̱'e̱mu̶ñ je̱'e̱ mu̶dyiibu̶ je̱'e̱ Moisés jim Sinaí koptku̶xp yajmooyu̶ñ, Arabia naaxjooty, je̱'e̱ mu̶dyiibu̶ cham Jerusalén kajpt'ajtpu̶ñ, je̱'e̱ kajpt mu̶dyiibu̶ je̱'e̱ Moisés y'ane̱'e̱mu̶ñ ane'emy yaj'ijtu̶gu̶xpu̶ñ kipxy mu̶u̶d je̱'e̱ y'ung y'ana'k ajku̶xy, du'un neby je̱'e̱ tuumbu̶ ni'idoogypyu̶ ane'emy y'ityu̶ñ. 26Peru̶ je̱'e̱ Jerusalén kajpt tzajpjootypyu̶, awa'adztuum je̱', ka'p je̱'e̱ Moisés y'ane̱'e̱mu̶ñ y'ane'emyii, y jímu̶tz u̶u̶ch nyajpaatu̶m ajku̶xy. 27Je̱' ko du'un je̱'e̱ Dios ñaky myu̶na'añ:

“Xonda'ag, miich to'oxyu̶jk je̱'e̱ ka'pu̶ y'ungpaady, miich je̱'e̱ ka'pu̶ m'ung m'ana'k;

ya'ax jok mu̶u̶d je̱'e̱ xonda'agyiibu̶, miich je̱'e̱ mu̶dyiibu̶ je̱'e̱ tzaachpyu̶ ka'p mnejwu̶'u̶y neby je̱'e̱ ja'ay y'ungpaadyu̶ñ.

Je̱' ko je̱'e̱ to'oxyu̶jk je̱'e̱ mu̶dyiibu̶ je̱'e̱ y'ung najty ka'p ni tu'ugu̶ñ,

may je̱'e̱ y'ung ni'igyu̶ pada'añ ni'igu̶ ka'p je̱'e̱ to'oxyu̶jk je̱'e̱ mu̶dyiibu̶ ya'aydyu̶jkmu̶u̶du̶ñ ajku̶xy.”

28“Mu̶gu'uktu̶jk, miich du'un miich ajku̶xy neby je̱'e̱ Isaacu̶ñ: du'un miich ajku̶xy neby je̱'e̱ ung ana'k je̱'e̱ mu̶dyiibu̶ je̱'e̱ Dios Abraham yajwinwaanu̶u̶yu̶ñ. 29Du'un neby je̱'e̱ Ismael, je̱'e̱ ni'idoogypyu̶ to'oxyu̶jk y'ung, je̱'e̱ mu̶dyiibu̶ du'un ma'axung'ajt neby oy mu̶dyiibu̶ ma'axúng mya'axung'átyu̶ñ, myu̶dzip'ajt je̱'e̱ Isaac, je̱'e̱ mu̶dyiibu̶ ma'axung'ajt mu̶u̶d je̱'e̱ Dios y'Espíritu myu̶k'ajt, y nandu'unu̶tz jada'achám tyuñyii jyadyii du'un je̱'e̱ ja'ay xymyu̶dzip'ajtu̶m ajku̶xy je̱'e̱ mu̶dyiibu̶ je̱'e̱ Moisés y'ane̱'e̱mu̶ñ kuydyuungu̶xpu̶ñ ko je̱'e̱ Jesucristo u̶u̶ch nmu̶bu̶jku̶m ajku̶xy. 30Peru̶ ¿neby je̱'e̱ Dios ñaky myu̶na'añ? Pues du'un je̱'e̱ myu̶na'añ: “Ke̱jxpu̶dzú̶m je̱'e̱ to'oxyu̶jk po'oduumbu̶ mu̶u̶d je̱'e̱ y'ung, je̱'e̱ mu̶dyiibu̶ du'un neby je̱'e̱ tuumbu̶ ni'idoogypyu̶ju̶ñ, je̱' ko ka'p je̱'e̱ ni'idoogypyu̶ to'oxyu̶jk y'ung je̱'e̱ pu̶da'agy mu̶baad pyadyii mu̶u̶d je̱'e̱ awa'adztuumbu̶ to'oxyu̶jk y'ung, je̱'e̱ mu̶dyiibu̶ ka'p ñi'idoogyu̶ch.” 31Y du'unu̶tz mu̶gu'uktu̶jk, ka'p je̱'e̱ ni'idoogypyu̶ to'oxyu̶jk xy'ung'ajtp ajtu̶m ajku̶xy, je̱'e̱ mu̶dyiibu̶ ane'emy ijtpu̶ñ, je̱' xy'ung'ajtp ajtu̶m ajku̶xy je̱'e̱ to'oxyu̶jk awa'adztuumbu̶, je̱'e̱ ka'pu̶ ñi'idoogyu̶ch.

Currently Selected:

Gálatas 4: MIXE

Highlight

Copy

Compare