2 Timoteo 3
3
Neby je̱'e̱ ja'ay jootmáy mu̶'idaangu̶xyu̶ñ ko naty je̱'e̱ xu̶u̶ tiempo myu̶baad'ajtnu̶
1Nan mu̶baad miich nandu'un mnejwu̶'u̶y ma je̱'e̱ xu̶u̶ tiempo naty kyu̶xaan tyu̶goyaanu̶ju̶ñ, tunaan jadaanu̶p je̱'e̱ ayo'on mu̶k. 2Jii'adaamb je̱'e̱ ja'ay mu̶dyiibu̶ ku̶xyu̶ tii naydyu'um adzogaangu̶xpu̶ñ, mu̶dyiibu̶ janch meeñ adzogaangu̶xpu̶ñ, mu̶dyiibu̶ mu̶j ku̶xp nayjyu̶wu̶'u̶waanu̶gu̶xpu̶ñ, mu̶dyiibu̶ ku̶'u̶m naygyu'umayaanu̶gu̶xpu̶ñ, mu̶dyiibu̶ kapxtu̶goyaangu̶xpu̶ñ ma je̱'e̱ Diosu̶ñ, mu̶dyiibu̶ je̱'e̱ tyaj tyeedy ka'p kapxymyu̶dowaangu̶xyu̶ñ, mu̶dyiibu̶ ka'p tii ku'umayaangu̶xyu̶ñ y mu̶dyiibu̶ je̱'e̱ Dios y'u̶xpu̶jku̶ñ ka'p windzu̶gu̶'u̶waangu̶xyu̶ñ. 3Jii'adaamb je̱'e̱ ja'ay mu̶dyiibu̶ je̱'e̱ myu̶gu'ug ka'p ixaangu̶xy tzogaangu̶xyu̶ñ, mu̶dyiibu̶ je̱'e̱ pa'a''ayo'on ka'p mu̶dadaangu̶xyu̶ñ, mu̶dyiibu̶ je̱'e̱ myu̶gu'ug ni'oj niyaxu̶'u̶waangu̶xpu̶ñ, mu̶dyiibu̶ je̱'e̱ kyu̶'u̶mdzojku̶ñ ka'p mu̶baad u̶xmajtzku̶xyu̶ñ, mu̶dyiibu̶ janch awa'an ja'ay'adaangu̶xpu̶ñ y mu̶dyiibu̶ je̱'e̱ oybyu̶ ku̶xyu̶ mu̶dzip'adaangu̶xpu̶ñ. 4Jii'adaamb je̱'e̱ ja'ay mu̶dyiibu̶ je̱'e̱ myu̶gu'ug ku̶'u̶ye̱gaangu̶xpu̶ñ, mu̶dyiibu̶ tunaamb tii tyimy tunaangu̶xypyu̶ñ, mu̶dyiibu̶ aa'adaamb joot'adaangu̶xpu̶ñ je̱'e̱ mu̶jpu̶ ku̶je̱e̱bu̶ y u̶xta'awaangu̶xy je̱'e̱ mayñaxpu̶ xondaaku̶ñ y ka'p je̱'e̱ Dios y'ayuuk tyu̶y'ajt kuydyunaanu̶ ajku̶xy. 5Jii'adaamb je̱'e̱ ja'ay mu̶dyiibu̶ du'un naybyu̶da'agaanu̶gu̶xpu̶ñ neby je̱'e̱ Dios y'u̶xpu̶jku̶ñ nu̶wu̶'u̶y kyuydyuungu̶xypyu̶ñ y ka'p naty du'un ñi'ijaanchu̶chpyu̶, peru̶ ma je̱'e̱ chu̶naayu̶ñ jyugy'ajtu̶ñ ajku̶xyu̶ñ jim je̱'e̱ ñi'igu̶xu̶'u̶gu̶ch ko je̱'e̱ jaanchpyu̶ tu̶y'ajt myu̶k'ajt ka'p yajtuungu̶xy.
Mgu'ugue̱'e̱gu̶py je̱'e̱ du'umbu̶ ja'ay, ka'p mbuyo'oy mbunaxu̶'u̶wu̶ch. 6Je̱'e̱ du'umbu̶ ja'ay ajku̶xy je̱' je̱'e̱ ajku̶xy je̱'e̱ mu̶dyiibu̶ du'un kuyo'oyu̶u̶by kunaxu̶u̶ygyu̶xpu̶ñ tu̶jk tu̶jk y win'u̶u̶ngu̶xy je̱'e̱ to'oxyu̶jktu̶jk mu̶dyiibu̶ ka'p tii jajtku̶xyu̶ñ, mu̶dyiibu̶ nu̶u̶ja'ay pokyjya'ayu̶ñ ajku̶xy, mu̶dyiibu̶ ku̶xyu̶ tijaty janch adzojkku̶xpu̶ñ. 7Je̱'e̱ du'umbu̶ to'oxyu̶jktu̶jk ajku̶xy je'emy je̱'e̱ oy mu̶dyiibu̶ u̶xpu̶jku̶ñ ja'apanú̶kxku̶xy, peru̶ nimu̶naa je̱'e̱ Dios y'ayuuk tyu̶y'ajt ka'awinju̶wu̶u̶ygyu̶xyñu̶. 8Du'un neby je̱'e̱ Janes y je̱'e̱ Jambres xu̶u̶maaybyu̶ mu̶dzibu̶u̶ygyu̶xyu̶ñ je̱'e̱ Moisés, nandu'un je̱'e̱ du'umbu̶ ja'ay je̱'e̱ tu̶y'ajt mu̶dzibu̶'u̶waangu̶xy. Je̱'e̱ du'umbu̶ ja'ay je̱' je̱'e̱ ajku̶xy mu̶dyiibu̶ je̱'e̱ jyoot wyinma'añ tu̶ tyu̶gooygyu̶xnu̶ y mu̶dyiibu̶ je̱'e̱ myu̶bu̶jku̶ñ tu̶ yajtu̶gooygyu̶xnu̶ ma je̱'e̱ Diosu̶ñ. 9Peru̶ ka'p may mu̶mada'agu̶ch ajku̶xy neby je̱'e̱ Dios jya'ay win'u̶u̶nu̶chu̶ñ ajku̶xy, je̱' ko yajnejwu̶'u̶wu̶p je̱'e̱ ku̶xyu̶ ko chuja'ay lyooku̶ja'ayu̶ch ajku̶xy, du'un neby je̱'e̱ Janes y je̱'e̱ Jambres jyajty ajku̶xyu̶ñ ko je̱'e̱ Moisés mu̶dzibu̶u̶y ajku̶xy.
Mu̶dyiibu̶ je̱'e̱ Pablo jyakyajni'ipu̶jku̶ñ je̱'e̱ Timoteo
10Peru̶ miich tu̶ oy yajxón mbanu̶kxy u̶u̶ch je̱'e̱ n'u̶xpu̶jku̶ñ, neby u̶u̶ch ndzu̶na'ay njugy'atyu̶ñ, neby u̶u̶ch je̱'e̱ winma'añ nmu̶u̶du̶chu̶ñ, y neby u̶u̶ch je̱'e̱ mu̶bu̶jku̶ñ tu'ug'aa tu'ugjoot nmu̶u̶du̶chu̶ñ, neby u̶u̶ch je̱'e̱ me̱kxtujku̶ñ nmu̶u̶du̶chu̶ñ, neby u̶u̶ch je̱'e̱ oyjya'ay'ajtu̶ñ nduñu̶ñ y neby u̶u̶ch je̱'e̱ mu̶k'ajt nmu̶u̶du̶chu̶ñ neby u̶u̶ch tu̶ nme̱kxtukyu̶ñ. 11Miich m'ijxypy mnejwu̶u̶by ku̶xyu̶ neby u̶u̶ch tu̶ nyaj'u̶xwu̶díty tu̶ nyajpawu̶dítyu̶ñ y neby u̶u̶ch tu̶ njaty tu̶ n'abetyu̶ñ jim Antioquía, jim Iconio y jim Listra, y neby u̶u̶ch njajty n'abejtyu̶ñ ko u̶u̶ch nyaj'u̶xwu̶dijty nyajpawu̶dijty, peru̶ je̱'e̱ Windzú̶n Dios u̶u̶ch xyñiwaan xykyuwaan. 12Janch tu̶y'ajtu̶ñ je̱'e̱ du'un ko ku̶xyu̶ pu̶njaty tzu̶na'a jugy'adaangu̶xpu̶ñ mu̶u̶d je̱'e̱ wa'adzpu̶ jyoot wyinma'añ ajku̶xy ma je̱'e̱ Cristo Jesúsu̶ñ, nan yaj'u̶xwu̶dít yajpawu̶díttu̶p je̱'e̱ nandu'un ajku̶xy. 13Peru̶ je̱'e̱ ju̶bu̶kja'aydyu̶jk y je̱'e̱ win'u̶u̶nbu̶du̶jk ni'igyu̶ je̱'e̱ ju̶bu̶k axu̶u̶g y'adu̶'u̶dzaangu̶xy, win'u̶naangu̶xy je̱'e̱ ja'ay y ñaywyin'u̶naanu̶gu̶xy ku̶'u̶m.
14Miich Timoteo, panu̶kx je̱'e̱ tu̶u̶bu̶ ku̶xyu̶ m'u̶xpu̶ky je̱'e̱ mu̶dyiibu̶ tu̶ mu̶jootku̶da'agyu̶ñ y ka'p nimu̶naa m'u̶xmádzu̶ch. Miich mnejwu̶u̶by pu̶n je̱'e̱ tu̶ xyaj'u̶xpú̶kyu̶ñ. 15Ja'aymyé̱tz ko pi'knu̶ mutzknu̶ je̱'e̱ Dios ñaky tu̶ m'u̶xpu̶jku̶ mu̶dyiibu̶ mu̶baad xyajmu̶dóy y xyajnejwu̶'u̶y neby je̱'e̱ m'aanu̶mu̶ ni'idzooku̶ñ mu̶baad mbaady ko je̱'e̱ Cristo Jesús mmu̶bú̶gu̶ch. 16Ku̶xyu̶ je̱'e̱ Dios ñaky Dios je̱'e̱ winma'añ myooy mu̶dyiibu̶ jaayu̶ñ ajku̶xy, y oy je̱'#3.16 Ku̶xyu̶ je̱'e̱ Dios ñaky; Dios je̱'e̱ winma'añmyooy je̱'e̱ mu̶dyiibu̶ jaayu̶ñ ajku̶xy y oy je̱': nije̱' wiingpu̶ jaaybyu̶du̶jk myu̶naangu̶xy: ku̶xyu̶ je̱'e̱ Dios ñaky; Dios je̱'e̱ winma'añmyooy je̱'e̱ mu̶dyiibu̶ jaayu̶ñ ajku̶xy y oy je̱'e̱ nandu'un. ko nyaj'u̶xpu̶jku̶mu̶ch ajku̶xy y ko je̱'e̱ ja'ay nyaj'oj nyajmu̶gápxu̶mu̶ch ajku̶xy, ko n'u̶u̶wij ngapxwiju̶mu̶ch ajku̶xy y nwingapx nju̶jpkapxu̶u̶yu̶mu̶ch ajku̶xy neby mu̶baad tu̶ytyu'uda'agy chu̶naay jyugy'ajtku̶xyu̶ñ. 17Neby je̱'e̱ Dios jya'ay mu̶baad u̶xpu̶ky y mu̶j'u̶xpú̶ky y'ijtku̶xyu̶ñ neby je̱'e̱ oybyu̶ tuung mu̶baad ku̶xyu̶ tuungu̶xyu̶ñ.
Currently Selected:
2 Timoteo 3: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005