2 Timoteo 4
4
1Y'ijxypy ñejwu̶u̶by je̱'e̱ Dios y je̱'e̱ Cristo Jesús mu̶dyiibu̶ minaamb neby je̱'e̱ ane̱'e̱mbu̶ju̶ñ ko naty je̱'e̱ juugypyu̶ja'ay y je̱'e̱ o'ogypyu̶ja'ay ajku̶xy miñ tu̶ydyúñ, cham adayaaba njaktimyajni'ipú̶ky 2ko je̱'e̱ Dios y'ayuuk tyu̶y'ajt mgapxwa'kxu̶ch oy tyimymyu̶naaju̶ch, y ko myajmu̶guwanu̶'u̶wu̶ch oy pu̶n mu̶doowa'añ o ka'amu̶doowa'añ. Yajkapxykyu'ubú̶k, oj mu̶gapx y yajjootkugu̶'u̶ ajku̶xy mu̶u̶d je̱'e̱ Dios y'ayuuk tyu̶y'ajt, cham myaj'u̶xpú̶ky oy yajxón mu̶u̶d je̱'e̱ me̱kxtujku̶ñ. 3Je̱' ko mínu̶p je̱'e̱ xu̶u̶ tiempo ma naty je̱'e̱ ja'ay je̱'e̱ wa'adzpu̶ u̶xpu̶jku̶ñ ka'p okmu̶dowaangu̶xnu̶ju̶ñ; y'u̶xtaaygyu̶xu̶py je̱'e̱ yaj'u̶xpu̶jkpu̶du̶jk may mu̶u̶d je̱'e̱ kyu̶'u̶m winma'añ ajku̶xy, mu̶dyiibu̶ je'eyu̶ yaj'u̶xpu̶gu̶u̶ju̶bu̶ñ ajku̶xy mu̶dyiibu̶ naty je̱' kyu'umaaygyu̶xypyu̶ñ y y'amdo'idaangu̶xypyu̶ñ. 4Y'u̶xmajtzku̶xnu̶py je̱'e̱ tu̶y'ajt y mu̶jpu̶daakku̶xnu̶ naty ku̶xyu̶ je̱'e̱ nigoobu̶ kyapxy'aty myu̶dya'agy'áty. 5Peru̶ miich wijy kejy je̱'e̱ mjoot mwinma'añ mu̶dajtnu̶, me̱kxtuk neby mjaty m'abetyu̶ñ, u̶u̶wa'kx kapxwa'kx je̱'e̱ Dios y'ayuuk tyu̶y'ajt mu̶dyiibu̶ aanu̶mu̶ ni'idzooku̶ñ ye̱jkpu̶ñ, kuydyún je̱'e̱ mduung oy yajxón neby mDiosmu̶duñuñ.
6U̶u̶ch tu̶ tyimywyingoonu̶ mu̶naa u̶u̶ch nyajku̶'u̶ye̱ga'añu̶ñ neby je̱'e̱ windzu̶gu̶'u̶ñdyu̶ñ; tu̶ je̱'e̱ xu̶u̶ tiempo paatnu̶ mu̶naa u̶u̶ch je̱'e̱ ja'ay xyaj'o'ogaanu̶ju̶ñ ajku̶xy. 7Tu̶ u̶u̶ch je̱'e̱ Dios y'ayuukkapxwa'kxu̶u̶ nwindu̶na'ay, tu̶ u̶u̶ch je̱'e̱ nduung nyajkú̶xy nyajmáy mu̶dyiibu̶ u̶u̶ch najty xypyaatpu̶ñ, tu̶ u̶u̶ch tu'uda'agy nmu̶dúñ y ka'p u̶u̶ch je̱'e̱ y'ayuuk tyu̶y'ajt nimu̶naa tu̶ n'u̶xmajtzu̶. 8Cham nju̶jp'ijxnu̶byu̶ch je̱'e̱ oy'ajtu̶ñ mu̶dyiibu̶ u̶u̶ch xywyinmajtzpu̶ñ xymyo'owa'añu̶ch je̱'e̱ Windzú̶n, je̱'e̱ tu'uda'agypyu̶ tu̶ydyuumbu̶ jiiby tzajpjooty, je̱'e̱ mu̶'it xu̶u̶. Nan ka'p je̱'e̱ u̶u̶chtyu̶'ajty je'eyu̶ xymyo'owaamb, nan myo'owe̱e̱mby je̱'e̱ nandu'un nigu̶xyu̶ mu̶dyiibu̶ tu'ug'aa tu'ugjoot ja'ay'e̱jxku̶xpu̶ñ ko je̱'e̱ Jesús ja'adu'ook wyimbijttu̶gátzu̶ch ya naaxwiiñ.
Pablo may'ajt yujkwa'añ ma je̱'e̱ Timoteo ko tzojku̶ ñinu̶kxu̶u̶ju̶ch.
9Tun je̱'e̱ may'ajt min tzojku̶ ku'ijxku̶ch. 10Je̱'e̱ Demas tu̶ u̶u̶ch je̱'e̱ yam xykyu'ugue̱e̱knu̶, je̱' ko je̱'e̱ mayñaxpu̶ xondaaku̶ñ ni'igyu̶ janch adzoky ya naaxwiiñ, jim Tesalónica je̱'e̱ tu̶ ñu̶kxnu̶; je̱'e̱ Crescente jim Galacia naaxjooty y je̱'e̱ Tito jim Dalmacia naaxjooty.#4.10 Nije̱' wiingpu̶ versión myu̶na'añ: Galacia y Dalmacia. 11Je'eyu̶ u̶u̶ch je̱'e̱ Lucas yam nmu̶u̶du̶ch. U̶xta'a je̱'e̱ Marcos y wan mu̶dmínu̶ch, je̱' u̶u̶ch mu̶baad xypyubety ma je̱'e̱ Dios tyuungu̶ñ. 12Je̱'e̱ Tíquico jim Éfeso kajpt u̶u̶ch je̱'e̱ tu̶ nguexy. 13Ko naty mmiñ, xyajmiinu̶byu̶ch je̱'e̱ nni'ijé̱n mu̶dyiibu̶ u̶u̶ch n'u̶xyo'oyu̶ñ jim Troas ma je̱'e̱ Carpo tyu̶jku̶ñ. Nan mu̶mínu̶py je̱'e̱ naky abu̶dity, y mu̶u̶d je̱'e̱ po'o'aknáky abu̶dity.
14Je̱'e̱ Alejandro je̱'e̱ pujxk'oydyuumbu̶ tu̶ u̶u̶ch je̱'e̱ mu̶j xyjyanchmu̶duundu̶góy, wan je̱'e̱ Windzú̶n Dios yajkumu̶doyii neby tu̶ y'adu̶'u̶chu̶ñ. 15Miich naygyweentu̶'adu̶u̶ mu̶u̶d je̱'e̱ Alejandro, ka'p mbuyo'oy mbunaxu̶'u̶wu̶ch, je̱' ko janchmu̶k je̱'e̱ Dios y'ayuuk tyu̶y'ajt mu̶dzip'ajtu̶, je̱'e̱ mu̶dyiibu̶ ngapxwa'kxypy ajtu̶mu̶ñ.
16Ko u̶u̶ch timyjyayu̶jp'ajt nayñi'igapxtuuttu̶ ma je̱'e̱ tuungmu̶u̶dpu̶du̶jk ajku̶xyu̶ñ, ka'p u̶u̶ch ni pu̶n xypyu'u̶u̶ xypyugapxu̶u̶y, ni'igyu̶ u̶u̶ch je̱'e̱ nigu̶xyu̶ xykyu'ugue̱e̱ktaay ajku̶xy, peru̶ Dios je̱'e̱ may'ajt túnu̶p ka'pu̶ kweentu̶pú̶gu̶ch neby tu̶ y'adu̶u̶tzku̶xyu̶ñ. 17Peru̶ je̱'e̱ Windzú̶n Dios u̶u̶ch xypyube̱jt xypyudu̶gu̶u̶y y xymyooyu̶ch je̱'e̱ mu̶k'ajtu̶ñ neby u̶u̶ch mu̶baad n'u̶u̶wa'kxy ngapxwa'kxyu̶ñ je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ y neby je̱'e̱ ja'ay mu̶baad nigu̶xyu̶ mu̶doogu̶xyu̶ñ mu̶dyiibu̶ ka'p jyudíoja'ayu̶chu̶ñ ajku̶xy je̱'e̱ Dios y'ayuuk tyu̶y'ajt, y je̱'e̱ Windzú̶n Dios u̶u̶ch xyñiwaan xykyuwaan ma je̱'e̱ o'ku̶ñ ke̱e̱ku̶ñ. 18Y je̱' u̶u̶ch xyñiwa'anu̶p xykyuwa'anu̶p ma je̱'e̱ ju̶bu̶kpu̶ axu̶u̶gpu̶ kú̶xyu̶ju̶ñ, y xyu'udzu̶p xy'ame̱e̱du̶bu̶ch u̶xtu̶ koonu̶ u̶u̶ch naty xyajnú̶kxy ma je̱'e̱ y'ane̱'e̱mdaaktu̶ñ jiiby tzajpjooty. ¡Wan je̱'e̱ Dios ku'umáy y'ídu̶ch wiinu̶u̶xu̶u̶ wiinu̶u̶tiempo! Jaanch adaa du'un.
Pablo myu̶gu'ugtu̶jk yajpókxu̶ñ y kunukxu̶ñ jak'yajniguéxy
19Yajnajxu̶gyu̶ch je̱'e̱ nyajpókxu̶ñ ma je̱'e̱ Prisca y ma je̱'e̱ Aquila, y ma je̱'e̱ Onesíforo jyuugy myu̶gu'ug ajku̶xyu̶ñ. 20Je̱'e̱ Erasto jim Corinto je̱'e̱ wyu̶'u̶my, y je̱'e̱ Trófimo jim Mileto u̶u̶ch je̱'e̱ n'u̶xyo'oy, je̱' ko pu̶jku̶p je̱'e̱ najty. 21Mjatytimymínu̶p tzojku̶ ma naty je̱'e̱ tu̶u̶chpyoj tiempo ka'anu̶ myíñu̶ju̶ñ. Cham je̱'e̱ yajpókxu̶ñ ke̱jxku̶xy ma miichu̶ñ je̱'e̱ Eubulo, je̱'e̱ Pudente, je̱'e̱ Lino, je̱'e̱ Claudia y ku̶xyu̶ je̱'e̱ nmu̶gu'ugtu̶jk ajtu̶m.
22Wan je̱'e̱ Windzú̶n Jesucristo ity mu̶u̶d miich, y wan je̱'e̱ Dios oy'ajt may'ajt tuñ ma miich nigu̶xyu̶ ajku̶xyu̶ñ. Jaanch adaa du'un.
Currently Selected:
2 Timoteo 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005