2 Timoteo 2
2
Tu'ug je̱'e̱ oybyu̶ Jesucristo chiptuumbu̶
1Y miich Timoteo, du'un u̶u̶ch miich nju̶wu̶'u̶y neby je̱'e̱ ku̶'u̶m'úngu̶ñ, nay'amu̶jadunu̶u̶ yajtún je̱'e̱ mu̶k'ajt mu̶dyiibu̶ je̱'e̱ Cristo Jesús tu̶ xymyo'oyu̶ñ. 2Je̱'e̱ ayuuk tu̶y'ajt je̱'e̱ mu̶dyiibu̶ tu̶ mmu̶doyu̶ñ tu̶ nyaj'u̶xpú̶kyu̶ch mayjya'ayjyooty, yajni'ipú̶k je̱'e̱ ja'ay ajku̶xy mu̶dyiibu̶ oy m'ixy'ajtypyu̶ñ mu̶dyiibu̶ je̱'e̱ wiingpu̶ja'ay mu̶baad yaj'u̶xpu̶jktu̶gáchu̶ñ ajku̶xy.
3Miich mmu̶nax ku'ubú̶k je̱'e̱ mje̱' je̱'e̱ tzaachpyu̶ ayo'on mu̶dyiibu̶ mbaatypyu̶ñ, du'un neby tu'ug oybyu̶ Jesucristo syoldado mu̶dyiibu̶ oy tuumbu̶ñ. 4Ni tu'ug je̱'e̱ tziptuumbu̶ wiingpu̶ tuung ka'atúñ mu̶dyiibu̶ ka'p pyadyiiju̶ñ, je̱' je̱'e̱ je'eyu̶ tyuumby mu̶dyiibu̶ je̱'e̱ wyindzú̶n kyu'umaaybyu̶ñ. 5Nan timydyu'un je̱'e̱ ayu̶u̶ybyu̶du̶jk ajku̶xy, ka'p je̱'e̱ tii paatku̶xy pu̶nu̶ ka'p je̱'e̱ ane̱'e̱mu̶ñ du'un kuydyuungu̶xy neby je̱'e̱ ane̱'e̱mu̶ñ myiñu̶ñ. 6Pu̶n tuumb ma je̱'e̱ kyam tyu'uju̶ñ, je̱' je̱'e̱ jayu̶jp paattu̶p mu̶dyiibu̶ je̱'e̱ tyu̶u̶m cha'am yajpu̶du̶'u̶gu̶bu̶ñ je̱'e̱ mu̶dyiibu̶ naty tu̶ y'ityu̶ñ. 7Winmay oy yajxón mu̶u̶d adaa mu̶dyiibu̶ yam nyajmu̶dmu̶dyaakypyu̶ñ, y je̱'e̱ Windzú̶n Dios ku̶xyu̶ xyajwinju̶wu̶u̶ydya'awu̶p.
8Ja'aymyé̱tz je̱'e̱ Jesucristo ko jyuugypyu̶jky ko najty tu̶ y'o'ogy, y ko ijty je̱' ok'ung ok'ana'k'ajtu̶p je̱'e̱ mu̶j'ane̱'e̱mbu̶ David. Adaa je̱' je̱'e̱ ayuuk tu̶y'ajt mu̶dyiibu̶ aanu̶mu̶ ni'idzooku̶ñ ye̱jkpu̶ñ mu̶dyiibu̶ u̶u̶ch ngapxwa'kxypyu̶ñ. 9Y mu̶u̶d adaa gyu̶xpu̶ u̶u̶ch nme̱kxtuky; nmu̶naxy ngu'ubú̶kyu̶ch je̱'e̱ tzaachpyu̶ du'un ko u̶u̶ch je̱'e̱ ayuuk tu̶y'ajt ngapxwa'kxy, y njaktimyguwu̶u̶ñ'u̶ña'ayu̶ch mu̶u̶d je̱'e̱ cadeenu̶ du'un neby tu'ug ju̶bu̶kja'ayu̶ñ, peru̶ ka'p ñejpyu̶ch, je̱'e̱ Dios y'ayuuk tyu̶y'ajt ka'p je̱'e̱ kyuwu̶u̶ñu̶ch mu̶u̶d je̱'e̱ cadeenu̶, yajkapxwa'kx'adu̶u̶tzp je̱'e̱ ni'igyu̶. 10Paady u̶u̶ch nme̱kxtuky nmu̶najxta'ay ngu'ubu̶jkta'ayu̶ch adaa du'un ku̶xyu̶, neby je̱'e̱ ja'ay mu̶baad nandu'un paatku̶xyu̶ñ, je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ je̱'e̱ oybyu̶ jugy'ajtu̶ñ y je̱' aanu̶mu̶ ni'idzooku̶ñ y je̱'e̱ juugy'ajtu̶ñ wiinu̶u̶xu̶u̶bu̶ mu̶dyiibu̶ yajpaatp ma je̱'e̱ Cristo Jesúsu̶ñ.
11Adaa tu̶y'ajtu̶ñ adaa du'un:
Pu̶nu̶ tu̶ n'o'ku̶m ajku̶xy mu̶u̶d je̱'e̱ Jesús,
nan je̱' mu̶u̶d ndzu̶naayu̶mu̶ch ajku̶xy.
12Pu̶nu̶ nmu̶najxypy ngu'ubu̶jkypy je̱'e̱ tzaachpyu̶ ayo'on ajtu̶m ajku̶xy mu̶u̶d je̱'e̱ Jesús,
nan kipxy jiiby n'ane̱'e̱mu̶mu̶ch ajku̶xy mu̶u̶d je̱'.
Pu̶nu̶ ka'p je̱'e̱ y'ayuuk tyu̶y'ajt ya ngu'ubu̶jku̶yu̶ ajtu̶m ajku̶xy,
nan ka'p je̱'e̱ xykyu'ubu̶jku̶mu̶ch ajku̶xy.
13Pu̶nu̶ ka'p je̱'e̱ Jesús y'ayuuk tyu̶y'ajt oy nguydyuunu̶yu̶ ajtu̶m ajku̶xy,
peru̶ je̱' kyuydyune̱e̱mby y'ayuuk tyu̶y'ajt je̱'.
Je̱' ko ka'p je̱'e̱ y'ayuuk mu̶baad ku̶'u̶m nixi'igy yajxi'igy.
Tu'ug tuumbu̶ mu̶dyiibu̶ ku'umáy pu̶dzu̶u̶mb
14Yajja'aymyé̱tz je̱'e̱ mu̶bu̶jkpu̶du̶jk ajku̶xy adaa tu̶y'ajt mu̶dyiibu̶ tu̶ nyajnu̶ma'ayu̶ñ, y yajni'ipú̶k ajku̶xy Windzú̶n Dios winduuy ko je̱'e̱ tzip kapxy awa'an gapxy wan u̶xmajtzku̶xy, je̱' ko ka'p je̱'e̱ du'umbu̶ tzip kapxy awa'an gapxy nidu'uñdyu̶ chobaady; je'eyu̶ ok'yajwinma'añdyu̶gooygyu̶xnu̶ pu̶njaty naty amdo'ijtku̶xpu̶ñ. 15Jatytimyñaybyu̶da'agu̶u̶ tu'ug'aa tu'ugjoot ma je̱'e̱ Dios y'ayuuk tyu̶y'ajtu̶ñ neby mu̶baad ku'umáy mbu̶dzu̶my Dios winduuy, du'un neby tu'ug Dios mu̶duumbu̶ mu̶dyiibu̶ ka'p ni tii mu̶dzu̶gu̶'u̶y mu̶dzo'oydyúñu̶ñ, mu̶dyiibu̶ je̱'e̱ Dios y'ayuuk tyu̶y'ajt oy yajxón yaj'u̶xpu̶jkp ma je̱'e̱ myu̶gu'ugtu̶jk ajku̶xyu̶ñ. 16Ka'p je̱'e̱ nigoobu̶ kyapxy'aty myu̶dya'agy'áty myajkápx myajxiigu̶'u̶ju̶ch y je̱'e̱ mu̶dyiibu̶ ka'p yajwinju̶wu̶'u̶yu̶ñ, je̱' ko je̱'e̱ mu̶dyiibu̶ du'un kápxku̶xpu̶ñ mu̶dyaakku̶xpu̶ñ ni'igyu̶ je̱'e̱ jyaknayyajpokykya'aw'adu̶u̶tzu̶gu̶xyu̶. 17Je̱'e̱ y'u̶xpu̶jku̶ñ ajku̶xy yajwinma'añdyu̶gooby ja'ay je̱'e̱ ajku̶xy, du'un neby je̱'e̱ ju̶bu̶k pu'udzpa'am mu̶dyiibu̶ je̱'e̱ ni'kx ju̶kxpu̶ñ. Y du'unu̶tz je̱'e̱ Himeneo y je̱'e̱ Fileto jyajty ajku̶xy, 18ko je̱'e̱ Dios tyu̶y'ajt yajtu̶gooyu̶ ajku̶xy y myu̶naangu̶xnu̶ ko je̱'e̱ ja'ay tu̶ jyuugypyu̶jkku̶xnu̶ba je̱'e̱ tu̶u̶bu̶ y'o'kku̶xy, y du'un je̱'e̱ ja'ay nije̱' tu̶ yajwinma'añdyu̶gooygyu̶xy, tu̶ yaj'u̶xmajtzku̶xy je̱'e̱ Dios tyu̶y'ajt du'un. 19Peru̶ neby je̱'e̱ Dios tu̶ wyinmayu̶ñ, ijtu̶wu̶p je̱'e̱ wiinu̶u̶xu̶u̶ y ka'p mu̶baad pu̶n yajtu̶gách ma du'un kyuja'ayu̶chu̶ñ: “Je̱'e̱ Windzú̶n Dios y'u̶xkajptaaby je̱' pu̶njaty jya'ay'ajtypyu̶ñ”, y “ku̶xyu̶ pu̶njaty je̱'e̱ Windzú̶n Jesucristo mu̶yaaxp o'owu̶dajtku̶xpu̶ñ, wan je̱'e̱ ju̶bu̶kwinma'añ u̶xmajtztaaygyu̶xy.”
20Ma tu'ug mu̶j kumeeñjya'ay tyu̶jku̶ñ, ka'p jiiby je̱'e̱du̶'ajty je̱'e̱ ooru̶ taazu̶ y je̱'e̱ platu̶ texy, nan jiiby je̱'e̱ kepychim y je̱'e̱ naaxpochtyéxy nandu'un. Je̱'e̱ ooru̶ taazu̶ y je̱'e̱ platu̶ texy mu̶'it je̱'e̱ yajtúñ ko je̱'e̱ kaayu̶ñ uuku̶ñ mu̶jpu̶ ni'ixu̶'u̶y; je̱'e̱ kepychim y je̱'e̱ naaxpochtyéxy oy mu̶naa je̱'e̱ yajtúñ. 21Du'un je̱'e̱ ja'ay ajku̶xy neby je̱'e̱ ooru̶ taazu̶ y je̱'e̱ platu̶ texyu̶ñ ko je̱'e̱ ju̶bu̶kwinma'añ ku̶xyu̶ u̶xmajtzku̶xy y tuungu̶xy je̱'e̱ oywyinma'añ, yajku'umaaygyu̶xu̶p je̱' ma je̱'e̱ Windzú̶n Diosu̶ñ, y wa'adz je̱'e̱ du'umbu̶ ja'ay jyoot wyinma'añ ajku̶xyu̶ñ, y mu̶'it je̱'e̱ oybyu̶ tuung mu̶baad tuungu̶xnu̶.
22Miich u̶xmatz je̱'e̱ tzugajy'ana'ktu̶jk chuwinma'añ ajku̶xy, y tu̶ytyu'uda'agy tzu̶na'a jugy'at, mu̶dat je̱'e̱ mmu̶bu̶jk'ajtu̶ñ ma je̱'e̱ Diosu̶ñ, tzok ju̶wu̶'u̶ je̱'e̱ mjuugy mmu̶gu'ug y tzu̶na'a jugy'at oy yajxón ka'p je̱'e̱ tzip ma'ad maa, tu'ugyu̶ nigu̶xyu̶ pu̶njaty je̱'e̱ Windzú̶n Dios mu̶u̶d je̱'e̱ oyjyoot oywyinma'añ mu̶yaaxp o'owu̶dajtku̶xpu̶ñ. 23Ka'p je̱'e̱ tzip kapxy awa'an gapxy mgweentu̶túñ je̱'e̱ nigoobu̶ kyapxy'aty myu̶dya'agy'áty, miich mnejwu̶u̶by je̱'e̱ du'un ko je̱'e̱ du'umbu̶ tzip kapxy awa'an gapxy tzipkojp ma'adkojp je̱'e̱ je'eyu̶. 24Y tu'ug je̱'e̱ Windzú̶n Dios tyuumbu̶ ka'p je̱'e̱ mu̶baad chiptúñ, ni'igyu̶ je̱'e̱ wan oy ja'ay'áty mu̶u̶d je̱'e̱ ja'ay nigu̶xyu̶ ajku̶xy, y y'ídu̶ch wijy kejy neby mu̶baad yaj'u̶xpú̶kyu̶ñ y mu̶dádu̶ch je̱'e̱ me̱kxtujku̶ñ mu̶u̶d je̱'e̱ myu̶gu'ugtu̶jk ajku̶xy, 25y kapxwiju̶ch mu̶u̶d je̱'e̱ yuungpu̶ naaxypyu̶ jyoot wyinma'añ mu̶dyiibu̶ je̱'e̱ Dios ka'p kapxymyu̶doogu̶xyu̶ñ, wan je̱'e̱ Dios du'un myu̶na'anu̶ch ko jyootwimbijtku̶xu̶ch ma je̱'e̱ju̶ñ y nejwu̶u̶ygyu̶xu̶ch je̱'e̱ tu̶y'ajty. 26Wan je̱'e̱ jyoot wyinma'añ yajmiin yajme̱jtzku̶xu̶ch, y y'awa'adzpu̶dzu̶u̶mgu̶xu̶ch ma je̱'e̱ mu̶jku'u tu̶ yajka'awu̶gu̶xyu̶ñ mu̶dyiibu̶ du'un mu̶dajtu̶gu̶xpu̶ñ tzumy mach y tyuunu̶gu̶xyu̶ neby y'aa jyoot tzokyu̶ñ.
Currently Selected:
2 Timoteo 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005