1 Tesalonicenses 5
5
1“Mu̶gu'uktu̶jk, ka'p jyatytyimchogyii nnijayu̶u̶ygyu̶xu̶ch tii xu̶u̶ tii jumu̶jt je̱'e̱ du'un tyuna'añyii jya'ada'añyiijju̶ñ. 2Miich ajku̶xy, oy yajxón mnejwu̶u̶ygyu̶xy ko je̱'e̱ Windzú̶n Jesús wyimbida'añ ya naaxwiiñ mu̶naa naty ka'p pu̶n tii tajy mayu̶ñ, du'un neby je̱'e̱ me̱e̱tzpu̶ tu'ug koodz jya'adyu̶ñ. 3Ko naty je̱'e̱ ja'ay du'un myu̶naangu̶xy: “Cham janch jootkujk ndzu̶naay njugy'ajtu̶m ajku̶xy y ka'p je̱'e̱ tzip ma'ad maa”, mu̶'it je̱'e̱ ayo'on amoñygyu̶joot myina'añ, du'un neby je̱'e̱ to'oxyu̶jk tzojku̶ pya'ambétyu̶ñ ko naty je̱'e̱ tiempo tu̶ myu̶baad'ajtnu̶ mu̶naa y'ungpada'añu̶ñ y ka'p je̱'e̱ ayo'on mu̶baad ni pu̶n ku'ugue'egy. 4Peru̶ miich mu̶gu'uktu̶jk ajku̶xy, mnejwu̶u̶ygyu̶xypy je̱'e̱ tu̶y'ajt, ka'p miich agoodztuum myajpaatku̶xnu̶, ka'pu̶ je̱'e̱ Windzú̶n Jesús amoñygyu̶joot xyajja'tpe̱jtku̶xu̶ch ko naty wyimbity neby tu'ug me̱e̱tzpu̶ju̶ñ. 5Miich nigu̶xyu̶ miich je̱'e̱ tu̶y'ajt mnejwu̶u̶ygyu̶xy, ka'p agoodztuumb nyajpaatu̶nu̶ ajku̶xy. 6Paady ka'p mu̶baad nnay'u̶xmu̶'o'ku̶mu̶ ajku̶xy neby je̱'e̱ wiingpu̶ ja'ay ajku̶xyu̶ñ, je̱'e̱ mu̶dyiibu̶ je̱'e̱ ayuuk tu̶y'ajt ka'p nejwu̶u̶ygyu̶xyu̶ñ, tzu̶k juugy ijtu̶m ajku̶xy y wijy kejy je̱'e̱ joot winma'añ. 7Je̱'e̱ ja'ay mu̶dyiibu̶ maagu̶xpu̶ñ, koodz je̱'e̱ myaagu̶xy, y je̱'e̱ mu̶dyiibu̶ muuku̶gu̶xpu̶ñ, koodz je̱'e̱ myuuku̶gu̶xy. 8Peru̶ u̶u̶ch ajtu̶m ajku̶xy je̱'e̱ mu̶dyiibu̶ je̱'e̱ tu̶y'ajt nnejwu̶u̶yu̶mbyu̶ñ, mu̶baad wijy kejy n'ijtu̶u̶wu̶m ajku̶xy ma je̱'e̱ joot winma'añdyu̶ñ. Mu̶baad nayñiwaanu̶ma ajku̶xy mu̶u̶d je̱'e̱ mu̶bu̶jk'ajtu̶ñ y je̱'e̱ tzojk'ajtu̶ñ,#5.8 Nije̱' wiingpu̶ versión myu̶na'añ: Du'un neby je̱'e̱ tziptuumbu̶tu̶jk je̱'e̱ pujxk ñiwaanu̶gu̶xyu̶ñ je̱'e̱ mu̶dyiibu̶ kyachkyu̶xy pyu̶daakku̶xypyu̶ñ. y nayñiwaanu̶mu̶ch ajku̶xy du'un neby je̱'e̱ tziptuumbu̶tu̶jk je̱'e̱ pyujxkku'ujúp ñiwaanu̶gu̶xyu̶ñ. Nayñiwaanu̶mu̶ mu̶u̶d je̱'e̱ aanu̶mu̶ ni'idzooku̶ñ, je̱'e̱ mu̶dyiibu̶ nju̶jp'ijxu̶mbyu̶ñ ajku̶xy. 9Je̱' ko ka'p je̱'e̱ Dios je̱'e̱ tzaachpyu̶ tu̶ xyajnibu̶daagu̶u̶yu̶m ajku̶xy, je̱' je̱'e̱ tu̶ xyajnibu̶daagu̶u̶yu̶m ajku̶xy neby je̱'e̱ aanu̶mu̶ ni'idzooku̶ñ mbaattu̶mu̶chu̶ñ ajku̶xy mu̶u̶d je̱'e̱ nWindzú̶n Jesucristo kyu̶xpu̶ ajtu̶m ajku̶xy. 10Je̱'e̱ Jesucristo xyñi'i'o'ktuut ajtu̶m ajku̶xy, neby mu̶baad tu'ugyu̶ njugy'ajtu̶mu̶ñ ajku̶xy wiinu̶u̶xu̶u̶ mu̶u̶d je̱', oy naty nja'ajugy'ajtu̶mbu̶ ajku̶xy y oy naty tu̶ nja'a'o'ku̶mbu̶ ajku̶xy ko naty je̱'e̱ ya naaxwiiñ wyimbity. 11Paady, nayjyootmu̶kmooyu̶gu̶x y naybyube̱jtu̶gu̶x amíñ u̶xyu̶py, du'un neby cham mduungu̶xyu̶ñ.
Pablo je̱'e̱ mu̶bu̶jkpu̶du̶jk kapxwijy
12“Mu̶gu'uktu̶jk, cham nmu̶nukxtaakku̶xy ko windzu̶gu̶u̶ygyu̶x je̱'e̱ mu̶dyiibu̶ jim tuungu̶xpu̶ñ ma miich ajku̶xyu̶ñ y xyajni'ixu̶u̶ygyu̶xpu̶ñ y xy'u̶u̶wij xykyapxwijku̶xpu̶ñ ma je̱'e̱ Windzú̶n Jesucristo y'u̶xpu̶jku̶ñ. 13Mdzojk mba'a''ayoogu̶xu̶py y mdzojk mju̶wu̶u̶ygyu̶xu̶py mu̶k mu̶u̶d je̱'e̱ tuung je̱'e̱ mu̶dyiibu̶ tyuungu̶xypyu̶ñ. Tzu̶naaygyu̶x jugy'ajtku̶x jootkujk nixim niyam.
14Nan nyajni'ipu̶jkku̶xypy mu̶gu'uktu̶jk, ko ojku̶x mu̶gápxku̶x je̱'e̱ mu̶dyiibu̶ ka'p tyunaangu̶xyu̶ñ, jootmu̶kmooygyu̶x je̱'e̱ mu̶dyiibu̶ tu̶ chijpu̶gu̶xnu̶ju̶ñ, pube̱jt pudu̶gu̶u̶ygyu̶x je̱'e̱ mu̶dyiibu̶ je̱'e̱ mu̶bu̶jku̶ñ we̱e̱nu̶ mu̶dajtku̶xpu̶ñ y mu̶me̱kxtujkku̶x nigu̶xyu̶ ajku̶xy.
15Naygyweentu̶'ajtu̶gu̶xu̶ ko ka'p mu̶baad ni pu̶n tii ju̶bu̶k yaj'awimbijtu̶gách ma je̱'e̱ myu̶gu'ugu̶ñ, je̱'e̱ mu̶dyiibu̶ naty tu̶ myu̶duundu̶goyiiju̶ñ. Ni'igu̶ ni'igyu̶ je̱'e̱ oybyu̶ mduungu̶xu̶ch mu̶u̶d je̱' ajku̶xy, du'un ma miich ajku̶xyu̶ñ y ma je̱'e̱ ja'ay ku̶xyu̶ ajku̶xyu̶ñ.
16Jootkujk ijtu̶u̶gu̶x. 17Mu̶bu̶jktzoogu̶x je̱'e̱ Dios ja'anaam ja'atzojk. 18Ye̱jkku̶x je̱'e̱ Dioskujuuyu̶p ma je̱'e̱ Diosu̶ñ oy neby mjajtku̶x m'abe̱jtku̶xu̶ch, je̱' ko du'un je̱'e̱ Dios tzoky mu̶u̶d miich ajku̶xy je̱'e̱ mu̶dyiibu̶ je̱'e̱ Cristo Jesús mu̶bu̶jkku̶xpu̶ñ ko je̱'e̱ Dioskujuuyu̶p mye̱jkku̶xu̶ch ma je̱'e̱ju̶ñ.
19Ka'p je̱'e̱ Dios y'Espíritu tyuung m'adujku̶ ajku̶xy. 20Ka'p je̱'e̱ y'ayuuk m'u̶xtiju̶ ajku̶xy je̱'e̱ mu̶dyiibu̶ je̱'e̱ Dios yajkápxu̶gu̶xpu̶ñ. 21Jaywiin ku̶xyu̶ m'ok'ijxku̶xu̶ch y m'okmu̶daj m'okmu̶maaygyu̶xu̶ch, y chiiju̶tz je̱'e̱ oybyu̶ je'eyu̶ myajwu̶'u̶mgu̶xu̶ch. 22U̶xmajtzku̶x je̱'e̱ ju̶bu̶kpu̶ ku̶xyu̶.
23Wan je̱'e̱ Dios ku̶'u̶m, je̱'e̱ Dios mu̶dyiibu̶ je̱'e̱ jootkujk'ajtu̶ñ ye̱jkpu̶ñ ku̶xyu̶ xyajwaatztaaygyu̶xy wa'adzu̶ wa'adzu̶, y xykyweentu̶'ajtu̶ch je̱'e̱ mjoot mwinma'añ ku̶xyu̶ ajku̶xy, je̱'e̱ mju̶wu̶'u̶ñ ajku̶xy, je̱'e̱ m'aanu̶mu̶ ajku̶xy y je̱'e̱ mni'kx mgopt ajku̶xy, ka'p je̱'e̱ poky ku̶dyeey naty maaju̶ñ, u̶xtu̶ koonu̶ je̱'e̱ nWindzú̶n Jesucristo ajtu̶m ajku̶xy naty ya naaxwiiñ ja'adu'ook wyimbijttu̶gách. 24Je̱'e̱ Dios je̱'e̱ mu̶dyiibu̶ tu̶ xywyin'ijxku̶xyu̶ñ, tu'uda'agy je̱', y kyuydyune̱e̱mby adaa du'un ku̶xyu̶ neby tu̶ myu̶na'añu̶ñ.
Pablo myu̶gu'ugtu̶jk yajpókxu̶ñ y kunukxu̶ñ jak'yajniguéxy
25“Mu̶gu'uktu̶jk, mu̶bu̶jktzoogu̶x je̱'e̱ Dios nandu'un mu̶u̶d u̶u̶ch kyu̶xpu̶ ajku̶xy.
26Ye̱jku̶ygyu̶ch je̱'e̱ nyajpókxu̶ñ ajku̶xy ma je̱'e̱ nmu̶gu'ugtu̶jk ajtu̶m ajku̶xyu̶ñ xi'ig xon; cham mnaymyajtz mnaymyu̶ne̱e̱nu̶gu̶xy.
27Nyajni'ipu̶jkku̶xypy, mu̶u̶d je̱'e̱ Windzú̶n Jesucristo y'ane̱'e̱mu̶ñ ko je̱'e̱ mu̶bu̶jkpu̶du̶jk adayaaba naky wan nigu̶xyu̶ kápxku̶xy.
28Wan je̱'e̱ nWindzú̶n Jesucristo ajtu̶m ajku̶xy oy'ajt may'ajt tuñ ma miich ajku̶xyu̶ñ.
Currently Selected:
1 Tesalonicenses 5: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005