1 Tesalonicenses 4
4
Je̱'e̱ tzu̶naayu̶ñ jugy'ajtu̶ñ mu̶dyiibu̶ je̱'e̱ Dios kyu'umaaybyu̶ñ
1Jada'achám mu̶gu'uktu̶jk, nmu̶nukxtaakku̶xy y nyajni'ipu̶jkku̶xy adaa, mu̶u̶d je̱'e̱ Windzú̶n Jesucristo kyu̶xpu̶: ko oy yajxón jakja'ay'ajtku̶x, du'un neby cham mdzu̶naaygyu̶xy mjugy'ajtku̶xyu̶ñ, du'un neby tu̶ nyaj'u̶xpu̶jkku̶xyu̶ñ ko du'un mguydyuungu̶xu̶ch neby je̱'e̱ Dios du'un ku'umáyu̶chu̶ñ.
2Miich mnejwu̶u̶ygyu̶xypy je̱'e̱ ayuuk je̱'e̱ mu̶dyiibu̶ tu̶ nmooygyu̶xyu̶ñ, je̱'e̱ ane̱'e̱mu̶ñ je̱'e̱ mu̶dyiibu̶ u̶u̶ch je̱'e̱ Windzú̶n Jesús tu̶ xyajni'ipu̶jkku̶xyu̶ñ ko nmooygyu̶xu̶ch. 3Je̱'e̱ mu̶dyiibu̶ je̱'e̱ Dios chojkypyu̶ñ je̱' je̱'e̱ ko mdzu̶naay mjugy'ajtku̶xu̶ch mu̶u̶d je̱'e̱ wa'adzjoot wa'adzwinma'añ ma je̱'e̱ju̶ñ, ko je̱'e̱ to'oxyu̶jktu̶jk ka'p mu̶baad tu'ug tu'ug mmu̶dtuundu̶gooygyu̶xy, 4y ko wan je̱'e̱ ya'aydyu̶jktu̶jk je̱'e̱ tyo'oxyu̶jk nidu'ug nidu'ug oy yajxón mu̶dtzu̶naaygyu̶xy mu̶u̶d je̱'e̱ oyjyoot oywyinma'añ y windzu̶gu̶u̶ygyu̶xu̶ch, 5ka'p nigoo tzojku̶ tzojkku̶xu̶ch y ka'p nijoot'ajtku̶xu̶ch mu̶u̶d je̱'e̱ ju̶bu̶k adzojku̶ñ neby je̱'e̱ ja'ay y'adu̶u̶tzku̶xyu̶ñ je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p nejwu̶u̶ygyu̶xyu̶ñ. 6Ka'p mu̶baad ni pu̶n mu̶dtuundu̶gooyu̶ y win'u̶u̶nu̶ je̱'e̱ myu̶gu'ug tyo'oxyu̶jk, je̱' ko je̱'e̱ Windzú̶n Dios chaachtyuumby je̱'e̱ ja'ay ku̶xyu̶ mu̶k je̱'e̱ mu̶dyiibu̶ du'un adu̶u̶tzku̶xpu̶ñ neby yam tu̶ nnajtzkapxu̶u̶yu̶ ajku̶xyu̶ñ. 7Je̱' ko ka'p je̱'e̱ Dios paady tu̶ xywyin'ijxu̶m ajku̶xy ko ju̶bu̶k axu̶u̶g ndzu̶naay njugy'ajtu̶mu̶ch ajku̶xy, paady je̱'e̱ tu̶ xywyin'ijxu̶m ajku̶xy ko ndzu̶naay njugy'ajtu̶mu̶ch ajku̶xy mu̶u̶d je̱'e̱ wa'adzjoot wa'adzwinma'añ ma je̱'e̱ju̶ñ. 8Y du'unu̶tz, pu̶n adayaaba u̶xpu̶jku̶ñ u̶xtijpu̶ñ, ka'p naty je̱'e̱ ja'ay y'u̶xpu̶jku̶ñ du'un y'u̶xtiju̶py, je̱'e̱ Dios naty y'u̶xpu̶jku̶ñ je̱'e̱ du'un y'u̶xtiju̶py, je̱'e̱ mu̶dyiibu̶ miich tu̶ xymyooygyu̶xyu̶ñ je̱'e̱ y'Espíritu Santo.
9Du'un neby mnaychojk mnayjyu̶wu̶u̶yu̶gu̶xyu̶ñ amíñ u̶xyu̶py agu̶ mu̶gu'uktu̶jk, oy mu̶baad nga'adimyñijayu̶u̶ygyu̶xpu̶, je̱' ko je̱'e̱ Dios du'un ku̶'u̶m tu̶ xyajni'ixu̶u̶ygyu̶xy ko amíñ u̶xyu̶py mnaychojk mnayjyu̶wu̶u̶yu̶gu̶xu̶ch. 10Pues du'un miich myajtu'uyo'oygyu̶xy mu̶u̶d je̱'e̱ mu̶gu'uktu̶jk nigu̶xyu̶ ajku̶xy, je̱'e̱ mu̶dyiibu̶ jim tzu̶naaygyu̶xpu̶ñ ma je̱'e̱ Macedonia naaxjooty kú̶xyu̶ju̶ñ. Peru̶ nmu̶nukxtaakku̶xypy mu̶gu'uktu̶jk, ko ni'igyu̶ mjaknaychojk mjaknayjyu̶wu̶u̶yu̶gu̶xu̶ch. 11Jatytimychu̶naaygyu̶x jootkujk y mu̶jootkugu̶u̶ygyu̶x je̱'e̱ mgu̶'u̶mduung ajku̶xy, cham mduungu̶xy mu̶u̶d je̱'e̱ mgu̶'u̶ mdeky ajku̶xy du'un neby tu̶ nyajni'ipu̶jkku̶xyu̶ñ, 12neby je̱'e̱ ja'ay du'un xywyindzu̶gu̶u̶ygyu̶xu̶chu̶ñ je̱'e̱ mu̶dyiibu̶ je̱'e̱ Dios ka'p mu̶bu̶jkku̶xyu̶ñ y ka'pu̶ nandu'un ni tii xymyayjyajtu̶yu̶ch ajku̶xy.
Ko naty je̱'e̱ Windzú̶n Jesús ja'adu'ook wyimbity ya naaxwiiñ
13“Mu̶gu'uktu̶jk, ka'p u̶u̶ch ndzojkku̶xy nu̶kxy du'uñyu̶ mwu̶'u̶mgu̶xy. Mga'anejwu̶u̶ygyu̶xu̶ch neby je̱'e̱ ja'ay jyajtku̶xyu̶ñ, je̱'e̱ tu̶u̶bu̶ y'o'kku̶xyu̶ñ, ka'pu̶ miich mdajku̶xu̶ch mmaaygyu̶xu̶ch neby je̱'e̱ ja'ay ajku̶xyu̶ñ, je̱'e̱ mu̶dyiibu̶ ka'p mu̶bu̶jkku̶xyu̶ñ ko je̱'e̱ Jesús je̱'e̱ ja'ay ja'adu'ook yajjuugypyu̶ga'añ je̱'e̱ tu̶u̶bu̶ y'o'kku̶xy. 14Du'un neby nmu̶bu̶jku̶m ajku̶xyu̶ñ ko je̱'e̱ Jesús jyuugypyu̶jky ko y'o'ky, du'un nandu'un nmu̶bu̶jku̶m ajku̶xy ko je̱'e̱ Dios yajjuugypyu̶ga'añ je̱'e̱ tu̶u̶bu̶ ja'ay y'o'kku̶xy mu̶u̶d je̱'e̱ Jesús je̱'e̱ mu̶dyiibu̶ naty tu̶ myu̶bu̶jku̶gu̶xyu̶ñ.
15Paady miich du'un nnu̶maaygyu̶xy, neby je̱'e̱ Windzú̶n Jesús y'u̶xpu̶jku̶ñ myu̶na'añu̶ñ, ko u̶u̶ch ajtu̶m ajku̶xy je̱'e̱ mu̶dyiibu̶ naty jakjugy'ajtu̶mb ajku̶xy ko je̱'e̱ Windzú̶n Jesús naty ya naaxwiiñ wyimbity, ka'p njayu̶jp'ajtu̶mu̶ch ajku̶xy; tu'ugmúky je̱'e̱ xyajnú̶kxu̶mu̶ch ajku̶xy mu̶u̶d je̱'e̱ tu̶u̶bu̶ naty y'o'kku̶xy. 16Je̱' ko yajmu̶dowaamb je̱'e̱ ayuuk tu'ug je̱'e̱ mu̶dyiibu̶ je̱'e̱ ane̱'e̱mu̶ñ mu̶k mu̶u̶du̶ñ, je̱'e̱ ángel mu̶jtuungmu̶u̶dpu̶ y'ayuuk y yajmu̶dowa'añ ko naty je̱'e̱ ángel je̱'e̱ Dios tyrompeta yajxuuxu̶yu̶, y mu̶'it je̱'e̱ Windzú̶n Jesús ku̶'u̶m kyu̶da'aga'añ ya naaxwiiñ. Y je̱'e̱ tu̶u̶bu̶ naty y'o'kku̶xnu̶, je̱'e̱ mu̶dyiibu̶ je̱'e̱ Cristo naty mu̶bu̶jkku̶xpu̶ñ, jayu̶jp je̱'e̱ jyuugypyu̶gaangu̶xy, 17mu̶'it u̶u̶ch ajtu̶m ajku̶xy, mu̶dyiijáty naty jakjugy'ajtu̶mb ajku̶xy, kipxy jokjooty xyajnú̶kxu̶mu̶ch ajku̶xy mu̶u̶d je̱'e̱ tu̶u̶bu̶ naty jyuugypyu̶jkku̶xy, neby jiiby poj'agujk naybyaattu̶mu̶chu̶ñ ajku̶xy mu̶u̶d je̱'e̱ Windzú̶n Jesús y du'un jiiby ndzu̶naay njugy'ajtu̶mu̶ch ajku̶xy wiinu̶u̶xu̶u̶ wiinu̶u̶tiempo mu̶u̶d je̱'e̱ Windzú̶n Jesús. 18Nayjyootmu̶kmooyu̶gu̶x amíñ u̶xyu̶py mu̶u̶d adayaaba ayuuk.
Currently Selected:
1 Tesalonicenses 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005